Zaaki 1 - LAWA A BOO SONBORE

¹ Masɛ Zaaki, Lawa laanka Dɛnaa Yezu *Krita a bɛ̀rɛ n sɛ́wɔ kɛ diɛ. Lawa a minin mɛnɛn bɛ́ pɛsiɛ̃-n kanaa paǹ tumaa nɛ, ka Izirayeli tɔrɔ fulupaa kɛ bɛ́ lɔn, ma á fòo diɛ ka tumaa nɛ.

Golee Lawa li laanka sii-doɛ̃ boo

² Ma dɔɔ̃nɔn lɛn, ka bɛ́ nɔmaa tɔrɔ mɛn tumaa we, ka toa ka n nyɛnyɛɛ bɛ gɔ́ɔ̃ nɛ.

³ A giala, ka á doɛ̃, bɛ̀ kaa golee Lawa li nə́ n si nɔmaa la, bɛ lɛ n die ka sii simaa nɛ.

⁴ Sɛnɛ, ka toa kaa sii simaa yɛ foaãnɛ, màn mɛn bɛ́ toɛ, kaa sii lɛ pã a dɔ a lɛ dan ganaa, sii kɔ́n baran ka bɔ a ka daa wa.

⁵ Bɛ̀ sii-doɛ̃ nyaabaa min mɛn ganaa, ǹ dɛnaa na a nyankɔ Lawa la, á die koe la. A giala, Lawa n boe a din ni, bɛ̀ a bǐɛ̃ baa min tumaa la miɛ̃, a min sɔ̀n pii a tɔn gɔ wa.

⁶ Sɛnɛ, ǹ dɛnaa na a nyankɔ ka goleemali ni, a baran n gɔ́ɔ̃ baa paa wa. A giala, bɛ̀ min mɛn tá n gɔ́ɔ̃ biɛ paa, bɛa dɛnaa yiri nə n penpelen diɛ, ka piɛ̃ bɛ́ kɔ̀ mu siɛ, bɛ̀ a na a penpelen da lɔn.

⁷ Bɛ miã min kɛ baran n yiri koa a ganaa, mà Dɛnaa á die màn kɔ́n koe la wa,

⁸ a giala, a gɔ́ɔ̃ n paa, a sii kɔ́n ba a giala la wa.

Doobaabaa laanka paãmabaa boo

⁹ Bɛ̀ Lawa dɔɔ̃n doobaa mɛn saa á da lon, bɛa dɛnaa nə n nyɛnyaa a saa a da lon lɛ taman yii.

¹⁰ Bɛ̀ pàãma dɔ mɛnaa, a dɔ nə n nyɛnyaa a mɛnaa lɛ taman yii. A giala, da buũ bɛ́ papaɛ̃ fufuu lɔn, pàãma dɔ n die papaɛ̃ miɛ̃.

¹¹ Bɛ̀ wasa bɔ ka a sɛ̀ fuu kakaarɛ kɛ nɛ, a n da lɛ laɛ. A buũ n kiɛ, a siĩnbaa n papaɛ̃. Pàãma dɔ n die papaɛ̃ a nya ǹ dín bii miɛ̃.

Da gɔ́ɔ̃ li boo

¹² Min mɛn bɛ́ nɔmaa sii a ganaa, bɛa dɛnaa wɔ á re bǐɛ̃ koe. A giala, bɛ̀ a bɔ a-n ka bǐɛ̃ nɛ, á re yiikoonaabaa yii. Min mɛnɛn bɛ́ Dɛnaa narɛ, a na á n lɛ kɔ, mà á die bɛ lɛ koe ǹ la.

¹³ Bɛ̀ da ma gɔ́ɔ̃ li min yɛ, ǹ dɛnaa baran pɛ mà Lawa sii-n wa. A giala, min ba boe la a n da Lawa gɔ́ɔ̃ li wa, Lawa dɔ a die n diɛ min gɔ́ɔ̃ li wa.

¹⁴ Bɛ̀ min yii bɔ sii mɛn li, bɛ lɛ n bebele a kũ ka kan bɛ́ lɔn, a da sii ni.

