Zaã1 5 - LAWA A BOO SONBORE

Boo kanaa la boo

¹ Min mɛn bɛ́ golee li, mà Yezu n Minin Nyin-sili lɛa, bɛ n Lawa a nɛ lɛa. Bɛ̀ n tá min di narɛ, ma na a nɛnyaanan dɔn narɛ.

² Bɛ lɛ n ke, bɛ̀ wɔ á Lawa narɛ, wɔ ná a dí-pɛn siin zɛnɛɛ, wɔ ǹ doɛ̃ ka bɛ nɛ, wáa wɔ doamaa-n wɔ Lawa a nɛnyaanan dɔn narɛ.

³ A giala, bɛ̀ wɔ á Lawa a dí-pɛn lɛn lɛ sii, wɔ n Lawa narɛ ka bɛ nɛ. A dí-pɛn lɛn dɔn ba kaka wɔsɛn ganaa wa,

⁴ a giala, Lawa a nɛ tumaa á boe la a boo kanaa la. Màn mɛn dɔ bɛ́ toɛ wɔ boo kanaa la, bɛ n ka wɔa goleemali ni.

⁵ Die n boe kanaa la? Min mɛn bɛ́ golee li, mà Lawa a Nɛgiĩ n ka Yezu ni, yǎa bɛ dinsɔɔ̃.

Siérebaa ǹ sii mɛn nə n pɛ Yezu Krita wɔ paǹ li

⁶ Min mɛn da wɔ li, bɛ n ka Yezu *Krita nɛ. A na á daa ka a *batɛmu yɛ ǹ mu ni, ka a gɛ̀-wɔ ǹ mà nɛ. A bie á daa ka mu dinsɔɔ̃-n wa, sɛnɛ, a na á daa ka mu ni, ka mà nɛ. Yiri Fu din nə bɛa siére pii, a giala, a n sonbore lɛa.

⁷ Siére sɔɔ na a tan:

⁸ Yiri Fu ni, mu ni, ka mà nɛ. Ǹ dinin sɔɔnɔn dɔn lɛ n kun siére goon toto kɛ lɛ nɛ.

⁹ Bɛ̀ wɔ á lɛ koe minbuiinin siérebaa ǹ boo ganaa, wɔ dɔ̃ mà Lawa a siérebaa ǹ boo kɛ á gole á la bɛ nɛ. Lawa din na á bɛa siérebaa ǹ boo lɛ pɛ a Nɛgiĩ wɔ gɔn la.

¹⁰ Bɛ̀ min mɛn tá golee Lawa a Nɛgiĩ li, bɛa siérebaa ǹ boo kɛ lɛ tá ǹ dɛnaa nɛ. Sɛnɛ, bɛ̀ min mɛn ba golee Lawa li wa, bɛa dɛnaa n Lawa biɛ soɛ-bɔle lɛa. A giala, Lawa siérebaa ǹ boo mɛn kɔ a Nɛgiĩ wɔ paǹ li, a golee bɛ li wa.

¹¹ Bɛa siérebaa ǹ boo lɛ á ke: Nyin nyabaã mɛn bɛ́ a din a Nɛgiĩ ni, Lawa na á bɛ lɛ kɔ wɔ la.

¹² Bɛ̀ Lawa a Nɛgiĩ lɛ tá min mɛn li, nyin nyabaã wole dɔ na a li. Bɛ̀ Lawa a Nɛgiĩ lɛ ba min mɛn li wa, nyin nyabaã dɔ ba a li wa.

Nyin nyabaã boo

¹³ Kasɛn mɛnɛn bɛ́ ka golee Lawa a Nɛgiĩ tɔ li, man boo kɛ kiɛ̃ diɛ ka la, màn mɛn bɛ́ toɛ ka dɔ̃, mà nyin nyabaã tá ka li.

¹⁴ Wɔ á doɛ̃, wáa bɛ̀ wɔ màn mɛn nyankɔ la, á n woe a din foo sii li, á re n too koe wɔ lon. Bɛ lɛ n toɛ, foo-doa gole tá wɔ lon Lawa yɔrɔ-a.

¹⁵ Wɔ bɛ́ doɛ̃, wáa bɛ̀ wɔ́ màn woo màn nyankɔ la, wáa a tá n too koe wɔ lon, bɛ lɛ dɔ n toɛ wɔ á doɛ̃, wáa bɛ̀ wɔ màn mɛn nyankɔ la, wáa bɛ n wɔa wɔ lɛa.

¹⁶ Sii baraa mɛn bɛ́ a woe ka min ni gɛ̀-n wa, bɛ̀ min nə́ ǹ dɔɔ̃n yɛ bɛ zɛnɛɛ, a Lawa nyankɔ, Lawa á re yiikoonaabaa koe ǹ dɔɔ̃n kɛ lɛ la, bɛ̀ á daa yaa sonbore, sii baraa kɛ lɛ á zɛnaa, bɛ̀ a ba woe-n gɛ̀-n wa. Sɛnɛ, sii baraa goon tan, a n woe ka min ni gɛ̀ nɛ, ma bie máa ka Lawa nyankɔ bɛa sii baraa kɛ miã a lɛa wa.

¹⁷ Landa lɛ tii ǹ sii tumaa n sii baraa lɛa, sɛnɛ, sii baraan tan ǹ nə́ ǹ ba woe ka min ni gɛ̀-n wa.

¹⁸ Wɔ á doɛ̃, wáa Lawa a nɛ kɔ́n ba sii baraa zɛnɛɛ a wo-n wa, a giala, Lawa a Nɛgiĩ kɛ tá a lɛduĩ, Màn Baraa kɛ a boe la a màn kɔ́n zɛnaa-n wa.

¹⁹ Wɔ á doɛ̃, wáa wɔ n Lawa wɔn lɛa, sɛnɛ, kanaa kɛ tumu n *Sɛtaan Baraa kɛ pàã giulun.

²⁰ Wɔ á doɛ̃, wáa Lawa a Nɛgiĩ na á daa, á yiri kɔ wɔ la, mà wɔ Lawa Taãn kɛ dɔ̃. Wɔ ǹ goɛ̃ kun ka Lawa Taãn kɛ nɛ, a din a Nɛgiĩ Yezu Krita pàã ganaa. A din Yezu lɛ n Lawa Taãn lɛ lɛa, a din dɔ n nyin nyabaã dɔ lɛa.

²¹ Maa nɛnyaanan lɛn, ka n dinin kũ dì mànan ganaa.