Zozoe 13 - LAWA A BOO SONBORE

Bǎãn mɛnɛn nə goã

¹ Zozoe daa á zizi kɔ parsiini. Ǹ kɔn pinaa, Dɛnaa Lawa tɔ́n pɛ nɛ: «Ń bɛ n zizi kɔ parsiini, a da yǎa gána lɛ a paǹ mɛn goã, n nə́ n tɔn si wa, á tɔn gole parsiini.

² Gána lɛ a paǹ mɛn goã, bɛ n ka kɛ nɛ: Filisiti minin bǎãn kɛn tumaa ka Gesuuru tɔrɔn kɛn bǎã tumaa nɛ.

³ A n siɛ Sikɔɔrɔ tà kɛ ganaa baa sii kiɛ̃ Ezipti gána yɔrɔ-a, a wo yǎa Ekrɔn lɛkoro-a, gɔsɛ a lɛ̀gɔn la. Bɛa bǎã lɛ doamaa nɛ a Kanaan minin kɛn bǎã baa. Filisiti minin kii sooro kɛ na á goã walan: Gaazaa kiwi wɔ nɛ, Asidɔdi kiwi wɔ nɛ, Asikalɔn kiwi wɔ nɛ, Gaadi kiwi wɔ nɛ, Ekrɔn kiwi wɔ nɛ, ka Avii tɔrɔn kɛn nɛ.

⁴ A n siɛ gusin a lɛ̀gɔn la ganaa, Kanaan minin gána kɛ tumaa ka Meyaraa kiwi kɛ nɛ Sidɔn minin wɔ lɛa yǎa Afɛki kiwi, a wo kaa Amɔɔrɔ tɔrɔn gèlè lɛ.

⁵ Gibla minin bǎã kɛ dɔ tá a nɛ, Liban gána kɛ tumaa nɛ, dia-n woe lɛ̀giala-n. A n siɛ Baali-Gaadi kiwi ganaa, Ɛrmɔn kele gòã lasa nɛ, yǎa Lebo-Amaati.

⁶ Kele yii bǎã kɛ tumaa, a saa Liban gána ganaa a wo yǎa Misirefɔti-Mayimu kiwi, bɛ dɔ tá a nɛ. Bɛa bǎã lɛ a minin tumaa na á goã Sidɔn minin lɛa. Masɛ dinmaa-n die bɛa bǎãn kɛn lɛn minin lui ma ǹ bɔ Izirayeli minin lɛn nyɛɛnɛ. Sɛnɛ, ka masɛ pɛ n nɛ lɔn, ka n pã, n gána lɛ tatala n kɔ Izirayeli minin lɛn la.

⁷ Kanna kəni, gána kɛ gii tɔrɔ manangɔrɔ kɛ bii, ka Manaasee tɔrɔ minin kɛn talɛɛ gialakun ni.»

Bǎã mɛn nə n gii Zurdɛ̃ tà kio lɛ̀giala-n

⁸ Dɛnaa Lawa a dí-nyali Muizu bǎã mɛn kɔ Urubɛn tɔrɔn laanka Gaadi tɔrɔn la ka Manaasee tɔrɔ minin kɛn talɛɛ nɛ Zurdɛ̃ tà kio lɛ̀giala-n, bɛ́ bɛn kíɛ̃ baa.

⁹ A n siɛ Aroɛɛrɛ kiwi ganaa Arnɔn tà lɛ-a, ka kiwi kɛ nɛ nyankɔrɔ basa kɛ bii, Medebaa kiwi a diə bǎã kɛ tumaa, yǎa Dibɔn kiwi.

¹⁰ Amɔɔrɔ tɔrɔn kii Sihɔn mɛn goã giã-n kiibaa la Ɛsibɔn kiwi, bɛa kiwin kɛn tumaa tá a nɛ, a wo yǎa Amɔn tɔrɔn kɛn gèlè ganaa.

¹¹ Galaati gána dɔ tá a nɛ, Gesuuru bǎã kɛ nɛ, Maakaa tɔrɔn bǎã kɛ nɛ, Ɛrmɔn kele kɛ tumaa ka Basan bǎã kɛ tumaa nɛ, a wo yǎa Salkaa kiwi.

¹² Basan gána a kii Ɔgu mɛn goã Asitarɔti laanka Edreyii kiwi mìi la, Refayimu tɔrɔn kɛn min giala nyɔmiɛ̃ goon lɛa, bɛa bǎãn kɛn tumaa tá a nɛ. Muizu boo bɛa bǎãn lɛn minin la á ǹ loo.

¹³ Sɛnɛ, Izirayeli minin lɛn nə Gesuuru minin kɛn laanka Maakaa tɔrɔn kɛn loo wa. Bɛ lɛ n ke, Gesuuru minin lɛn laanka Maakaa tɔrɔn lɛn nə́ giã Izirayeli minin lɛn bii, yǎa á daa kaa pelo lɛawaa kɛ lɛ.

¹⁴ A na a bǎã kɔ Levii tɔrɔ minin kɛn dininsɔɔ̃nɔn la kíɛ̃ lɛa wa. A giala, Dɛnaa Lawa, Izirayeli minin Lawa a wúlu mànan kɛn ǹ nə́ goã ǹ tiɛ̃, ǹ wɔ gii na á goã ka bɛ nɛ, ka a din bɛ́ á goã á pɛ ǹ nɛ lɔn.

¹⁵ Muizu bǎã kɔ Urubɛn tɔrɔ minin la ǹ tanlɛ yii li.

