Zeremii 43 - LAWA A BOO SONBORE

Maǹ woe Zeremii ni Ezipti

¹ Dɛnaa Lawa, ǹ Lawa boon mɛnɛn pɛ Zeremii ni Zaman lɛ wɔ lɛa, Zeremii bɛ́ á bɛn pɛ á nya lɔn,

² Osayia a nɛgiĩ Azaria nɛ, Kareya a nɛgiĩ Zoanan nɛ ka din koa wolen tɛnɛn nɛ, ǹ nə́ pɛ Zeremii-n kɛnɛn: «Soɛ nɛ n tá boe. Dɛnaa Lawa, wɔa Lawa nə n dia mà n da pɛ wɔ nɛ mà wɔ nyan wo gùli kɔ Ezipti gána-n wa.

³ Sɛnɛ, Neriya a nɛgiĩ Baruku nə n sɔsɔmɛ n diɛ wɔ ganaa. A n li a wɔ wɔ *Baabilonii minin gɔn, ǹ wɔ dɛ hinlaa ǹ wɔ goa ǹ wo wɔ nɛ Baabilonii gána nɛ.»

⁴ Kareya a nɛgiĩ Zoanan nɛ, sɔraasin goledɛnan nɛ ka zaman gialakun lɛ nɛ, ǹ kɔn din ba n too koe Dɛnaa Lawa a da ǹ boo li wa, ǹ ba li ǹ giã Zudaa gána-n wa.

⁵ Zudaa gána a min mɛnɛn yii goã koo, Zoanan laanka zaman nyɛɛnaandɛnan lɛn nə́ ǹ kũ, ǹ nə́ woo ǹ ne Ezipti gána nɛ. Bɛa minin lɛn man nə́ goã pɛsiɛ̃-n bǎã yii ni ǹ lɛkoro lɛ-a gánan nɛ, ǹ nə́ wusoo doo ǹ nə́ daa giã Zudaa gána nɛ.

⁶ Giĩn nə́ goã ǹ tan, lɔn nɛ, nɛnyaanan nɛ, kii a nɛlɔn nɛ, ka min mɛnɛn bɛ́ bǎã-lɛduə̃lin goledɛnaa Nebuzaradan nə́ ǹ koa Ayikaamu a nɛgiĩ Gedalia li, Safan a nɔ̀ɔn lɛa. Ǹ nə́ Lawa a boo gii-dali Zeremii dɔ kũ ka Neriya a nɛgiĩ Baruku ni.

⁷ Ǹ nə́ n piã ka Dɛnaa Lawa bɔlɔ sii ni, ǹ nə́ woo Ezipti gána nɛ, ǹ nə́ dɔ yǎa Tapanɛsi.

Nebukadenezɔɔrɔ a da kɔ Ezipti gána lɛ

⁸ Dɛnaa Lawa boo da Zeremii ni Tapanɛsi, á pɛ nɛ:

⁹ – Kɔlɔ dadaran goa, n nə ǹ duru banbaran kɛa tii li *Faarahɔn a kii kion kɛa kiɛnlɛ-a Tapanɛsi. A zɛnaa miɛ̃ Zudaa minin lɛn yɔrɔ-a.

¹⁰ Bɛ kio, n tɔn pɛ ǹ nɛ: «Dɛnaa Lawa Pàãyiidɛnaa, Izirayeli a Lawa n kɛ pii: Á ke, man die lɛ diɛ maa dí-nyali Baabiloniin kii Nebukadenezɔɔrɔ la. N kɔlɔn mɛnɛn lɛn wɔ tán, man die a kii dankan koɛ bɛn lɛn la. A n die a kiibaa ǹ zìã doe walan.

¹¹ Bɛ̀ á daa, á re yui Ezipti gána gialaa. Min mɛnɛn doamaa bɛ́ nɛ ǹ gã, bɛn tá re giɛ̃, ǹ mɛnɛn doamaa bɛ́ ka goa nɛ, ǹ tá bɛn goɛ, ǹ mɛnɛn doamaa bɛ́ ka gɔya sa gɛ̀ nɛ, gɔya sa á re bɛn dii.

¹² Ma á re tɛ diɛ Ezipti a dì kionən ganaa. Nebukadenezɔɔrɔ á re ǹ tiɛ̃, a ǹ goa a wo ǹ ne Baabilonii. Á re Ezipti gɔn màn tumaa goɛ lenlen ka tɔɔn-lɛduə̃li bɛ́ kɔrɔnkiɛ̃n wɛɛ a mɔnaa-n lɔn. Bɛ kio, á re n bɔyɛɛ a wo piɛ là nyantoro gɔ́ɔ̃ nɛ.

¹³ Á re dì nyínin yɔyɔrɛ Bɛti-Semɛsi kiwi, a tɛ da Ezipti a dì kionən ganaa.»