Zeremii 41 - LAWA A BOO SONBORE

¹ Lɛ̀ a mui sɔbaabaa ǹ wɔ li, Netania a nɛgiĩ, Elisamaa a nɔ̀ɔn Isimayeli daa Ayikaamu a nɛgiĩ Gedalia li Mispaa kun ka min fù ni. Isimayeli na á goã kii a sumu min lɛa. Á goã kii a dí-nyali gole goon din lɛa. A ǹ toa màn bii Gedalia a piɛ Mispaa,

² Netania a nɛgiĩ Isimayeli laanka a giĩ fù lɛ yoo, ǹ nə́ Safan a nɔ̀ɔn, Ayikaamu a nɛgiĩ Gedalia dɛ ka gɔya sa nɛ. *Baabiloniin kii min mɛn koa gánadɛnaa lɛa Zudaa gána nɛ, ǹ nə́ bɛ dɛ.

³ Zudaa min mɛn tumaa goã kun ka Gedalia nɛ Mispaa, Isimayeli bɛn tumaa dɛ kɔnlɛ ka Baabilonii sɔraasin ni, ǹ mɛnɛn tumaa goã walan.

Isimayeli zii tɔ-wɔle pɔkiwisi dɛ

⁴ Gedalia a gɛ̀ lɛawaa, min kɔn tɔn ma mà á gã wa.

⁵ Minin nə́ bɔ Sisɛmu, Siiloo, ka Samarii kiwi ni ǹ nə́ daa. Maǹ min pɔkiwisi, ǹ lɛtoro ka koɛ̃maa nɛ, ǹ mɔnaan nə́ tɔtoɛ̃ nɛ, ǹ nə́ n gɔ̀nɔn tɔtoɛ̃. Maǹ die Lawa gɔ ǹ màn laanka da yon gìĩ kɔɔ̃n nɛ Lawa a kion wɔ lɛa.

⁶ Netania a nɛgiĩ Isimayeli soo Mispaa á woo n da ǹ lɛ ka wuu ni. A bɛ́ á dɔ ǹ ganaa, á pɛ ǹ nɛ: «Ka da Ayikaamu a nɛgiĩ Gedalia a piɛ.»

⁷ Ǹ nə́ wɔ kiwi lɛ nɛ. Bǎã goon ne, Netania nɛgiĩ Isimayeli laanka a kiodɛnan lɛn nə́ ǹ dɛ, ǹ nə́ ǹ geren kaa nyankɔrɔ zuzulu ni.

⁸ Sɛnɛ, ǹ bii, min fù pɛ Isimayeli ni: «N nyan wɔ dɛ wa. Wɔ́ màn-bii duru wurun ni: *Belee ne, *ɔrzi ni, nyɔɔ nɛ ka zoo nyɔɔ nɛ.» Isimayeli tɔn bɛn toa walan, a ǹ dɛ kun ka ǹ dɔɔ̃nɔn lɛn nɛ wa.

⁹ Isimayeli min mɛnɛn lɛn dɛ kun ka Gedalia nɛ, a ǹ gere zũ nyankɔrɔ mɛn lɛ nɛ, kii Azaa na á fɔ̃ bɛ̀ a bɛ́ zia biɛ kɔn ka Izirayelin kii Bayesaa nɛ. Isimayeli bɛ pã ka gere ne.

¹⁰ Bɛ kio, min mɛn tumaa goã Mispaa, á ǹ tumaa baa kòso nɛn lɛa kɔnlɛ ka kii a nɛlɔn nɛ. Bǎã-lɛduə̃lin goledɛnaa Nebuzaradan minin mɛnɛn tumaa koa Ayikaamu a nɛgiĩ Gedalia li, á bɛn tumaa si. Netania a nɛgiĩ Isimayeli tɔn kiɛ̃ ka kòso nɛn lɛn nɛ á woo ǹ ne Amɔn tɔrɔn li.

Isimayeli a kòso nɛn kaa

¹¹ Kareya a nɛgiĩ Zoanan laanka sɔraasin nyɛɛnaandɛnan mɛnɛn nə goã kun ni, bɛn nə́ Netania a nɛgiĩ Isimayeli a minin dɛ boo lɛ ma.

¹² Ǹ nə́ ǹ sɔraasin tumaa sɔkɔn, màn mɛn bɛ́ toɛ ǹ wo a gialaa. Ǹ nə́ dɔ a ganaa Gabawɔ̃ a pɛrɛ gole kɛ lɛ-a.

¹³ Isimayeli a kòso nɛn lɛn bɛ́ ǹ nə́ Kareya a nɛgiĩ Zoanan yɛ ka a sɔraasi nyɛɛnaandɛnan nɛ a kio, ǹ foo kɔɔ̃n kɔ.

¹⁴ Isimayeli bɔ ka min mɛnɛn lɛn tumaa nɛ Mispaa, ǹ tumaa nə́ n bɔyaa ǹ nə́ kaa kun ka Zoanan nɛ.

¹⁵ Sɛnɛ, Isimayeli baa si Kareya a nɛgiĩ Zoanan nyɛɛnɛ kun ka min kiwisi ni ǹ nə́ woo Amɔn tɔrɔn li.

¹⁶ Bɛ kio, min mɛnɛn yii goã koo Netania a nɛgiĩ Isimayeli a wo bɛ̀rɛbaa ǹ bǎã-n wolen lɛn bii, Isimayeli a Ayikaamu a nɛgiĩ Gedalia dɛ kio Mispaa, Kareya a nɛgiĩ Zoanan laanka a sɔraasin nyɛɛnaandɛnan nə́ bɔ ka bɛn nɛ Gabawɔ̃ ǹ nə́ ǹ sɔkɔn. Giĩn ni goã ǹ tan sɔraasin lɛa, lɔn nɛ, nɛnyaanan nɛ, ka kii a sumu dí-nyalin ni.

¹⁷ Ǹ nə́ zii saa, ǹ nə́ woo golee Kiimaamu a golee ǹ bǎã kɛ nɛ, kunu Bɛtlehɛmu ganaa. Maǹ giɛ li ǹ wo Ezipti gána nɛ.

¹⁸ Maǹ nə́ goã nyɛ́ɛ biɛ Baabilonii minin manɛ a giala, Netania a nɛgiĩ Isimayeli na á Ayikaamu a nɛgiĩ Gedalia dɛ, Baabiloniin kii nə ǹ mɛn lɛ koa gánadɛnaa lɛa Zudaa gána mìi la.