Uruti 2 - LAWA A BOO SONBORE

Uruti a wo Boazi a wuru-n boo

¹ Naomii ǹ zuũ lɛ dɔɔ̃ngiĩ goon goã, a tɔ n Boazi. Elimelɛkin lɛn tanlɛ min ni. A na á goã pàãma lɛa, a yii n guguru.

² Moabu tɔrɔ Uruti lɛ pɛ Naomii ni: «Zii kɔ ma la, ma wo wuru-n. Min mɛn bɛ́ re bǐɛ̃ koe ma ganaa, ma á die *ɔrzi bún boe bɛa dɛnaa kio.»

³ Á woo ɔrzi bún lɛ bɔ wuru kɔn nɛ, ɔrzi-kurulin lɛn basa la. A mìi kɔɔ̃n kɔ, á woo yaa bɛ̀ bǎã lɛ n Elimelɛkin tanlɛ min Boazi wɔ lɛa.

⁴ Bɛ kio, Boazi bɔ Bɛtlehɛmu á daa, á pɛ ɔrzi-kurulin lɛn manɛ: «Dɛnaa Lawa die a goã kun ka niɛ» Ǹ ná a lɛ si: «Dɛnaa Lawa die a barka da n dɔ ganaa.»

⁵ Boazi tɔ́n nɔ̀n da a ɔrzi-kurulin lɛn kiã la: «Lɔ ten kɛ n die wɔ lɛa?»

⁶ Ɔrzi-kurulin kiã ná a lɛ si á pɛ: «Lɔ ten kɛ lɛ Moabu tɔrɔ lɛa, á bɔ Moabu gána nɛ, á daa kun ka Naomii ni, a din lɛ nɛ.

⁷ A na á pɛ mà wɔ toa asɛ ɔrzi bún bɔ ɔrzi-kurulin lɛn basa la. A da baayɛlɛ lɔn, a na a gòãn la miɛ̃ yǎa sisia. A din tɔn nə n susu taãn wa.»

⁸ Boazi pɛ Uruti ni kɛnɛn: «Maa nɛlɔ, n too kɔ, n baran wo ɔrzi bún bɔ wuru kɔsɔ-n wa, n baran n wɔlɔ lui kànaa ganaa wa. Nɛlɔn mɛnɛn bɛ́ masɛ a dí lɛ nyɛɛ, giã kun ka bɛn nɛ.

⁹ Ǹ bɛ́ ɔrzi kuri wuru mɛn nɛ, n yii doa bɛ lɛ la, n kɔ ǹ basa lɛ. Ma á ke má pɛ nɛlɔ dí-nyalin lɛn manɛ, máa ǹ baran n gɔn da n ganaa wa. Bɛ̀ mu boro tá n ganaa, dí-nyalin lɛn nə mu mɛn kaa dɔ́n nɛ, n wo bɛ lɛ dɔɔ n mi.»

¹⁰ Bɛ kio, á na á kaa tán a giulun á pɛ nɛ: «A na á saa lɔn ń tá giɛ masɛ walan, n tá bǐɛ̃ zɛnɛɛ ma nɛ, masɛ din tɔrɔ kɔsɔ min ke?»

¹¹ Boazi ná a lɛ si: «N zuũ lɛ a gɛ̀ kio, n sii mɛn tumaa zɛnaa ǹ zuũ dan lɛ nɛ, ǹ ná a tumaa kalaa masɛ nɛ. N nə n díi laanka n náa toa walan, n yɛ ǹ gána nɛ. N bɛ́ n ba tɔrɔ minin mɛnɛn doɛ̃ lɛlɛ wa, n nə́ n daa bɛn li.

¹² N sii mɛn zɛnaa, Dɛnaa Lawa die n sarɛɛ nɛ. Dɛnaa Lawa lɛ, Izirayeli minin Lawa lɛa, n da kaa Lawa mɛn lɛ yele, bɛ die a n saraa lɛ piɛ̃ kɔ n la.»

¹³ Uruti tɔ́n pɛ: «Maa dɛnaagiĩ na á bǐɛ̃ kɔ masɛ ganaa, a giala a na á masɛ foo basã, á ma foo taã. A da yaa, masɛ din ba ka n bɛ̀rɛlɔn kɛn goon bɛ lɔn wa.»

¹⁴ Màn-bii biikoo li, Boazi pɛ nɛ: «N zɔ̃ n dɔ n màn bii, a sã dù li n bii.» Uruti giã tán ɔrzi-kurulin lɛn li. Boazi ɔrzi-tiɛ̃ saa á kɔ la, á sɔ̃ á kã, a giala goã.

¹⁵ Bɛ kio, á yoo á ɔrzi bún bɔ. Boazi tɔ́n pɛ a dí-nyalin manɛ: «Haalɛ ta a n màn siɛ gɔn sara yiin bii, ka baran kurəə wa.

¹⁶ Ka toa bɛ̀ ɔrzi san lɛ tɛn kaa dinin a bɛ dɔ goa, ka baran sɛ̀ pɛ a ganaa wa.»

¹⁷ Uruti ɔrzi bún bɔ wuru lɛ nɛ yǎa wasa mɛ. A màn mɛn yɛ, á bɛ duwəə, a nàn woo dɔ gongo yii paa kɛ miã.

¹⁸ A ɔrzi bún mɛn bɔ, á saa á woo-n piɛ, ǹ zuũ dan lɛ yɛ. A màn-bii gialakun mɛn dɔ goã, á bɛ dɔ bɔ á kɔ la.

¹⁹ Ǹ zuũ dan lɛ nɔ̀n da la: «Ma nə n ɔrzi bún bɔ maa pelo? Ma nə n dí nya maa? Min mɛn bǐɛ̃ kɔ n ganaa, Lawa die a barka da bɛa dɛnaa ganaa.» Uruti dí nya min mɛn lon, a ná a laakalaa ǹ zuũ dan lɛ nɛ, á pɛ nɛ: «Ma dí nya min mɛn lon pelo, a tɔ n Boazi.»

²⁰ Naomii tɔ́n pɛ ǹ manaa lɛ nɛ: «Dɛnaa Lawa die a barka da n ganaa asɛ mɛn bɛ́ a ba a makara-doɛ̃ kɛ toɛ walan yiikoonaan wɔ paǹ li wa, a toɛ walan geren dɔn wɔ paǹ li wa.» Bɛ kio, Naomii pɛ nɛ: «Bɛa giĩ lɛn wɔsɛn dinin min taãn lɛa, wɔsɛn sii n doe a din lɛ ganaa.»

²¹ Moabu tɔrɔ Uruti pɛ doo: «Giĩ lɛ pɛ dɔn: mà ma giã kun ka asɛ dí-nyalin lɛn nɛ yǎa ǹ ɔrzi lɛ tumaa kuri ǹ nyɛɛ.»

²² Naomii tɔ́n pɛ ǹ manaa Uruti ni: «Maa nɛlɔ, bɛ á siĩni, n goã bɛ̀ n wo dí nya kun ka Boazi a nɛlɔ dí-nyalin lɛn nɛ, màn mɛn bɛ́ toɛ, min baran bɔ n yii-n wuru kɔsɔ-n wa.»

²³ Uruti dɔ giã kun ka Boazi a nɛlɔ dí-nyalin lɛn nɛ, á ɔrzi bún bɔ kunun ǹ ni yǎa ɔrzi-kurii laanka *belee-kurii nya. Uruti goã kun ka ǹ zuũ dan lɛ nɛ.