Zozoe 8 - LAWA A BOO SONBORE

Ayii kiwi yu

¹ Dɛnaa Lawa pɛ Zozoe ne: «N baran nyɛ́ɛ baa wa, n foo baran biɛ na wa. Zia-baali zaman lɛ tumaa bii n nə ǹ kaa kun ka n din ni, n yoo n wo Ayii minin lɛn gialaa. Á ke, má Ayii kiwi a kii kɛ wɔ n gɔn, a zaman nɛ, kiwi lɛ din ni, ka a bǎã tumaa nɛ.

² N sii mɛn zɛnaa Zerikoo kiwi laanka a kii ni, n die n bɛ lɛ miã zɛnaa Ayii kiwi dɔ laanka a kii ni. Sɛnɛ, ka die ka ǹ mànan laanka ǹ tɔɔn goa, ka dinin wɔ lɛa. N minin kɔnɔn duru, bɛn die ǹ yɔ bɔ kiwi lɛ ganaa a kio wɔlɔ li.»

³ Bɛ kio, Zozoe yoo kun ka a zia-baalin lɛn tumaa nɛ, á woo Ayii gialaa. Á min duu pɔsɔɔ bɔ, zia-baali foo taãnaan lɛa, á ǹ dia tèlò basa li.

⁴ Ǹ laan bɛ̀ maǹ woe, á n gɔn waa ǹ nɛ á pɛ ǹ nɛ kɛnɛn: «Haya! Bɛ̀ ka dɔ, ka n duru kiwi lɛ kio, ka yɔ bɔ a ganaa. Ka baran n wɔlɔ lui kiwi lɛ ganaa a la yii-n wa. Sɛnɛ, ka tumaa nə n yɔrɔ bɔ!

⁵ Ma din laanka zaman mɛn tumaa á ke kun, wɔsɛn tá re n zoɛ̃ wɔ n mɔrɔ kiwi lɛ ganaa. Bɛ̀ ǹ nə́ soo mà maǹ die wɔsɛn gialaa ka bibinaa wɔ lɛ bɛ́ lɔn, wɔsɛn tá re baa sii ǹ nyɛɛnɛ.

⁶ Bɛa biikoo li, ǹ tá re soe ǹ kaa wɔsɛn kio. Wɔsɛn tá re ǹ bebele wɔ wo ǹ ne, yǎa ǹ wɔlɔ lui kiwi lɛ ganaa. A giala, maǹ die taasɛ mà wɔ n baa sii ǹ nyɛɛnɛ ka bibinaa wɔ lɛ bɛ́ lɔn. Wɔ á re baa sii ǹ nyɛɛnɛ.

⁷ Sɛnɛ, bɛa biikoo li, kasɛn kɛn die ka soo kaa duru ǹ bǎã nɛ, ka kiwi lɛ kũ. A giala, Dɛnaa Lawa lɛ, kaa Lawa lɛa, bɛ lɛ á die kiwi lɛ we ka gɔn.

⁸ Bɛ̀ ka kiwi lɛ kũ ǹ mɛn waáraa, ka tɛ da a ganaa. Dɛnaa Lawa pɛ ka-n lɔn, ka zɛnaa miɛ̃. Ka doamaa bɛ́ nɛ ka sii mɛn zɛnaa, a din nə ka kɛ nɛ masɛ á pii ka nɛ.»

⁹ Bɛ kio, Zozoe nə́ ǹ dia ǹ nə́ woo duru ǹ bǎã lɛ nɛ. Ǹ nə́ giã Betɛli laanka Ayii biin ni, Ayii a lɛ̀nyɛɛn gɔn la. Zozoe din bɛa tèlò lɛ zɛnaa kun ka zaman gialakun kɛ nɛ.

¹⁰ A lɛawaa, Zozoe yoo baayɛlɛ yiisoone, á bɔbɔ zaman lɛ li. A din laanka Izirayeli min golen lɛn nə́ mɛ zaman lɛ nyɛɛnɛ, ǹ nə́ woo Ayii gialaa.

¹¹ Zia-baalin mɛnɛn tumaa goã kun ni, bɛn nə́ soo, ǹ nə́ diri kiwi lɛ la. Ǹ nə́ woo golee kiwi lɛ yɔrɔ-a, Ayii a gɔsɛ a lɛ̀gɔn la. Yankɔrɔ basa kɛ na á goã ǹ laanka Ayii lɛ bii.

¹² Zozoe tɔ́n min duu sooro kɛ miã bɔ, mà bɛn nə n duru Betɛli laanka Ayii biin ni, kiwi lɛ a lɛ̀nyɛɛn gɔn la.

¹³ Zia-baali zaman lɛ tumaa giã kiwi lɛ a gɔsɛ a lɛ̀gɔn la. Ǹ durii-wɔlen lɛn sɛn nə́ giã a lɛ̀nyɛɛn gɔn la. Bɛ kio kəni, Zozoe nə́ n zɔ̃ á dɔ nyankɔrɔ basa lɛ bii a din tèlò lɛ nɛ.

