Zeremii 49 - LAWA A BOO SONBORE

Lawa a boo Amɔn tɔrɔn wɔ paǹ li

¹ Amɔn tɔrɔn wɔ paǹ li: Dɛnaa Lawa n kɛ pii: «A na á saa lɔn, Amɔn tɔrɔn kii Gaadi gána si á baa a wɔ lɛa? Ǹ zaman nə́ Izirayeli kiwin si ǹ nə́ n kɔ lɛ. Bɛ giala mà wàa kəni? Izirayeli minin nɛnyaanan ma nə ǹ banban ǹ nə́ boe la ǹ bɛa kiwin lɛn baa ǹ kíɛ̃ lɛa wa?»

² «Dɛnaa Lawa a da ǹ boo á ke, lɛawaan tá re doe, man die toɛ, ziabaa ǹ lɛ dɛ bɔ Rabaa, Amɔn tɔrɔn kiwi gole kɛ nɛ. Bɛa kiwi gole lɛ á re kɛbɔlɔ biɛ. Tɛ á re a lɛkoro lɛ-a kiwin kuĩ. Bǎãn mɛnɛn bɛ́ Izirayeli wɔ lɛa, á re ǹ sii.»

³ Ɛsibɔn minin, ka gɛ̀ koa ǹ loe lɔ, a giala Ayii kiwi yu! Rabaa lɛkoro-a kiwin, ka gú da! Ka gɛ̀ koa ǹ mɔnaan wɔ, ka foo ziziɛ̃ ǹ loe lɔ! Ka bɔ bǎã tumaa nɛ, kɛ ziin li: Amɔn tɔrɔn kii n woe gùli kɔ ǹ bǎã nɛ, kun ka a wúlu-bɔlen laanka a kiãn tumaa nɛ.

⁴ Rabaa, nɛlɔ piã-wole, ma nə́ n goã n din koɛ n nyankɔrɔ basan kɛn taman yii, ka n kaa-piɛ màn sonboren kɛn nɛ! Ma nə́ n goã n foo doɛ n naforon ganaa, bɛ̀ n tá pii: «Die doe ne a yoo ma gialaa?»

⁵ Dɛnaa Lawa Pàãyiidɛnaa a da ǹ boo á ke: «Man die nyɛ́ɛ kiɛ ǹ ganaa, a bɔ paǹ tumaa li. Ǹ tá re ka kiɛ ǹ nyɛɛnɛ ǹ ka loo, min kɔn ba re yii a baa-silin lɛn sɔkɔn wa.

⁶ Sɛnɛ bɛ kio, ma á re Amɔn tɔrɔn giã ǹ gɔn zizi kɛ koe ǹ la.» Dɛnaa Lawa a da ǹ boo ne.

Lawa a boo Edɔmu minin wɔ paǹ li

⁷ Edɔmu minin wɔ paǹ li. Dɛnaa Lawa Pàãyiidɛnaa n kɛ pii: «Sii-dɔ̃li ba Teman kiwi doo wa? Yiridɛnan kɛn yiri na á n si ǹ la? Ǹ sii-doɛ̃ lɛ na á nya?

⁸ Dedan minin lɛn, ka n dɔ̀ɔ̃ wɔ ka baa si! Ka n duru kele yalan nɛ! Ezawu a kion minin lɛn, man die koe boe ka ganaa. Biikoo n ke má n die yui ka gialaa.

⁹ Bɛ̀ rezɛ̃ nɛ na wolen nə́ daa ka li, ǹ ba a nɛ gogoon toɛ walan wa? Bɛ̀ wurumun nə́ daa tèlò-n, ǹ bɛ́ re boe màn mɛn la, ǹ bie woe ka bɛ-n wa?

¹⁰ Sɛnɛ, ma dinmaa n die Ezawu a kion minin lɛn lon dudui. Ma á re toɛ ǹ nə ǹ duru ǹ bǎãn kɛn wɔlɔ yɛ. Ǹ ba re boe la ǹ wo walan doo wa. Ǹ tá re ǹ nɛnyaanan dii, ǹ dɔɔ̃nɔn nɛ, ka ǹ miãkɛnɛn tumaa nɛ. Min kɔn ba re pii ǹ ni:

¹¹ Kaa nɛ toenen kɛn, ma á re ǹ toe, kaa lɔ giɔɔrɔn tá boe la ǹ nə n foo doa ma ganaa.»

¹² Dɛnaa Lawa n kɛ pii: «Ka n too kɔ: Min mɛnɛn doamaa bɛ́ ǹ bie ǹ maa foo-yoo ǹ paan lɛ a mu mi wa, n dɔn nə́ mi. Edɔmu, nsɛ n die goɛ̃ dɔlɔ baã? Haayii! Kɛa foo-yoo ǹ paan lɛ, n tá re a mu mii, sàabaa ba la wa.

