1 कुरिनथियनमन 15 - सादरी नवाँ नियम

मसीह केर जी उठेक

¹ हे बिसवासी भाईमन, मोंय तोहरेमन के ओहे शुभ समाचार के याइद करवावना जेके पहिले सुनाय चुइक हों, जेके तोहरेमन बिसवास हों काइर रहा आउर जेकर में तोहरेमन एखन तक स्थिर हों बनल अहा।

² उकरे से परमेश्‍वर तोहरे के बचायला, अगर तोहरेमन उ शुभ समाचार उपरे लगातार बिसवास करते रहबा, जे मोंय तोहरेमन के सुनाय रहों, निहीं तो तोहर बिसवास करेक बेकार होलक।

³ एहे लगिन मोंय तोहरे के सोउब से खास संदेश के सुनालों, जेके मोंय प्रभु यीशु मसीह से पाय रहों, उ संदेश इ हेके, पवितर किताब केर बचन केर मोताबिक यीशु मसीह हमरे केर पापमन केर खातिर मोइर गेलक,

⁴ आउर गाड़ल गेलक, आउर पवितर किताब केर मोताबिक तीसरा दिन जी हों उठलक।

⁵ आउर पतरस आउर उकर पाछे बारहों चेलामन उके देखलैं।

⁶ फिन पाँच सौ से बगरा बिसवासी भाईमन एके संगे देखलैं, जेमन में से ढेइरमन एखन तक मौजूद अहैं मगर केतना झन मोइर गेलैं।

⁷ फिन याकूब हों देखलक तब सोउब यीशु केर चुनल खास चेलामन देखलैं।

⁸ आउर सोउब केर पाछे उ मोके हों दिस्तार देलक, उ बेरा मोंय अचका प्रभु यीशु केर चुनल खास चेला बनलों, जबकि इकर कोनों उमीद नी रहे, उ छउवा नियर जेकर जनम, जनमेक केर दिन से पहिलेहें होई हे।

⁹ काले कि मोंय यीशु केर चुनल खास चेलामन में सोउब से छोट हेकों, बल्कि चेला कहाएक केर लायक हों नखों, काले कि मोंय परमेश्‍वर केर कलीसिया केर बिसवासीमन के सताय रहों।

¹⁰ मगर मोंय जे कुछ भी अहों परमेश्‍वर केर किरपा से अहों, आउर उकर किरपा मोर उपरे ढेइर बड़का काम करलक, आउर मोंय यीशु केर चुनल दोसर खास चेलामन से बाइढ़ के मेहनइत हों करलों। फिन भी इ मोर बटले निहीं, मगर परमेश्‍वर केर किरपा से होलक जे मोर उपरे रहे।

¹¹ इ लगिन चाहे मोंय, चाहे उमन, हमरे सोउब ओहे मसीह केर संदेश के परचार करिला, आउर इकरे उपरे तोहरेमन बिसवास हों करला।

बिसवासीमन केर जी उठेक

¹² अब मोंय तोहरे से इ पुछोना, काले कि हमरे सोउब तोहरे के इ परचार काइर ही कि मसीह मोरलमन में से जी उठलक, तो तोहर में से केखो इ नी कहेक चाही कि परमेश्‍वर बिसवासीमन के मोरल पाछे नी जियाई!

¹³ अगर मोरलमन के जी उठेक हें नखे, तो मसीह हों नी जी उइठ हे।

¹⁴ आउर अगर मसीह मोरल में से नी जी उइठ हे, तो जे संदेश के हमरे परचार करिला, आउर उकर उपरे तोहरे बिसवास कराला सोउब कुछ बेकार अहे।

¹⁵ अगर मुरदामन नी जी उठैना, तो हमरे इ कइह के परमेश्‍वर केर बारे में झूठ बोइल ही कि परमेश्‍वर मसीह के फिन से जिंदा काइर देई हे, जबकि उ नी जी उइठ हे।

¹⁶ फिन मोंय कहोना, अगर कोनोवें मुरदा नी जी उठी, तो मसीह हों नी जी उइठ हे।

¹⁷ आउर अगर मसीह नी जी उइठ हे, तो तोहर बिसवास करेक बेकार अहे, आउर तोहरेमन एखन तक अपन पापमन में जिंदगी के जियाथा।

¹⁸ बल्कि जेमन मसीह उपरे बिसवास काइर के मोइर हैं, उमन हों सोउब दिन लगिन परमेश्‍वर से अलग होई गेलैं।

¹⁹ अगर मसीह से हमरे सिरिफ एहे जिंदगी भइर ले आसरा करिला, तो हमरे इ दुनिया में सोउब आदमीमन से बगरा अभागा हेकी।

²⁰ मगर सचमुच में परमेश्‍वर मसीह के मोरलमन में से जियाय हे, आउर जेमन मोइर जाय हैं उमन में मसीह पहिला आदमी हेके जे जी उइठ हे।

