Zeremii 30 - LAWA A BOO SONBORE

Lawa n lɛ koe a zaman la

¹ Dɛnaa Lawa boo da Zeremii ni á pɛ nɛ:

² «Masɛ Dɛnaa Lawa, Izirayeli a Lawa a da ǹ boo á ke. Ma bɛ́ boon mɛnɛn diɛ n nɛ, ǹ tumaa kiɛ̃ sɛ́wɔ nɛ.

³ Taãn nɛ, man kɛ pii n ni: Ǹ kɔn pinaa, man die wusii ma da maa zaman Izirayeli laanka Zudaa a wo bɛ̀rɛbaa ǹ bǎã-n wolen kɛn nɛ. Man die wusii ma da ǹ nɛ gána kɛ nɛ má kɔ ǹ digolon la, ǹ wusoo ǹ si, ǹ baa ǹ wɔ lɛa. Ma din Dɛnaa Lawa a da ǹ boo ne.»

⁴ Dɛnaa Lawa boon mɛnɛn da Izirayeli laanka Zudaa a paǹ li, bɛn nə́ ke:

⁵ «Dɛnaa Lawa n kɛ pii: Wɔ́ nyɛ́ɛ baa ǹ lɛ-dɛ ma, nyɛ́ɛ gole ne, bǐɛ̃ bie wa.

⁶ Ka nɔ̀n da minin la, ka ga a ganaa: Giĩ á boe la a nɛ yɛ? A da yaa, ma yii n giĩn tumaa ganaa, ǹ gɔnɔn nə́ ǹ kii la ka lɔ bɛ́ lɔn a nɛ yɛ waáraa, ǹ yɔrɔ n ziziɛ̃ nɛ.

⁷ Koe n ka kɛ nɛ! Lɛawaa baraa nɛ! A kɔnbɔ ka lɛawaa kɔn nɛ wa! Zakɔba tɔrɔn foo ziziɛ̃ lɛawaa nɛ, sɛnɛ, ǹ tá re kanbiɛ.»

⁸ Dɛnaa Lawa Pàãyiidɛnaa a da ǹ boo á ke: «Ǹ kɔn pinaa, ma á re ǹ sii ma ǹ bɔ pàã kɛ gɔn, ke ǹ wìi li ka zǔu bɛ́ lɔn. Ma á re ǹ zɔrɔkan kɛn niɛ̃ ma bɔ ǹ ganaa. Bɛa waáraa kəni, ǹ ba re bɛ̀rɛn biɛ tiin gɔn wa.

⁹ Sɛnɛ, maǹ die dí nyɛɛ masɛ din Dɛnaa Lawa, ǹ Lawa nɛ. Ǹ tá re dí nyɛɛ ǹ kii Davida a kion min kɛ nɛ, ma á re koɛ ǹ mìi la.»

¹⁰ Dɛnaa Lawa a da ǹ boo á ke: Nsɛ Zakɔba, maa dí-nyali, nyɛ́ɛ nyan nə n kũ wa, N gɔ̀nɔn nyan bìn da wa nsɛ Izirayeli. Taãn nɛ, ma á re n kirisibiɛ, ma n bɔ ma n bɔ gána sɔsɔɔn kɛn nɛ, ma n nɛnyaanan kɛn waa bɛ̀rɛbaa ǹ bǎã nɛ, ma da ǹ nɛ. Zakɔba, n tá re n bɔyɛɛ n daa, n giã kiĩ ni, yii-nyɛɛ gɔ́ɔ̃ nɛ. Min kɔn ba re nyɛ́ɛ diɛ n ganaa doo wa.

¹¹ Masɛ Dɛnaa Lawa a da ǹ boo á ke: Ma tá kunun n ni, ma á n kirisibiɛ. Ma wo n ne tɔrɔn mɛnɛn bii, Ma á re bɛn tumaa bɔ̀nbiɛ. Sɛnɛ, ma a re nsɛ bɔ̀nbiɛ wa. Taãn nɛ, ma a re n toɛ walan dɔlɔ baã wa. Ma á re n doree ka peperebaa nɛ.

