Zeremii 27 - LAWA A BOO SONBORE

Zǔu mɛn bɛ́ Baabiloniin kii a pàã giala pii

¹ Zoziasi a nɛgiĩ Zozakimu a kiibaa giala kɔ waáraa Zudaa gána mìi la, Dɛnaa Lawa boo da Zeremii ni á pɛ-n kɛnɛn:

² – Dɛnaa Lawa màn mɛn pɛ ma nɛ á ke: «Ki ma, n gɔnɔn sɛlɛ, n zǔun zɛnaa. Bɛ kio, n nə ǹ kaa n wìi li.

³ N tɔn nə ǹ kɔ Edɔmun kii a dí-nyali gole kɛ la kànaa, Moabu gána a kii wɔ nɛ, Amɔnitin kii wɔ nɛ, Tiirin kii wɔ nɛ ka Sidɔn gána kii wɔ nɛ, ǹ mɛnɛn bɛ́ ǹ nə́ daa Zeruzalɛmu Zudaan kii Sedekiasi li.

⁴ N die n kɛ laa ǹ ganaa ǹ kiin wɔ lɛa mà Dɛnaa Lawa Pàãyiidɛnaa, Izirayeli a Lawa n kɛ pii:

⁵ Ma din ni má tán zɛnaa, minbuiinin ni ka tɔɔn tumaa-n tán la. Man má ǹ zɛnaa ka ma pàã gole kɛ laanka maa boo sii la gole kɛ nɛ. Bɛ̀ min mɛn kɔɔ̃n kɔ ma ganaa, ma mànan mɛnɛn zɛnaa ma ǹ koe bɛa dɛnaa la.

⁶ Kanna kəni, man die kaa gánan kɛn tumaa kiɛ maa dí-nyali *Baabiloniin kii Nebukadenezɔɔrɔ a pàã giulun. Gòon-mànan dinin tá re a dí nya ǹ mànan biɛ.

⁷ Tɔrɔ tumaa á re dí nyɛɛ nɛ, a nɛgiĩn ni ka a nɔ̀ɔnɔn nɛ. Bɛ n die n zɛnɛɛ miɛ̃ yǎa biikoo mɛn li bɛ̀ tɔrɔ gigiã laanka kii pàãdɛnan ná a dɔ a gána da ǹ dɔn pàã giulun.

⁸ Kɔntan, gána hinlaa tɔrɔ kɔn tá yii a n piã ka Nebukadenezɔɔrɔ a pàã kɛ nɛ, ke ma da ǹ wìi li ka zǔu bɛ́ lɔn. Á bǐɛ̃ kɔ, man die yui bɛa gána kɛ gialaa ka zia nɛ, bòo ne ka piɛ̃ busu ni. Man die Baabiloniin kii biɛ bɛa gána lɛ a ziziɛ̃ wole lɛa. Dɛnaa Lawa a da ǹ boo ne.

⁹ Kasɛn, ka nyan nə n too kɔ kaa Lawa a boo gii-dalin lon wa, ǹ mɛnɛn bɛ́ biɛ̃ ǹ pii, narɛɛ giala-pɛlen ne, lon gɔ̀nɔn ganaa pɛlen ne, ka kɔ́lɔnbaalin ni. Maǹ pii ka nɛ, mà ka a re goɛ̃ Baabiloniin kii a pàã kɛ giulun wa.

¹⁰ Ǹ bɛ́ boo mɛn diɛ ka nɛ, soɛ nɛ. Bɛ̀ ka n too kɔ ǹ lon, ka wɔlɔ á re sɔsɔɔ koe kaa gána ganaa. Hiĩ, man die ka pɛsɛ̃ bǎã yii ni, ka gã walan.

¹¹ Sɛnɛ, bɛ̀ tɔrɔ mɛn lɛ kɔ Baabiloniin kii a zǔu kɛ ganaa á dí nya nɛ, man die bɛa tɔrɔ lɛ toɛ a gána nɛ, ǹ na ǹ tán kɔsɔ, ǹ giã a nɛ. Dɛnaa Lawa a da ǹ boo ne.»

