Zeremii 38 - LAWA A BOO SONBORE

Zeremii n nyankɔrɔ zuzulu ni

¹ Matan a nɛgiĩ Sefatiya nɛ, Pasewuru a nɛgiĩ Gedalia nɛ, Selemia a nɛgiĩ Yukaali ni, ka Malkia a nɛgiĩ Pasewuru ni, ǹ nə́ Zeremii a boon kɛn ma á goã ǹ pii zaman tumaa nɛ:

² Dɛnaa Lawa n kɛ pii: «Min woo min giã kiwi kɛ nɛ, bɛa dɛnaa á re giɛ̃ zia taman yii, bòo ne, ka piɛ̃ busu ni. Sɛnɛ min mɛn bɛ́ re soe a wo n din wɔ *Baabilonii minin gɔn, bɛ yii á re goɛ̃ koo sɛn.»

³ Dɛnaa Lawa n kɛ pii doo: «Ma á re kiwi kɛ we Baabiloniin kii a sɔraasin gɔn. Sàabaa ba la wa ǹ tá re kuĩ.»

⁴ Bɛ kio, gána nyɛɛnaandɛnan nə́ pɛ kii Sedekiasi ni: «Zeremii dɛ a gã. A bɛ́ boo mɛn diɛ, bɛ n sɔraasin foo ziziɛ̃, ka zaman kɛ nɛ kiwi. A bie giɛ zaman lɛ a bǐɛ̃ li wa, a n giɛ a koe li.»

⁵ Kii Sedekiasi tɔ́n nə ǹ lɛ si: «Bɛ̀ sii mɛn kɔɔ̃n kɔ ka ganaa, ka bɛ zɛnaa nɛ. Ma din ni kii lɛa, sɛnɛ ma a boe la ma ka kurəə sii kɔn ganaa wa.»

⁶ Gána nyɛɛnaandɛnan lɛn nə́ Zeremii saa, ǹ nə́ zũ kii a nɛgiĩ Malkia a nyankɔrɔ zuzulu kɛ nɛ. Maǹ nə́ Zeremii gisĩ nyankɔrɔ lɛ nɛ ka biɛ nɛ. Bɛa nyankɔrɔ zuzulu lɛ n bǎã-lɛduə̃lin sumu-n. Mu goã a-n wa, yǎa bɛrɛɛ. Bɛa bɛrɛɛ lɛ Zeremii kũ.

⁷ A da yaa, Etiopii min goon goã dí-nyali yii guguru-a lɛa kii a kion, a tɔ n Ebɛdi-Melɛki. Bɛ ma mà maǹ nə́ Zeremii da nyankɔrɔ zuzulu lɛ nɛ. Kii sɛ na á goã golee-n Bɛnzamɛn tɔrɔn kiɛnlɛ-a.

⁸ Ebɛdi-Melɛki woo kii lɛ li á pɛ nɛ:

⁹ «Dɛnaagiĩ kii ganaa, minin lɛn nə sii mɛn zɛnaa Lawa a boo gii-dali Zeremii ni, sii baraa nɛ. Maǹ nə́ zũ nyankɔrɔ zuzulu ni. A n die giɛ̃ bòo gɔn a giala, màn-bii ba kiwi lɛ-n wa.»

¹⁰ Kii tɔn kɛa boo kɛ pɛ Etiopii min Ebɛdi-Melɛki ni: «Ga min sɔɔ li ka wo Zeremii baã nyankɔrɔ lɛ nɛ ka soo ne bɛ̀ a ná a tɔn gã wa!»

¹¹ Ebɛdi-Melɛki daa ka min sɔɔ lɛ nɛ. Á kiɛ̃ á woo kii a kion, kion nɛ goon ne, naforon tamaa ǹ kion kɛ giulun, á mɔnaa kunun goa walan. Á bɛa mɔnaa kunun lɛn dia Zeremii la nyankɔrɔ lɛ nɛ kɔnlɛ ka biɛn nɛ.

¹² Etiopii min Ebɛdi-Melɛki tɔn pɛ Zeremii ni: «Mɔnaa kunun kɛn wɔ n nyàan giulun, n tɔn biɛn lɛn da la.» Zeremii dɔ zɛnaa miɛ̃.

¹³ Bɛa minin lɛn nə́ tɔn Zeremii baã ǹ nə́ soo ne nyankɔrɔ zuzulu lɛ nɛ. Bɛ kio, Zeremii goã bǎã-lɛduə̃lin sumu lɛ nɛ.

Kɔn yɛ giala nyɔmɔɔ ka kii ni

¹⁴ Kii Sedekiasi min dia mà a wo lɛ dia Lawa a boo gii-dali Zeremii la. Á daa nɛ Lawa a kion a kiɛnlɛ sɔɔbaa ǹ wɔ kɛ li. Á pɛ nɛ: «Man die nɔ̀n goon diɛ n la, n nyan boo kɔn duru ma la wa.»

