Zeremii 37 - LAWA A BOO SONBORE

Zeremii n kòso ne

¹ Baabiloniin kii Nebukadenezɔɔrɔ na á Zoziasi a nɛgiĩ Sedekiasi koa kii lɛa Zudaa gána mìi la. Sedekiasi na á Zozakimu a nɛgiĩ Konia bǎã saa.

² Sɛnɛ, Dɛnaa Lawa a gɔn waa ǹ boon kɛn Zeremii goã ǹ diɛ, min kɔn goã ǹ too koe ǹ li wa, kii dinmaa nɛ, a gána nyɛɛnaandɛnan nɛ, ka Zudaa minin ni.

³ A da yaa, kii Sedekiasi na á Selemia a nɛgiĩ Yukaali laanka Maseya a nɛgiĩ Lawa a wúlu-bɔle Sefania dia Zeremii li. Ǹ nə́ pɛ-n kɛnɛn: «Dɛnaa Lawa, wɔa Lawa nyankɔ wɔa lɛa!»

⁴ Bɛa biikoo li, bɛ̀ ǹ tɔn Zeremii da kòso-n wa. Á goã boe la a n bibiə̃ a din dùũ li zaman bii.

⁵ *Faarahɔn a zia kuru goã boe Ezipti gána-n die. *Baabilonii minin mɛnɛn nə goã ǹ nə́ yoo Zeruzalɛmu kiwin gialaa, ǹ bɛ́ ǹ nə́ bɛa boo lɛ ma, ǹ nə́ n wɔlɔ lui kiwi lɛ ganaa.

⁶ Dɛnaa Lawa tɔn boo da Lawa a boo gii-dali Zeremii ni á pɛ nɛ:

⁷ – Dɛnaa Lawa Pàãyiidɛnaa, Izirayeli a Lawa n kɛ pii: «Zudaan kii mɛn nə ka dia ma li, ka wo pɛ-n kɛnɛn: Faarahɔn a sɔraasin mɛnɛn nə soo mà man die n doe ka lɛ, ǹ nə́ n bɔyaa ǹ nə́ woo Ezipti gána nɛ.

⁸ Baabilonii minin tá re wusii ǹ yoo Zeruzalɛmu gialaa. Ǹ tá re kuĩ, ǹ tɛ da a ganaa.

⁹ Masɛ Dɛnaa Lawa n kɛ pii: Ka nyan ka dinin yiri sã ka pɛ mà Baabilonii minin lɛn nə́ woo ǹ nə n bɔ ka li wa. Haayii, ǹ ba re woe wa!

¹⁰ Ta ka n boe Baabilonii gána a sɔraasin tumaa la, ǹ mɛnɛn yii bɛ́ re goɛ̃ koo ǹ bii busulən lɛa, bɛn tá re yui ǹ zìã kionən ne, ǹ tɛ da Zeruzalɛmu kiwi ganaa.»

¹¹ Baabilonii a sɔraasin nə́ n wɔlɔ sɔsɔɔ kɔ Zeruzalɛmu ganaa Ezipti gána a sɔraasin lɛn taman yii.

¹² Zeremii goã li a soo a kiwi lɛ nɛ a wo Bɛnzamɛn minin gána nɛ, sumu boo ganaa ǹ dɔɔ̃nɔn li.

¹³ A bɛ́ á dɔ Bɛnzamɛn minin kiɛnlɛ-a, á n da wɔlɔ-lɛduə̃lin goledɛnaa Iriya lɛ, Anania a nɔ̀ɔn lɛa, Selemia a nɛgiĩ lɛa. Iriya Lawa a boo gii-dali Zeremii bíi á pɛ nɛ: «N nə n woe n kiɛ kun ka Baabilonii minin ni!»

¹⁴ Zeremii ná a lɛ si kɛnɛn: «Haayii, ma bie woe n kiɛ kun ka Baabilonii minin ni wa!» Sɛnɛ, Iriya nə n too kɔ Zeremii lon wa. Á kũ, á woo ne a goledɛnan li.

¹⁵ Ǹ foo goã yoo-n Lawa a boo gii-dali Zeremii li parsiini, yǎa ǹ nə́ dɛdɛ. Ǹ nə́ tɔn a lɛ tã sɛ́wɔ-kiɛ̃li Zonaatan a kion kɛ nɛ ǹ nə́ bɔyaa ǹ nə́ baa kòso kion lɛa.

¹⁶ Ǹ Zeremii da bǎã mɛn nɛ, nyankɔrɔ zuzulu ni. Á goã walan á belebɔ.

¹⁷ Ǹ kɔn pinaa, kii Sedekiasi min dia mà a wo lɛ dia la. A n li a nɔ̀n da la ka durii ni a kii kion lɛ nɛ. Kii lɛ nɔ̀n da la: «Dɛnaa Lawa boo da n nɛ masɛ a paǹ li?» Zeremii ná a lɛ si: «Hiĩ, Dɛnaa Lawa á re n we Baabiloniin kii gɔn.»

¹⁸ Á tɔn pɛ kii lɛ nɛ: «Ma n má wàa la n la, n gána nyɛɛnaandɛnan nɛ ka Zeruzalɛmu minin ni ka n ma diɛ kòso ne?

¹⁹ Kaa Lawa a boo gii-dalin mɛnɛn nə pɛ mà Baabiloniin kii ba re yui ka gialaa ka zia-n wa, mà a re yui kaa gána dɔ gialaa wa, bɛn maǹ maa pelo?»

²⁰ Zeremii tɔn kɛ ti a ganaa: «Kii, n too kɔ ma lon kanna. N too kɔ maa nyankɔ li. N nyan ma dia sɛ́wɔ-kiɛ̃li Zonaatan a kion doo wa, bɛ bie wa, man die giɛ̃.»

²¹ Kii Sedekiasi tɔn pɛ mà ǹ Zeremii da bǎã-lɛduə̃lin sumu kɛ nɛ, ka buuru mɔ̀mɔ mìi goon kɔ la baraabaraa, buuru mɛn bɛ́ boe buuru-dalin bǎã kɛ nɛ yǎa bɛ̀ buuru nya kiwi lɛ nɛ. Bɛa yɔrɔ lɛ la, Zeremii goã bǎã-lɛduə̃lin sumu lɛ nɛ.