¹³ Man liɛ kɛ we, ma din Dɛnaa Lawa: Bosraa kiwi kɛ á re kɛbɔlɔ biɛ, a diə gole baa. Ǹ tá re biɛ sii a kɔnboe lɛa lɛn baraa bíi a paǹ li hinlaa bɛ̀ ǹ tá li ǹ sìi da min ganaa. A lɛkoro lɛ-a kiwin kɛn tá re kɛbɔlɔn biɛ, yǎa duduu. Dɛnaa Lawa a da ǹ boo ne.»

¹⁴ Dɛnaa Lawa boo da ma nɛ, dia dí-a wole n woe bɛ pii tɔrɔn tumaa nɛ: «Ka n sɔkɔn, ka wo Edɔmu gialaa! Ka yoo, ka a ziabaa!»

¹⁵ «Taãn nɛ, Edɔmu, man die n biɛ tɔrɔn tumaa a kiɛɛrɛ lɛa, tɔrɔ mɛn bɛ́ min tumaa ná a puusə koe.

¹⁶ Ma n nyɛ́ɛ da ǹ màn lɛa, n nə́ n din koɛ n miãn ganaa. Sɛnɛ, ma nə n din siɛ̃. N giã ǹ bǎã n ka kele yalan nɛ, sɛnɛ, n woo giã kele mìi ni. Ta ma n nə́ n kii dɔ lon sɔsɔɔ á la zèwo wɔ nɛ, man die n zuĩ yǎa tán.» Dɛnaa Lawa a da ǹ boo ne.

¹⁷ Edɔmu á re kɛbɔlɔ biɛ. Min mɛn tumaa bɛ́ kiɛ̃ kunu a li, ǹ yiri á re n lɔlɔkɔn. Ǹ tá re n lɛ dii basaã kɛ tumaa taman yii.

¹⁸ Dɛnaa Lawa pɛ: «Basaã mɛn Gomɔɔrɔ laanka Sodɔmu ka ǹ lɛkoro lɛ-a kiwin yɛ a din lɛ miã n die ka yii. Min goon din ba re goɛ̃ kaa kiwin ni wa, minbuiin nɛ goon ba re goɛ̃ ǹ nɛ wa.»

¹⁹ Dɛnaa Lawa pɛ: Man die goɛ̃ ka yàra bɛ́ lɔn, á soo da yii ni Zurdɛ̃ tà lɛ-a, woe tɔɔn buu sɔ̃ ǹ bǎãn ganaa. Man die min tumaa goɛ bǎã goon ma wo ǹ ne, Bɛ kio, ma á re min goon boe kiã lɛa ma koa Edɔmu mìi la? Die n ka ma bɛ́ lɔn? Die n boe la a maa sii zɛnaa a nɔ̀n da ma la. Kiã mɛn nə boe la a n gòãn dii ma ganaa?

²⁰ Dɛnaa Lawa sii mɛn yɔrɔ bɔ Edɔmu wɔ lɛa, a sii mɛn yɔrɔ bɔ Teman minin wɔ paǹ li, ka n too kɔ bɛ li kəni: Sàabaa ba la wa, maǹ die ǹ giɛrɛɛ tán ka pàã nɛ, kɔnlɛ ka ǹ bɔnboɛɛnɛn tumaa nɛ, ka tɔɔn bɛ́ lɔn. Sàabaa ba la wa, ǹ dinin taman yii, ǹ tá re ǹ zìã wurii.

²¹ Ǹ bɔ á mɛnaa wuu n bìn diɛ tán ganaa. Ǹ lɛ dɛ wuu n boe Sawɛɛ tà lɛ-a.

²² Zɔ́ɔ n ka zèwo bɛ́ lɔn, piɛ̃, á n nyàan lɛ bɔ Bosraa kiwi lalan. Bɛa pinaa lɛ nɛ, nyɛ́ɛ á re Edɔmu a zia-baali zanbian kɛn kuĩ ka lɔ bɛ́ lɔn a nɛ yɛ biikoo li.

Lawa a boo Damaasi a paǹ li

²³ Damaasi kiwi a paǹ li: Amaati kiwi laanka Arpaadi kiwi kibərə baraa ma. Sìi nə n kɔ ǹ lɛ. Ǹ yiri lɔlɔkɔnmaa nɛ, ka yìsi mu bɛ́ lɔn, a boe la á golee wa.

²⁴ Damaasi minin foo ziziɛ̃maa nɛ, maǹ nə n yɔrɔ boe die baa sii. Ǹ gɔ̀nɔn nə bìn diɛ nyɛ́ɛ gɔn. Nyɛ́ɛ nə ǹ ganaa, ǹ gɔ̀nɔn nə bìn diɛ, ka lɔ bɛ́ lɔn a nɛ yɛ biikoo li.

²⁵ Ǹ nə́ n la bɔ kiwi gole kɛ ganaa, kiwi ke ma foo kɔɔ̃n koe! Bɛ giala mà wàa kəni?

