Zakarii 7 - LAWA A BOO SONBORE

Lɛ-sɔɔ mɛn bɛ́ a kɔɔ̃n Dɛnaa Lawa ganaa wa

¹ Dariyusu a kiibaa lɛ̀ siibaa ǹ wɔ li, a mui manangɔrɔbaa ǹ wɔ, ǹ bɛ́ ǹ mɛn lɛ bíi mà *Kisilə mui, bɛa lɛawaa siibaa ǹ wɔ li, Dɛnaa Lawa boo da Zakarii ni.

^2-3 Kii a dí-nyalin nyɛɛnaandɛnaa gole Betɛli Saresɛɛrɛ ná a minin dia mà ǹ Dɛnaa Lawa nyankɔ mà a n yɔrɔ bǐɛ̃ da ǹsɛn la, ǹ nɔ̀n kɛ da Dɛnaa Lawa Pàãyiidɛnaa a kion a Lawa a wúlu-bɔlen laanka Lawa a boo gii-dalin la: «Ma doamaa-n ma wuu pɛ, man lɛ sɔɔ haalɛ tɔn pelo yii ni lɛ̀ a mui soorobaa ǹ wɔ li ka ma bɛ́ má goã zɛnɛɛ lɔn haalɛ bibi?»

⁴ Dɛnaa Lawa Pàãyiidɛnaa boo kɛ da ma nɛ:

⁵ «Boo da zaman tumaa nɛ ka Lawa a wúlu-bɔlen ne n pɛ ǹ nɛ: A lɛ̀ pɔsɔbaa n ka kɛ nɛ, ka nə n lɛ-sɔɔ, ka n gɛ̀ loen loe, mui sooro laanka a sɔbaabaa ǹ wɔ li. Taãn nə n pɛ, ka n bɛa lɛ soɛ lɛ zɛnɛɛ masɛ tɔ la?

⁶ Bɛ̀ kaa màn bii ka n màn mii, ka dinin là taman yii bie wa?»

⁷ Lɛlɛ, Lawa a boo gii-dalin nə́ goã ǹ nə́ gɔn waa boon kɛn miãn da ka Dɛnaa Lawa tɔ nɛ. Bɛa biikoo li, Zeruzalɛmu laanka a lɛkoro-a kiwi tumaa goã yii-nyɛɛ la. Minin nə́ goã giã nɛ Negɛvu gána nɛ ka *Sefelaa gána kɛ nɛ.

⁸ Dɛnaa Lawa Pàãyiidɛnaa boo da Zakarii ni á pɛ nɛ:

⁹ «Dɛnaa Lawa Pàãyiidɛnaa n ke pii: Ka kiri pepere wɔ, ka goã min sonboren lɛa, kɔn-narɛɛ n ka bii.

¹⁰ Ka nyan mɛnaa nɛ toen laanka lɔ giɔɔrɔ la wa, tii laanka doobaa nɛ. Ka nyan taasiɛ baraan wɔ kɔn a paǹ li wa.»

¹¹ Sɛnɛ, minin nə́ n piã ǹ nə n too kɔ wa. Ǹ nə́ n dɔ̀ɔ̃ wɔ, ǹ nə́ n toon tã màn mɛn bɛ́ toɛ ǹ nyan màn kɔn ma wa.

¹² Ǹ nə́ n foo kaka kɔ ka kɔlɔ bɛ́ lɔn. Ǹ nə́ n piã ka Dɛnaa Lawa Pàãyiidɛnaa a dí-pɛ laanka a boon ne, a ǹ mɛnɛn kɔ a lɛlɛ a Lawa a boo gii-dali la a din yiri barka nɛ. Bɛ lɛ nɛ, Dɛnaa Lawa Pàãyiidɛnaa foo yoo parsiini

¹³ á pɛ: «Ma bɛ́ máa ǹ ma bɔlɔ si, ǹ nə n too kɔ wa. A din yii goon ne, bɛ̀ ǹ tá gú diɛ, ma dɔ ba n too koe ǹ lon wa.

¹⁴ Má ǹ sasawaa tɔrɔn bii, ǹ bɛ́ ǹ ba ǹ mɛnɛn dinin doɛ̃ wa. Ǹ goa lɛ kio, ǹ gána lɛ yu. Min kɔn ba woe walan wa, min kɔn dɔ a boe a-n wa. Bɛa gána kɔɔ̃n-kɔɔ̃n kɛ lɛ, ǹ nə́ bɔyaa ǹ nə́ baa kɛbɔlɔ lɛa.»