Zeremii 13 - LAWA A BOO SONBORE

Maabɛlɛ a sii a kɔnboe

¹ Dɛnaa Lawa a da ǹ boo á ke: «Maabɛlɛ sonbore pii, n yii n binbin ni, sɛnɛ, n nyan toa mu mɛ a ganaa wa.»

² A kɔnpɛ ka Dɛnaa Lawa a da ǹ boo ne, má bɛa maabɛlɛ lɛ pii, má n binbin kũ ni.

³ Dɛnaa Lawa wusoo á boo da ma-n doo á pɛ:

⁴ «N maabɛlɛ mɛn lɛ pii n nə́ n binbin kũ ni, wo Faara tà lɛ-a, n duru gɛ̀fu yala-n.»

⁵ Má woo Faara tà lɛ-a, má maabɛlɛ lɛ duru ka Dɛnaa Lawa pɛ ma-n lɔn.

⁶ Lɛawaa damata bɛ kio, Dɛnaa Lawa boo da ma nɛ á pɛ: «N bɔyaa n wo Faara. Ma pɛ máa n maabɛlɛ mɛn lɛ duru walan ke, wusoo n wo bɛ lɛ saa.»

⁷ Má n bɔyaa ma woo Faara, má woo ga bɛa maabɛlɛ lɛ li a duru ǹ bǎã nɛ. Sɛnɛ, má woo maabɛlɛ lɛ yaa á bɔɔ̃ lenlen, là goon din ba a ganaa doo wa.

⁸ Dɛnaa Lawa tɔn boo da ma-n kəni á pɛ:

⁹ «Masɛ Dɛnaa Lawa a da ǹ boo á ke: A din yɔrɔ goon la, man die Zudaa a din koa kɛ ziziɛ̃, kɔnlɛ ka Zeruzalɛmu dɔ a din koa gole kɛ nɛ.

¹⁰ Tɔrɔ baraan manɛ. Ǹ ba n too koe maa da ǹ boon li wa. Maǹ nə n dinin foo kaka koe, ǹ paraamaa-n lawa kɔsɔn ganaa ǹ tá ǹ guguru koe. Ǹ tá re n biɛ ka maabɛlɛ kɛ bɛ́ lɔn, a na a màn kɔn bǐɛ̃ koe doo wa!»

¹¹ Dɛnaa Lawa a da ǹ boo á ke: «Minbuiin nɛn bɛ́ maabɛlɛ yii ǹ binbin ni lɔn, ma dɔ n má Izirayeli zaman laanka Zudaa zaman yii ma binbin ni miɛ̃, máa ǹ maa zaman baa, ǹ ma tɔ bɔ, ǹ gugurubaa da ma tɔ la, ǹ ma foo kɔɔ̃n kɔ. Sɛnɛ, ǹ nə n too kɔ ma lon wa.»

Lawa foo yoo a zaman li

¹² N die n pɛ ǹ nɛ kɛnɛn: – Dɛnaa Lawa, Izirayeli a Lawa a da ǹ boo á ke: «Doon man nə́ n zɛnaa mà ǹ duvɛ̃ kaa ǹ nɛ.» Bɛ̀ ǹ nə́ n lɛ si mà ǹsɛn tá bɛ doɛ̃,

¹³ n pɛ ǹ nɛ kɛnɛn: – Dɛnaa Lawa a da ǹ boo á ke: «Maa foo-yoo kɛ n die gána kɛa min tumaa yii kuĩ ka yɔ bɛ min yii kuĩ lɔn, ǹ kiin mɛnɛn bɛ́ giã-n Davida a kii dankan la, ǹ Lawa a wúlu-bɔlen ne, ǹ Lawa a boo gii-dalin ni, ka Zeruzalɛmu min tumaa nɛ.

¹⁴ Man die ǹ totoe kɔn nɛ, díi laanka nɛ, Dɛnaa Lawa a da ǹ boo ne. Sabarabaa ba a-n wa. Min kɔn makara á re ma kuĩ wa. Sàabaa ba la wa, man die ǹ bɔ̀n biɛ.»

