Timəə dí-pɛn 7 - LAWA A BOO SONBORE

Izirayeli minin Lawa wɔ baa

¹ Ka bɛ́ re woe gána mɛn lɛ sii ka baa kaa wɔ lɛa, kaa Lawa, Dɛnaa Lawa á re toɛ ka wɔ bɛa gána lɛ nɛ. A din nə die tɔrɔ gigiã lui a ǹ bɔ ka nyɛɛnɛ, ǹ mɛnɛn bɛ́ mɔnaa nɛ ǹ nə́ la ka nɛ, ǹ pàã dɔ din nə́ la kaa wɔ nɛ: Ɛti tɔrɔn manɛ, Girgazi tɔrɔn nɛ, Amɔɔrɔ tɔrɔn nɛ, Kanaan minin ni, Ferɛzi minin ni, tɔrɔ kɛn ǹ nə́ ǹ bíi Ivitin, ka Zebuzu tɔrɔn nɛ. Ǹ kaa kun tɔrɔ sɔbaa.

² Bɛ̀ kaa Lawa, Dɛnaa Lawa lɛ nə́ ǹ wɔ ka gɔn ǹ mɛn waáraa, bɛ̀ ká boo ǹ la, ka ǹ tumaa dɛ lenlen. Ka nyan lɛ kɔ kɔn la wɔ ǹ nɛ wa, ka nyan makara bɔ ǹ ganaa wa.

³ Ka nyan toa kɔn-wɔ ka kaa kun wa: ka nyan kaa nɛlɔn kɔ ǹ nɛgiĩn la wa, ka baran ǹ dɔn nɛlɔn goa, ka ǹ kɔ kaa nɛgiĩn la wa.

⁴ Bɛ bie wa, maǹ die kaa nɛnyaanan kɛn mìi ziziɛ̃ masɛ ganaa, ǹ nə ǹ kaa dìn guguru kɔ ganaa. Bɛ̀ á n baa miɛ̃ dɔn, Dɛnaa Lawa foo n die yui ka li, a ka dɛ a ka nya bǎã goon.

⁵ Sɛnɛ, ka bɛ́ re sii mɛn zɛnɛɛ bɛa tɔrɔ kɔsɔn lɛn manɛ, bɛ n ka kɛ nɛ: ǹ wúlu bɔ ǹ bǎãn kɛn, ka die ka bɛn wuru, ǹ tíĩn kɛn, ka bɛn wɔwoɛ̃, ka ǹ dì gɔnɔn kɛn kukuru, ǹ dìn kɛn, ka bɛn tã.

⁶ Kaa Lawa, Dɛnaa Lawa din na á ka bɔ á ka koa a din wɔ lɛa. A din na á ka bɔ tɔrɔ kɔsɔn kɛn tumaa bii kanaa, màn mɛn bɛ́ toɛ, ka a dinsɔɔ̃ gɔn màn baa.

Lawa a bɔlɔgoondɛnaabaa

⁷ Bɛ̀ ń yǎa Dɛnaa Lawa tá ka narɛ, bɛ̀ ń yǎa á ka bɔ, a bie ka ka n mɔnaa-n ká la tɔrɔ gialakunun kɛn tumaa-n wa. Ka dinin man tɔrɔ kɔsɔn lɛn tumaa a boɛɛn lɛa.

⁸ A giala, Dɛnaa Lawa na á ka narɛ. A lɛ kɔ kɔn la mɛn wɔ ka ka digolon ne dɔn, á bɛ lɛ pã. Bɛ lɛ nɛ, Dɛnaa Lawa din ka si ka pàã nɛ. Á ka bɔ bɛ̀rɛbaa nɛ, á ka bɔ *Faarahɔn gɔn, Ezipti minin kii ke.

⁹ Ka toa ka dɔ̃, mà kaa Lawa, Dɛnaa Lawa lɛ din nə Lawa lɛa, Lawa taãn lɛa. Bɔlɔgoondɛnaa nɛ. Min mɛnɛn bɛ́ narɛ, ǹ ná a dí-pɛn kɛn tamaɛ, a na a lɛ kɔ kɔn la ǹ boon kɛn lɛ piɛ̃ bɛn wɔ paǹ li, a bǐɛ̃ zɛnaa ǹ nɛ, yǎa a woe doe nɔ̀ɔ duu gigiã ganaa.

¹⁰ Min mɛnɛn bɛ́ biɛ zɔ́ɔ, a na a gɛ̀ dòo boe bɛn ganaa, a din bǎã nɛ, a ǹ dɛ a ǹ bɔ bii-a. Min mɛnɛn bɛ́ biɛ zɔ́ɔ, a nə ǹ sarɛɛ a din bǎã nɛ, a ba n yii diɛ wa.

¹¹ Maa gɔn waa ǹ boo ke, maa landa boon ne ka maa sii yɔrɔ bɔ ǹ boon kɛn nɛ, ma á ǹ koe ka la pelo, ka toa ka bɛn tamaa.

¹² Bɛ̀ ká n too kɔ bɛa sii yɔrɔ bɔ ǹ boon lɛn li, ká ǹ tamaa, ká kɔ ǹ lɛ, kaa Lawa, Dɛnaa Lawa lɛ kɔ kɔn la mɛn wɔ ka ka digolon ne, á re bɛ lɛ piɛ̃, a bǐɛ̃ zɛnaa ka nɛ.

