Zeremii 23 - LAWA A BOO SONBORE

Zaman nyɛɛnaandɛnaa baraan

¹ «Wàa koe n ka kɛ nɛ! Nyɛɛnaandɛnan mɛnɛn bɛ́ maa zaman lɛ nyɛɛnaan boe, maǹ nə ǹ sasawɛɛ ǹ nə́ ǹ pɛsɛ̃ paǹ yii li!» Dɛnaa Lawa a da ǹ boo ne.

² Bɛ lɛ nɛ, Dɛnaa Lawa, Izirayeli a Lawa n boo kɛ diɛ ǹ paǹ li: – Ka maa tɔɔn toa ǹ nə́ woo paǹ yii li, ka maa sèren loo, ka ga ǹ walan wa. Á bǐɛ̃ kɔ! Ka sii baraa mɛn tumaa zɛnaa, ma á re yui ka gialaa bɛn taman yii. Masɛ Dɛnaa Lawa a da ǹ boo ne.

³ Bɛ kio, má maa zaman gialakun kɛ loo má ǹ pɛsɛ̃ gánan mɛnɛn nɛ, ma dinmaa á re ǹ soekɔn ma bɔ ǹ nɛ walan, ma da ǹ nɛ ǹ lɛduə̃ ǹ bǎã nɛ. Ǹ tá re buluboe walan, ǹ mɔnaa.

⁴ Ma á re lɛduə̃li sonboren koɛ ǹ mìi la. Nyɛ́ɛ a re maa sèren lɛn kuĩ doo wa, ǹ nyin ba re soe doo wa, ǹ kɔn dɔ ba re nyaabiɛ duduu wa. Dɛnaa Lawa a da ǹ boo ne.

Zaman nyɛɛnaan-bɔle sonboren

⁵ Á ke, lɛawaan tá re doe, Dɛnaa Lawa a da ǹ boo ne, Davida tɔrɔ taãn tá re yii, a kiibaa zɛnaa, ka yiridɛnaabaa nɛ. Á re peperebaa laanka sonborebaa zɛnɛɛ gána lɛ nɛ.

⁶ Bɛa waáraa kəni, Zudaa gána á re goɛ̃ a din gɔn wìi á lɛa, Izirayeli zaman goã yii-nyɛɛ la. Ǹ bɛ́ re tɔ mɛn koe a ganaa, á ke: «Dɛnaa Lawa n wɔ kirisibaali lɛa.»

⁷ Hiĩ, ǹ kɔn pinaa, Dɛnaa Lawa a da ǹ boo ne, min kɔn ba re pii doo: «Ma nə n liɛ ka Dɛnaa Lawa Yiikoonaa tɔ nɛ, asɛ mɛn nə Izirayeli nɛn waa á ǹ bɔ Ezipti gána nɛ!»

⁸ Sɛnɛ, ǹ tá re pii: «Ma nə n liɛ ka Dɛnaa Lawa Yiikoonaa tɔ nɛ, asɛ mɛn nə Izirayeli nɛn waa gɔsɛ a lɛ̀gɔn la gánan nɛ á soo ǹ ne gánan kɛn tumaa nɛ á ǹ pɛsɛ̃ ǹ nɛ, a n die ǹ soekɔn ǹ gána nɛ!»

Boo mɛn nə n da Lawa a boo gii-dali soɛ-bɔlen paǹ li

⁹ Lawa a boo gii-dalin paǹ li. Ma foo ziziɛ̃, ma gɔ̀nɔn yii n bìn diɛ. Man ka yɔ mi a la yii-n wole bɛ́ lɔn ka min mɛn bɛ́ duvɛ̃ ná a yii ganaa. Dɛnaa Lawa a lɛa nɛ, ka a boon kɛn nɛ, á ǹ pɛ ma nɛ.

¹⁰ Gána lɛ piɛ̃maa-n ka naarɛbaalin ni. Lɛn baraa taman yii, gána lɛ n gɛ̀ koa gɔ́ɔ̃ nɛ. Gána lɛ a bɔmɔ bǎãn tumaa laa. Maǹ baa sii sii baraa ganaa. Sii mɛn bɛ́ a siĩ-n wa, ǹ foo n tã ka bɛa zɛnaa nɛ.

¹¹ Lawa a boo gii-dalin laanka Lawa a wúlu-bɔlen man lɛ pii ǹ màn sii. Ǹ sii baraan mɛnɛn zɛnaa, bɛ lɛ á tɔn yii maa kion kɛ nɛ. Dɛnaa Lawa a da ǹ boo ne.