^21-22 काले कि जब एक आदमी आदम केर पाप केर चलते माउत आलक, आउर सोउब आदमीमन मोरैना, तो एहे नियर एक आदमी मसीह केर काममन केर चलते मोरलमन केर जी उठेक हों आलक, एक दिन सोउब मोरल आदमीमन फिन से जी उठबैं।

²³ मगर हरेक झन अपन-अपन पारी केर मोताबिक जी उठबैं, सोउब से पहिले मसीह जी उठलक, फिन जब मसीह घूइर आवी तब उ सोउब आदमीमन फिन से जी उठबैं, जेमन केर रिश्ता यीशु मसीह केर संगे गहरा अहे।

²⁴ इकर पाछे मसीह सोउब शक्ति आउर ताकतमन के नाश काइर देवी, आउर दुनिया केर अंत आय जाई, आउर मसीह राइज के परमेश्‍वर आबा केर हाँथ में सोंइप देवी।

²⁵ काले कि जब तक परमेश्‍वर अपन बैरीमन के पूरा-पुरी हरुवाय नी देवी, तब तक मसीह के राइज करेक जरुरी अहे।

²⁶ सोउब से आखरी बैरी जे सत्यानाश करल जाई उ माउत हेके।

²⁷ पवितर किताब में भजन के लिखेक वाला लीख हे कि परमेश्‍वर सोउब कुछ के मसीह केर अधिकार केर नीचे काइर देवी, तो इ साफ अहे कि परमेश्‍वर जे मसीह के अधिकार देई हे, उ खुद अधिकार केर नीचे नखे।

²⁸ जब सोउब चीजमन (मसीह) बेटा केर अधिकार में अहे, तो बेटा हों खुद के परमेश्‍वर केर अधिकार केर नीचे सोंइप देवी, मतलब परमेश्‍वर, जे सोउब कुछ के मसीह केर अधिकार में काइर देई हे, ताकि सोउब जगा आउर सोउब कुछ में परमेश्‍वर सोउब से उपरे रहोक।

²⁹ अगर मोरलमन फिन से जिंदा नी होबैं, तो थोरेक आदमीमन मोरल आदमीमन केर बदली में बपतिस्मा जल संस्कार लेवैना, इ रीति केर का फायदा होवी?

³⁰ आउर हमरे लगिन हों, अगर मुरदामन नी जी उठैना, तो खुद के खतरा में रखेक मूरखता हेके।

³¹ हे बिसवासी भाईमन, जइसन इ पक्का अहे कि मोंय तोहरे उपरे घमंड करोना, काले कि तोहरेमन हमर प्रभु यीशु मसीह केर संगे एक अहा, आउर एहो पक्का अहे कि मोंय रोज दिन माउत केर खतरा में जिंदगी बिताथों।

³² मोंय इफिसुस शहर में भारी कठिनाई में से होई के गुजरलों, काले कि जेमन मोर बिरोध करैना उमन भयानक जानवरमन नियर अहैं। आदमीमन केर बिचार केर मोताबिक मोके उ कठिनाईमन से का मिललक? बिलकुल कोनोवें निहीं। से लगिन अगर इ सच अहे कि मुरदामन फिन से नी जी उठबैं, तो आदमीमन केर कहल नियर चलेक भला होवी, जइसन कि उमन कहैना, “आवा खाब-पियब काले कि अगर काइल मोइर जाब तो सोउब कुछ सिराय जाई।”

³³ जे केऊ एइसन कहैना उमन से धोखा ना खावा, “बुरा संगति अच्छा चरितर के बिगड़ाय देवेला।”

³⁴ होस में आवा, अच्छा जिंदगी के अपनावा, जइसन कि तोहरे के होवेक चाही। पाप करेक छोइड़ देवा, काले कि तोहर में से थोरेक आदमीमन एइसन अहैं, जेमन परमेश्‍वर केर बारे में कोनों नी जानैना। एइसन मोंय इ लगिन कहाथों ताकि तोहरेमन के लाज होवोक।

जी उठल पाछे केर काया

³⁵ अब तोहर में से केऊ कही कि कैसे परमेश्‍वर मुरदामन के जियाई, आउर कइसन काया केर संगे जी उठबैं?

³⁶ हे निरबुद्धियामन! जे कोनों तोहरे बुनाला उ जब तक आँउख होई के मोइर नी जायला, तब तक नी जियेला।

³⁷ आउर जहाँ तक तोहरे जे बुनाला, उ बुनल बिहीन ओंकइर के बुदा बाइन जायला, तोहरेमन उ बढ़ल बुदा के तो नी बुइन रहा। सिरिफ बिहीन के बुइन रहा, चाहे गोहोम केर बिहीन हो चाहे कोनों आउर केर बिहीन।

³⁸ आउर बुनल पाछे परमेश्‍वर अपन इच्छा केर मोताबिक उके बढ़ायला, हरेक बिहीन जइसन उकर बुदा होवेला तइसनेहें बढ़ेला।

³⁹ सोउब केर काया एके नियर नखे, आदमीमन केर काया अलगे अहे, जानवरमन केर काया अलगे अहे, एहे नियर चरईमन केर आउर मछरीमन केर काया हों अलगे अहे।

