Zeremii 2 - LAWA A BOO SONBORE

Zudaa a bɔlɔgoonbaãdɛnaabaa

¹ Dɛnaa Lawa boo da ma nɛ, á pɛ:

² Wo pɛ Zeruzalɛmu ni: Dɛnaa Lawa a boo á ke: Ma yiri tá n tenmaa waáraa kɛ nɛ. N nə́ n goã doa-n ma-a. N goã ma narɛ san wɔ baa nɛ. N goã koe ma lɛ diə gole ne, bǎã mɛn bɛ́ màn kɔn ná a boe a-n wa.

³ Izirayeli, n nə n goã ma dinsɔɔ̃ wɔ lɛa. N nə n goã ma din wɔ baa nɛ, ka kaa-piɛ da nɛ bibinaa bɛ́ lɔn. Min mɛnɛn gɔn bɛ́ re miɛ n ganaa, zɛ̀rɛ n die bɛn kuĩ, koe bɔ ǹ ganaa. Dɛnaa Lawa a da ǹ boo ne.

⁴ Kasɛn kɛn Zakɔba tɔrɔn lɛa, ka kasɛn, Izirayeli a tanlɛn tumaa, ka n too kɔ Dɛnaa Lawa a boo li!

⁵ Dɛnaa Lawa bɛ́ màn mɛn pii, á ke: Ka digolon tá sã goon yii ǹ ma zɛ̀rɛ baa nɛ? Ǹ nə́ n wɔlɔ lui ma ganaa, ǹ nə́ koe dìn lɛ, ǹ mɛnɛn bɛ́ ǹ ba màn kɔn lɛa wa, ǹ dininmaan dɔn nə́ màn kooron baa.

⁶ Ǹ nɔ̀n da kɛnɛn wa: Dɛnaa Lawa á maa, asɛ mɛn nə wɔ waa Ezipti gána nɛ, á wɔ nyɛɛnaa ǹ bɔ diə gole ne, don lɛa, piɛ̃-n ka nyankɔrɔ nɛ, gána gere lɛa, a n tì, min ná a boe a-n wa, min ná a ba a-n dɔn wa.

⁷ Má ka kaa gána sonbore ne, máa ka là yɛ a da nɛ ganaa, ka a gɔ́ɔ̃gɔ́ɔ̃ ǹ mànan dɔn nɛ. Sɛnɛ, kaa daa li, ká a gɔgɔrɛ kɔ. A na á goã ma din wɔ lɛa, sɛnɛ ka baa màn bɔbɔnɛɛ lɛa.

⁸ Lawa a wúlu-bɔlen nə nɔ̀n da kɛnɛn wa: «Dɛnaa Lawa á maa?» Min mɛnɛn bɛ́ Lawa a dí-pɛn doɛ̃, bɛn ba ma doɛ̃ wa. Kiãn nə́ n gòãn dii ma ganaa. Lawa a boo gii-dalin man boo diɛ ka *Baali tɔ nɛ. Maǹ koe dìn lɛ, ǹ mɛnɛn bɛ́ ǹ ba boe sii kɔn la wa.

⁹ Bɛ lɛ nɛ, ma á re zɛ̀rɛ diɛ ka la doo. Man zɛ̀rɛ diɛ kaa nɔ̀ɔnɔn dɔn dinin la. Ma din Dɛnaa Lawa a da ǹ boo ne.

¹⁰ Ka wo bǎã sɔsɔɔ kɛ nɛ Grɛki, ka ga a ganaa, ka wo Kebaaraa Larabun kɛn li, ka nɔ̀n da. Ka á re yii, mà sii kɛ miã bin nə n zɛnaa wa.

¹¹ Tɔrɔ kɔn bin ná a dìn lon kɔ? A da yaa, ǹ bie Lawa taãn lɛa wa. Sɛnɛ, maa zaman lɛ ná a gugurubaa lɛ lon kɔ ka màn kooron ne.

¹² Lon mànan lɛn, kɛ doamaa nɛ a ka yiri lɔlɔkɔn, a ka gɔ̀nɔn bìn da, a bɔbɔnɛɛbaa ka gù dɛ. Masɛ Dɛnaa Lawa a da ǹ boo ne.

