Zeremii 15 - LAWA A BOO SONBORE

Dɛnaa Lawa

¹ Dɛnaa Lawa pɛ ma nɛ: – Ta Muizu laanka Samayeli din nə́ n gii wɔ boo kɛ nɛ masɛ li, ma a re n yɔrɔ diɛ zaman lɛ la wa. Ǹ loo n nə ǹ bɔ ma yɔrɔ-a ǹ wo sɔsɔɔ.

² Bɛ̀ minin nə́ nɔ̀n da n la mà ǹsɛn doamaa nɛ ǹ wo maa, n die nə ǹ lɛ si kɛnɛn: «Dɛnaa Lawa n kɛ pii: Min mɛnɛn doamaa bɛ nɛ ǹ gã ka piɛ̃ busu ni, bɛn man die giɛ̃ ka piɛ̃ busu ni. Min mɛnɛn doamaa bɛ nɛ ǹ gã zia la, zia n die bɛn dii. Min mɛnɛn doamaa bɛ nɛ ǹ gã bòo ne, bɛn man die giɛ̃ bòo gɔn. Min mɛnɛn doamaa bɛ nɛ ǹ wo bɛ̀rɛbaa ǹ bǎã nɛ, ǹ tá re bɛn dɔn goɛ ǹ wo ǹ ne.»

³ Dɛnaa Lawa a da ǹ boo á ke: «Man die yui ǹ gialaa ka yɔrɔ sii ni: Gɔya sà gɛ̀ nɛ, ginin tá re ǹ giɛrɛɛ ǹ wo ǹ ne sɔsɔɔ, zèwon tá re ǹ mui tolokan nə ǹ sɔ̃ ǹ nə ǹ bɔ tán.

⁴ Bɛa biikoo li, kanaa a tɔrɔn tumaa á re bìn diɛ nyɛ́ɛ gɔn. Zudaan kii Ezekiasi a nɛgiĩ Manaasee sii baraan mɛnɛn zɛnaa Zeruzalɛmu, bɛn lɛn lɛa nɛ.»

⁵ Dɛnaa Lawa pɛ: Die n die makara boe n ganaa doo Zeruzalɛmu? N sii n die busi die ganaa? Die n die n din nɔmɛɛ a nɔ̀n da n li? Min kɔn!

⁶ N din nə n ma toa walan, Dɛnaa Lawa a da ǹ boo ne, n nə n dɔ̀ɔ̃ wɔ ma nɛ. Bɛ lɛ nɛ, ma yoo n gialaa, ma n ziziɛ̃. Má makara bɔ n ganaa ma nɔmaa.

⁷ Má maa zaman pɛsɛ̃, gána lɛ paǹ tumaa nɛ, ka ǹ bɛ́ màn sui lɔn. Má ǹ ziziɛ̃, má ǹ nɛnyaanan bɔ̀n baa. Sɛnɛ, ǹ nə ǹ giã ǹ gɔn bɔyaa wa.

⁸ Má ǹ lɔ giɔɔrɔn mɔnaa, ka yìsi mu gole a nyɔɔsɔ̃ bɛ́ lɔn. Penleen tã, má basaã dia sɔraasi ten a náa la. Bǎã goon ne, má nyɛ́ɛ laanka gɔ̀nɔn bìn diɛ dia la.

⁹ Lɔ mɛn nɛ sɔbaa yɛ, nɔmaa n die bɛ yii, a fɔfoã golee. Penleen tá re tèlò biɛ a ganaa. Sìi nə́ n kɔ lɛ. A yii gugurubaa papaã. Min mɛnɛn yii goã koo, ma á re bɛn dii zia la, ǹ zɔ́ɔn yɔrɔ-a. Dɛnaa Lawa a da ǹ boo ne.

