Zeremii 18 - LAWA A BOO SONBORE

Gì laanka dɔn-bɔle

¹ Dɛnaa Lawa boo da Zeremii ni á pɛ:

² «Yoo n wo dɔn-bɔle goon a piɛ. Boo mɛn bɛ́ ma lɛ-n, ma á re bɛ pii n ni walan.»

³ Má yoo má woo dɔn-bɔle lɛ li, má woo yaa dí nyɛɛ.

⁴ Sɛnɛ, a goã dɔn mɛn boe, wɔ̀lɔ̀ na á goã bɛ ganaa ka a bɛ́ goɛ̃ bɛ̀ a n zɛnaa lɔn. Dɔn-bɔle lɛ wusoo á dɔn kɔsɔ zɛnaa, á kɔnpɛ ka a din dùũ ni.

⁵ Dɛnaa Lawa boo mɛn da ma nɛ, á ke:

⁶ «Izirayeli minin lɛn, ma dɔ n ma a boe la ma sii zɛnaa ka nɛ ka dɔn-bɔle kɛ bɛ́ lɔn wa? Kasɛn Izirayeli minin lɛn, ka ǹ ma gɔn ka gì bɛ́ dɔn-bɔle gɔn lɔn. Ma din Dɛnaa Lawa a da ǹ boo ne.

⁷ Biikoo tɛn li, má màn woɛ̃ laanka a yɔyɔrɛɛ ka a ziziɛ̃ boo da tɔrɔ kɔn hinlaa gána kɔn a paǹ li.

⁸ Sɛnɛ, ma boo da sii baraan mɛnɛn paǹ li, bɛ̀ zaman lɛ bɛn kaa, ma goã má dɔlɔ mɛn boo da, ma dɔ á re bɛ toɛ walan.

⁹ Biikoo tɛn li, má màn doe laanka màn zumii boo da tɔrɔ kɔn hinlaa gána kɔn a paǹ li.

¹⁰ Sɛnɛ, bɛ̀ bɛa tɔrɔ lɛ nə n too kɔ ma lon wa, sii mɛn bɛ́ baraa ma yii li bɛ̀ ǹ nə́ bɛ zɛnaa, ma goã má bǐɛ̃ mɛn boo da ǹ nɛ, man wusii ma maa taasiɛn bɔyaa.»

¹¹ Kanna kəni Zeremii, boo da Zudaa minin laanka Zeruzalɛmu minin ni n pɛ ǹ nɛ: – Dɛnaa Lawa n kɛ pii: «Á ke, man dɔlɔ yɔrɔ boe kaa wɔ lɛa. Man koe lɛ boe die-n ka ganaa. Didie doamaa nɛ a na a taasiɛ baraan kaa. Hiĩ, ka kaa giã ǹ gɔn laanka kaa zɛnaa ǹ siin bɔyaa.»

¹² Sɛnɛ, ǹ tá re pii: «Wɔ laadoo bie wa. Wɔ golee sii mɛn li, wɔ n die bɛ lɛ zɛnɛɛ. Wɔ n koe wɔa taasiɛ bɔnɛɛn lɛn lɛ.»

Izirayeli yiri bɔ ka Dɛnaa Lawa nɛ

¹³ Dɛnaa Lawa n kɛ pii: Ka nɔ̀n da tɔrɔ kɔsɔ minin la: Ka bin tɔn boon kɛn miãn ma? Izirayeli zaman lɛ na á sii bɔbɔnɛɛn zɛnaa.

¹⁴ *Mu nyuù-wɔle bie koe ne Liban a kele gɛ̀fun kɛn lɛ duduu wa? Mu nyantoto ke baa sii gɛ̀fu la boe bǎã sɔsɔɔ nɛ, bɛ á boe la a golee? Haayii!

¹⁵ A da yaa maa zaman yiri bɔ ma nɛ. Maǹ wúlu boe màn kooron ganaa. Bɛa màn kooron lɛn manə ǹ boe ǹ daɛ zii la, ǹ goã koe ziin mɛnɛn lɛ lɛlɛ, maǹ nə n boe n boe bɛn la, ǹ nə́ koe ziin kɔsɔn lɛ ǹ nə́ ǹ ba ǹ doɛ̃ wa.

¹⁶ Maa zaman ná a gána lɛ bɔyaa á baa kɛbɔlɔ lɛa, yaa da ǹ màn lɛa yǎa duduu. Kiɛ̃ wolen yiri nə́ n lɔlɔkɔn. Maǹ nə n mìi papasɛ.

¹⁷ Bɛ̀ zɔ́ɔ daa ǹ mɛn waáraa, ma á re maa zaman lɛ pɛsɛ̃ paǹ tumaa li, ka gusuũ bɛ́ lɔn la piɛ̃ li. Ǹ koe pinaa, ma nə n dɔ̀ɔ̃ we ǹ ne, ma a re n yɔrɔ diɛ ǹ la wa.

Maǹ zoɛ̃ li ǹ Zeremii dɛ

¹⁸ Minin man pii: «Ka daa wɔ boo wɔ kɔn Zeremii ganaa! Wɔa foɛ̃ Lawa a wúlu-bɔle li a wɔ daraa dí-pɛn ganaa wa, hinlaa sii-dɔ̃li li a yiri kɔ wɔ la wa. Wɔa foɛ̃ Lawa a boo gii-dali li a Lawa a boo da wɔ-n wa. Ka wɔ n tan, wɔ yoo a gialaa, wɔ boo baraa da a ganaa. Wɔ nyan nə n too kɔ a da ǹ boon li wa!»

¹⁹ Sɛnɛ, Dɛnaa Lawa, n yiri koa ma li. Min mɛnɛn bɛ́ ma zɛ̀rɛ biɛ, n too kɔ ǹ da ǹ boo li.

²⁰ Maǹ bǐɛ̃ sarɛɛ ka baraa nɛ? Maǹ nə́ nyankɔrɔ fɔ̃ mà ma mɛnaa a nɛ. A da yaa, n yiri kɔ, man má golee n din yɔrɔ-a, má boo da n nɛ ǹ dinin bǐɛ̃ kɔ á lɛa màn mɛn bɛ́ toɛ, n nə n foo yoo kɛ wɔlɔ lui ǹ ganaa.

²¹ A bɛ́ miɛ̃, ǹ nɛnyaanan wɔ bòo gɔn, ǹ wɔ gɔya sa gɔn! Ǹ lɔn ba re nɛ yii wa! Ǹ tá re giɔɔrɔn biɛ! Piɛ̃ busu á re ǹ zuũn dii! Ǹ nɛ tenən tá re giɛ̃ zia la!

²² Zia nɛn kaa ǹ ganaa! Ka bɛ-n kəni, lɛ-dɛ á re boe ǹ kionən ne. A giala, maǹ nyankɔrɔ foɛ̃ ma nyɛɛnɛ, maǹ kan koe ma nɛ.

²³ Nsɛ Dɛnaa Lawa, ǹ bɛ́ sii mɛn yɔrɔ boe màn mɛn bɛ́ toɛ ǹ ma nyin bɔ, ń tá bɛ doɛ̃ taãn nɛ. N nyan nə ǹ sii baraan toa ǹ nɛ wa! N nyan nə ǹ siɛ̃n tuturu wa! Toa ǹ mɛnaa n yɔrɔ-a! N foo-yoo pinaa, yoo ǹ gialaa!