Biblia Todo Logo
Bìoball air-loidhne

- Sanasan -

Zeremii 11 - LAWA A BOO SONBORE


Lɛ kɔ kɔnla ziziɛ̃

1 Dɛnaa Lawa boon mɛnɛn pɛ Zeremii ni, ǹ nə́ ke:

2 – Maa lɛ kɔ kɔn la ǹ boon kɛn ka ka nɛ, ka ǹ tamaa. Boo da ka Zudaa laanka Zeruzalɛmu minin ni,

3 n pɛ ǹ nɛ: «Dɛnaa Lawa Izirayeli a Lawa boo mɛn da á ke: Bɛ̀ min mɛn kɔ lɛ kɔ kɔn la ǹ boo kɛn lɛ wa, lɛn baraa nə n bíi li.

4 Lɛlɛ, ma ka digolon waa Ezipti gána nɛ, tɛ gole ke, má soo ǹ ne. Bɛa waáraa lɛ nɛ, ma lɛ kɔ kɔn la wɔ kɔn ka ka nɛ, má pɛ: Ka n too kɔ maa boon li, ka kɔ ǹ lɛ ka ma bɛ́ pii ka-n lɔn pelo. Ka bɛ nɛ, ka á re maa zaman biɛ, ma dɔ á re kaa Lawa biɛ.

5 Bɛa yɔrɔ lɛ la, ma lɛ-kɔ mɛn wɔ ka ka digolon ne, máa ma á re gána koe ǹ la, bɔ̀nyaa laanka zoo nyɔɔ n baa sii a nɛ, ma á re bɛ lɛ piɛ̃. A din lɛ n ke ka tá a-n pelo.» Má a lɛ si: «Hiĩ Dɛnaa Lawa!»

6 Dɛnaa Lawa pɛ ma-n doo: – Lɛ dia n pɛ Zudaa kiwin ni ka Zeruzalɛmu a ziin la ǹ nɛ, n pɛ kɛnɛn: «Ka lɛ kɔ kɔn la ǹ boon kɛn tamaa, ka kɔ ǹ lɛ!

7 Ma bɛ má ka digolon waa Ezipti gána nɛ má soo ǹ ne, má n gɔn waa ǹ nɛ ka ma parsiini. A da pelo yaa, má belebɔ, má n tɔ nə n gɔn woɛ ǹ nɛ, má n pii: Ma bɛ́ boo mɛn pii ka nɛ, ka n too kɔ li.

8 Sɛnɛ, ǹ nə n too kɔ wa, ǹ yiri bɔ wa. Maǹ nə́ kɔ ǹ dinin foo a baraabaa kɛ lɛ. Bɛ lɛ nɛ, lɛ kɔ kɔn la ǹ boon lɛn, ǹ nə́ ǹ boo la ǹ nə́ tamaa wa, a laanɛ má n gɔn waa ǹ nɛ, man má yoo ǹ gialaa bɛ lɛ taman yii.»

9 Bɛ kio, Dɛnaa Lawa kɛ pɛ ma-n doo: – Zudaa minin laanka Zeruzalɛmu minin man nə́ boo wɔ kɔn.

10 Maǹ nə́ timəə ǹ digolon siɛ̃n la, ǹ mɛnɛn lɛn nə n piã mà ǹ ba n too koe maa boon ganaa wa. Maǹ nə́ kɔ lawa kɔsɔn lɛ ǹ nə́ ǹ guguru kɔ. Izirayeli minin laanka Zudaa minin nə́ maa lɛ kɔ kɔn la kɛ ziziɛ̃ má doa kɔn ka ǹ digolon ne.

11 Bɛ lɛ nɛ, masɛ Dɛnaa Lawa á kɛ pii: «Á ke, man die koe diɛ ǹ la, ǹ bɛ́ ǹ ba re n boe ǹ mɛn nɛ wa. Bɛ̀ ǹ tá gú diɛ, ma a re n too koe ǹ lon wa.

12 Zudaa kiwin laanka Zeruzalɛmu minin tá re ǹ lawan bíi kəni, ǹ goã da yon gìĩ kɔɔ̃n tiɛ̃ ǹ mɛnɛn lɛn wɔ lɛa. Sɛnɛ, koe pinaa, bɛa lawan lɛn ba re boe la ǹ nə ǹ kirisibaa wa.