¹² Bɛ lɛ nɛ, ǹ zii á re wɔrɔnzɔrɔn biɛ ǹ ganaa. Tèlò-n, ǹ tá re n tɔtoe kɔn nɛ, ǹ bɔ ǹ kaa. Taãn nɛ, bɛ̀ ma yoo ǹ gialaa lɛ̀ mɛn-a, man die koe diɛ ǹ mìi ni. Dɛnaa Lawa a da ǹ boo ne.

¹³ Samarii a Lawa a boo gii-dalin li, má siin yɛ ǹ mɛnɛn bɛ́ ǹ ba foo sii wa. Maǹ boo diɛ ka *Baali tɔ nɛ ǹ nə́ maa zaman Izirayeli siɛ̃ nɛ.

¹⁴ Zeruzalɛmu a Lawa a boo gii-dalin dɔn li, ma yii n sii bɔbɔnɛɛn ganaa: Maǹ naarɛbiɛ, maǹ soɛ boe. Ǹ giala n kun ka min baraan nɛ, Bɛa yɔrɔ lɛ la, min kɔn ba n nyɛnɛɛ sii baraa-n wa. Masɛ yii li, maǹ nə́ kɔnbɔ ka Sodɔmu minin ni. Zeruzalɛmu minin man nə́ kɔnbɔ ka Gomɔɔrɔ minin ni.

¹⁵ Bɛ lɛ nɛ, Dɛnaa Lawa Pàãyiidɛnaa á kɛ pii Lawa a boo gii-dalin paǹ li: Man die liɛ kɔɔsɛ koe ǹ la ǹ sɔ̃, ma sèwò kɔ ǹ la ǹ mi. A giala Zeruzalɛmu a Lawa a boo gii-dalin lɛn man ka mu yala gɔ̀dɛnaa bɛ́ lɔn, n daɛ gána lɛ tumaa la.

Dɛnaa Lawa

¹⁶ Dɛnaa Lawa Pàãyiidɛnaa pɛ: Ka nyan nə n too kɔ Lawa a boo gii-dalin kɛn lon wa. Maǹ ka yiri siɛ̃. Ǹ bɛ́ boo mɛn diɛ, ǹ dinin taasiɛn manɛ. Masɛ a boon bie wa.

¹⁷ Min mɛnɛn bɛ́ masɛ diɛ yaa lɛa, maǹ pii kɛnɛn: Dɛnaa Lawa pɛ: «Kaa wɔ á re bǐɛ̃ koe!» Min mɛnɛn bɛ́ koe ǹ dinin taasiɛ baraan lɛ, maǹ pii bɛn manɛ: «Baraa a re ka yii wa!»

¹⁸ Man pii: Die na á goã kun ma nɛ maa sii yɔrɔ bɔ waáraa? Die na á maa boon yɛ, die na á ǹ ma? Die na á n yiri kɔ ǹ li, die na á ǹ giala ma?

Zeremii

¹⁹ Piɛ̃ gole yoo, Dɛnaa Lawa a foo-yoo ne. A n kurunkurun lɛa, min baraan mìi la.

²⁰ Dɛnaa Lawa sii mɛn yɔrɔ bɔ á koa a yɔrɔ-a, yǎa bɛ lɛ piɛ̃, a foo-yoo baraa kɛ tɔn golee. Bɛ kio, ka á re a giala miɛ.

Dɛnaa Lawa

²¹ Bɛa Lawa a boo gii-dalin lɛn, ma ǹ dia wa, sɛnɛ maǹ baa sii. Ma boo da ǹ nɛ wa, sɛnɛ maǹ Lawa a boo gii diɛ.

²² Bɛ̀ maǹ maa sii yɔrɔ bɔn kɛn siére-a, bɛ̀ ǹ ná a boo da maa zaman nɛ. Ǹ giã ǹ gɔn baraa laanka ǹ sii baraan kɛn, bɛ̀ ǹ nə́ bɛn toa walan.

Dɛnaa Lawa n kanaa paǹ din tumaa nɛ

²³ Wɔlɔ kunu dinsɔsɔɔ̃ a Lawa n ka ma nɛ? Ma bie wɔlɔ sɔsɔɔ sɛ wɔ lɛa wa? Dɛnaa Lawa a da ǹ boo ne.

²⁴ Ta min na á n duru dɔndɔɔn nɛ, ma yii na a ganaa. Dɛnaa Lawa a da ǹ boo ne. Man bǎã tumaa nɛ, lon laanka tán. Dɛnaa Lawa a da ǹ boo ne.

Soɛ boon

²⁵ Lawa a boo gii-dalin bɛ́ soɛ boon mɛnɛn diɛ ka ma tɔ nɛ, ma á miɛ. Maǹ pii: «Má n narɛ, má n narɛ!»