¹⁴ Ayiin kii bɛ́ á bɛ yɛ, a laanka a zia-baalin tumaa nə́ n nanaa, ǹ nə́ yoo baayɛlɛ yiisoone, ka kiwi minin lɛn nɛ. Ǹ bǎã mɛn pɛ kɔn nɛ, ǹ nə́ soo mà maǹ woe n diɛ Izirayeli minin lɛn lɛ walan, ǹ ziabaa ǹ ganaa walan, dia-n woe Zurdɛ̃ tà a nyankɔrɔ basa kɛ la. Sɛnɛ, a goã doɛ̃, mà ǹ nə́ minin duru kiwi lɛ kio, bɛn nə́ kuu koe a ganaa wa.

¹⁵ Zozoe laanka Izirayeli minin lɛn tumaa nə́ n dinin baa ka maǹ nə́ boo ǹsɛn la. Ǹ nə́ don zii saa, ǹ nə́ baa si.

¹⁶ Ayii minin lɛn nə́ n lɛ dɛ, ǹ nə́ kiwi lɛ a zaman tumaa yiɛ ǹ nə́ kaa ǹ kio, ǹ nə́ Zozoe kio loo. Sɛnɛ, bɛ nə́ ǹ bebele miɛ̃, á ǹ wɔlɔ lui kiwi lɛ ganaa.

¹⁷ Min din goã Ayii laanka Betɛli kiwi, bɛ̀ a ná a soo á woo Izirayeli minin lɛn kio wa. Sɛnɛ, maǹ nə́ goã ǹ nə́ soo, ǹ nə́ kiwi lɛ lɛ toa koo, ǹ nə́ Izirayeli minin lɛn kio loo.

¹⁸ Dɛnaa Lawa tɔ́n pɛ Zozoe ne: «Sɛmiɛ̃ mɛn bɛ́ n gɔn ke, a saa n dia Ayii kiwi lɛ la. A giala, masɛ n die we n gɔn.» Sɛmiɛ̃ mɛn goã Zozoe gɔn, á saa á dia Ayii kiwi lɛ la.

¹⁹ A din bɛ́ á n gɔn dia la lɔn gɔrɔ, durii-wɔlen lɛn nə́ n nanaa ǹ nə́ soo ǹ duru ǹ bǎã nɛ, ǹ nə́ baa si ǹ nə́ kaa kiwi lɛ nɛ, ǹ nə́ kiwi lɛ kũ. Ǹ nə́ n nanaa dɔn gɔrɔ, ǹ nə́ tɛ da kiwi lɛ ganaa.

²⁰ Ayii minin lɛn nə́ n bɔyaa ǹ nə́ ga ǹ kio, bɛ̀ kiwi lɛ a tɛmaa bɛ́ á yoo lon kurukuru. Ǹ gù din yii gã kəni, pàã din ba ǹ lon, ǹ tá baa sii woe paǹ kɔn li wa. Izirayeli zaman mɛn goã baa sii woe don, bɛn nə́ n bɔyaa ǹ loolin lɛn li.

²¹ Zozoe laanka Izirayeli minin lɛn tumaa bɛ́ ǹ nə́ yɛ mà durii-wɔlen lɛn nə́ kiwi lɛ kũ, tɛmaa dɔ n boe kiwi lɛ nɛ, ǹ nə́ n bɔyaa ǹ nə́ daa Ayii minin lɛn dɛ.

²² Izirayeli minin gialakunun lɛn nə́ soo kiwi lɛ nɛ, ǹ nə́ daa n da ǹ lɛ. Ayii minin lɛn man nə́ goã Izirayeli minin lɛn bii kəni, kɛn nə́ ǹ wàã kɛ-a, kɛn dɔn nə́ ǹ wàã kɛ-a. Izirayeli minin lɛn nə́ ǹ dɛ lenlen, ǹ min toa wa, min dɔ baa si á la wa,

²³ bɛ̀ á n bɔ Ayiin kii kɛ nɛ, ǹ nə́ kũ a yii n koo, ǹ nə́ woo kɔ Zozoe la.

²⁴ Izirayeli minin nə́ Ayii minin lɛn tumaa dɛ don. Ayii minin lɛn nə Izirayeli minin kio loo, ǹ nə́ woo ǹ koa bǎã mɛn nɛ ke lɛn, Izirayeli minin lɛn nə́ ǹ tumaa dɛ walan yǎa ǹ nə́ nya. Bɛ kio, Izirayeli minin lɛn tumaa nə́ n bɔyaa ǹ nə́ daa Ayii kiwi, ǹ nə́ kiwi minin gialakunun kɛn dɔn dɛ.

