Zeremii 20 - LAWA A BOO SONBORE

Zeremii n kòso ne

¹ Imɛɛrɛ a nɛgiĩ Pasewuru ke Lawa a wúlu-bɔle lɛa, bɛ na á goã goledɛnaa lɛa Lawa a kion. Á Zeremii lɛ ma bɛa boon lɛn diɛ ka Dɛnaa Lawa tɔ nɛ.

² Á Lawa a boo gii-dali Zeremii lɛ dɛ, ǹ nə́ kũ ǹ nə́ yii bìbì ganaa Lawa a kion a wɔ ǹ kiɛnlɛ-a, lon a lɛ̀gɔn la, ǹ bɛ́ ǹ mɛn bíi mà Bɛnzamɛn tɔrɔn kiɛnlɛ.

³ A lɛawaa, Pasewuru Zeremii fore, á bɔ bìbì lɛ ganaa. Zeremii pɛ nɛ: «Dɛnaa Lawa ba re n bíi Pasewuru doo wa, bɛ giala mà "gɛ̀rɛsiɛdɛnaa n bǎã tumaa nɛ" sɛnɛ, a n die n bíi "nyɛ́ɛ n bǎã tumaa nɛ".»

⁴ Bɛ lɛ nɛ, Dɛnaa Lawa a da ǹ boo á ke: «Ma á re nyɛ́ɛ kiɛ ka ganaa, n laanka n giaáran nɛ. Ǹ tá re mɛnɛɛ ǹ zɔ́ɔn gɔya sa nyɛɛnɛ, ǹ gã n din yɔrɔ-a. Man die Zudaa min tumaa we Baabiloniin kii gɔn. Á re ǹ goɛ a wo ǹ ne a gána nɛ, a ǹ dɛ ka gɔya sa nɛ.

⁵ Zeruzalɛmu a naforon tumaa nɛ, a dí nya á màn mɛn tumaa yɛ, a màn giɔ̀mɔ kakan nɛ, ka Zudaan kiin naforon ne, man die bɛ yii we ǹ zɔ́ɔn gɔn, ǹ kokoo, ǹ goa ǹ wo ǹ ne *Baabilonii gána nɛ.

⁶ Nsɛ Pasewuru, n laanka min mɛn tumaa bɛ́ kion kun, ǹ tá re ka goɛ. Bɛ̀ n dɔ Baabilonii, n tá re giɛ̃. Ǹ tá re n biĩ walan, kun ka n giaáran kɛn tumaa nɛ, ń Lawa a boo gii-dali soɛ-bɔle baa ǹ nɛ.»

Zeremii na a foo busii pii Lawa nɛ

⁷ Dɛnaa Lawa, ń ma sã, má toa ń ma sã. N pàã zɛnaa ma nɛ, ń boo ma la. Lɛawaa tumaa gɔ́ɔ̃ nɛ, minin man yaa we ma ganaa, min tumaa n ma foo siɛ.

⁸ Bɛ̀ ma á boo diɛ lɔn, paraa nɛ, man «dɔlɔ laanka ziziɛ̃» boo diɛ. Hiĩ, lɛawaa tumaa gɔ̀ɔ̃ nɛ, Dɛnaa Lawa a boo taman yii, minin man sɔ kiɛ ma la, ǹ nə́ ma foo siɛ.

⁹ Má taasɛ ma gɔ́ɔ̃ nɛ, máa ma a re n taasɛ Dɛnaa Lawa n doo wa, máa ma a re a boo diɛ ka a tɔ-n doo wa. Sɛnɛ, ma gɔ́ɔ̃ nɛ, a boo lɛ n ka tɛ bɛ lɔn ma kuĩ. Ma nə n din nɔmɛɛ máa ma pàã yɛ ma la bɛa tɛ lɛ nɛ, sɛnɛ ma a boe la wa.

¹⁰ Má boo baraa gigiã ma minin lɛ-n. Maǹ pii: «Nyɛ́ɛ n bǎã tumaa nɛ.» Ǹ tɛnɛn dɔn man pii: «Ka a giala da kanaa.» Maa giaáran dinin man giɛ maa mɛnaa li. Maǹ pii: «Kɔntan, wɔ á re tɔwɛɛ, wɔ pàã la nɛ, wɔ wɔa gɛ̀ dòo bɔ a ganaa!»

¹¹ Sɛnɛ, Dɛnaa Lawa n kun ka ma nɛ. A n zia biɛ ka pàã gole ne maa lɛa. Min mɛnɛn bɛ́ boe ma yii ni, bɛn tá re boe ǹ mɛnaa. Ǹ ba re boe sii kɔn la ǹ zɛnaa ma-n wa. Sìi á re n koe ǹ lɛ, a giala, ǹ pàã dɔ ma li wa. Ǹ sìi lɛ n die goɛ̃ miɛ̃ yǎa duduu. Ǹ kɔn yiri a re boe-n wa.

¹² Sɛnɛ, nsɛ Dɛnaa Lawa Pàãyiidɛnaa, kiri pepere wɔle, n nə n min tumaa gɔ́ɔ̃gɔ́ɔ̃ ǹ taasiɛn doɛ̃. N bɛ́ re maa gɛ̀ dòo boe lɔn, ma á re bɛ yii, a giala, man ma sii we n din gɔn.

¹³ Ka loe lɔ ka Dɛnaa Lawa tɔ bɔ nɛ, a giala, a n doobaa gɔsiɛ a bɔ min baraan gɔn.

¹⁴ Áh! Lɛn baraa bíi maa yɛ pinaa kũ! Maa náa ma yɛ á ma da kanaa ǹ mɛn pinaa, min kɔn nyan boo bǐɛ̃ da bɛa lɛawaa lɛ a paǹ li wa!

¹⁵ Min mɛn boo kɛ pɛ maa díi ni: «n lɔ nɛginin yɛ,» á a foo kɔɔ̃n kɔ, lɛn baraa bíi bɛa dɛnaa kũ!

¹⁶ Bɛa dɛnaa nə n baa ka kiwi mɛn nə́ ke Dɛnaa Lawa ziziɛ̃, a makara ná a kũ wa. Baayɛlɛ woo baayɛlɛ, ginii lɛ n boe a nɛ, penleen, ziabaa ǹ lɛ-dɛ nɛ!

¹⁷ Bɛ̀ Dɛnaa Lawa na á toa dinin má gã ma dan gɔ́ɔ̃ nɛ! Ma dan gɔ́ɔ̃ maa yala baa goon lɛa. Ma goã walan yǎa duduu.

¹⁸ Bɛ̀ nɔmaa laanka foo ziziɛ̃ ka sìi á lɛa nɛ baraabaraa maa yiikoonaabaa gɔ́ɔ̃ nɛ, maa yɛ mìi-n ka wàa nɛ?