¹³ Maa zaman lɛ na á sã wɔlɔ paa wɔ: Ǹ nə́ n la bɔ ma ganaa, masɛ mu yala nyantoto ke, nyin koe. Ǹ nə́ nyankɔrɔn fɔ̃, sɛnɛ, nyankɔrɔn lɛn gɔ́ɔ̃ yuimaa nɛ, ǹ ba mu kuĩ wa.

Lawa toa walan nə sii bɔbɔnɛɛ lɛa

¹⁴ Izirayeli n bɛ̀rɛ lɛa ya? A na á yɛ bɛ̀rɛbaa taman yii? Sɛnɛ wàa na á baa ǹ tá kokoe?

¹⁵ Yàran man lɛ biɛ a ganaa, maǹ wɔɔsaa we a ganaa, ǹ ná a gána ziziɛ̃ lenlen, ǹ nə́ tɛ da a kiwin ganaa. Màn kɔn ba giã nɛ a-n doo wa.

¹⁶ Haalɛ Mɛmifisi minin laanka Tapenɛsi minin ná a mìi kɔɔ̃.

¹⁷ Bɛ bie n din sii lɛa wa, Izirayeli? Masɛ Dɛnaa Lawa nə n nyɛɛnaan boe, sɛnɛ, n nə́ n la bɔ ma-a.

¹⁸ Sisia kəni, n wo Ezipti là n ka wàa nɛ, N wo Niili tà mi? Ma nə́ n woo Asiirii là n wàa nɛ, Ma nə́ n woo Efrati tà mi?

¹⁹ N sii baraa mɛn zɛnaa, bɛ die a dɔlɔ baa n ganaa. N bɔlɔgoonbaãdɛnaabaa ke, bɛ die a kũ n din mìi ni. Ka bɛ nɛ, n tá re yii, n na a giala ma, mà la bɔ Dɛnaa Lawa ganaa á bɔbɔnɛɛ, a n kɔɔsɛ taãn-taãnɛ, ka masɛ Dɛnaa Lawa guguru kɔ baã bɛ́ lɔn. Masɛ Dɛnaa Lawa Pàãyiidɛnaa a da ǹ boo ne.

Izirayeli n ka lɔ bɔlɔgoonbaãdɛnaa bɛ́ lɔn

²⁰ Dɛnaa Lawa pɛ: Izirayeli, haalɛ bibi n nə́ n wìi li ǹ zǔu kɛ yiɛ, n nə́ n gɔn ganaa ǹ biɛn kɛn nana. Ń goã ń pɛ: «Ma ba li ma bɛ̀rɛbaa doo wa.» Sɛnɛ, kele tumaa mìi ni, da luu tì tumaa giulun, n nə́ n goã wɛɛ tán ka lɔ kɔrɔ bɛ́ lɔn.

²¹ Sɛnɛ, man má goã má n zumu, ka *rezɛ̃ da sonbore bɛ́ lɔn, ka da mɛn bɛ́, da tɔrɔ sonbore lɛa. A na á saa lɔn, n nə́ n bɔyaa, ń don gɔ́ɔ̃ da baa, n nɛ n bɔnɛɛ?

²² Haalɛ ta n nə́ n zoo ka sɔmaa nɛ, ta n nə́ n zoo ka sɔmaa gigiã nɛ, n sii baraa kɛ n ma yɔrɔ kɛnɛn, ka *gɔ̀ bɛ́ lɔn. Dɛnaa Lawa a da ǹ boo ne.

²³ N nə n siɛ lɔn n tá pii mà n nə n din gɔgɔrɛ kɔ wa, mà n Baalin guguru kɔ wa. Ga n giã ǹ gɔn ganaa nyankɔrɔ basa kɛ nɛ. Lɛ kɔ n sãn ganaa. N nə n kɔnbɔ nyɔɔmaa dan ten ne, baa sii paǹ yii li.

²⁴ N nə n kɔnbɔ ka don dundun dan nɛ, a lɛ mui ka bǎã kòso ne, a dii biikoo li, gìĩ siɛ piɛ̃ li. A dii waáraa, màn kɔn ba kurii wa. Dundunun mɛnɛn bɛ́ giɛ li, ǹ ba ǹ dinin nɔmɛɛ wa. Bɛ̀ á dii lɔn gɔrɔ, maǹ woe yiɛ.

