Zakarii 9 - LAWA A BOO SONBORE

Lawa n barka diɛ a zaman ganaa, a n là nyantoro koe ǹ la Izirayeli miãkɛnɛn ba re ǹ yɔyɔrɛ doo wa

¹ Dɛnaa Lawa a da ǹ boo á ke: Dɛnaa Lawa a boo dɔ Adraki gána nɛ, á dɔ yǎa Damaasi kiwi. A giala, Dɛnaa Lawa bie n yiin doɛ Izirayeli tɔrɔn dininsɔɔ̃nɔn la wa, sɛnɛ, a n doɛ minbuiin nɛ tumaa la.

² A n boo diɛ ka Amaati ni, kunu Damaasi kiwi ganaa, ka Tiiri kiwi laanka Sidɔn kiwi ni, ǹsɛn mɛnɛn doɛ̃ bɛ́ gole.

³ Tiiri kiwi tamaa ǹ kungɔn dɔ. Á wɔrɔ laanka sana sɔkɔn gigiã, mɔnaa nɛ ka tii bɛ́ lɔn.

⁴ Sɛnɛ, Dɛnaa Lawa á re sii. A kiwi tamaa ǹ kungɔnɔn kɛn, á re bɛn noɛ̃ a ǹ kaa Yìsi mu gole li. Tɛ á re bɛa kiwi lɛ kuĩ.

⁵ Bɛ̀ ǹ nə́ bɛ yɛ, nyɛ́ɛ á re Asikalɔn kiwi kuĩ, Gaazaa gɔ̀nɔn tá re bìn diɛ nyɛ́ɛ gɔn. Foo doa ǹ bǎã ba Ekrɔn la wa, kii ba re yii Gaazaa doo wa, min ba re goɛ̃ Asikalɔn kiwi-n wa.

⁶ Minbuiinin man die goɛ̃ lɔloɛ-n kɔn Asidɔdi kiwi. Dɛnaa Lawa pɛ: «Kɛa yɔrɔ kɛ lɛ la, man die Filisiti minin din gole kɔ kɛ nyɛɛ.

⁷ Siĩ gɔ̀dɛnaa ke ǹ lɛ-n, ma á re bɛ boe ma bɔ a nɛ. Mà bɔbɔnɛɛ ke a ganaa, ma á re bɛ pii ma bɔ a ganaa. Min mɛnɛn yii bɛ́ re goɛ̃ koo ǹ bii, bɛn tá re maa wɔn biɛ ka Zudaa a kiã bɛ́ lɔn, Ekrɔn minin tá re goɛ̃ ka Zebuzu tɔrɔn bɛ́ lɔn.

⁸ Ma á re maa gána lɛ lɛduĩ, ma a kirisibaa zɔ́ɔ woo a daa wolen ganaa. Tiin kiã kɔn ba re die boe maa zaman yii-n doo wa. A giala, má n yiin doa ǹ la kanna.»

Kii mɛn bɛ́ die ka là nyantoro ne

⁹ *Siɔn kiwi, bɛ̀ baa ka n we tumaa nɛ! Zeruzalɛmu minin, ka foo kɔɔ̃nbaa ǹ lɛ dɛ! Ga, n kii n die n li. A n pepere, gɔ̀lɔ̀ lɛa, a nə n din boɛɛn koe. A na á dii dundun la, dundun nɛ la, dundun dan a nɛ.

¹⁰ Ma á re ziabaa ǹ wotoron boe ma ǹ bɔ Efrayimu, ma ziabaa ǹ sùin bɔ ma ǹ bɔ Zeruzalɛmu. Ma á re ziabaa ǹ san yiyiɛ. Kii lɛ á re là nyantoro koe tɔrɔn la. A n die Dɛnaa biɛ, a kũ Yìsi mu kɔsɛ kɔsɛ ganaa a wo Yìsi mu gole kɔsɔn yaa, a kũ Efrati tà ganaa, a wo kanaa lɛ dan yaa.

Dɛnaa Lawa n die kòso nɛn kiɛ

¹¹ Dɛnaa Lawa pɛ: «Maa lɛ kɔ kɔn la kɛ taman yii má wɔ kɔn ka ka nɛ, mà na a siére lɛa, min mɛnɛn bɛ́ kòso ne, nyankɔrɔ gole ne, mu ná a ba a-n wa, man die bɛn wɛɛ, ma ǹ kaa.

¹² Kòso nɛ foo doa wolen lɛn, ka n bɔyaa ka da kaa kiwi tamaa wole ne! Pelo dinin, man pii ka nɛ, màn mɛn bɛ́ ka lon, man die bɛa la ma-n paa koe ka la.

¹³ Man die Zudaa gána biɛ maa ziabaa ǹ sa lɛa, ma Efrayimu baa a kiɛ lɛa. Siɔn, man die n nɛnyaanan diɛ Grɛki minin gialaa. Maǹ die goɛ̃ ma gɔn ka zia-baali a gɔya sa bɛ́ lɔn.»

¹⁴ Ka bɛ-n kəni, Dɛnaa Lawa n die yui lon ǹ mìi la, a kiɛ kɛ wo ka la a tɛ pɛ bɛ́ lɔn. Dɛnaa Lawa n die bɛn pii, a wo nyɛɛnɛ ka labara nɛ, boe gusin a lɛ̀gɔn la.

¹⁵ Dɛnaa Lawa Pàãyiidɛnaa á re a zaman tamɛɛ. Ǹ tá re boe ǹ zɔ́ɔn la, ǹ nə ǹ baragii kɔlɔn yɔyɔrɛ. Ǹ tá re màn mii, ǹ bìn diɛ gole wɔ ka yɔ bɛ min yii ganaa lɔn. Ǹ tá re piɛ̃ ka *wúlu màn mà bɛ́ lɔn paan nɛ, hinlaa ka mà mɛn bɛ́ ǹ kaa *wúlu bɔ ǹ bǎã karan ganaa.

¹⁶ Bɛa pinaa, Dɛnaa Lawa, ǹ Lawa á re ǹ kirisibiɛ ka tɔɔn-lɛduə̃li bɛ́ a tɔɔn kirisibiɛ lɔn. Maǹ die tɛ pii ǹ gána nɛ ka kɔlɔ giɔ̀mɔ kaka bɛ́ lɔn, kii bafolo ganaa.

¹⁷ Ǹ foo á re kɔɔ̃n koe parsiini! Ǹ tá re siĩn koe parsiini! *Belee á re pàã koe nɛ tenən la, duvɛ̃ dii pàã kɔ nɛlɔ tenən la.