Zonaasi 4 - LAWA A BOO SONBORE

Zonaasi a foo-yoo gɔ́ɔ̃ nɛ Lawa daraa mɛn kɔ la

¹ Bɛa sii lɛ busu Zonaasi ganaa parsiini,

² a foo yoo á kiɛ̃ a bǎã la. Á tɔn pɛ Lawa nɛ: «A din lɛ n ke le Dɛnaa Lawa, ma bɛ́ maa gána nɛ, man má goã má kɛ lɛ pɛ. Bɛ lɛ na á toa má saa lɛlɛ má baa si máa man woe Tarsisi. A giala, má goã doɛ̃ máa ma n Lawa lɛa, bǐɛ̃ biɛ, min makara doɛ̃. N foo a yui fufuu wa, n kɔn-narɛɛ dɔ n gole. Ta n pɛ mà ma n die dɔlɔ boe min ganaa, ma n wusii ka n kio ne.

³ Dɛnaa Lawa, masɛ nə n nyankoe máa n ma nyin bɔ gɔrɔ. A giala, gɛ̀ á soɛ masɛ ganaa tá kanaa nɛ.»

⁴ Dɛnaa Lawa tɔn pɛ nɛ: «Á siĩni n foo yoo kɛnɛn?»

⁵ Zonaasi soo á woo giã kiwi lɛ a lɛ̀giala gɔn la. Á siã dɔ walan á giã a wúlu li. Sii mɛn bɛ́ re n zɛnɛɛ kiwi lɛ nɛ, a n tán n yii diɛ bɛ la.

⁶ Bɛa biikoo li Dɛnaa Lawa lɛ Lawa lɛa, bɛ́ da kɔn tɔrɔ da bɔ ganaa, á gole kɔ a wúlu nə n kɔ Zonaasi lɛ a ná a foo basã. Bɛa da lɛ a sii Zonaasi foo kɔɔ̃n kɔ parsiini.

⁷ Bɛa lɛawaa baayɛlɛ yiisoone Lawa nyuun goon dia á wɔ da lɛ nɛ, da lɛ gã.

⁸ Á ga gɛ̀ li bɛ̀ a n pii mà gɛ̀ á soɛ asɛ ganaa tá kanaa nɛ.

⁹ Lawa tɔn pɛ nɛ: «Sonbore tá n lon n foo yoo da kɛ lɛ a gɛ̀ taman yii?» Zonaasi ná a lɛ si: «Sonbore tá ma lon ma foo yoo taãn-taãnɛ, yǎa a doe gɛ̀ ganaa.»

¹⁰ Bɛ kio, Dɛnaa Lawa pɛ nɛ: «Ń bɛ́ ń nɔmaa ka da mɛn nɛ wa, n nə́ n da gole kɔ dɔ ganaa wa, bɛ makara n boe nsɛ ganaa. A da yaa a na á bɔ tèlò goon ne, á gã tèlò goon ne.

¹¹ Sanparɛ Ninivu kiwi gole ke, masɛ á re makara boe bɛ ganaa wa! A giala, min duu paabiɛ ka fuə (120 000) tá yii a nɛ, min mɛnɛn nə́ ke ǹ nə́ ǹ ba ǹ gusin laanka ǹ gɔsɛ a bɔkɔnlɛ doɛ̃ wa. Tɔɔ damata dɔ tá a nɛ.»