Zeremii 4 - LAWA A BOO SONBORE

Dɛnaa Lawa

¹ Izirayeli, bɛ̀ n wusoo ń daa, n doamaa nɛ n wusoo n da masɛ li. N màn nyín bɔbɔnɛɛn kɛn, bɛn bɔ n nə ǹ bɔ n yɔrɔ-a, n ba re n bibiĩ n mìi gialaa doo wa.

² Bɛ̀ n tá pepere, bɔlɔgoondɛnaa lɛa, n gɔ́ɔ̃ n fu, bɛ̀ n lɛ kɔ wɔ, ń pɛ: «Ma nə n liɛ ka Dɛnaa Lawa Yiikoonaa tɔ nɛ», bɛa waáraa kəni, tɔrɔ kɔsɔn kɛn tá re ma nyankoe mà ma barka da ǹsɛn ganaa. Ǹ tá re gugurubaa yii masɛ taman yii.

³ Á ke, Dɛnaa Lawa n kɛ pii Zudaa laanka Zeruzalɛmu minin manɛ: Ka sɔ́ dii dɛ kaa wɔ lɛa. Ka nyan màn da nyan bii doo wa!

⁴ Ka n dinin kɔ Dɛnaa Lawa la lenlen, màn mɛn bɛ́ ka niɛ̃ ka boe masɛ ganaa ka bɛ bɔ, ka kaa yiikoonaabaa kɔ masɛ la. Bɛ bie wa, kaa sii baraan kɛn taman yii, man die maa foo-yoo kɛ kiɛ ka la, ka tɛ bɛ́ lɔn. Á re màn tumaa kuĩ, min kɔn ná a boe la a nimi wa.

Lɛ-dɛ n boe Zudaa

⁵ Ka boo kɛ pɛ Zudaa gána nɛ, ka sawaa Zeruzalɛmu. Ka sère gɔ̀lɔ̀ bɛn pɛ gána lɛ nɛ, ka n lɛ dɛ ka lɛn gole ne ka pɛ: «Ka n sɔsɔkɔn kiwi tamaa wolen ne!»

⁶ Ka sii giala pɛ ǹ màn doa tán *Siɔn, ka n mìi duru, ka nyan golee kaa giã ǹ bǎã-n wa. A giala, masɛ Dɛnaa Lawa n die ka koe ne boe gɔsɛ a lɛ̀gɔn la, koe gole ne.

⁷ Yàra soo tewon ne, min mɛn bɛ́ tɔrɔn ziziɛ̃, á ke die. A n soe a duru ǹ bǎã nɛ, die kaa gána lɛ ziziɛ̃. Kaa kiwin man die kɛbɔlɔn dadaran biɛ, min goon din ná a ba goɛ̃ ǹ nɛ wa.

⁸ Ka gɛ̀ koa ǹ mɔnaan wɔ, ka wuu pɛ, ka gini. Haayii! Dɛnaa Lawa a foo-yoo baraa lɛ nə n bɔ wɔ kio wa.

⁹ Bɛa pinaa lɛ nɛ, kiin laanka nyɛɛnaandɛnan foo á re ziziɛ̃, Dɛnaa Lawa a da ǹ boo ne. Lawa a wúlu-bɔlen yiri á re n lɔloɛkɔn, nyɛ́ɛ á re Lawa a boo gii-dalin kuĩ.

¹⁰ Ma á re pii kəni: – Áh! Dɛnaa Lawa, ń zaman lɛ laanka Zeruzalɛmu minin yiri sã taãn-taãnɛ, bɛ̀ n bɛ n goã ń pɛ: «Ka á re yii-nyɛɛ yii.» Sɛnɛ, gɔya sa n zoɛ̃ li á wɔ nyin boe.

Zɔ́ɔn man boe bǎã yii li die Dɛnaa Lawa

¹¹ Bɛa waáraa kəni, Dɛnaa Lawa á re pii Zeruzalɛmu minin manɛ: Kele mìi ni, piɛ̃ fuu nə n toɛ diə gole ne, die maa zaman gialaa. Piɛ̃ lɔnlɔɔn bie màn suu ǹ wɔ lɛa wa, màn *yoreen kɔ ǹ wɔ bie wa.

¹² Sɛnɛ piɛ̃ gole ne, ma lɛ dia la boe walan. Kanna kəni, man die kiri we ǹ ganaa.

Zaman

¹³ Zɔ́ɔn lɛn nə́ ke: maǹ die ka la a tì bɛ́ lɔn, Ǹ ziabaa ǹ wotoron yii n fuu ka piɛ̃ gole bɛ́ lɔn, ǹ sùin yii n fuu á la giogialatã-a nɛ. Wàa koe n ka kɛ nɛ! Wɔ́ sàabaa!

Dɛnaa Lawa

¹⁴ Zeruzalɛmu, bɛ̀ n tá giɛ kirisibaa li, baraabaa pii n bɔ n foo ne. N nə n die n taasiɛ baraan kɛn toɛ n gɔ́ɔ̃ nɛ yǎa biĩ kəni?

¹⁵ A kũ Dan ganaa, lɛ dia n boe gɔsɛ a lɛ̀gɔn la. A n koe giala pii, boe Efrayimu a kele yii kɛ nɛ.