¹⁶ Ǹ bǎã lɛ n siɛ Aroɛɛrɛ kiwi ganaa Arnɔn tà lɛ-a, ka kiwi kɛ nɛ nyankɔrɔ basa kɛ bii, diə bǎã kɛ tumaa nɛ, kunu Medebaa kiwi ganaa.

¹⁷ Ɛsibɔnɔn gána laanka a kiwi mɛn tumaa goã diə bǎã lɛ nɛ, bɛn dɔn tá a nɛ: Dibɔn laanka Bamɔti-Baali ni, Bɛti-Baali-Mewɔn nɛ,

¹⁸ Zaasaa nɛ, Kedemɔti ni, Mefaati ni,

¹⁹ Kiriyatayimu ni, Sibimaa nɛ, Serɛti-Asakaara nɛ nyankɔrɔ basa lɛ a kele lalan,

²⁰ Bɛti-Pewɔɔrɔ nɛ Pisigaa kele gòã lasa bǎã kɛ nɛ, Bɛti-Ayesimɔti ni,

²¹ diə gɔ́ɔ̃ a kiwin lɛn tumaa. Amɔɔrɔ tɔrɔn kii Sihɔn mɛn goã giã-n kiibaa la Ɛsibɔn kiwi, bɛ dɔ a bǎã kɛ tumaa tá a nɛ. Muizu na á goã á Sihɔn lɛ dɛ. Madiã kiin mɛnɛn dɔn nə goã gána lɛ a minin lɛa naa-n kɔn ka Sihɔn nɛ, á bɛn dɔn dɛ: Evii ni, Rekɛmu ni, Suuru ni, Huuru ni ka Rebaa nɛ.

²² Izirayeli minin lɛn nə min mɛnɛn dɛ bɛa biikoo lɛ li, Bewɔɔrɔ a nɛgiĩ Balaamu mɛn goã wɔ-kũli lɛa, bɛ n ka ǹ goon ne.

²³ Urubɛn tɔrɔn lɛn bǎã gèlè na á goã ka Zurdɛ̃ tà kɛ nɛ, ka a lɛkoro lɛ-a bǎãn nɛ. Kiwin laanka bǎãn mɛnɛn nə dɔ Urubɛn tɔrɔn lɛn ganaa kíɛ̃ lɛa, ǹ tanlɛ yii li, ǹ dinin lɛn man ka bɛn nɛ.

²⁴ Muizu bǎã kɔ Gaadi tɔrɔ minin dɔn la, ǹ tanlɛ yii li.

²⁵ Ǹ bǎã lɛ na á goã siɛ Zazɛɛrɛ kiwi ganaa, a Galaati gána a kiwin kɛn tumaa kaa a nɛ, ka Amɔn tɔrɔn kɛn gána a talɛɛ nɛ, a wo yǎa Aroɛɛrɛ kiwi, Rabaa kiwi yɔrɔ-a.

²⁶ A n siɛ Ɛsibɔn kiwi dɔ ganaa, a wo yǎa Ramati-Mispee laanka Betonimu kiwi, a wusoo a saa Mahanayimu kiwi ganaa, a wo yǎa Debiiri kiwi lɛkoro-a.

²⁷ Bǎãn mɛnɛn nə dɔ ǹ ganaa Zurdɛ̃ a nyankɔrɔ basa kɛ nɛ, bɛn man ka kɛn nɛ: Bɛti-Aramu, Bɛti-Nimuraa, Sukɔti, Safɔn, Ɛsibɔnɔn kii Sihɔn kɛa bǎã gialakun ni, Zurdɛ̃ tà laanka a lɛkoro lɛ-a bǎãn nɛ, a wo yǎa Kinerɛti tà a lɛ doa ǹ bǎã ganaa, Zurdɛ̃ tà kio lɛ̀giala-n.

²⁸ Kiwin laanka bǎãn mɛnɛn nə dɔ Gaadi tɔrɔn lɛn ganaa kíɛ̃ lɛa, ǹ tanlɛ yii li, ǹ dinin lɛn man ka bɛn nɛ.

²⁹ Muizu bǎã kɔ Manaasee tɔrɔ minin kɛn talɛɛ dɔ la. A bǎã mɛn kɔ Manaasee tɔrɔ minin lɛn talɛɛ la ǹ tanlɛ yii li,

³⁰ a na á goã siɛ Mahanayimu kiwi ganaa, a Basan bǎã kɛ tumaa kaa a nɛ, ka Basan gána a kii Ɔgu kɛa gána tumaa nɛ, ka Zayiiri a kiwi pɔsɔrɔ kɛ tumaa nɛ Basan gána nɛ.

³¹ Galaati gána a talɛɛ dɔ́ goã a nɛ, ka Asitarɔti laanka Edreyii kiwi ni. Bɛa kiwin lɛn man nə́ goã Basan gána a kii Ɔgu wɔn lɛa lɛlɛ. Bɛa bǎã lɛ na á dɔ Makiiri a nɔ̀ɔn Manaasee tɔrɔn ganaa ǹ tanlɛ yii li.

³² Muizu bǎãn mɛnɛn gii ǹ bii kíɛ̃ lɛa Moabu a diə bǎã kɛ nɛ, Zurdɛ̃ tà laanka Zerikoo kiwi kio lɛ̀giala-n, ǹ dinin lɛn man ka bɛn nɛ.

³³ Sɛnɛ, Muizu bǎã kɔ *Levii tɔrɔn kɛn la kíɛ̃ lɛa wa. Dɛnaa, Izirayeli minin Lawa lɛ na á goã ǹ wɔ gii lɛa, ka a din bɛ́ á goã á pɛ ǹ nɛ lɔn.