²⁶ Bɛa Lawa a boo gii-dalin lɛn man soɛ boon diɛ, ǹ nə́ ǹ dinin taasiɛn pii. Bɛ n die beleboe yǎa biĩ kəni?

²⁷ Maǹ zoɛ̃ li mà maa zaman lɛ yiri bɔ ka ma tɔ nɛ, ǹ narɛɛn kɛn lɛa ǹ tá kalɛɛ kɔn nɛ, ka ǹ digolon yiri bɔ ka ma tɔ-n lɔn ǹ nə́ kɔ Baali lɛ.

²⁸ Lawa a boo gii-dali mɛn bɛ zoɛ̃ li a na a narɛɛn kalaa, a ǹ kalaa. Sɛnɛ, maa boo gii bɛ́ ǹ mɛn li, a da ka peperebaa nɛ. «Màn fofolo laanka màn nàn sonbore á goon?» Dɛnaa Lawa a da ǹ boo ne.

²⁹ «Maa boo kɛ bie ka tɛ bɛ́ lɔn wa? A bie ka yele bɛ́ lɔn gɛ̀fu yui wa?» Dɛnaa Lawa a da ǹ boo ne.

³⁰ Lawa a boo gii-dalin kɛn maa da ǹ boon koɛ̃ kɔn lɛ-n, man die yui ǹ gialaa. Dɛnaa Lawa a da ǹ boo ne.

³¹ Hiĩ, bɛa Lawa a boo gii-dalin lɛn, soɛ boe ka masɛ tɔ nɛ, ma á re yui ǹ gialaa, ǹsɛn mɛnɛn bɛ́ pii: «Dɛnaa Lawa a da ǹ boo ne.»

³² Ma á re yui ǹ gialaa. Ǹ narɛɛn man soɛn lɛa. Bɛ̀ ǹ tá ǹ kalɛɛ maa zaman yɔrɔ-a, boo kooron dininsɔɔ̃nɔn manɛ. Ma ǹ dia wa, ma zii kɔ ǹ la wa. Ǹ là goon din ba maa zaman ganaa wa. Dɛnaa Lawa a da ǹ boo ne.

Dɛnaa Lawa a boo n guĩ lɛa minin ganaa

³³ Kɔntan, zaman lɛ a minin tá re nɔ̀n diɛ n la, Lawa a boo gii-dali lɛa hinlaa Lawa a wúlu-bɔle lɛa, ǹ pɛ: – Dɛnaa Lawa a guĩ n ka wàa nɛ? Ń die n nə ǹ lɛ si kɛnɛn: «Ka dinin lɛn man a guĩ lɛa, ma á re n mìi boe ka li.» Dɛnaa Lawa a da ǹ boo ne.

³⁴ Kɔntan, zaman lɛ a min, Lawa a boo gii-dali lɛa hinlaa Lawa a wúlu-bɔle lɛa, bɛ á re pii mà Dɛnaa Lawa guĩ da asɛ mìi ni. Á bǐɛ̃ kɔ, man die yui a gialaa, ka a kion minin ni.

³⁵ Ka bɛ́ re nɔ̀n diɛ kɔn la ka boo mɛn nɛ ka dinin bii ni, bɛ á ke: «Dɛnaa Lawa n wɔ lɛ sii mà lɔn? A n pii mà wàa?»

³⁶ Ka doamaa bie ka pɛ doo mà Dɛnaa Lawa na á guĩ da min mìi-n wa. Dɛnaa Lawa a boo n guĩ lɛa? Haayii. Sɛnɛ, bɛ̀ ka bɛa boon kɛn tɔrɔn da, ka ǹ Lawa Yiikoonaa, Lawa Pàãyiidɛnaa, wɔa Lawa a boo kɔkɔrɔ koe.

³⁷ Ka doamaa bɛ́ nɛ ka sii mɛn a nɔ̀n da Lawa a boo gii-dali la á ke: «Dɛnaa Lawa na á n lɛ si mà lɔn? A na á wàa boo pɛ n nɛ?»

³⁸ Sɛnɛ, bɛ̀ kaa tɔn pii mà Dɛnaa Lawa guĩ da kasɛn mìi ni a da yaa má ka kurəə bɛa pɛ ganaa, bɛa yɔrɔ lɛ la, masɛ Dɛnaa Lawa bɛ́ màn mɛn pii, á ke:

³⁹ «Man die ka diɛ ma dɔ̀ɔ̃ nɛ ka guĩ bɛ́ lɔn, ma wo ka zũ, kɔnlɛ ka kiwi kɛ dɔ nɛ, ma kɔ ka la ka ka digolon ne.

⁴⁰ Man die sìi diɛ ka ganaa yǎa duduu, ka a re yii gugurubaa yii doo wa. Min kɔn yiri á re boe ka bɛ-n wa.»