¹⁶ Ka a giala pɛ tɔrɔn tumaa nɛ, ka a boo da Zeruzalɛmu: Zɔ́ɔn lɛn manə n mɔrɛ, maǹ boe gána sɔsɔɔ nɛ. Maǹ ziabaa ǹ lɛ-dɛ we Zudaa kiwin ganaa.

¹⁷ Ǹ nə́ Zeruzalɛmu lɛnpɛnɛ, ka wɔlɔ-lɛduə̃lin bɛ́ wuru lɛduĩ lɔn. A giala, a na á n gòãn dii masɛ ganaa. Dɛnaa Lawa a da ǹ boo ne

¹⁸ Zeruzalɛmu, n giã ǹ gɔn laanka n zɛnaa ǹ siin taman yii ni kɛ á n yii. N baraabaa lɛ a saraa nɛ. Hiĩ, n koe lɛ á kɔɔsɛ taãn-taãnɛ. A na á n kũ n foo ganaa.

Zeremii n busu koe koen kɛn taman yii die

¹⁹ Áh! Ma nɔ̀! Ma nɔ̀! Ma nə n duwii là paparɛɛ gɔn! Ma foo n die puri! Ma gɔ̀nɔn tumaa n bìn diɛ. Ma a n lɛ tiɛ̃ doɛ̃ wa. A giala, ma bɛn wuu ma, ka ziabaa ǹ lɛ-dɛ nɛ.

²⁰ Maǹ bɔ̀n dinsɔɔ̃ boo diɛ, gána lɛ tumaa ziziɛ̃. Ǹ nə́ wɔa mɔnaa kionən ziziɛ̃ bǎã goon ne, wɔa duru ǹ bǎãn nə́ papaã gunyin goon.

²¹ Ziabaa ǹ zanzan kɛ n die goɛ̃ ma yɔrɔ-a yǎa biĩ, man die n too koe bɛnɛn kɛn wuu ganaa miɛ̃ duduu?

²² Dɛnaa Lawa pɛ: Maa zaman lɛ a sii doɛ̃ wa, a ba ma doɛ̃ wa. Maǹ nɛnyaanan lɛa, ǹ ba n taasɛ wa, ǹ ba sii kɔn giala miɛ wa. Ǹ tá kɔn doɛ̃ ka sii baraa zɛnaa nɛ, sɛnɛ, ǹ ba kɔn doɛ̃ ka bǐɛ̃-n wa.

²³ Man giɛ tán ganaa, a gɔ́ɔ̃ kooromaa nɛ, màn kɔ́n banban. Man giɛ lon ganaa, wɔlɔ fúlu banban.

²⁴ Man giɛ kelen ganaa: maǹ bìn diɛ. Tenten tumaa n bìn diɛ.

²⁵ Man giɛ, á ke, ma yii a minbuiin nɛ kɔn ganaa wa, bàanan tumaa sawaa.

²⁶ Man giɛ, á ke, gána sonbore lɛ diə gole baa. Ǹ ná a kiwin tumaa ziziɛ̃. Dɛnaa Lawa a lɛa nɛ, ka a foo-yoo baraa kɛ nɛ.

²⁷ Dɛnaa Lawa bɛ́ boo mɛn diɛ, á ke: Gána lɛ tumaa á re n bɔyɛɛ a diə gole baa, sɛnɛ, ma a re ziziɛ̃ lenlen wa.

²⁸ Bɛ lɛ nɛ, tán nə gɛ̀ koɛ, lon, labara gɔ̀nɔn nə́ tii. Hiĩ! Ma màn mɛn pɛ, man bɛ lɛ zɛnɛɛ, ma a re n lɛ boe, ma wusoo maa da ǹ boo kio wa.

Zeruzalɛmu n gɛ̀-dɛlin gɔn

²⁹ Sùidɛnan laanka sa-zũlin bìn diɛ nyɛɛnɛ, kiwin tumaa a minin man baa sii. Maǹ baa sii kiɛ tewonən ne, ǹ nə́ dii gɛ̀fun la. Ǹ nə́ n la bɔ kiwin tumaa ganaa, min kɔn ba ǹ nə́ wa.

³⁰ Sɛnɛ, nsɛ Zeruzalɛmu ke ń ziziɛ̃, ma n wàa zɛnɛɛ? Ń mɔnaa sonbore wɔ, ka nyaǹ mànan nɛ sana lɛa. Ń kala lɔ n yii li n nə́ n din siĩn koe ne. Sɛnɛ, n din zɛnaa kɛa là banban. N sanan manə n pɔpɔsɛ, maǹ giɛ n gɛ̀ li.

³¹ Sonbore, ma á lɛ-dɛ miɛ̃, ka lɔ nɛ-yɛli bɛ́ lɔn, lɔ ten a lɛ-dɛ lɛa, a gɔ́ɔ̃ yii bibinaa nɛ yii. Siɔn kiwi a lɛ-dɛn manɛ. A n gini, á n gɔnɔn lɛ boe: «Aba! Man giɛ̃ gɛ̀-dɛlin mandɛ gɔn.»