¹² Masɛ Zeremii n má kɛa boo kɛ lɛ miã pɛ Zudaan kii Sedekiasi ni. Má pɛ nɛ: – Nsɛ, n laanka n zaman doamaa nɛ ka lɛ kɔ Baabiloniin kii a pàã kɛ ganaa ka zǔu bɛ́ lɔn. Ka dí nya nɛ, ka dí nya a zaman dɔ nɛ, ka yii á re goɛ̃ koo.

¹³ A n siɛ lɔn n laanka n zaman tá zoɛ̃ li mà ka gã zia gɔn, bòo ne hinlaa piɛ̃ busu ni. Táa Dɛnaa Lawa na á bɛ lɛ pɛ gánan kɛn wɔ paǹ li, ǹ mɛnɛn bɛ́ re n piɛ̃ mà ǹ ba dí nyɛɛ Baabiloniin kii n wa.

¹⁴ Lawa a boo gii-dali tɛnɛn man pii ka nɛ: «Ka a re goɛ̃ Baabiloniin kii a pàã giulun wa.» Ǹ bɛ́ boo mɛn diɛ, soɛ nɛ. Ka nyan nə n too kɔ ǹ lon wa.

¹⁵ Masɛ bie má ǹ dia wa. Maǹ pii mà ǹsɛn man boo diɛ ka masɛ tɔ nɛ, sɛnɛ, soɛ nɛ. Bɛ̀ ka n too kɔ ǹ lon, ka ǹ die giɛ̃, man die ka lui ma ka bɔ kànaa, ka dinin ni ka kaa Lawa a boo gii-dalin kɛn nɛ bɛa boon lɛn pii ka nɛ. Dɛnaa Lawa a da ǹ boo ne.

¹⁶ Masɛ Zeremii, má boo da Lawa a wúlu-bɔlen manɛ ka minin kɛn tumaa nɛ ǹ nə́ goã ǹ tan. Má pɛ ǹ nɛ kɛnɛn: – Dɛnaa Lawa a da ǹ boo á ke: «Ka nyan nə n too kɔ Lawa a boo gii-dalin kɛn lon pii mà kànaa ka boɛɛn mà Lawa a kion a dí-nya ǹ mànan kɛn tá re wusii ǹ bɔ *Baabilonii gána nɛ ǹ daa. Maǹ soɛ boe.

¹⁷ Ka nyan nə n too kɔ ǹ lon wa. Ka dí nya Baabilonii n kii ni. Ka yii á re goɛ̃ koo. Wàa n die toɛ kaa kiwi kɛbɔlɔ baa?»

¹⁸ Bɛ̀ bɛa minin lɛn man Lawa a boo gii-dalin lɛa, bɛ̀ maǹ Lawa a boo gii diɛ sonbore, ǹ doamaa bɛ́ nɛ ǹ màn mɛn nyankɔ Dɛnaa Lawa Pàãyiidɛnaa lon, bɛ n ka kɛ nɛ: Màn giɔ̀mɔ kakan mɛnɛn bɛ́ tɔn Lawa a kion, Zudaan kii a kion ka Zeruzalɛmu kiwi ni, ǹ nyan toa bɛn nə wo Baabilonii wa.

¹⁹ Boo n Dɛnaa Lawa li bìbìn kɛn wɔ paǹ li, doo kaaraa kɛ nɛ, wotoron kɛn nɛ, ka mànan kɛn tumaa nɛ tɔn Zeruzalɛmu.

²⁰ Taãn nɛ, Baabiloniin kii Nebukadenezɔɔrɔ bɛ́ Zozakimu a nɛgiĩ Zudaan kii Yekonia laanka Zeruzalɛmu ka Zudaa a kiãn goɛ, a bɛa mànan lɛn tumaa goa Zeruzalɛmu á woo ǹ ne Baabilonii wa.

²¹ Dɛnaa Lawa Pàãyiidɛnaa, Izirayeli a Lawa n kɛ pii màn giɔ̀mɔ kakan kɛn wɔ paǹ li Lawa a kion, Zudaan kii a kii kion ne hinlaa ka Zeruzalɛmu kiwi ni:

²² «Bɛa mànan lɛn tumaa tá re n goɛ, ǹ wo ǹ ne Baabilonii gána nɛ. Maǹ die goɛ̃ walan, yǎa ǹ mɛn pinaa bɛ̀ ma yiri daa ǹ nɛ, má n die ǹ ne kànaa.» Dɛnaa Lawa a da ǹ boo ne.