Ka n too kɔ a biikoo li

¹⁵ Ka n too kɔ, ka n too da. Ka nyan nə n dinin koa wa. Dɛnaa Lawa n boo diɛ ka ka nɛ.

¹⁶ A laan bɛ̀ a n tèlò diɛ kɔ ganaa, bɛ̀ ka n gòã na kɔlɔ ganaa kele mìi ni, ka gugurubaa da Dɛnaa Lawa, kaa Lawa tɔ la. Ka nə n yii diɛ penleen la, sɛnɛ Dɛnaa Lawa n bɔyɛɛ a baa wɔlɔ tì biribiri lɛa, a n furuməə gole koe lɛ.

¹⁷ Bɛ̀ ka n too kɔ gɔn waa kɛ li wa, man wuu pii ka durii ni kaa din koa kɛ taman yii. Ma yii mu n piɛ̃ kiɛ, a giala, maǹ nə́ Dɛnaa Lawa a zaman goa ǹ nə́ woe ne.

Dɛnaa Lawa a boo kii wɔ paǹ li

¹⁸ A pɛ kii laanka kii ǹ dan nɛ kɛnɛn: Ka giã tán furu-n a giala, kaa kii bafolo sonbore kɛ bɔ ka mìi ganaa á mɛnaa.

¹⁹ Negɛvu a kiwin kiɛnlɛn tiɛ̃maa nɛ. Min kɔn ba ǹ buĩ doɛ̃ wa. Sonbore, ǹ nə́ Zudaa minin goa, ǹ nə́ woo ǹ tumaa nɛ bɛ̀rɛbaa ǹ bǎã nɛ.

Zeruzalɛmu a yii gugurubaa nya

²⁰ Zeruzalɛmu, n yii saa n ga: Zɔ́ɔn man boe gɔsɛ a lɛ̀gɔn li. Ma tɔɔ kuru mɛn koa n li, bɛ á maa? Sèren mɛnɛn nə goã n foo kɔɔ̃n koe, ǹ tá maa?

²¹ Ń giaárabaa zɛnaa ka ǹ tɛnɛn nɛ ǹ lɛ mui ni. Ǹ mɛn pinaa bɛ̀ ǹ nə́ n bɔyaa, maǹ die n diɛ ǹ pàã giulun, n nə n die wàa boo diɛ? N nə n die fuu yii ka lɔ nɔɔrɔ kɔle bɛ́ lɔn.

²² Bɛa biikoo li, n tá re nɔ̀n diɛ n din la mà wàa na á baa kɛ á n yii. Sonbore, bɛ̀ ǹ nə́ n mɔnaa goa lon, bɛ̀ ǹ nə́ n kũ ka pàã nɛ, n din a sii baraa damata lɛ a lɛa nɛ.

²³ Etiopii min tá boe la a n gɔ̀nɔn ki bɔyaa? Goe á boe la a na a sisiabaa kɛ bɔ a din ganaa? Haayii! Kasɛn mɛnɛn dɔn lɛ mui ka sii baraa zɛnaa nɛ, ka ǹ siɛ lɔn ka boo sii bǐɛ̃ zɛnaa la.

²⁴ Man die ka pɛsɛ̃ paǹ yii li, ka buu bisin bɛ́ lɔn, diə gole a piɛ̃ n goɛ.

²⁵ Dɛnaa Lawa a da ǹ boo á ke: Zeruzalɛmu, sii mɛn bɛ́ re n yii, ma sii mɛn yɔrɔ bɔ n wɔ lɛa, bɛ á ke. A giala, n yiri bɔ ka ma nɛ ń nə n foo doa lawa kooron ganaa.

²⁶ Sɛnɛ, masɛ n die n mɔnaa goɛ ma kɔ n yɔrɔ lɛ, ma n tontoro da kanaa.

²⁷ Áh! Má n naarɛbaa kɛ yɛ, n foo kɔɔ̃n lɛ dian kɛn nɛ, n sìi da ǹ kɔrɔbaa kɛ nɛ, kelen la, wurun ni. Má n dì bɔbɔnɛɛn kɛn yɛ. Wàa koe n ka kɛ nɛ Zeruzalɛmu ganaa? N ba li n nə n din *yoreen kɔ wa? Yǎa biĩ kəni?