1 कुरिनथियनमन 10 - सादरी नवाँ नियम

इसराइलीमन केर इतिहास से चेतावनी

¹ हे बिसवासी भाईमन, मोंय चाहोना तोहरेमन इ गोइठमन के याइद करा कि ढेइर समय पहिले हमर पुरखामन केर संगे बान माझे का होई रहे। परमेश्‍वर एगो बदरी के भेइज के उ सोउबमन केर अगुवाई करलक, जे उमन केर संगे आगे-आगे गेलक, आउर परमेश्‍वर उ सोउबमन के लाल समुदर केर पानी माझे चलुवाय के आउर बचाय लानलक जइसन कि सुखल भूंई में चलैना।

² आउर चिन्हा केर रूप में माइन लेवा कि उमन सोउब बदरी केर नीचे आउर समुदर में बपतिस्मा जल संस्कार लेलैं, इ एगो चिन्हा रहे कि उमन मूसा केर चेला रहैं।

³ आउर उमन सोउब उ रोटी के खालैं जेके परमेश्‍वर स्वरग से उमन के देई रहे।

⁴ आउर उमन सोउब उ पानी के पिलैं, जेके परमेश्‍वर उमन के चट्टाइन में से देई रहे। आउर जे उमन के चट्टाइन में से पानी देई रहे, उ उमन केर संगे-संगे गेलक, उ मसीह हेके।

⁵ मगर परमेश्‍वर उमन में से ढेइरमन से खुश नी होलक, इ लगिन उमन सुनसान ठाँव में मोइर गेलैं।

⁶ इ गोइठमन हमर लगिन चेतावनी ठहरलक कि जइसन उमन लोभ करलैं, तइसनेहें हमरे के बुरा चीजमन केर लोभ करेक नी चाही।

⁷ आउर ना तोहरेमन मूर्ति पूजा करा, जइसन कि उमन में से ढेइरमन करलैं, जइसन कि पवितर किताब में लिखल अहे, “आदमीमन खाएक-पियेक लगिन बइठलैं, आउर उइठ के नाचेक-डेगेक लगलैं।”

⁸ आउर ना हमरे के ब्यभिचार करेक चाही, जइसन उमन में से ढेइरमन करलैं, आउर एक दिन में तईस हजार आदमीमन मोइर गेलैं।

⁹ आउर ना हमरे के मसीह के परखेक चाही, जइसन उमन में से ढेइरमन परखलैं, आउर साँपमन केर द्वारा नाश करल गेलैं।

¹⁰ आउर ना तोहरेमन कुड़कुड़ावा, जइसन उमन में से ढेइरमन कुड़कुड़ालैं, आउर स्वरग दूतमन केर द्वारा जेमन के परमेश्‍वर नाश करेक लगिन भेइज रहे, नाश करल गेलैं।

¹¹ मगर इ सोउब गोइठमन जे उमन उपरे पड़लक, चेतावनी नियर रहे, आउर इ हमर चेतावनी लगिन पवितर किताब में लिखल जाय हे, जे दुनिया केर आखरी समय में रहिला।

¹² इ लगिन जे समझेला कि मोंय अपन बिसवास में ठीक अहों, उ सावधान रहोक, ताकि कहीं ओहे पापमन में गिर ना जाओक।

¹³ तोहरेमन कोनों एइसन परीक्षा में नी पाइड़ हा, जे आदमी केर सहेक से बाहर अहे। आउर परमेश्‍वर बिसवास लायक अहे, उ तोहरेमन के सहेक से बाहर परीक्षा में पड़ेक नी देवी, बल्कि परीक्षा से बचेक में मदइत करी।

मूर्ति पूजा केर बिरोध में चेतावनी

¹⁴ इकर चलते हे मोर दुलार बिसवासी भाई बहिनमन, मूर्ति पूजा करेक से बाइच के रहबा।

¹⁵ मोंय बुद्धिमान जाइन के तोहरेमन से कहोना, जे मोंय हिंयाँ कहोना उकर बारे में तोहरेमन सोचा कि उ सचमुच ठीक अहे कि निहीं।

¹⁶ जब हमरे प्रभु भोज में (अंगूर केर रस) के कटोरा में से पियिला, आउर जेकर लगिन हमरे परमेश्‍वर के धन्यबाद देवीला, तो हमरे सचमुच में मसीह केर लोहू में हिस्सेदार होविला, आउर जब हमरे रोटी के टुकरिला आउर उके खाइला, तो हमरे सचमुच में मसीह केर काया में हिस्सेदार होविला।

