Zonaasi 2 - LAWA A BOO SONBORE

Zonaasi Lawa nyan mɛn kɔ zɔ̀ gɔ́ɔ̃ nɛ

¹ Dɛnaa Lawa zɔ̀ gole kɔn dia, á Zonaasi kũ á mui. Zonaasi goã a gɔ́ɔ̃-n miɛ̃ lɛawaa sɔɔ ka tèlò sɔɔ.

² Zonaasi nə́ n toa zɔ̀ lɛ gɔ́ɔ̃ nɛ, á Dɛnaa Lawa, a Lawa lɛ nyankɔ,

³ á pɛ: «A ma toa fuu kɛ gɔ́ɔ̃ nɛ, má Dɛnaa Lawa bíi wɔ, á ma lɛ si. A ma toa gɛ̀ gɔ́ɔ̃ nɛ, má lɛ dia n la máa n nə n dɔ ma lɛ, n ma lɛ ma.

⁴ Ń ma zũ kɔ̀ mu zuzulu kɛ bii, mu ma da bii walan, n mu koreen lɛn tumaa bɔ ma la.

⁵ Bɛ lɛ n ke maa pii ma din ni: Máa ma n nə́ ma loo n ma bɔ n yɔrɔ-a. Sɛnɛ, a laanka bɛ yii ni man tɔ nə n yɔrɔ diɛ n kion sonbore kɛ la.

⁶ Nyankɔrɔ zuzulu lɛ a mu ma da bii, kɔ̀ buun nə́ n pɛnɛ ma mìi ganaa.

⁷ Má gisĩ má woo tán yǎa kelen giulun. Ń geren piɛ a kiɛnlɛ kũ n tã ma lɛ duduu. Sɛnɛ ń wusoo ń ma bɔ ń soo ma nɛ ma yii n koo.

⁸ Maa fɔfoã bɛ́ re nyɛɛ, ma yiri gisĩ ka n din ni Dɛnaa Lawa, maa nyankɔ dɔ n din li n kion sonbore kɛ nɛ.

⁹ Min mɛnɛn bɛ́ n parɛɛ dì guguru kɔ ganaa, bɛn man Lawa a bǐɛ̃ kɛ a zii tiɛ̃ ǹ dinin ganaa.

¹⁰ Sɛnɛ, masɛ n giɛ li ma wúlu mànan kɔ n la. Man lɛ kɔ ka siin mɛnɛn nɛ, ma bɛn zɛnaa ma ǹ lɛ pã, bɛ̀ má n loe loe barka diɛ n nɛ. Kirisibaa lɛ n boe Dɛnaa Lawa li.»

¹¹ Dɛnaa Lawa boo da ka zɔ̀ lɛ nɛ. A din bǎã-n gɔrɔ, zɔ̀ lɛ pisəə ka Zonaasi-n tán gere la.