¹⁵ Bɛ̀ yii bɔ sii li dɔ wɔ foo ne á nya, bɛ lɛ n die ka sii baraa nɛ. Bɛ̀ sii baraa dɔ nə́ n din yɛ, bɛ lɛ n die ka gɛ̀ nɛ.

¹⁶ Ka baran ka dinin bebele wa, ma dɔɔ̃n narɛɛ wolen lɛn.

¹⁷ Lawa bɛ́ wɔ goe ka màn mɛn tumaa nɛ, màn sonbore ne, a lɛ piɛ̃maa nɛ. A din na á folo-kaalin zɛnaa á ǹ kaa lon. Lawa ba n bɔyɛɛ ka bɛa mànan lɛn bɛ́ lɔn, bɛ̀ a fúlu a wusoo a tii wa; bɔyaa ǹ gɔn ba a ganaa paǹ kɔ́n li wa.

¹⁸ A na á kɔɔ̃n kɔ Lawa ganaa, a yiikoonaabaa dii kɔ wɔ la ka boo sonbore kɛ barka nɛ, màn mɛn bɛ́ toɛ, a bɛ́ re min kɔsɔn mɛnɛn dɔn yii miɛ̃, wɔ bɛn nyɛɛnaandɛnan baa.

Too-kɔ boo li laanka sii-zɛnaa boo

¹⁹ Ka dɔ̃, ma dɔɔ̃n narɛɛ wolen lɛn, didie doamaa nɛ a n too kɔ doɛ̃, min kɔ́n baran n lɛ fuu kɔ a boo da wa, min kɔ́n foo baran yoo fufuu wa.

²⁰ A giala, bɛ̀ min foo yoo, a bɛ́ sii mɛn zɛnɛɛ bɛ gɔ́ɔ̃ nɛ, bɛa boe la a goã pepere Lawa yɔrɔ-a wa.

²¹ Bɛ lɛ taman yii, sii mɛn tumaa bɛ́ *gɔ̀ loe min ganaa, ka n bɔ bɛ wɔlɔ li, ka nya ǹ dí babaraa tumaa nɛ. Lawa na a boo mɛn wɔ ka foo ne, ka lɛ kɔ bɛ ganaa ka din-gisiĩ ni, a giala, á boe la a ka kirisibaa.

²² Ka toa ka tɔ wɔ, a kɔnpɛ ka Lawa a boo lɛ-n ka tɛrɛɛnɛ. Ka baran n too kɔ a ganaa kooro, ka ka dinin bebele wa.

²³ A giala, bɛ̀ min tá n too koe Lawa a boo lɛ ganaa, a ná a tɔ we á kɔnpii-n wa, bɛa dɛnaa n kɔnboe ka giĩ kɔ́n nɛ, giɛ a din a minbuiinbaa ǹ yɔrɔ kɛ ganaa damalon ne.

²⁴ A bɛ́ á ga a din ganaa á nya á woo, a bɛ́ lɔn, a yiri bɔ gɔrɔ.

²⁵ Sɛnɛ, bɛ̀ min mɛn nə́ n yii wɔ Lawa a minin doroo ǹ boo lɛ piɛ̃ kɛ-n taãn-taãnɛ, bɛ mɛn bɛ́ wɔ boe sii ni, bɛ̀ n dɛnaa nə́ n doa a ganaa ka a parsiini, a bɛ́ boo mɛn miɛ, bɛ̀ a yiri á goɛ̃ bɛ nɛ, á n tɔ we á kɔnpii ni, Lawa á die barka we bɛa dɛnaa nɛ a nya ǹ dín gɔ́ɔ̃ nɛ.

²⁶ Bɛ̀ min pɛ mà a n Lawa a zii tɔ we, a lɛ dɔ ná a kuĩ wa, bɛa dɛnaa na a din bebele, a Lawa a zii tɔ-we lɛ n kooro lɛa.

²⁷ Zii mɛn bɛ́ siĩni, á n pepere dɔn Díi Lawa yɔrɔ-a, bɛ n ka kɛ nɛ: N nə n dɔ nɛ-toenən laanka lɔ giɔɔrɔn lɛ ǹ nɔmaa gɔ́ɔ̃ nɛ, n nə n parabaa ka kanaa siin ni, màn mɛn bɛ́ toɛ, n baran gɔ̀ lɔ n din ganaa wa.