¹⁷ काले कि एके गो रोटी अहे जे मसीह हेके, जबकि हमरे ढेइर अही, तो हमरे एके गो काया बाइन जाइला काले कि हमरे सोउब ओहे एके गो रोटी के खाइला।

¹⁸ जब सोउब इसराइली आदमीमन परमेश्‍वर के चढ़ाल चीजमन के खायना, तो उमन परमेश्‍वर केर आराधना में शामिल होवैना। एहे नियर जे आदमीमन मूर्तिमन लगिन बलिदान चढ़ाल चीजमन के खायना, तो उमन उ मूर्तिमन केर पूजा में शामिल होवैना।

¹⁹ मोंय इ नी कहाथों कि मूर्ति लगिन बलि चढ़ाल केर कोनों कीमत अहे आउर मूर्ति कोनों खास चीज हेके, जे मोंय कहेक चाहाथों उ इ हेके कि

²⁰ परजाइतमन जे बलिदान चढ़ायना, तो उमन परमेश्‍वर लगिन निहीं, मगर भूतमन लगिन बलिदान चढ़ायना, आउर मोंय नी चाहोना कि तोहरेमन भूतमन केर हिस्सेदार होवा।

²¹ तोहरेमन लगिन इ ठीक नखे कि भूतमन लगिन चढ़ाल चीजमन के खाएक आउर पियेक में शामिल होबा, आउर साथ ही साथ प्रभु केर भोज में हों शामिल होबा, जे हमरे के प्रभु केर माउत के याइद करुवायला।

²² अगर तोहरे एइसन कराला, तो परमेश्‍वर तोहरेमन से पक्का खिसाय जाई, इके याइद करा कि तोहरेमन परमेश्‍वर से बगरा शक्तिशाली नखा।

सोउब कुछ परमेश्‍वर केर महिमा लगिन अहे

²³ हमरे सोउब कुछ करेक लगिन आजाद तो अही, मगर हमरे लगिन सोउब कुछ बेस ना लगे। हमरे सोउब कुछ करेक लगिन आजाद तो अही, मगर सोउब कुछ हमरे के परमेश्‍वर उपरे बिसवास में मजबूत नी करेला।

²⁴ केऊ अपनेहें भलाई के ना चाहबा, मगर दोसरमन केर हों भलाई चाहबा।

²⁵ तोहरेमन कोनोवें माँस जे बजार में बेचायला उके खाएक पारबा, मूर्तिमन लगिन चढ़ाल हेके कि निहीं सेके ना पूछबा, तब तोहरे केर बिवेक परेशान नी होवी।

²⁶ तोहरे सोउब के खाएक पाराला काले कि पवितर किताब में लिखल अहे “धरती आउर जे कोनों उकर में अहे सोउब कुछ प्रभु केर हेके।”

²⁷ अगर अबिसवासीमन में से केऊ तोहरेमन के नेवता देवी आउर तोहरेमन जाएक चाहबा, तो जे कोनों तोहर सामने रखल जाई उखे खाबा, आउर मूर्तिमन लगिन चढ़ाल हेके कि निहीं सेके ना पूछबा, तब तोहरे केर बिवेक परेशान नी होवी।

^28-29 मगर, अगर केऊ तोहरेमन से कही, इ तो मूर्तिमन लगिन बलि चढ़ाल चीज हेके, तो उके ना खाबा, तोहरे केर बिवेक केर चलते निहीं मगर बताएक वाला केर बिवेक केर चलते। काले कि तोहरे केर आजादी दोसरमन केर बिवेक से ना चलाल जाओक।

³⁰ अगर मोंय मूर्तिमन लगिन चढ़ाल चीजमन के धन्यबाद देई के खावना, तो जेकर लगिन मोंय धन्यबाद देवोना उकर चलते मोर उपरे काले दोष लगाल जायला?

³¹ मोंय तोहरेमन से कहोना कि चाहे खावा, चाहे पिया, चाहे जे कोनों करा सोउब कुछ परमेश्‍वर केर महिमा लगिन करा।

³² तोहरेमन ना यूनानी आदमीमन केर लगिन, ना यहूदीमन केर लगिन आउर ना परमेश्‍वर केर कलीसिया लगिन ठोकर केर कारण बना।

³³ जइसन कि मोंय हों सोउब गोइठमन में सोउब केऊ के खुश रखेक केर कोशिश करोना, आउर अपन भलाई करेक केर कोशिश नी करोना, मगर बगरा से बगरा आदमीमन केर भलाई चाहोना ताकि उमन बाइच जबैं।