²⁶ Dɛnaa Lawa Pàãyiidɛnaa a da ǹ boo á ke: «Bɛ lɛ nɛ, bɛa pinaa lɛ nɛ, nɛ tenən tá re kiɛ bǎã dadaran nɛ, sɔraasin tumaa á re giɛ̃.

²⁷ Kungɔn mɛn bɛ́ Damaasi kiwi tamɛɛ, ma á re tɛ diɛ bɛ ganaa. Á re Bɛn-Adaadi a kii kion kuĩ.»

Lawa a boo Larabun wɔ paǹ li

²⁸ Kebaara Larabun wɔ paǹ li kɔnlɛ ka Asɔɔrɔ gánan nɛ, kɛn Baabiloniin kii Nebukadenezɔɔrɔ boo ǹ la. Dɛnaa Lawa pɛ: Ka yoo, ka wo Kedaara gialaa! Ka diə gole minin kɛn màn tumaa ziziɛ̃!

²⁹ Ka ǹ zìãn laanka ǹ tɔɔn si ǹ la, ǹ mìi duru ǹ bǎã laanka ǹ màn tumaa nɛ! Ka wo ka ǹ nyɔɔmaan nɛ, ka n lɛ dɛ ǹ ganaa, ka pɛ: «Nyɛ́ɛ n bǎã tumaa nɛ!»

³⁰ Asɔɔrɔ minin lɛn, ka baa si, ka baa si fufuu. Ka n duru kele yalan nɛ. Dɛnaa Lawa a da ǹ boo ne. A giala, Baabiloniin kii Nebukadenezɔɔrɔ nə n yɔrɔ boe, a n sii yɔrɔ boe die-n ka gialaa.

³¹ Ka yoo, ka wo tɔrɔ kɛn gialaa ǹ nə́ ǹ ba n taasɛ ka sii kɔn nɛ wa. Maǹ taasɛ mà ǹsɛn man yii-nyɛɛ gɔ́ɔ̃ nɛ. Dɛnaa Lawa a da ǹ boo ne. Goo ba ǹ kiɛnlɛn lɛ wa goo nɛ ba ǹ ganaa wa. Maǹ giã-n tiãlɛa.

³² Ǹ zɔ́ɔn tá re ǹ nyɔɔmaan koɛ̃, ka ǹ tɔɔ kuru damata nɛ, ka bɔ zia la ǹ màn bɛ́ lɔn. Min mɛnɛn bɛ́ n karazɔɔ ka koɛ̃, ma á re bɛn pɛsɛ̃ bǎã tumaa nɛ. Ma á re toɛ koe bɔ paǹ yii-a a da ǹ ganaa. Dɛnaa Lawa a da ǹ boo ne.

³³ Asɔɔrɔ kiwi á re tolokan susu ǹ bǎã biɛ, kɛbɔlɔ lɛa yǎa duduu. Min goon ba re goɛ̃ kaa kiwin ni wa, minbuiin nɛ goon din ba re goɛ̃ ǹ nɛ wa.

Lawa a boo Elamu minin wɔ paǹ li

³⁴ Dɛnaa Lawa boo da Lawa a boo gii-dali Zeremii ni Elamu minin wɔ paǹ li. Bɛ́ á zoɛ̃ bɛ̀ Sedekiasi a Zudaan kiibaa tɔn belebɔ wa.

³⁵ Dɛnaa Lawa Pàãyiidɛnaa boo mɛn da, á ke: Elamu minin sãn kɛn, ǹ mɛnɛn lɛn bɛ́ ǹ pàã lɛa, man die bɛn yiyiɛ.

³⁶ Man die piɛ̃ sii diɛ Elamu la, boe kanaa gùrù sii tumaa ganaa. Man die Elamu minin lui bǎã tumaa nɛ, ǹ gùli-kɔlin tá re yii gána tumaa nɛ.

³⁷ Elamu minin gɔ̀nɔn tá re bìn diɛ ǹ zɔ́ɔn nyɛɛnɛ, ǹ mɛnɛn bɛ́ giɛ ǹ gɛ̀ li. Maa foo yoo baraa kɛ gɔ́ɔ̃ nɛ, man die koe diɛ ǹ la. Dɛnaa Lawa a da ǹ boo ne. Ma á re ǹ kio lui ka zia nɛ, yǎa ma ǹ tumaa dii lenlen.

³⁸ Man die Elamun kii laanka a dí-nyalin dii, ma dinmaa kii dankan koa bɛa gána lɛ nɛ. Dɛnaa Lawa da ǹ boo ne.

³⁹ Sɛnɛ, ǹ kɔn pinaa, ma á re wusii ma Elamu a lɛlɛ ǹ giã ǹ gɔn kɛ kɔ la. Dɛnaa Lawa a da ǹ boo ne.