13 Kaa kiwin bɛ́ mɔnaa-n lɔn, kaa dìn dɔn man mɔnaa-n miɛ̃. Zeruzalɛmu a ziin bɛ mɔnaa-n lɔn kaa wúlu bɔ ǹ bǎãn kɛn sìi diɛ, bɛn dɔn man mɔnaa-n miɛ̃, kɛn lɛn ka n da yon gìĩ kɔɔ̃n tiɛ̃ ǹ ganaa dì *Baali wɔ lɛa.

14 Nsɛ Zeremii, n nyan nyankɔ wɔ zaman kɛa lɛa wa. N nyan gú da hinlaa n gòã kũ da ma ganaa ǹ lɛa wa. Koe biikoo li, ta ǹ nə́ n lɛ dɛ ma ganaa, ma a re n too koe ǹ lon wa.»


Izirayeli, Dɛnaa Lawa a olivie da

15 Tɔrɔ ke má narɛ, masɛ Dɛnaa Lawa ná a taasiɛ baraan kɛn dɔ̃. A n die wàa zɛnɛɛ maa kion? A bɛ́ lɛ kɔn mɛnɛn we ma nɛ hinlaa a bɛ ma goe ka siĩn mɛnɛn nɛ, bɛ́ á boe la a koe wɔlɔ lui a ganaa sonbore, a tɔ nə n nyanyaa bɛ kio?

16 Má goã má tɔ kɔ a ganaa máa "*olivie da, luu tì, nɛ sonbore koe biikoo yii li". Sɛnɛ, bìn diɛ gole goon gɔ́ɔ̃ nɛ, ma tɛ da a luun ganaa, a gùrùn tumaa yiyiɛ.

17 Dɛnaa Lawa Pàãyiidɛnaa din na á n zumu. Sɛnɛ kanna, a n koe pii n ni Izirayeli minin laanka Zudaa minin sii baraa zɛnaan taman yii. A giala, maǹ nə́ wúlu mànan kɔ Baali la ǹ nə́ Dɛnaa Lawa foo yoo ne.


Zeremii a kiwi minin man yui a gialaa

18 Maa zɔ́ɔn bɛ́ kuu koe ma ganaa ka siin mɛnɛn nɛ, Dɛnaa Lawa bɛn nyaa ma nɛ, má bɔ a siére-a.

19 Man má goã ka sère nɛ mɛn bɛ́ ǹ nə́ woe ne a dɛ ǹ bǎã nɛ. Ǹ goã sii mɛn we kɔn ma ganaa, ma goã doɛ̃ wa. Maǹ pii: «Ka daa wɔ da lɛ dɛ a kakabaa waáraa, a papaã a n bɔ yiikoonaan bii, min kɔn yiri nyan gisĩ a tɔ-n doo wa!»

20 Sɛnɛ, nsɛ Dɛnaa Lawa Pàãyiidɛnaa, kiri pepere wɔle, n tá min tumaa gɔ́ɔ̃gɔ́ɔ̃ ǹ taasiɛn doɛ̃. N bɛ́ re maa gɛ̀ dòo boe lɔn, ma á re bɛ yii, a giala, man ma sii we n din gɔn.

21 Bɛ lɛ nɛ, Dɛnaa Lawa a da ǹ boo á ke Anaatɔti minin ganaa, kɛn giɛ n gɛ̀ li, ǹ nə́ pii: «N nyan Lawa a boo gii da ǹ boo da wɔ-n doo Dɛnaa Lawa tɔ-n wa. Bɛ bie wa, wɔ n die n nyin boe.»

22 Bɛ lɛ nɛ, Dɛnaa Lawa Pàãyiidɛnaa n kɛ pii: «Man die yui ǹ gialaa. Ǹ tá re ǹ nɛ tenən dii zia la. Bòo á re ǹ nɛgiĩn laanka ǹ nɛlɔn dii.

23 Ma bɛ́ re yui Anaatɔti minin gialaa lɛ̀ mɛn-a, ma koe da ǹ mìi ni, min kɔn ba re goɛ̃ a yii n koo wa.»

San Catholic Edition Bible © Bible Society of Burkina Faso, 2013.

Bible Society of Burkina Faso
Lean sinn:



Sanasan