Zeremii 35 - LAWA A BOO SONBORE

Rekabu tɔrɔn sii a kɔnboe

¹ Zoziasi a nɛgiĩ Zudaan kii Zozakimu a kiibaa waáraa, Dɛnaa Lawa boo da Zeremii ni á pɛ nɛ:

² «Wo dɔ Rekabu tɔrɔ minin li, n pɛ ǹ nɛ mà ǹ da wɔ Lawa a kion lɛ a kion nɛ goon ne. N tá re duvɛ̃ koe ǹ la walan ǹ mi.»

³ Zeremii tɔn woo ga Abasinia a nɔɔn, Irmeya a nɛgiĩ Yazania li. Á woo ga Yazania a nɛnyaanan li, bɛ giala mà Rekabu tɔrɔn tumaa.

⁴ Á woo ǹ ne Lawa a kion, Idigaliya a nɛgiĩ, Lawa a min Hanan a nɛgiĩn kion nɛ kɛ nɛ. Bɛa kion nɛ lɛ n kiãn kion genli, Salumu a nɛgiĩ Maseya a kion nɛ kɛ lalan, ke Lawa a kion a wɔ ǹ kiɛnlɛ lɛduĩ.

⁵ Zeremii mànan kaa tán piɛ̃-n ka duvɛ̃ nɛ, ka paanan nɛ Rekabu a tanlɛ minin lɛn yɔrɔ-a. Á tɔn pɛ ǹ nɛ: «Ka duvɛ̃ boɛɛn mi!»

⁶ Sɛnɛ, ǹ ná a lɛ si: «Wɔ a duvɛ̃ mii wa. A giala, wɔ digolo Zonaadaabu ke Rekabu a nɛgiĩ lɛa, bɛ na á n gɔn waa wɔ-n kɛnɛn: Ka nyan duvɛ̃ mi duduu wa, ka dinin ni, ka kaa nɛnyaanan nɛ.

⁷ Ka nyan kion dɔ wa, ka nyan tán kɔsɔ wa. Ka nyan *rezɛ̃ da zumu wa, bɛ kɔn nyan goã ka lon wa. Sɛnɛ, ka ǹ die giɛ̃ zìã kionən ne miɛ̃ duduu. Ka bɛ-n kəni, ka á re nyin sasa yii gána kɛ nɛ, ka bɛ́ tiibaa nɛ ǹ mɛn lɛ nɛ pelo.

⁸ «Wɔ digolo Zonaadaabu boo mɛn tumaa pɛ wɔ nɛ, wɔ n wɔ́ kɔ bɛ lɛ lɛ. Wɔa duvɛ̃ mii duduu wa, wɔa lɔn nɛ, wɔa nɛgiĩn ni ka wɔa nɛlɔn nɛ.

⁹ Wɔ a kion doe wɔ giã-n wa. Wɔ a rezɛ̃ wuru boe wa, wɔ a tán kɔsɛ wa.

¹⁰ Sɛnɛ, wɔ n giɛ̃ zìã kionən ne. Wɔ digolo Zonaadaabu nə n gɔn waa wɔ nɛ ka boo mɛn tumaa nɛ, wɔ n wɔ́ kɔ bɛn lɛ.

¹¹ Sɛnɛ, Baabiloniin kii Nebukadenezɔɔrɔ bɛ́ á yoo gána lɛ gialaa, wɔ́ taasiɛ wɔ kɛnɛn: Á soɛ wɔ ganaa wɔ wo Zeruzalɛmu màn mɛn bɛ́ toɛ wɔ kanbaa *Baabilonii gána a sɔraasin laanka Siirii gána wɔn ganaa. Sisia, wɔ n giã-n kiwi lɛ gɔ́ɔ̃ nɛ.»

¹² Dɛnaa Lawa tɔn boon kɛn da Zeremii ni:

¹³ – Kanna, boo da Zudaa laanka Zeruzalɛmu minin manɛ, n pɛ ǹ nɛ: «Sisia kəni, ka á re lɛ koe doroo kɛ ganaa, ka n too kɔ maa boon li?» Dɛnaa Lawa a da ǹ boo ne.

¹⁴ Rekabu a nɛgiĩ Zonaadaabu pɛ a nɛnyaanan manɛ mà ǹ baran duvɛ̃ mi wa. Rekabu tɔrɔn lɛn nə́ bɛa boo lɛ si, ǹ duvɛ̃ mi wa, a da pelo yaa. A giala, maǹ nə́ ǹ digolo bɔlɔ si. Sɛnɛ, biikoo tumaa li, masɛ Dɛnaa Lawa boo da ka nɛ, sɛnɛ, ka n too kɔ ma lon wa.

¹⁵ Biikoo tumaa li, má maa dí-nyalin maa Lawa a boo gii-dalin dia ka la. Kɔn kio ganaa, maǹ nə́ goã pii ka nɛ: «Didie tumaa na a giã ǹ gɔn baraa kaa. Ka sii zɛnaa a yɔrɔ li. Ka nyan kɔ dì kɔsɔn lɛ ka ǹ guguru kɔ wa. Ma gána mɛn kɔ ka laanka ka digolon la, ka á re boe la ka giã bɛ-n kəni.» Sɛnɛ, ka n too da wa, ka n too kɔ ma lon wa.

¹⁶ Rekabu tɔrɔn sɛn nə kɔ ǹ digolo Zonaadaabu a gɔn waa lɛ. Sɛnɛ, kasɛn Zudaa minin, ka n too kɔ ma lon wa!

¹⁷ Zeremii pɛ doo: – Bɛ lɛ nɛ, Dɛnaa Lawa Pàãyiidɛnaa, Izirayeli a Lawa á kɛ pii: «Zudaa minin ka Zeruzalɛmu minin, ma goã má koe mɛn boo da, man die bɛ lɛ boe ka ganaa. A giala, má boo da ka nɛ, sɛnɛ ka n too kɔ ma lon wa. Ma lɛ dia ka la, sɛnɛ ka n nyəə wa.»

¹⁸ Bɛ kio, Zeremii pɛ Rekabu tɔrɔn lɛn manɛ: – Dɛnaa Lawa Pàãyiidɛnaa, Izirayeli a Lawa n kɛ pii: «Ká kɔ ka digolo Zonaadaabu a gɔn waa lɛ. A boo mɛn tumaa pɛ ka nɛ, ka kɔ ǹ tumaa lɛ.

¹⁹ Á bǐɛ̃ kɔ, bɛ lɛ taman yii, Dɛnaa Lawa Pàãyiidɛnaa, Izirayeli a Lawa n kɛ pii: Min tá re yii Rekabu a nɛgiĩ Zonaadaabu a sumu-n duduu, a dí nya ma yɔrɔ-a lɛawaa tumaa li.»