Zeremii 9 - LAWA A BOO SONBORE

Sonbore banban

¹ Áh! Man zoɛ̃ li ma goã diə gole ne, zii tɔ-wɔlen bɛ́ nɛn bɛ̀ ǹ golee bǎã mɛn nɛ. Ma á re maa zaman toɛ walan, ma wo sɔsɔɔ man bɔ ǹ li. Minin giala da kanaa wolen manɛ, Naarɛbaalin manɛ!

² Ǹ lɛwɔn nə baraa ka kiɛ bɛ́ lɔn. Ǹ nə́ gána lɛ a mìinaan baa soɛ taman yii peperebaa a lɛa bie wa. Taãn nɛ, gɛ̀ dɛ woo gɛ̀ dɛ, ǹ dí n ka bɛ lɛ nɛ. A giala, ǹ ba ma doɛ̃ wa. Dɛnaa Lawa a da ǹ boo ne.

³ Didie nə n parabaa n giaára nɛ. Min kɔn doamaa bie a n foo doa ǹ dɔɔ̃n ganaa wa. Sàabaa ba la wa, á re ka siɛ̃. Haalɛ ń giaára dinmaa n die soɛ diɛ n la.

⁴ Didie nə ǹ miã siɛ̃, Min kɔn ba sonbore pii wa. Ǹ tumaa lɛ muĩ soɛ nɛ. Ǹ nya ǹ dí n ka sii baraa nɛ.

⁵ Kakaarɛbaa woo kakaarɛbaa. Soɛ woo soɛ. Maǹ nə n piɛ̃ ǹ ba ma doɛ̃ wa. Dɛnaa Lawa a da ǹ boo ne.

⁶ Bɛ lɛ nɛ, Dɛnaa Lawa Pàãyiidɛnaa á kɛ pii: «Man die ǹ *yoreen koe ka tɛ nɛ. Man die giɛ ǹ giala-a. Man die maa zaman lɛ kuĩ lɔn doo?

⁷ Minin kɛn lɛwɔn nə ka kiɛ bɛ́ lɔn gɛ̀ dii. Maǹ soɛ boe, maǹ boo paparɛ diɛ ǹ giaáran manɛ, Sɛnɛ, ǹ foo ne, maǹ kan koe ǹ ne.»

⁸ Ma kɔnbɔ ma yoo minin kɛn gialaa wa? Ma doamaa bie ma maa gɛ̀ dòo bɔ tɔrɔ kɛ miã ganaa wa? Dɛnaa Lawa a da ǹ boo ne.

Gɛ̀ loe, Zeruzalɛmu laanka Zudaa la Dɛnaa Lawa

⁹ Kelen mìi ni, man wuu pii, má n gini. Man gɛ̀ loe loe gána lɛ a tɔɔn lɛduə̃ ǹ bǎã nɛ. A giala, tɛ ná a tumaa kũ. Min kɔn ba boe walan wa. Tɔɔn bìn diɛ á boe walan doo wa. Ǹ tumaa sasawaa, bàanan nɛ ka tɔɔ gialakunun tumaa nɛ, ǹ goon din banban.

¹⁰ Man die Zeruzalɛmu biɛ kɛbɔlɔ gole lɛa, tolokan susu ǹ bǎã lɛa. Man die Zudaa kiwin bɔyɛɛ, ma ǹ baa kɛbɔlɔ lɛa, min ná a giã a-n doɛ̃ wa.

¹¹ Sii-dɔ̃li tan a n boe la a siin kɛn giala ma? Bɛ̀ Dɛnaa Lawa boo da ǹ dɛnaa nɛ, gána lɛ ziziɛ̃ mìi mɛn ganaa, tɛ kũ ka yɔrɔ mɛn nɛ min ná a kiɛ̃ a-n doɛ̃ dinin wa, a bɛ giala pɛ.

¹² Dɛnaa Lawa pɛ doo: «A giala, maa dí-pɛn kɛn má kɔ ǹ la, ǹ nə́ n la bɔ bɛn ganaa. Ǹ nə n too kɔ ma lon wa, ǹ kɔ ma lɛ wa.

