Timəə dí-pɛn 4 - LAWA A BOO SONBORE

Lawa bɔlɔ sii

¹ Má pɛ ka nɛ: Izirayeli minin lɛn, ma dinmaa bɛ́ ka darɛɛ landa boon laanka sii yɔrɔ bɔ ǹ boon mɛnɛn ganaa, ka bɛn si, ka kɔ ǹ lɛ. Bɛ á re toɛ ka yii goã koo, ka boo la ka wɔ gána kɛ dɔ nɛ, ka digolon Lawa, Dɛnaa Lawa bɛ́ ǹ mɛn lɛ koe ka la, ka si ka baa kaa wɔ lɛa.

² Ma bɛ́ gɔn waa ǹ boo mɛn pii ka nɛ, ka baran màn da bɛ li wa, ka nyan màn dɔ bɔ lɛ wa. Kaa Lawa, Dɛnaa Lawa nə n gɔn waa ma nɛ ka boon mɛnɛn nɛ, má ǹ pɛ ka nɛ, ka bɛn lɛn tamaa.

³ Pewɔɔrɔ minin dì *Baali kɛa sii gɔ́ɔ̃ nɛ, Dɛnaa Lawa sii mɛn zɛnaa, ka yii bɛ́ á yɛ. A giala, min mɛn tumaa goã ǹ nə́ woo Pewɔɔrɔ minin dì Baali lɛ la, kaa Lawa, Dɛnaa Lawa bɛn tumaa dɛ, á ǹ bɔ ka bii.

⁴ Sɛnɛ, kasɛn mɛnɛn nə kaa wɔ kaa kun ka kaa Lawa, Dɛnaa Lawa nɛ, ka yii á ke tɔn koo pelo.

⁵ Ma á ke má ka daraa landa boon laanka sii yɔrɔ bɔ ǹ boon lɛn ganaa, ka maa Lawa, Dɛnaa Lawa bɛ́ á n gɔn waa ma-n lɔn. Ma pɛ ka-n lɔn, ka bɛ́ re kiɛ gána mɛn lɛ nɛ, ka si ka baa kaa wɔ lɛa, ka zɛnaa walan miɛ̃.

⁶ Ka bɛa boon lɛn tamaa, ka kɔ ǹ lɛ. A giala, bɛ lɛ n die kaa sii-doɛ̃ laanka kaa yiridɛnaabaa nyɛɛ tɔrɔ kɔsɔn manɛ, ǹ mɛnɛn bɛ́ re landa boon kɛn lɛn tumaa miɛ. Maǹ die pii: – Tɔrɔn kɛn gigiãbaa lɛ! Sii-doɛ̃ laanka yiri tá ǹ lon dɛ!

⁷ Sonbore ne, tɔrɔn mɛnɛn bɛ́ gigiã ka wɔ bɛ́ lɔn, ǹ mɛn a lawa nə n nyii ǹ la, ka wɔa Lawa, Dɛnaa Lawa á ke n nyii wɔ la lɔn, bɛ̀ wɔ́ a bii wɔ sii mɛn ganaa.

⁸ Tɔrɔn mɛnɛn bɛ́ gigiã ka wɔ bɛ́ lɔn, ǹ mɛn a landa boon laanka a sii yɔrɔ bɔ ǹ boon man pepere ka dí-pɛn kɛn tumaa bɛ́ lɔn, ma á ǹ pii ka yii-n pelo?

Sii mɛn nə n zɛnaa Orɛbu kele la

⁹ Sɛnɛ, ka n dinin kũ. Ka siin mɛnɛn yɛ ka yii ni, ka n yiri koa bɛn li taãn-taãnɛ, a ka yii toa koo, ka nyan toa ka yiri bɔ ǹ nɛ wa. Ka die ka kaa nɛnyaanan laanka kaa nɔ̀ɔnɔn daraa ǹ ganaa.

¹⁰ Dɛnaa Lawa na á goã á pɛ ma nɛ, mà ma zaman lɛ sɔkɔn ma kɔ asɛ la. Mà asɛ n die a lɛ gɔ́ɔ̃ ǹ boo pii ǹ ni, màn mɛn bɛ́ toɛ, ǹ nə n daraa asɛ guguru kɔ ǹ gɔn ganaa, ǹ yiikoonaabaa tumaa gɔ́ɔ̃ nɛ, ǹ na a yɔrɔ nyaa ǹ nɛnyaanan dɔn manɛ. A bɛ́ bɛa boo kɛ lɛ diɛ ma nɛ ǹ mɛn pinaa, ká goã goleene kaa Lawa, Dɛnaa Lawa lɛ yɔrɔ-a, Orɛbu.

