1 कुरिनथियनमन 1 - सादरी नवाँ नियम

जोहार

¹ इ चिट्ठी के मोंय पौलुस लिखाथों, मोंय परमेश्‍वर केर इच्छा से यीशु मसीह केर चुनल खास चेला बनेक लगिन बोलाल जाय हों, मोंय हिंयाँ हमर संगी बिसवासी भाई सोस्थिनेस केर संगे अहों जे मोर मदइत कराथे।

² इ चिट्ठी के हमरे परमेश्‍वर केर उ कलीसिया केर नाँव में लिखाथी, जे कुरिन्थुस शहर में अहे, जहाँ केर बिसवासीमन के परमेश्‍वर यीशु मसीह केर द्वारा अपन आदमी केर रूप में अलग काइर हे आउर अपन पवितर आदमी बनेक लगिन बोलाय हे, जे नियर कि परमेश्‍वर उ सोउबमन के चुइन हे, जेमन सोउब ठाँव में हमर प्रभु यीशु मसीह केर सेवा करैना, काले कि उ हमरे सोउब केर प्रभु हेके।

³ मोंय प्रार्थना करोना कि परमेश्‍वर हमर आबा आउर प्रभु यीशु मसीह तोहरे उपरे किरपा करोक आउर शांति देवोक।

मसीह में आशीषमन

⁴ मोंय तोहर बारे में अपन परमेश्‍वर के सोउब बेरा धन्यबाद देवोना, काले कि यीशु मसीह में एक होवेक केर चलते परमेश्‍वर अपन किरपा से तोहरेमन के ढेइर आशीषमन के देई हे।

⁵ यीशु मसीह में एक होवेक केर चलते परमेश्‍वर तोहरेमन के जे कोनों जरुरत अहे, सोउब कुछ भरपूरी से देई हे। उ दोसरमन के अपन संदेश के बताएक लगिन तोहरेमन के पवितर आत्मा केर सोउब रकम केर बरदानमन के आउर अपन बचन केर बारे में गेयान के देई हे।

⁶ जेकर से परमेश्‍वर तोहरेमन में इ साबित काइर हे कि यीशु मसीह केर बारे में जे संदेश अहे उ सच्चा हेके।

⁷ इकर चलते एखन जब तोहरेमन हमर प्रभु यीशु मसीह के इ धरती में घूइर आवेक केर आसरा देखाथा, तो तोहरे ठिना सोउब आत्मिक बरदान अहे, जेकर तोहरेमन के जरुरत अहे।

⁸ परमेश्‍वर तोहरेमन के आखरी तक बिसवास में मजबूत हों करी, ताकि तोहरेमन उ दिन तक निरदोष रहबा, जब हमर प्रभु यीशु मसीह इ धरती में फिन से घूइर आवी।

⁹ परमेश्‍वर सच्चा अहे, जे तोहरेमन के अपन बेटा हमर प्रभु यीशु मसीह केर संगति में बोलाय हे।

कलीसिया में फूट

¹⁰ हे बिसवासी भाईमन, मोंय हमर प्रभु यीशु मसीह केर अधिकार से तोहरेमन से हाँथ जोइर के अरजी करोना कि तोहरे सोउब एक दोसर केर गोइठ के माना, आउर तोहर माझे फूट ना होवोक मगर एक हें मन आउर एक हें बिचार काइर के मिल के रहा।

¹¹ काले कि हे मोर बिसवासी भाईमन, खलोय केर परिवार केर आदमीमन, मोके तोहर बारे में बताय हैं कि तोहरेमन में झगरा होवाथे।

¹² मोर कहेक केर मतलब इ हेके कि तोहर में से केऊ तो खुद के “पौलुस केर,” केऊ “अपुल्लोस केर,” केऊ “पतरस केर,” आउर केऊ “मसीह केर” कहेला।

¹³ “जे तोहरेमन कराथा इ ठीक नखे,” का तोहरेमन लगिन इ ठीक अहे कि मसीह के एइसन बाँइट देबा? का मोंय पौलुस तोहरे केर पाप केर दाम चुकाएक लगिन क्रूस उपरे जान देई हों? या का तोहरे मोर चेला बनेक लगिन बपतिस्मा जल संस्कार लेई हा?

¹⁴ मोंय परमेश्‍वर के धन्यबाद देवोना कि क्रिस्पुस आउर गयुस के छोइड़ आउर केखो बपतिस्मा जल संस्कार नी देई हों।

¹⁵ कहीं केऊ एइसन ना कहोक कि मोके तोर चेला बनेक लगिन बपतिस्मा जल संस्कार मिल हे।

¹⁶ अरे हाँ, एखन मोंय याइद करलों, मोंय स्तिफनास केर परिवार के हों बपतिस्मा जल संस्कार देई हों, इमन के छोइड़ मोंय नी जानोना कि केखो आउर बपतिस्मा जल संस्कार देई हों।

¹⁷ काले कि मसीह मोके बपतिस्मा जल संस्कार देवेक लगिन निहीं, बल्कि शुभ समाचार सुनाएक लगिन भेइज हे, आउर जब मोंय शुभ समाचार परचार करलों, तो परचार करेक में अपन हुनर केर इस्तेमाल नी करलों, निहीं तो आदमीमन मोर हुनर केर चलते मोर उपरे बिसवास करतैं, आउर क्रूस उपरे यीशु मसीह केर माउत केर शक्ति के नी जानतैं।