¹³ Á re ka narɛ, a barka da ka ganaa, a toa ka mɔnaa. A n liɛ ka digolon ne, mà asɛ á re gána mɛn lɛ koe ka la, bɛ̀ ká dɔ walan, á re toɛ kaa nɛnyaanan nə mɔnaa, ka *belee gigiã yɛ, duvɛ̃ nɛ, ka nyɔɔ nɛ. Á re kaa diin mɔnɛɛ, kaa sèren ne ka kaa bòen ne.

¹⁴ Lawa á re barka diɛ ka ganaa, a la tɔrɔ kɔsɔn kɛn tumaa nɛ. Giĩ laanka lɔ kɔn ba re yii ka bii gɛ̀làa lɛa wa. Gɛ̀làa dɔ a re yii kaa tɔɔn bii wa.

¹⁵ Dɛnaa Lawa á re ka kanbiɛ busu tɔrɔ tumaa ganaa. A dɔlɔ mɛn tumaa da Ezipti minin mìi ni, ka á doɛ̃ taãn-taãnɛ, á re ka kanbiɛ bɛ ganaa, a re bɛ diɛ ka mìi-n wa. Sɛnɛ, min mɛnɛn bɛ́ ka biɛ zɔ́ɔ, a n die diɛ bɛn mìi ni.

¹⁶ Kaa Lawa, Dɛnaa Lawa bɛ́ re tɔrɔn mɛnɛn tumaa we ka gɔn, ka ǹ dɛ lenlen, ka nyan makara bɔ ǹ ganaa wa. Ka baran ǹ dìn kɛn guguru kɔ wa. A giala, bɛ á boe la, a kan baa ka ganaa.

Lawa a zaman tamaa

¹⁷ Kɔntan ka á re taasɛ ka gɔ́ɔ̃ nɛ, mà tɔrɔn kɛn lɛn tá gigiã ǹ nə́ la kasɛn manɛ, mà kasɛn man siɛ lɔn, ka boo ǹ la, ka ǹ loo?

¹⁸ Ka baran nyɛ́ɛ baa ǹ nɛ wa. Dɛnaa Lawa sii mɛn zɛnaa Eziptin kii laanka a gána minin manɛ, ka n yiri kɔa bɛ li.

¹⁹ A nɔmaa kakan mɛnɛn da ǹ mìi ni, a kaãbaa ǹ sii dadaran mɛnɛn zɛnaa, ká ǹ yɛ ka yii ni. Kaa Lawa, Dɛnaa Lawa lɛ na á sii kakan zɛnaa, á ka waa ka pàã nɛ, á soo ka nɛ. A n miɛ̃! Ka bɛ́ nyɛ́ɛbiɛ tɔrɔn mɛnɛn tumaa nyɛɛnɛ, kaa Lawa, Dɛnaa Lawa n die bɛ lɛ miã zɛnɛɛ bɛn manɛ.

²⁰ Kaa Lawa, Dɛnaa Lawa lɛ tá re yirigisiĩn dinin kiɛ ǹ ganaa. Min mɛnɛn dinin nə la, ǹ nə́ baa si ǹ nə́ n duru ka nyɛɛnɛ, yǎa bɛn dɔn nə giɛ̃.

²¹ Ka nyan nyɛ́ɛ baa ǹ nɛ wa. A giala, kaa Lawa, Dɛnaa Lawa tá ka bii. Lawa gole ne, a sii á nyɛ́ɛ diɛ.

²² Kaa Lawa, Dɛnaa Lawa n die bɛa tɔrɔn lɛn lui, a ǹ bɔ ka nyɛɛn boɛboɛ. Ka bie re boe ǹ la, ka ǹ nya bǎã goon ne wa. A giala, bɛ̀ á n baa miɛ̃, don màn babaraan man die mɔnɛɛ ka ganaa.

²³ Sɛnɛ, kaa Lawa, Dɛnaa Lawa á re bɛa tɔrɔn kɛn lɛn we ka gɔn. Á re nyɛ́ɛ gole diɛ ǹ ganaa, ǹ tá re giɛ̃ ǹ nya.

²⁴ Á re ǹ kiin we ka gɔn. Ka die ka bɛn dɛ, ka ǹ bɔ kanaa. Ǹ kɔn din ba re boe la a golee ka nyɛɛn wa. Ka á re ǹ tumaa dii ka ǹ nya.

²⁵ Màn nyínin mɛnɛn bɛ́ ǹ dìn lɛa, ka die ka bɛn tã. Ka nyan toa ka yii bɔ wɔrɔ laanka sana kɛ li ǹ la, ka ka dinin kaa sii-n wa. A giala, sii bɔbɔnɛɛ nɛ, kaa Lawa, Dɛnaa Lawa lɛ yii li.

²⁶ Ka baran bɛa màn bɔbɔnɛɛ kɛ kɔn da kaa kion wa. Bɛ̀ ká bɛ zɛnaa, bɔ̀n tá re ka yii kun. Sonbore, bɛ miã mànan lɛn doamaa nɛ, ǹ nə n tã lenlen. Ka nyan lɛ kɔ ǹ ganaa wa. Ǹ tìĩ doamaa nɛ, a bɔ ka nyin ni.