¹² Dɛnaa Lawa a da ǹ boo á ke: N busulɛ lɛ á baraa, n bayɛrɛ kɛ a nyɛɛ wa.

¹³ Min kɔn ba n zia gii diɛ wa. Busu n nyɛɛ lɛlɛ ǹ dun, sɛnɛ, nsɛ wɔ kɛa dagòã banban.

¹⁴ N sanan tumaa yiri bɔ n nɛ. Ǹ laadoo ba n ganaa doo wa. Zeruzalɛmu, má n dɛ ka zɔ́ɔ bɛ́ lɔn, má dɔlɔ baraa bɔ n ganaa, n sã gole kɛ laanka n sii baraa damata kɛa lɛa.

¹⁵ A n siɛ lɔn kəni n tá wuu pii n busu kɛ laanka n la paparɛɛ kɛ taman yii? Min kɔn ba boe la a na a kaka kɔ wa. N sã gole kɛ laanka n sii baraa damata kɛa lɛa nɛ má fuun kɛn da n mìi ni.

¹⁶ Sɛnɛ, min mɛn tumaa basaã kɔ n nɛ, ma á re basaã koe ǹ dɔn manɛ. Ń zɔ́ɔn tumaa á re woe bɛ̀rɛbaa ǹ bǎã nɛ. Min mɛnɛn bɛ́ koɛɛn we n ne, ǹ tá re koɛɛɛn we ǹ dɔn manɛ. Min mɛnɛn bɛ́ mɛnɛɛ n la, ǹ tá re mɛnɛɛ ǹ dɔn la.

¹⁷ Nsɛ mɛn bɛ́ ǹ nə́ goã n bíi "màn kooro" *"Siɔn mɛn bɛ́ laadoo ba a ganaa wa", ma á re n busulɛn nyɛɛ ma n kaka kɔ. Masɛ Dɛnaa Lawa a da ǹ boo ne.

¹⁸ Dɛnaa Lawa n kɛ pii: Ma á re Izirayeli minin lɛlɛ ǹ giã ǹ gɔn koe ǹ la. Ma á re makara boe ǹ kion minin ganaa. Ǹ nə ǹ kiwin mɛnɛn yu, ǹ tá re wusii ǹ bɛn dɔ ǹ bǎã nɛ, ǹ kion sonboren kɛn nə ǹ lɛlɛ bǎãn saa.

¹⁹ LOE laanka foo kɔɔ̃nbaa ǹ lɛ-dɛ á re boe walan. Ma á re barka diɛ ǹ ganaa, ǹ mɔnaa. Ma á re yii gugurubaa koe ǹ la. Ǹ ba re ǹ puusə koe doo wa.

²⁰ Zakɔba tɔrɔn kɛn, ǹ tá re n biɛ ka lɛlɛ bɛ́ lɔn. A zaman lɛ gòã á re we tán ma yɔrɔ-a. Min woo min yoo ǹ ganaa, ma á re yui bɛa dɛnaa gialaa.

²¹ Dɛnaa Lawa a da ǹ boo á ke: Ǹ dinin min goon nə die ǹ kiã biɛ. Min mɛn bɛ́ re ǹ nyɛɛnaan boe, ǹ dɛnaa n die yii ǹ dinin bii. Ma á re toɛ a n mɔrɔ ma ganaa. Die yii n we dinin a n mɔrɔ masɛ gana a din li?

²² Ka á re maa zaman biɛ, ma dɔ á re kaa Lawa biɛ.

²³ Dɛnaa Lawa a piɛ̃ gole n die, a foo yoo baraa puru. Piɛ̃ gole n boe, kurunkurun gole ne, a n kuĩ zɛ̀rɛdɛnan mìi ni.

²⁴ Dɛnaa Lawa a golee ka a foo-yoo baraa kɛ-n wa, yǎa bɛ̀ a din dùũ sii kɛ nə́ n zɛnaa á nya ǹ mɛn waáraa. Ǹ kɔn pinaa, ka á re a giala miɛ.