1 कुरिनथियनमन 13 - सादरी नवाँ नियम

प्रेम सोउब से खास चीज हेके

¹ अगर मोंय आदमीमन आउर स्वरगदूतमन केर भाषामन के गोठियामूँ, आउर दोसरमन के प्रेम नी करमूँ, तो मोर गोइठ जोर से बाजेक वाला घंटा नियर या झुनझुनी झाँझ केर आवाज नियर कोनों मतलब नी होवी।

² आउर अगर मोंय परमेश्‍वर केर संदेश के परचार करमूँ, आउर सोउब भेदमन आउर सोउब रकम केर गेयान के समझमूँ, आउर मोर ठिना परमेश्‍वर उपरे एतना मजबूत बिसवास अहे कि मोंय पहारमन के हों हटाएक पारमूँ, मगर प्रेम नी करमूँ, तो बिलकुल मोर कोनों कीमत नखे।

³ आउर अगर मोंय अपन पूरा सम्पति के गरीबमन के खियाएक लगिन देई देमूँ, या हिंयाँ तक कि मोंय अपन काया के जलाय लगिन देई देमूँ, आउर प्रेम नी करमूँ, तो मोर लगिन कोनोवें फायदा नखे।

⁴ जेमन प्रेम करैना उमन सहेक वाला होवैना, आउर उमन दया करैना, उमन हिसिंगा नी करैना, उमन अपन बारे में बड़ाई नी करैना, आउर घमंड नी करैना।

⁵ प्रेम करेक वालामन अनुचित ब्यवहार नी करैना, आउर उमन स्वार्थी नी होवैना, उमन तुरते नी खिसायना, आउर अपन बिरोध में करल काम के याइद नी करैना।

⁶ जब आदमीमन बुरा काममन के करैना, तब उमन खुश नी होवैना, मगर जब आदमीमन सच्चा आउर भला काममन के करैना, तब उमन खुश होवैना।

⁷ प्रेम करेक वाला आदमीमन सोउब गोइठमन के साइह लेवैना, उमन हर स्थिति में परमेश्‍वर उपरे बिसवास करेक नी छोड़ैना, आउर उमन बिसवास केर संगे परमेश्‍वर उपरे आसरा करैना, उमन दुःख तकलीफ के हों साइह के स्थिर बनल रहैना।

⁸ उ समय आवी जब आदमीमन परमेश्‍वर केर बचन के आउर परचार नी करबैं आउर दोसर-दोसर भाषा में हों नी गोठियाबैं, आउर परमेश्‍वर केर बारे में गहरा गेयान केर जरुरत आगे नी होवी, मगर प्रेम जुग-जुग लगिन बनल रही।

^9-10 काले कि हमर गेयान केर बरदान आउर परमेश्‍वर केर संदेश के परचार करेक केर शक्ति अधूरा अहे, मगर जब भरपूरी आउर सिद्ध आवी, तब जे सिद्ध नखे उकर आगे जरुरत नी होवी।

¹¹ जब मोंय एगो छउवा रहों, तब मोर बिचार आउर तर्क छउवामन नियर रहे, मगर जब हमरे बाइढ़ गेली, तो छउवामन केर नियर बिचार के छोइड़ देली।

¹² एखन तो हमरे के सोउब गोइठमन एइसन लगेला, जइसन कि हमरे एगो आयना में धुंधरा-धुंधरा देखिला सिरिफ आवेक वाला दिनमन में हमरे सचमुच में सोउब कुछ के समझेक पारब, काले कि हमरे परमेश्‍वर के आमने सामने देखब। एखन मोर गेयान अधूरा अहे, सिरिफ आवेक वाला दिनमन में, मोंय उके सचमुच में जानमूँ, जइसन परमेश्‍वर हों मोके जानेला।

¹³ तो हमर परमेश्‍वर में बिसवास आउर आसरा, आउर हमर परमेश्‍वर लगिन प्रेम आउर हमर संगी बिसवासीमन लगिन प्रेम, इ तीनों सोउब दिन ले बनल रही, मगर इमन में से सोउब से बढ़ियाँ प्रेम हेके।।