²⁵ Ǹ min mɛn tumaa dɛ bɛa pinaa kɛ lɛ nɛ, giĩn laanka lɔn nɛ, ǹ tumaa a kaa kun na á goã min duu fulupaa. Ǹ tumaa dɔ n Ayii minin lɛa.

²⁶ Sɛmiɛ̃ lɛ goã Zozoe gɔn mɛn nɛ á dia Ayii la, a bɛa gɔn lɛ gisĩ wa, yǎa á kiwi minin lɛn tumaa dɛ lenlen á ǹ nya.

²⁷ Sɛnɛ, Izirayeli minin lɛn nə kiwi lɛ a tɔɔn laanka a mànan mɛnɛn goa zia lɛ gɔ́ɔ̃ nɛ, ǹ dinin nə́ nɔmɔ bɛn ganaa, ka Dɛnaa Lawa bɛ́ á goã á pɛ Zozoe-n lɔn.

²⁸ Zozoe Ayii kiwi tã, á bɔyaa á baa kɛbɔlɔ kooro lɛa yǎa duduu. A n tɔn miɛ̃ haalɛ tɔn pelo, min ba a-n wa.

²⁹ Ayiin kii lɛ sɛ, á bɛ bɔlɔ da biɛ-n da ganaa, yǎa wasa woo mɛ. Wasa bɛ́ á mɛ, Zozoe pɛ minin manɛ, mà ǹ na a gere fore ǹ bɔ da lɛ ganaa. Ǹ ná a gere lɛ saa ǹ nə́ woo zũ tán kiwi lɛ a kiɛnlɛ-a, ǹ nə́ kɔlɔ da kɔn la a lalan ka teleen. Bɛa kɔlɔ dakɔnla gole lɛ á tɔn a tan haalɛ pelo.

Wúlu bɔ ǹ bǎã dɔ laanka landa sɛ́wɔ pɛ boo Ebaali kele la

³⁰ Bɛ kio kəni, Zozoe tɔ́n *wúlu bɔ ǹ bǎã dɔ Ebaali kele la Dɛnaa Lawa wɔ lɛa, Izirayeli minin Lawa lɛ.

³¹ Dɛnaa Lawa a dí-nyali Muizu boo mɛn pɛ Izirayeli minin lɛn manɛ, màn mɛn nə n kiɛ̃ Muizu a dí-pɛn sɛ́wɔ kɛ nɛ, wulu bɔ ǹ bǎã lɛ na á n dɔ á kɔnpɛ ka bɛ nɛ: A na á n dɔ ka kɔlɔ lɛ-piɛ̃n nɛ, a fɔlɔ màn saa á ǹ kɔn sɛlɛ-n wa. Bɛ kio, ǹ nə́ *wúlu màn tiɛ̃ laanka barka da Lawa nɛ ǹ wúlu bɔ la, Dɛnaa Lawa wɔ lɛa.

³² Zozoe wusoo á kɔ Muizu a dí-pɛn kɛn lɛ, á ǹ kiɛ̃ kɔlɔn lɛn ganaa walan, Izirayeli minin lɛn dinin yii ni.

³³ Bɛa biikoo li, Izirayeli minin lɛn tumaa, ǹ min golen ne, ǹ landa sii-daraalin laanka ǹ sii yɔrɔ bɔlen ne ka tɔrɔ kɔsɔn mɛnɛn bɛ́ ǹ bii, ǹ tumaa woo golee Lawa a *lɛ kɔ kɔn la ǹ goo lɛ wàãn paanan li, Levii tɔrɔ wúlu-bɔlen kɛn yɔrɔ-a, ǹsɛn mɛnɛn bɛ́ lɛ kɔ kɔn la ǹ goo lɛ guĩ. Zaman lɛ a talɛɛ na á giã Garizimu kele kɛ yɔrɔ-a, a talɛɛ dɔ́ giã Ebaali kele kɛ yɔrɔ-a. Dɛnaa Lawa a dí-nyali Muizu na á goã á pɛ ǹ nɛ mà ǹ zɛnaa miɛ̃, ǹ barka da Izirayeli zaman lɛ ganaa bɔrɔ.

³⁴ Bɛ kio, Zozoe dí-pɛn lɛn tumaa pɛ. Barka da min ganaa ǹ boon laanka lɛn baraa bíi min li ǹ wɔn nɛ, á ná a tumaa pɛ ka a bɛ́ kiɛ̃-n landa boon sɛ́wɔ lɛ-n lɔn.

³⁵ Muizu boon mɛnɛn tumaa pɛ Zozoe ne, bɛa boo lɛ a goon goã, mà Zozoe na á pɛ Izirayeli zaman lɛ yii-n wa. Ǹ lɔn nɛ, ǹ nɛnyaanan nɛ, tɔrɔ kɔsɔn mɛnɛn dɔn dinin bɛ́ ǹ bii, á pɛ ǹ tumaa yii ni.