Uruti 4 - LAWA A BOO SONBORE

Boazi laanka Uruti a kɔn-wɔ boo

¹ Boazi woo sii yɔrɔ bɔ ǹ bǎã nɛ, kiwi lɛ a kiɛnlɛ-a á giã tán walan. Á ke, Boazi goã á giĩ mɛn boo da mà Uruti a sii n doe a ganaa, bɛ daa kiɛ̃. Boazi lɛ dia la ka koee á pɛ: «Min kɛ, n zɔ̃ n dɔ, n giã tán kànaa.» Á n zɔ̃ á dɔ á giã tán.

² Bɛ kio, Boazi min fù bɔ kiwi lɛ a min golen bii, á pɛ ǹ nɛ: «Ka giã tán kànaa.» Ǹ nə́ giã tán.

³ Bɛ kio, Uruti a sii bɛ́ doe giĩ mɛn lɛ ganaa bibinaa nɛ, á tɔ́n pɛ bɛ nɛ: «Naomii mɛn bɔ Moabu gána nɛ á daa, a tá wɔ dɔɔ̃ngiĩ Elimelɛki a bǎã lɛ kɔn siɛ̃.

⁴ Bɛ lɛ n ke, masɛ á die n too toɛ tì ka a sii-n wa. Man giɛ li n pii kiwi lɛ a min golen laanka masɛ tɔrɔn kɛn yɔrɔ-a. Bɛ̀ n tá li n na a mìi bɔ, n na a mìi bɔ. Sɛnɛ, bɛ̀ n ba li n na a mìi dɔ bɔ wa, n bɛ pɛ wɔsɛn nə dɔ̃. A giala, bɛ̀ á n bɔ n din ni, min kɔsɔ a boe la a na a mìi bɔ wa. Masɛ mɛn nə́ ke, ma nə n kio.» Giĩ lɛ ná a lɛ si kɛnɛn: «Ma tá li ma a mìi bɔ.»

⁵ Bɛ kio Boazi pɛ: «Bɛ̀ ń wuru lɛ pii Naomii lon ǹ mɛn pinaa, n doamaa nɛ n Moabu tɔrɔ Uruti dɔ saa lɔ lɛa gɔrɔ, ǹ mɛn lɛ zuũ bɛ́ á gã. A zɛnaa miɛ̃, màn mɛn bɛ́ toɛ, n woo wole lɛ tɔ koa wuru lɛ la.»

⁶ Wuru lɛ a mìi-bɔ bɛ́ doe min mɛn ganaa, bɛ́ tɔ́n pɛ: Ma a boe la ma a mìi bɔ wa. Bɛ̀ má a mìi bɔ, man maa nɛnyaanan kíɛ̃ ziziɛ̃. Wuru lɛ mìi bɔ masɛ dòo, a giala masɛ a boe la ma a mìi bɔ wa.

⁷ Lɛlɛ, Izirayeli gána nɛ, kɛ na á goã landa lɛa màn mìi bɔ min la laanka a lonkɔ wɔ paǹ li. Màndɛnaa na a gòã ganaa ǹ kɔsɔ boe, a kɔ ǹ miã la, a nyaa, mà màn lɛ ná a wɔ baa. Bɛ lɛ na á goã siére koa sii la ǹ gɔn lɛa Izirayeli gána nɛ.

⁸ Min mɛn doamaa bɛ́ nɛ a wuru lɛ mìi bɔ, bɛ́ pɛ Boazi ni: N din wuru lɛ pii: bɛ lɛ nɛ, a ná a kɔsɔ sɔlɔ, á kɔ Boazi la.

⁹ Bɛ kio, Boazi pɛ min golen laanka zaman tumaa nɛ: Màn mɛn tumaa goã Elimelɛki wɔ lɛa ka Kiliyɔn laanka Maalɔn nɛ, masɛ bɛ tumaa pii Naomii lon. Ka dinin man bɛa siéren lɛa pelo.

¹⁰ Maalɔn a lɔ Uruti lɛ Moabu tɔrɔ lɛa, masɛ bɛ dɔ saa lɔ lɛa, màn mɛn bɛ́ toɛ, ma woo wole lɛ tɔ koa a gɔn màn la, a tɔ dɔ baran papaã a n bɔ ǹ dɔɔ̃nɔn bii wa, a baran papaã a n bɔ kiwi dɔ a sii yɔrɔ bɔ ǹ bǎã-n wa. Ka dinin man bɛa siéren lɛa pelo.

¹¹ Zaman lɛ laanka min golen mɛnɛn tumaa goã sii yɔrɔ bɔ ǹ bǎã lɛ nɛ, bɛn nə́ pɛ: Wɔsɛn dinin man siéren lɛa! Lɔ kɛ lɛ die we n kion, Dɛnaa Lawa die a baa ka Raseli laanka Leya bɛ́ lɔn. Bɛa lɔ min paa kɛ lɛ na á Izirayeli tɔrɔn koa. A die a màndɛnaa baa Efrataa tanlɛ minin bii, a tɔ bɔ Bɛtlehɛmu kiwi.

¹² Dɛnaa Lawa bɛ́ re toɛ a nɛnyaanan mɛnɛn yɛ bɛa lɔ ten kɛ lɛ ganaa, bɛa nɛnyaanan lɛn barka nɛ, a kion lɛ giala die a n bɔ li, ka Perɛzi wɔ bɛ́ lɔn, Tamaara Perɛzi mɛn yɛ Zudaa la.

Boazi a Uruti saa lɔ lɛa boo

¹³ Boazi Uruti saa lɔ lɛa, á giã kun ni. Dɛnaa Lawa toa Uruti min guguru baa á nɛgiĩ yɛ.

¹⁴ Bɛa biikoo li, lɔn nə́ pɛ Naomii ni kɛnɛn: «Barka tá Dɛnaa Lawa ganaa. A giala pelo pelo, min mɛn bɛ́ re n toɛ̃ ka n sii ni, a toa ń fɔ̃ bɛ li wa. A tɔ die a bɔ Izirayeli gána nɛ.

¹⁵ Á re n nyin tii n ganaa, a n zizimaa tamaa. A giala n manaa lɛ a yii ni, asɛ mɛn bɛ́ n narɛ, á soɛ nɛgiĩ sɔbaa nɛ n gɔn.»

¹⁶ Naomii nɛ lɛ saa, á da a kolo-n á too.

¹⁷ Lɔn mɛnɛn bɛ́ ǹ miã kɛnɛn lɛa, bɛn nə́ pɛ: «Naomii lɛ nɛgiĩ yɛ kəni!» Ǹ ná a tɔ kɔ mà Obɛdi. A din lɛ na á Davida ǹ di Zesee a díi baa.

Davida ǹ digolon tɔn nə́ ke

¹⁸ Perɛzi tɔrɔn nə́ ke: Perɛzi na á Ɛsirɔn yɛ,

¹⁹ Ɛsirɔn na á Ramu yɛ, Ramu na á Aminaadaabu yɛ,

²⁰ Aminaadaabu na á Naasɔn yɛ, Naasɔn na á Salmɔn yɛ,

²¹ Salmɔn na á Boazi yɛ, Boazi na á Obɛdi yɛ,

²² Obɛdi na á Zesee yɛ, Zesee na á Davida yɛ.