Zakarii 1 - LAWA A BOO SONBORE

Zakarii a sii-yɛn ( 1—8 ) Dɛnaa Lawa n Izirayeli nɛn bíi we mà ǹ nə ǹ giã ǹ gɔn bɔyaa

¹ Pɛrsin kii Dariyusu a kiibaa lɛ̀ paabaa ǹ wɔ a mui kiwisibaa ǹ wɔ li, Dɛnaa Lawa boo da ka Idoo a nɔ̀ɔn, Lawa a boo gii-dali, Berekia a nɛgiĩ Zakarii ni.

^2-3 Á pɛ nɛ mà a kɛ pɛ Izirayeli minin manɛ: – Á ke, masɛ Dɛnaa Lawa Pàãyiidɛnaa n kɛ pii: «Ma foo goã á yoo ka digolon ma li parsiini. Sɛnɛ, bɛ̀ ka wusoo ka daa masɛ Dɛnaa Lawa li, má á re wusii ma da ka li. Dɛnaa Lawa Pàãyiidɛnaa a da ǹ boo ne.

⁴ Ka nyan ka digolon lɛn zɔɔ̃ wa. Lɛlɛ, maa boo gii-dalin nə́ boo da ǹ nɛ, mà ǹ nə ǹ giã ǹ gɔn baraa kɛ kaa, kɔnlɛ ka ǹ sii bɔnɛɛ zɛnaan kɛn nɛ. Sɛnɛ, ǹ nə n too kɔ ma lon wa, ǹ nə n yiri koa ma li wa. Dɛnaa Lawa a da ǹ boo ne.

⁵ Ka digolon banban, Lawa a boo gii-dalin lɛn dɔn nə́ gã.

⁶ A da yaa ma boo laanka gɔn waan mɛnɛn kɔ maa dí-nyalin, Lawa a boo gii-dalin la, máa ǹ pɛ ǹ nɛ, á dɔ ǹ li ǹ nə́ golee li. Ǹ nə́ ǹ giã ǹ gɔn bɔyaa, ǹ nə́ pɛ: Dɛnaa Lawa Pàãyiidɛnaa na á golee li mà a n die wɔ kuĩ wɔa giã ǹ gɔn li ka wɔa sii zɛnaan nɛ. A na á bɛ lɛ zɛnaa.»

Sii-yɛ bibinaa: Sùin

⁷ Dariyusu a kiibaa lɛ̀ paabaa ǹ wɔ li, a mui fulugoonbaa ǹ wɔ, *Sebati mui a lɛawaa fuəweensiibaa ǹ wɔ li, Dɛnaa Lawa boo da ka Idoo a nɔ̀ɔn, Lawa a boo gii-dali, Berekia a nɛgiĩ Zakarii ni. Zakarii pɛ:

⁸ «Bɛa tèlò lɛ nɛ, má giĩ goon yɛ á dii sùi tã la. A n golee-n dan bii ni, ǹ luu n tì, nyankɔrɔ basa nɛ. Sùi kɔsɔn man a kio: A tãtãn nɛ, a pupurun ni, ka a fufun ni.»

⁹ Má nɔ̀n da kɛnɛn: «Dɛnaa, sùin kɛn man wàa giala pii?» Lon a dia dí-a wole mɛn bɛ́ á kɔnbɔ a boo da ma nɛ, bɛ́ ma lɛ si kɛnɛn: «Ma á re a giala pii n ni.»

¹⁰ Giĩ lɛ nə́ n toa dan lɛn gòã li ǹ luu n tì, á pɛ: «Dɛnaa Lawa na á ǹ dia mà ǹ da kɔ tán lɛ ǹ ga a ganaa.»

¹¹ Sùidɛnan lɛn nə́ n bɔlɔ saa ǹ nə́ pɛ Dɛnaa Lawa a lon a dia dí-a wole lɛ nɛ golee-n dan lɛn giulun ǹ luu n tì, ǹ nə́ pɛ: «Wɔ kɔ tán tumaa lɛ wɔ ga a ganaa. Wɔ bìn diɛ kɔn yɛ wa, a tumaa n kiĩ ni.»

¹² Dɛnaa Lawa a Lon a dia dí-a wole lɛ tɔn pɛ: «Dɛnaa Lawa Pàãyiidɛnaa, a lɛ̀ pɔsɔbaa n ke n foo n yoo ne Zeruzalɛmu li kɔnlɛ ka Zudaa kiwi tɛnɛn nɛ. Yǎa biĩ n tɔn makara bɔ ǹ ganaa?»

¹³ Dɛnaa Lawa tɔ́n boo da ka foo-basiɛ̃ nɛ lon a dia dí-a wole lɛ nɛ boo diɛ ka ma nɛ. Foo taã ǹ boon manɛ, ǹ nə́ foo doɛ.

Dɛnaa Lawa á re makara boe Zeruzalɛmu ganaa

¹⁴ Lona dia dí-a wole mɛn bɛ́ boo diɛ ka ma nɛ, á n toa ma ganaa mà ma boo kɛ pɛ: Dɛnaa Lawa Pàãyiidɛnaa n kɛ pii: «Maa Zeruzalɛmu narɛ ǹ gɔn tá baraa, ka *Siɔn kele sonbore kɛ nɛ.

¹⁵ Sɛnɛ, tɔrɔn mɛnɛn bɛ́ ǹ nə́ waa ǹ dinin la taãn-taãnɛ, ma foo n yoo ne bɛn li parsiini. A giala, maa foo-yoo bɛ́ a tɔn gole kɔ Izirayeli li ǹ mɛn waáraa wa, bɛa tɔrɔn kɛn lɛn ná a koe mìi saa lon.

¹⁶ Bɛ lɛ nɛ masɛ Dɛnaa Lawa á ke pii: Man die wusii man bɔyaa ma wo Zeruzalɛmu li ka foo basiɛ̃ nɛ, ma màn zɔɔ̃ ǹ biɛ da li. Ka bɛ nɛ, ǹ tá re wusii ǹ maa kion dɔ, ǹ wusoo ǹ maa kiwi lɛ dɔ.» Dɛnaa Lawa a da ǹ boo ne.

¹⁷ Bɛ kio, lon a dia dí-a wole lɛ wusoo á pɛ ma nɛ, mà ma boo kɛ da ka Dɛnaa Lawa Pàãyiidɛnaa tɔ nɛ: «Maa kiwin lɛn tá re wusii doo ǹ pã ka màn sonboren ne. Man die wusii ma Zeruzalɛmu bɔ ma koa doo, ma Siɔn foo taã.»