Zeremii 16 - LAWA A BOO SONBORE

Zeremii n Lawa a kiri wɔ boo diɛ

¹ Dɛnaa Lawa boo da ma nɛ á pɛ:

² «Ń doamaa bie n lɔ wɔ wa, n ba re nɛginin hinlaa nɛlɔ yii gána kɛ-n wa.

³ A giala, masɛ Dɛnaa Lawa bɛ́ boo mɛn diɛ nɛgiĩn laanka nɛlɔn wɔ paǹ li gána kɛ nɛ, ka díin laanka náan mɛnɛn bɛ́ re ǹ yii, á ke:

⁴ Busu kaka n die ǹ dii. Min kɔn ba re wuu pii ǹ la wa, min kɔn ba re ǹ biĩ wa. Maǹ die yisi biɛ tán. Maǹ die giɛ̃ zia la, hinlaa bòo nə ǹ dɛ. Zèwon laanka tolokan tá re ǹ siĩ kokoe.»

⁵ Dɛnaa Lawa wusoo á boo da ma-n doo á pɛ: «Minin bɛ́ ń soekɔn gɛ̀ koɛ kion mɛn nɛ, n nyan wɔ bɛ-n wa. N nyan gɛ̀ wuu pɛ wa. N nyan gɛ̀ fòo da wa. A giala, má maa là nyantoro laanka maa kɔn-narɛɛ ka maa makara doɛ̃ lɛ si maa zaman la. Masɛ Dɛnaa Lawa a da ǹ boo ne.

⁶ Kiãn laanka min kooron tá re giɛ̃ gána lɛ nɛ. Ǹ ba re ǹ biĩ wa. Min kɔn ba re ǹ gɛ̀ wuu pii wa. Min kɔn ba re n gɔ̀nɔn tɔtoɛ̃ hinlaa a n mìi ka kɔɔ̃ wa.

⁷ Min kɔn ba re woe màn-bii koe gɛ̀dɛnan la màn mɛn bɛ́ toɛ ǹ nə ǹ foo basã wa. Min kɔn ba re ǹ foo wɛɛ ǹ din hinlaa ǹ daanan gɛ̀ taman yii wa.»

⁸ Ǹ bɛ́ zɔ́n zɛnɛɛ kion mɛn nɛ, n nyan wɔ walan dɔn wa. N nyan giã tán n màn bii hinlaa n màn mi kun ka bɛa minin kɛn nɛ wa.

⁹ Masɛ Pàãyiidɛnaa Lawa, Izirayeli a Lawa a da ǹ boo á ke: «Ma á re zɔ́n bìn diɛn lɛ kuri, foo kɔɔ̃n lɛ-dɛn nɛ ka kɔn-wɔle tiin loen ne. Bɛ n die n zɛnɛɛ ka yii ni kaa yiikoonaabaa gɔ́ɔ̃ nɛ kànaa dinin.»

¹⁰ Bɛ̀ n boon kɛn tumaa da zaman lɛ nɛ ǹ mɛn waáraa, kɔntan min tá re nɔ̀n diɛ n la a pɛ: «Wàa na á baa Dɛnaa Lawa koe kɛ miã da wɔ mìi ni? Wɔ n wɔ sii baraa zɛnaa? Wɔa sã n ka wàa nɛ Dɛnaa Lawa, wɔa Lawa ganaa?»

¹¹ N die n nə ǹ lɛ si kɛnɛn: – Dɛnaa Lawa a da ǹ boo á ke: «A giala, ka digolon man nə́ n la bɔ ma ganaa, ǹ nə́ kɔ lawa kɔsɔn lɛ, ǹ nə́ ǹ guguru kɔ, ǹ nə́ kaa tán-a ǹ yɔrɔ-a. Ǹ nə́ n la bɔ masɛ ganaa, ǹ maa dí-pɛn kɛn tamaa wa.