⁴⁰ आउर जे नियर धरती केर चीजमन अलग-अलग अहे, सेहे नियर आकाश केर चीज बेइर, चाँद आउर तइरगनमन हों अलग-अलग अहे। आकाश केर चीजमन केर शोभा अलगे अहे, तो धरती केर चीजमन केर शोभा हों अलगे अहे।

⁴¹ बेइर केर शोभा अलग अहे, चाँद केर शोभा हों अलग अहे, (काले कि एक तइरगन से दोसर तइरगन केर शोभा में फरक अहे)।

⁴² एहे नियर मुरदामन केर फिन से जी उठेक हों अहे। जे काया के दफनाय देवैना उ काया साइड़ जायला, मगर जे काया जी उठेला उ कहियो नी सड़ी।

⁴³ जब हमरे केर काया मोइर जायला तो उ भद्दा आउर कमजोर रहेला, मगर जब उ जी जायला तो सुंदर आउर शक्तिशाली रहेला।

⁴⁴ एगो आदमी केर काया जे दफनाल जायला, उ सिरिफ इ दुनिया केर जिंदगी लगिन अहे, मगर जब परमेश्‍वर उके फिन से जिंदा करेला, तो उ स्वरग केर जिंदगी केर लायक होवेला, अगर एक किसिम केर काया सिरिफ इ दुनिया में रहेक लगिन अहे, तो एगो स्वरग में रहेक लायक काया हों अहे।

⁴⁵ एइसनेहें पवितर किताब में हों लिखल अहे कि पहिला आदमी, मतलब आदम, जिंदा प्राणी बनलक आउर आखरी आदम, मतलब मसीह जुग-जुग केर जिंदगी देवेक वाला आत्मा बनलक।

⁴⁶ हमरे ठिना पहिले इ दुनिया केर काया होवेक चाही, फिन स्वरगीय काया देवल जायला।

⁴⁷ पहिला आदमी धरती से मतलब माटी से बनल रहे, दूसरा आदमी मसीह, जे दूसरा आदम हेके स्वरग से आलक।

⁴⁸ जे आदमीमन इ धरती केर हेकैं, उमन धरती केर पहिला आदमी आदम नियर अहैं, मगर जे आदमीमन स्वरग केर हेकैं, उमन स्वरग केर आदमी मसीह नियर अहैं।

⁴⁹ हमरे सोउब केर ठिना आदम केर रूप अहे जे माटी से बनाल जाय रहे, एहे नियर एक दिन हमरे ठिना मसीह केर रूप होवी, जे स्वरग से आय हे।

⁵⁰ हे बिसवासी भाईमन, इ धरती केर हमर काया माँस आउर लोहू से बनाल जाय हे, हमरे इ कायामन केर संगे जे मोरेक वाला हेके, परमेश्‍वर केर राइज स्वरग में रहेक नी पारब, काले कि हूवाँ मोरेक नखे।

^51-52 इ सच्चा भेद केर गोइठ के सुना, हमरे सोउब नी मोरब, मगर जब आखरी तुरही बाजेक केर आवाज सुनाई देई, तब हमरे सोउब तुरते आँइख मिटकाते हें बदइल जाब। काले कि तुरही बाजेक केर आवाज सुनाई देई आउर मोरलमन जी उठबैं, आउर कहियो नी मोरबैं, आउर हमरे सोउब बदइल जाब।

⁵³ काले कि हमरे केर इ काया आसानी से मोइर जायला आउर साइड़ जायला, सेले इके उ काया में बदइल जाएक जरुरी अहे, जे कहियो नी मोरेला आउर ना सड़ेला।

⁵⁴ आउर जब एइसन होवी, तब पवितर किताब में लिखल परमेश्‍वर केर बचन पूरा होवी, जे कहेला, “माउत पूरा-पुरी हाइर जाई, आउर आगे फिन माउत नी रही।

⁵⁵ हे माउत तोर जीत अब कहाँ अहे? हे माउत तोर बिष अब कहाँ अहे?”

⁵⁶ माउत केर बिष पाप हेके, आउर पाप केर शक्ति मूसा केर नियम हेके।

⁵⁷ मगर परमेश्‍वर केर धन्यबाद होवोक, काले कि हमर प्रभु यीशु मसीह केर उ काम केर चलते, जेके उ हमर लगिन काइर हे, हमरे के मोरेक से डराएक केर जरुरत नखे, काले कि उ हमरे केर पाप के उठाय लेलक।

⁵⁸ से लगिन हे मोर दुलार बिसवासी भाईमन, बिसवास में स्थिर बनल रहा आउर झूठा शिक्षामन केर चलते प्रभु से दूर ना होवा, आउर प्रभु केर काम में हमेशा बढ़ते जावा, काले कि तोहरे इ जानाला कि जे कोनों तोहरे प्रभु लगिन कराथा, उ बेकार नी होवी मगर उकर इनाम मिली।