¹⁵ Zeremii Sedekiasi lɛ si kɛnɛn: «Bɛ̀ má sonbore pɛ n nɛ, n nə die ma nyin boe. Bɛ̀ ma doroo kɔ n la, n ba re koe lɛ wa!»

¹⁶ Sɛnɛ, kii Sedekiasi lɛ kɔ wɔ ka durii ni Zeremii-n kɛnɛn: «Ká Dɛnaa Lawa Yiikoonaa tɔ nɛ, asɛ mɛn yiikoonaabaa kɔ wɔ la, ma a re n nyin boe wa. Min mɛnɛn dɔn bɛ́ zoɛ̃ n gɛ̀ li, ma a re n we bɛn gɔn wa.»

¹⁷ Zeremii tɔ́n pɛ Sedekiasi ni: – Dɛnaa Lawa Pàãyiidɛnaa, Izirayeli a Lawa n kɛ pii: «Bɛ̀ n nə́ n din wɔ Baabiloniin kii a gána nyɛɛnaandɛnan gɔn, n yii á re goɛ̃ koo kɔnlɛ ka n sumu minin ni. Tɛ a re n diɛ Zeruzalɛmu ganaa dɔn wa.

¹⁸ Sɛnɛ, bɛ̀ n nə n din wɔ Baabilonii gána nyɛɛnaandɛnan lɛn gɔn wa, Zeruzalɛmu n die n we ǹ gɔn, ǹ tɛ da a ganaa. N ba re liɛ ǹ la wa.»

¹⁹ Kii Sedekiasi Zeremii lɛ si: «Zudaa minin mɛnɛn nə n dinin wɔ Baabilonii minin gɔn, man nyɛ́ɛ biɛ máa ǹ yaa kiɛ̃ ma we ǹ gɔn, ǹ baraa zɛnaa ma nɛ.»

²⁰ Sɛnɛ, Zeremii pɛ nɛ: «Haayii, ǹ ba re n we ǹ gɔn wa. N too kɔ Dɛnaa Lawa a boo kɛ li doɛ̃ ma á pii n ni. N sii tumaa á re bǐɛ̃ koe, n yii á re goɛ̃ koo.

²¹ «Sɛnɛ, bɛ̀ ń nə́ n piã, n nə n din wɔ ǹ gɔn wa, Dɛnaa Lawa sii mɛn nyaa ma nɛ, á ke:

²² Lɔn mɛnɛn tumaa bɛ́ re goɛ̃ kii kion lɛ nɛ, ǹ tá re ǹ tumaa goɛ ǹ wo ǹ ne Baabilonii gána nyɛɛnaandɛnan yɔrɔ-a, ǹ loe lɔ bɛ̀ ǹ tá n tɔ pii: Ǹ nə́ n sã taãn-taãnɛ, n giaára sonboren lɛn! Ń bɛ́ ń paraa bɛrɛɛ li ǹ mɛn waáraa, ǹ nə́ n la bɔ n ganaa!

²³ «Taãn nɛ, ǹ tá re woe n lɔn laanka n nɛnyaanan nɛ Baabilonii minin yɔrɔ-a. N dinmaa dɔ a re kanbiɛ ǹ ganaa wa. Baabiloniin kii á re n biɛ kòso nɛ lɛa, a tɛ da Zeruzalɛmu ganaa.»

²⁴ Sedekiasi tɔn Zeremii lɛ si: «Wɔ boo mɛn da sisia, n nyan toa min kɔn bɔ a siére-a wa. Ka bɛ-n kəni, n ba re giɛ̃ wa.

²⁵ Sàabaa ba la wa, gána nyɛɛnaandɛnan tá re boe a siére-a mà wɔ́ boo da. Ǹ tá re pii n ni: N boo mɛn pɛ kii ni, ka kii boo mɛn pɛ n nɛ, bɛ pɛ wɔ nɛ, ka bɛ nɛ wɔ a re n nyin boe wa.

²⁶ N die n nə ǹ lɛ si mà nsɛ nə n kii nyankɔ parsiini má a nyan wo n ne Zonaatan a kion kɛ-n doo wa. Bɛ bie wa, mà n nə ǹ die giɛ̃.»

²⁷ Sonbore, gána nyɛɛnaandɛnan lɛn tumaa daa Zeremii yaa, ǹ nə́ nɔ̀n dada la. Sɛnɛ, Zeremii nə́ ǹ lɛ si ka kii goã á pɛ-n lɔn. Ǹ nə́ tɔn Zeremii toa kiĩni, a giala min kɔn nə ǹ laanka kii a boo ma wa.

²⁸ Zeremii na á goã wɔlɔ-lɛduə̃lin sumu lɛ nɛ yǎa Zeruzalɛmu a kuĩ pinaa. Ǹ Zeruzalɛmu kũ ka yɔrɔ mɛn nɛ á ke: