Zaã2 1 - LAWA A BOO SONBORE

¹ Masɛ *min gole lɛ n sɛ́wɔ kɛ diɛ "lɔ kɛ la Lawa bɔ á koa ka a nɛnyaanan nɛ". Man ka narɛ taãn-taãnɛ. Masɛ dinsɔɔ̃ bie ka narɛ wa, min mɛnɛn tumaa bɛ́ sonbore doɛ̃, bɛn dɔn man ka narɛ miɛ̃.

² Sonbore mɛn bɛ́ wɔ nɛ, a n die goɛ̃ wɔ li yǎa duduu, man ka narɛ bɛ lɛ a lɛa.

³ Díi Lawa nɛ, ka Yezu *Krita mɛn bɛ́ Díi lɛ a Nɛgiĩ lɛa, ǹ bǐɛ̃ die a dɔ wɔ ganaa, ka makara-doɛ̃ nɛ, ka là nyantoro ne. Bǐɛ̃n kɛn die ǹ goã wɔ li, sonbore laanka kɔn-narɛɛ gɔ́ɔ̃ nɛ.

Sonbore laanka kɔn-narɛɛ boo

⁴ Má yɛ kaa Lawa a sɔmɔ nɛnyaanan tɛnɛn tá tɔ we sonbore zii la, ka Díi Lawa pɛ wɔ-n dí lɛa lɔn, bɛ́ kɔɔ̃n kɔ ma ganaa parsiini.

⁵ Kanna kəni, Lawa a sɔmɔ minin lɛn, man ka nyankoe, máa ka daa wɔ kɔn narɛ. Bɛ bie dí dii lɛa ma á koe ka la wa, dí mɛn nə n pɛ wɔ nɛ, a saa giala-kɔ waáraa ganaa, bɛ lɛ nɛ.

⁶ Ma bɛ́ kɔn-narɛɛ mɛn boo diɛ, bɛ n ka kɛ nɛ, wɔ toa wɔa giã ǹ gɔn kɔnpɛ ka Lawa a dí-pɛn nɛ. Dí-pɛ mɛn lɛ bɛ́ wɔ́ n daraa a ganaa, a saa giala-kɔ waáraa ganaa, a n mà wɔa giã ǹ gɔn goã kɔn narɛ ǹ zii la.

⁷ Soɛ-bɔle gigiã nə́ n da kanaa la. Maǹ nə́ n piɛ̃ ǹ ba golee li, mà Yezu Krita daa minbuiin nɛ taãn lɛa wa. Min mɛn bɛ́ zɛnɛɛ miɛ̃, bɛ lɛ n soɛ-bɔle lɛ lɛa, Krita a Zɔ́ɔ dɔ nɛ.

⁸ Ka n yiri kɔ ka dinin li, màn mɛn bɛ́ toɛ kaa tɛ̀fuu giɔ̀mɔ baran papaã wa, sɛnɛ, ka kaa saraa lɛ piɛ̃maa yɛ.

⁹ Daraa mɛn bɛ́ n we Krita wɔ gɔn la, bɛ̀ min woo min soo á n bɔ bɛ nɛ, á woo para li, Lawa a kun ni wa. Min mɛn bɛ́ goɛ̃ bɛa daraa kɛ gɔ́ɔ̃ nɛ, Díi Lawa laanka a Nɛgiĩ tá kun ka bɛa dɛnaa nɛ.

¹⁰ Bɛ̀ min daa ka ganaa, a ná a da ka bɛa daraa ǹ gɔn kɛ-n wa, ka baran n yɔrɔ da la wa, ka baran fòo din da-n wa.

¹¹ A giala, bɛ̀ min mɛn fòo da nɛ, ǹ dɛnaa na á n din kaa kun ka a zɛnaa ǹ sii bɔnɛɛn kɛn nɛ.

Boo giala-nyɔmɔɔ

¹² Boo gigiã tá ma li, má n zoɛ̃ máa ma ǹ pɛ ka nɛ, sɛnɛ, ma ba li ma kiɛ̃ sɛ́wɔ-n ma dia ka la wa. Man zoɛ̃ máa ma da kaa piɛ, ma din pɛ ka nɛ ka ma lɛ nɛ, màn mɛn bɛ́ toɛ, wɔa foo kɔɔ̃n kɔ lɛ pã.

¹³ Lawa a sɔmɔ mɛn dɔ bɛ kànaa, ka ka miãnɛn bɛ́ lɔn, a laanka a nɛnyaanan tá fòo diɛ ka nɛ.