²⁵ Izirayeli, yiri bɔ. N bɛ baa sii n dìn mɛnɛn kio ke, n tá re nɔmɛɛ, n bɔlɔ gɔ́ɔ̃ laa. Sɛnɛ, ń pɛ: «Sàabaa ba la wa, dì kɔsɔn man kɔɔ̃n ma ganaa. Man zoɛ̃ li ma wo ǹ kio.»

²⁶ Sɛnɛ, kasɛn Izirayeli minin, kaa zaman nɛ, kaa kiin laanka kaa gána nyɛɛnaandɛnan nɛ, kaa Lawa a wúlu-bɔlen laanka kaa Lawa a dia dí-a wolen ne, sìi n die n koe ka lɛ, ka wurumu wɔ bɛ́ lɔn, bɛ̀ ǹ nə́ tɔwaa.

²⁷ Nyín mɛn bɛ́ gɔn lɛa, ka ǹ pii bɛ nɛ: «Maa díi ni n ni!» Nyín mɛn bɛ́ kɔlɔ lɛa, ka n pii bɛ nɛ: «N din ni n ma da kanaa!» Màn mɛn tá-a ka n yɔrɔ dia masɛ la, ka nə n dɔ̀ɔ̃ we ma nɛ. Sɛnɛ, bɛ̀ koe ka yɛ lɔn gɔrɔ, ka ǹ pii ma-n kɛnɛn: «Yoo, n wɔ kirisibaa!»

²⁸ Ka dìn mɛnɛn zɛnaa ka dinin wɔ lɛa, bɛn tá maa? Bɛ̀ koe ka yɛ, bɛ̀ ǹ tá boe la, ǹ da ka kirisibaa! Kaa kiwin bɛ́ mɔnaa-n lɔn, kaa dìn dɔn man mɔnaa-n miɛ̃!

²⁹ Wàa na á baa kəni ka á kiri we ma ganaa? Ka dinin tumaa nə n gòãn dii ma ganaa. Dɛnaa Lawa a da ǹ boo ne

³⁰ Ma kaa nɛnyaanan dɛ, sɛnɛ a là goon yɛ wa. Ka golee maa doroon li wa. Ka yàra basaã-kɔle bɛ́ lɔn, ka kaa Lawa a dia dí-a wolen yii dɛ.

³¹ Kasɛn pelo minin lɛn, ka yiri bɔ Dɛnaa Lawa a boon li. Man má n baa ka diə gole bɛ́ lɔn Izirayeli gɔn? Hinlaa ka gána mɛn bɛ́ wɔlɔ tì li duduu? Maa zaman, wàa na á baa ka n pii: «Bǎã mɛn bɛ́ kɔɔ̃n wɔ-a, wɔ ǹ woe walan. Wɔa wusii wɔ da n li doo wa.»

³² Nɛniɛ yiri á boe a nyaǹ mànan ganaa? Lɔ tii yiri á boe a gɔ̀ mànan ganaa? Ka yiri bɔ ka ma nɛ, a biikoo a kànaa wa.

³³ Ǹ bɛ́ san boe lɔn, n tá bɛ yɔrɔ doɛ̃. N tá boe la dɔn dinin n nə n miãn daraa baraa zɛnaa ganaa!

³⁴ Doobaan laanka yii tì-an mà nə n mɔnaan ganaa, a da yaa dɔn n bie n woo ǹ tɔwaa n kiɛnlɛ yiɛ wa.

³⁵ A laan bɛ yii ni, n nə n pii: «Zɛ̀rɛ ba ma-a wa. Dɛnaa Lawa a foo yoo kɛ á re n boe ma kio.» Sɛnɛ, n bɛ́ pii mà nsɛ sii kɔn zɛnaa baraa wa, man die kiri we n ganaa.

³⁶ A n siɛ lɔn n tá ziin lon koe n mìi gialaa? Sɛnɛ, Ezipti dɔ n die n foo ziziɛ̃ ka Asiirii bɛ́ lɔn lɛlɛ.

³⁷ N tá re soe bɛa gána kɛ lɛ dɔ nɛ n gɔnɔn nə́ n mìi ni, sìi ni n ganaa. Sonbore, n foo bɛ́ doa-n min mɛnɛn ganaa, Dɛnaa Lawa á re bɛn lui. N ba re là goon yii ǹ ganaa wa.