¹³ Maǹ nə́ n mìi laa. Ǹ díin man nə́ Baalin nyaa ǹ nɛ. Maǹ nə́ kɔ bɛa dìn lɛn lɛ.

¹⁴ Á bǐɛ̃ kɔ, masɛ Dɛnaa Lawa Pàãyiidɛnaa, Izirayeli a Lawa bɛ́ boo mɛn diɛ, á ke: Líɛ mɛn bɛ́ kɔɔsɛ, man die bɛ biɛ ǹ màn-bii lɛa, ma ǹ da sèwò mii ganaa.

¹⁵ Tɔrɔn mɛnɛn bɛ ǹ dininmaan laanka ǹ díin nə ǹ dɔ̃ wa, man die ǹ pɛsɛ̃ bɛn bii. Ma á re zia yiɛ ǹ ganaa, ma ǹ yii dɛ lenlen.»

¹⁶ Dɛnaa Lawa Pàãyiidɛnaa a da ǹ boo á ke: Ka n yiri kɔ li, ka lɔ wuu-pɛlen bíi. Ǹ mɛnɛn bɛ́ a yɔrɔ doɛ̃ parsiini, ka bɛn bíi.

Zaman

¹⁷ Ǹ foo busu ǹ loe lɔ wɔ la fufuu! Wɔ yii mu pã, a kaa suuu.

Zeremii

¹⁸ Hiĩ, foo busu ǹ loe n boe *Siɔn. «Ebe, wɔ́ ziziɛ̃, sìi nə́ n kɔ wɔ lɛ. Wɔ doamaa nɛ wɔ soo wɔ n bɔ wɔa gána nɛ, a giala, wɔa kionən nə́ kaa.»

¹⁹ Lɔn lɛn, ka n too kɔ Dɛnaa Lawa a boon kɛn li. A bɛ́ boo mɛn diɛ, ka n too da li. Ka kaa nɛlɔn daraa gɛ̀ loe kɛ ganaa. Didie na a miãkɛn daraa a ganaa.

²⁰ «Gɛ̀ n we ka wɔa fenɛtərə ne, a n we wɔa kion sonboren kɛn nɛ, a n nɛnyaanan dii ziin la, a nɛ tenən dɛ bǎã dadaran nɛ.»

Dɛnaa Lawa

²¹ Nsɛ Zeremii, boo da: Dɛnaa Lawa a da ǹ boo á ke: «Geren man tán ka tɔɔn bù bɛ́ lɔn wuru-n. Ǹ kɔnboe n ka wii mɛn bɛ́ ǹ nə́ kuru ǹ nə́ n la bɔ a ganaa kio min kɔn ná a goɛ wa.»

Sii-doɛ̃ taãn

²² Dɛnaa Lawa bɛ́ boo mɛn diɛ, á ke: Sii-dɔ̃li doamaa bie a n din kalaa wa. Min kaka doamaa bie a na a din a kakabaa kalaa wa. Pàãmaa doamaa bie a na a din a pàãmabaa kalaa wa.

²³ Min mɛn bɛ́ zoɛ̃ li a n din kalaa, a n din kalaa kɛa lɛa: A yiri tan, a n masɛ doɛ̃. A giala, masɛ Dɛnaa Lawa a dí n ka makara-doɛ̃ nɛ, sonborebaa nɛ, ka peperebaa nɛ tán la. Bɛ lɛ n kɔɔ̃n ma ganaa. Dɛnaa Lawa a da ǹ boo ne.

²⁴ Lɛawaa á re doe, Dɛnaa Lawa a da ǹ boo ne, min mɛnɛn tumaa bɛ́ ǹ nə́ n kuru, ma á re yui bɛn gialaa.

²⁵ Sonbore, Ezipti minin ni, Zudaa minin ni, Edɔmu minin ni, Amɔn tɔrɔn nɛ, Moabu minin ni, ka diə gole minin kɛn nɛ n karazɔɔ ka koɛ̃, bɛn kuriimaa bie wa. Izirayeli minin lɛn dininmaa kuriimaa bie masɛ Dɛnaa Lawa yii li wa.