मसीह परमेश्‍वर केर गेयान आउर शक्ति हेके

¹⁸ काले कि जे आदमीमन दंड पावेक लगिन परमेश्‍वर से अलग होई जाय हैं, उमन सोचैना कि क्रूस उपरे यीशु मसीह केर माउत बेकार अहे, मगर हमरेमन लगिन जेमन उ संदेश उपरे बिसवास काइर ही, इ परमेश्‍वर केर शक्ति से आदमीमन के बचाएक लगिन परमेश्‍वर केर डहर हेके।

¹⁹ काले कि पवितर किताब में लिखल अहे परमेश्‍वर कहेला, “मोंय देखामूँ कि आदमीमन केर बिचारमन जेके दुनिया केर आदमीमन सोचैना कि गेयान हेके, उ सचमुच में बेकार आउर मूरख बिचारमन हेके, मोंय साबित करमूँ कि उमन सचमुच में गेयानवान ना लगैं।”

²⁰ तो हमरे गेयानवान आदमीमन केर बारे में का कहब? हमरे यहूदी नियम केर जानकार आदमीमन केर बारे में का कहब? हमरे इ दुनिया केर आदमीमन केर बारे में का कहब जेमन गोठियाएक में चलाँक अहैं? परमेश्‍वर उ सोउबमन के मूरख बनाय देई हे आउर उमन केर गेयान के बेकार काइर देई हे।

²¹ काले कि परमेश्‍वर अपन गेयान से पहिलेहें देइख हे कि दुनिया केर आदमीमन उके अपन गेयान से कहियो नी जानबैं, परमेश्‍वर बिसवास करेक वालामन के बचाएक लगिन हमर शुभ समाचार परचार के इस्तेमाल करलक, जबकि थोरेक आदमीमन इके बेकार गोइठ मतलब मूरख आदमी केर गोइठ समझैना।

²² इ शुभ समाचार केर गोइठ यहूदीमन लगिन मूरख आदमी केर गोइठ नियर लगेला, काले कि उमन इके सच्चा साबित करेक लगिन स्वरग से चमत्कार केर चिन्हा देखेक चाहैना, आउर यूनानी आदमीमन हों गेयान के खोजैना।

²³ मगर हमरे तो परचार करिला कि यीशु मसीह हमरे के पापमन से छोड़ाएक लगिन क्रूस उपरे अपन जान देलक, जे यहूदीमन केर भीरे ठोकर केर कारण, आउर परजाइत आदमीमन केर भीरे मूरख आदमी केर गोइठ हेके।

²⁴ मगर जेमन के परमेश्‍वर अपन आदमी बनेक लगिन बोलाय हे, यहूदीमन, चाहे यूनानी आदमीमन, उमन केर भीरे एहे मसीह परमेश्‍वर केर शक्ति आउर परमेश्‍वर केर गेयान हेके।

²⁵ काले कि परमेश्‍वर केर मूरख योजना में, गेयानवान आदमी केर योजना से बगरा गेयान अहे, आउर परमेश्‍वर केर कमजोरी में, ताकतवर आदमी केर ताकत से बगरा ताकत अहे।

²⁶ हे बिसवासी भाईमन, जब परमेश्‍वर तोहरे के यीशु मसीह केर पिछे चलेक लगिन बोलाय रहे, तब तोहरे केर दशा कइसन रहे सेके सोचा। आदमीमन केर बिचार से तोहर में से ढेइरमन गेयानवान नी रहा, आउर ना ढेइरमन अगुवा रहा, आउर तोहर में से ढेइरमन केर पुरखामन खास नी रहैं।

²⁷ मगर परमेश्‍वर गेयानवानमन के लाजिम खियाएक लगिन दुनिया केर अगेयानीमन के चुइन लेई हे, आउर परमेश्‍वर शक्तिशालीमन के लाजिम खियाएक लगिन दुनिया केर देखेक में कमजोरमन के चुइन लेई हे।

²⁸ आउर परमेश्‍वर दुनिया केर नीचमन के, तुच्छमन के, आउर जेमन कोनोवें ना लगैं सेमन के चुइन लेई हे, ताकि जेमन अपने के खास समझैना उमन के बेकार ठहराओक।

²⁹ परमेश्‍वर एइसन करलक ताकि केऊ आदमी परमेश्‍वर केर भीरे घमंड करेक नी पारबैं।

³⁰ मगर परमेश्‍वर तोहरे के यीशु मसीह में एक काइर हे, जेकर से उ हमरे के अपन गेयान देई हे। आउर परमेश्‍वर हमरे के अपन देखेक में धरमी हों बनायला, यीशु मसीह केर चलते हमरे पवितर बनाल जाय ही आउर यीशु मसीह हमरे के पाप से छुटकारा देई हे।

³¹ काले कि मसीह हमरे केर सोउब कुछ हेके, से लगिन जइसन पवितर किताब में लिखल अहे तइसनेहें करा, परमेश्‍वर हमर लगिन जे काम काइर हे उकरे उपरे घमंड करा।