¹² Kasɛn zɛnaa ǹ sii bɔnɛɛ kɔ á la ka digolon wɔ nɛ. Didie tumaa nə n parɛɛ a din a taasiɛ baraan ganaa, a ba n too koe maa da ǹ boo li wa.

¹³ Bɛ lɛ nɛ, man die ka lui gána kɛ nɛ. Gána mɛn bɛ́ kaa doɛ̃ wa, ka digolon dɔn dinin nə dɔ̃ wa, ka á re woe walan. Penleen laanka tèlò, ka á re lawa kɔsɔn guguru koe. Ma á re maa bǐɛ̃baa kɛ nyɛɛ ka-n doo wa.»

Wo bɛ̀rɛbaa ǹ bǎã n wolen wusoo a da piɛ

¹⁴ Á ke, lɛawaan tá re doe, Dɛnaa Lawa a da ǹ boo ne, ǹ ba re pii doo: «Ma nə n liɛ ka Dɛnaa Lawa Yiikoonaa tɔ nɛ, asɛ mɛn Izirayeli minin waa Ezipti gána nɛ á soo ǹ ne.»

¹⁵ Sɛnɛ, ǹ tá re pii: «Ma nə n liɛ ka Dɛnaa Lawa Yiikoonaa tɔ nɛ, asɛ mɛn Izirayeli minin waa gɔsɛ a lɛ̀gɔn la gána nɛ ka gána kɔsɔn kɛn nɛ á goã á ǹ pɛsɛ̃ ǹ nɛ.» Hiĩ, ma gána mɛn kɔ ǹ digolon la, ma á re wusii ma da ǹ nɛ walan.

Zɛ̀rɛdɛnaa kɔn ba re n boe a-n wa

¹⁶ Dɛnaa Lawa a da ǹ boo á ke: «Ma á re zɔ̀-kũli gigiã diɛ, ǹ da minin kɛn kũ. Bɛ kio, ma á re dɔ-dɔli damata diɛ ǹ da ǹ loo kelen la, tentenen ne, ka kele yalan tumaa nɛ.

¹⁷ Ǹ bɛ́ sii mɛn yii zɛnɛɛ, ma yii tá a ganaa. Ǹ kɔn ba durii-n ma ganaa wa. Ma yii tá ǹ siɛ̃n ganaa.

¹⁸ Ma á re ǹ kiɛ ǹ gɛ̀-dɛ ǹ giɔ̀mɔ lɛ laanka ǹ sãn lɛn saraa a laman paa saraa ganaa. A giala, ǹ nə́ *gɔ̀ da maa gána lɛ ganaa ka ǹ màn nyín gere bɔbɔnɛɛn kɛn nɛ. Gána mɛn bɛ má bɔ má koa maa wɔ lɛa, ǹ nə́ bɛ pã ka màn bɔbɔnɛɛn nɛ.»

Tɔrɔ tumaa á re Lawa taãn doɛ̃

¹⁹ Dɛnaa Lawa, n din nə ma pàã lɛa. N nə n ma tamɛɛ ka n pàã gole kɛ nɛ. Koe biikoo li, n din nə maa duru ǹ bǎã lɛa. Tɔrɔn tá re boe kanaa lɛ dan ganaa, ǹ da n li, ǹ pɛ: «Wɔ digolon man nə́ soɛ dinsɔɔ̃ ma, sii kooron mɛnɛn bɛ́ là ba ǹ ganaa wa.

²⁰ Minbuiin nɛ á boe la a lawan zɛnaa? A bɛ́ màn mɛn zɛnɛɛ, Lawa bie wa!»

²¹ Dɛnaa Lawa pɛ: Á bǐɛ̃ kɔ! Kanna kəni ma á re ma pàã laanka maa boo sii la baa nyɛɛ ǹ nɛ taãn-taãnɛ. Ǹ tá re doɛ̃ ka bɛ-n kəni mà ma tɔ n "Dɛnaa Lawa".