¹¹ Ká tɔ́n nə n zɔ̃ ká dɔ, ká golee kele lɛ gòã lasa la. Kele lɛ na á goã tɛ lɛa, kuĩ yǎa lon, wɔlɔ tì gole bii, tɛmaa bara bii, ka labara dadaran nɛ.

¹² Dɛnaa Lawa na á goã n toɛ bɛa tɛ lɛ bii boo diɛ ka nɛ. Ka n ká goã a boo-diɛ lɛ miɛ, sɛnɛ, ka màn kɔn yɛ ka yii-n wa, bɛ̀ á n bɔ lɛn kɛ lɛ nɛ.

¹³ A ná a lɛ kɔ kɔn la ǹ boon lɛn pɛ ka nɛ, boo fù kɛ lɛ, á n gɔn waa ka nɛ, mà ka kɔ ǹ lɛ. Á ǹ kiɛ̃ kɔlɔ-sɛlɛɛ màn paa dɔ ganaa.

¹⁴ Bɛa waáraa kɛ lɛ nɛ, Dɛnaa Lawa nə́ n gɔn waa ma dinmaa nɛ, mà ma ka daraa Landa boon laanka sii yɔrɔ bɔ ǹ boon lɛn ganaa. Ka bɛ́ re kiɛ̃ ka kaa gána mɛn lɛ nɛ, ka si ka baa kaa wɔ lɛa, ka doamaa nɛ, ka kɔ bɛa boon lɛn lɛ walan.

Gɔn-waa, dìn wɔ paǹ li

¹⁵ Ka yiri bɔ ka dinin li taãn-taãnɛ. A giala, Dɛnaa Lawa bɛ́ tɛ bii á n boo diɛ ka nɛ Orɛbu kele lɛ la ǹ mɛn pinaa, ka a dinmaa yɛ ka yii-n wa.

¹⁶ Bɛ lɛ nɛ, ka baran màn nyín zɛnaa, ka ka dinin ziziɛ̃-n wa. A nyan goã màn kɔn din nyin lɛa wa: giĩ hinlaa lɔ nyin,

¹⁷ màn yiikoonaan mɛnɛn bɛ́ tán la, bàanan mɛnɛn bɛ́ piɛ̃ lon,

¹⁸ màn giɛɛraa tán nɔ̀ la wolen ne, ka mu li ǹ zɔ̀n nɛ, a nyan bɛ kɔn nyin baa wa.

¹⁹ Lon gɔ̀nɔn ganaa ǹ mànan kɛn tumaa, wasa nɛ, mui ni ka leeren ne, ka baran n yii saa ka ga bɛ kɔn ganaa wa. Ka nyan toa ǹ ka yiri sã, ka yaa kiɛ tán-a ǹ giulun, mà ka nə ǹ guguru koe wa. A giala, kaa Lawa, Dɛnaa Lawa na á bɛa nya ǹ dín kɛn toa kanaa a tɔrɔ kɔsɔn kɛn tumaa gɔn.

²⁰ Sɛnɛ, kasɛn, Dɛnaa Lawa na á ka waa á ka bɔ Ezipti gána nɛ, nɔmaa kaka bii, màn mɛn bɛ́ toɛ, ka asɛ din wɔn baa, ka ka á ke a lɛa lɔn pelo.

²¹ A laan bɛ yii ni, Dɛnaa Lawa foo yoo masɛ li, ka dinin kɛn lɛn taman yii. Á tɔ́n nə n liɛ á pɛ: «N ba re Zurdɛ̃ tà kɛ kuri n wɔ gána sonbore kɛ nɛ, kaa Lawa, Dɛnaa Lawa lɛ n koe ka la, kaa wɔ lɛa wa.

²² Sonbore ne, masɛ a re Zurdɛ̃ tà kuri wa. Man die giɛ̃ gána kɛ-n kànaa. Sɛnɛ, kasɛn tá re tà lɛ kuri, ka wo gána sonbore kɛ lɛ si, ka baa kaa wɔ lɛa.»