Dɛnaa Lawa n Zeremii lɛ sii Zeremii

¹⁰ Maa wɔ n ka koe ne! Maa náa, ma n nə́ ma yɛ koe laanka zia taman yii gána lɛ tumaa nɛ? A da yaa, min kɔn a giɔ̀mɔ ba ma ganaa wa, ma wɔrɔ dɔn bii min kɔn la wa. Min tumaa lɛn baraa bíi ma li.

¹¹ Sɛnɛ, Dɛnaa Lawa pɛ: Ma nə n liɛ, ma á re n kirisibiɛ, ma yii nyɛɛ kɔ n la. Ma nə n liɛ, koe pinaa ka foo ziziɛ̃ gole pinaa nɛ, ma á re n zɔ́ɔ lɛ diɛ n gòã kuĩ ganaa.

¹² Fɔlɔ á boe la a gɔsɛ a lɛ̀gɔn la fɔlɔ laanka a zan kuru?

Dɛnaa Lawa

¹³ Zudaa, ǹ tá re n naforo laanka n gɔn màn giɔ̀mɔ kakaan kɛn kokoe. N ba re màn kɔn yii ǹ dòo wa. N sii baraa mɛn tumaa zɛnaa n gána lɛ nɛ, bɛn lɛn lɛa nɛ.

¹⁴ Gána mɛn bɛ́ n ba doɛ̃ wa, ma á re n biɛ n zɔ́ɔn bɛ̀rɛ lɛa walan. Sonbore, maa foo-yoo lɛ n kuĩ tɛ lɛa, die ka dinin kuĩ.

Zeremii

¹⁵ Dɛnaa Lawa, n tá sii tumaa doɛ̃. N yiri koa ma li, n nə n dɔ ma lɛ. Min mɛnɛn bɛ́ baraa zɛnɛɛ ma nɛ, maa gɛ̀ dòo bɔ bɛn ganaa. N nyan toa ma fuu yɛ, n foo á kũ ǹ li kɛa lɛa wa. Toa n kɛ dɔ̃: N din a lɛa nɛ maa sɔn kɛn sii ma ganaa.

¹⁶ Bɛ̀ má n boo ma lɔn, man kuĩ parsiini. A n ma foo kɔɔ̃n koe, a ma foo basã. Taãn nɛ Dɛnaa Lawa Pàãyiidɛnaa, n din tɔ n ma la.

¹⁷ Ma bie giã-n tán yaa wɔ ma-a wolen bii, ma á sàn koe wa. Sɛnɛ, ń ma da giã tiãlɛa ganaa ka pàã nɛ, a giala, ń ma gɔ́ɔ̃ pã ka foo yoo ne.

¹⁸ Dan ba maa là paparɛɛ la wa. Wàa na á baa? Maa busulɛ á nyɛɛ wa. A ba n lɛ tiɛ̃ wa. Bɛ giala? Sonbore, ma n ka mu zii bɛ́ lɔn ma gɔn, minin yiri siɛ̃, mu ná a yii a-n biikoo yii li wa.

Dɛnaa Lawa

¹⁹ Dɛnaa Lawa boo mɛn da ma nɛ, á ke: Bɛ̀ n wusoo n daa ma li, ma á re wusii ma n saa maa dí ni. Boon mɛnɛn bɛ́ là ba ǹ ganaa wa, bɛ̀ n bɛn toa walan, ń tá boo peperen diɛ, ma á re wusii ma n baa maa boo gii-dali lɛa. Zudaa minin doamaa nɛ ǹ da nsɛ ganaa, sɛnɛ nsɛ doamaa bie n wo ǹ li wa.

²⁰ Man die n biɛ ka zan kungɔn bɛ́ lɔn, min kɔn ná a boe la a nɔɔ a kaa wa. Ǹ tá re yui n gialaa, sɛnɛ, ǹ ba re boe n la wa. Sonbore, ma á re goɛ̃ kunun n ni, ma á re n kirisibiɛ. Dɛnaa Lawa a da ǹ boo ne

²¹ Ma á re n gɔsiɛ ma n bɔ min baraan gɔn, ma n kanbaa min kakaarɛn pàã ganaa.