²³ Ka yiri bɔ ka dinin li taãn-taãnɛ kəni, màn mɛn bɛ́ toɛ, kaa Lawa, Dɛnaa Lawa lɛ kɔ kɔn la mɛn doa kɔn ka nɛ, ka yiri nyan bɔ ka bɛ-n wa. Kaa Lawa, Dɛnaa Lawa ka kurəə mànan mɛnɛn nyin zɛnaa ganaa, ka nyan bɛ kɔn zɛnaa ka baa dì lɛa wa.

²⁴ A giala, kaa Lawa, Dɛnaa Lawa lɛ n ka tɛ bɛ́ lɔn màn kuĩ, a sii á kaka, a lɛ koe lawa kɔsɔ ganaa wa.

²⁵ Bɛ̀ ká giã gána lɛ nɛ á belebɔ, yǎa ka nɛnyaanan laanka nɔ̀ɔnɔn yɛ, ka nyan màn nyín zɛnaa ka ka dinin ziziɛ̃-n wa, haalɛ ta màn mɛn din nyín ni. Sii mɛn bɛ́ baraa kaa Lawa, Dɛnaa Lawa yii li, ka nyan bɛ zɛnaa, ka a foo yoo-n wa.

²⁶ Bɛ̀ ká bɛ zɛnaa, man pii ka-n foaã pelo, lon laanka tán dɔ din nə maa siére lɛa: ka bɛ́ re Zurdɛ̃ tà kuri, ka wo gána mɛn lɛ si, ka baa kaa wɔ lɛa, ka á re papaɛ̃ ka n bɔ a-n bǎã goon. Ka a re giɛ̃ a-n ka belebɔ wa. A giala, Lawa á die ka lui lenlen, a ka bɔ a nɛ.

²⁷ Dɛnaa Lawa á die ka lui a ka kaa tɔrɔ kɔsɔn bii. A bɛ́ re woe ka nɛ tɔrɔn mɛnɛn bii, kaa gialakun boɛɛn nə die goɛ̃ bɛn dɔn bii.

²⁸ Ka bɛ́ re lawan mɛnɛn guguru koe walan, minbuiin nɛ gɔn na á ǹ zɛnaa ka gɔn nɛ, ka kɔlɔ nɛ. Ǹ yii a wɔlɔ yii wa, ǹ ba boo miɛ wa, ǹ ba boe la ǹ màn bii wa, ǹ ba màn gìĩ miɛ̃ wa.

²⁹ Walan kəni, ka á re giɛ kaa Lawa, Dɛnaa Lawa li. Bɛ̀ ká ka dinin kɔ a gamali la, ká ga li ka ka foo tumaa nɛ, ka á re yii.

³⁰ A biikoo din tá die, bɛ̀ bɛa siin kɛn lɛn tá ka mìi ni ǹ mɛn waáraa, ká n nɔmaa gɔ́ɔ̃ nɛ, ka á re n bɔyɛɛ ka da yǎa kaa Lawa, Dɛnaa Lawa li. Ka á re n too koe a lon bɛa biikoo li.

³¹ A giala, kaa Lawa, Dɛnaa Lawa lɛ n makara-doɛ̃ wole lɛa. A re n gɔn boe ka-a wa, a re ka bɔ̀n biɛ wa, a lɛ kɔ kɔn la mɛn wɔ ka digolon ne á n liɛ, a yiri a die boe ka bɛ-n wa.

Dɛnaa Lawa bǐɛ̃ mɛn zɛnaa Izirayeli minin manɛ

³² Siin mɛnɛn nə n zɛnaa lɛlɛ, bɛ̀ ka bɛ́ ka tɔn yɛ bɔrɔ wa, Lawa bɛ́ minbuiin nɛ zɛnɛɛ tán la ǹ mɛn pinaa, ka n taasɛ ka bɛ nɛ. Ka nɔ̀n da kanaa paǹ tumaa nɛ, bɛ̀ bɛ miã sii gole kɛ bin tɔ́n nə n zɛnaa, bɛ̀ min bin nə́ ǹ miã ma.

³³ Tɔrɔ kɔsɔ mɛn na á Lawa lɛ ma boo diɛ tɛ bii, ka ka á ke ká ma lɔn, a yii wusoo á goã koo?

³⁴ Lawa mɛn kɔsɔ na á ná a minin si ǹ zɔ́ɔn la lɛn zɔɔ̃, ka kaa wɔ kɛ bɛ́ lɔn? A na á fuu nya kaa zɔ́ɔn lɛn manɛ, á kaãbaa ǹ sii dadaran nya ǹ nɛ, á zia baa ǹ ganaa, á sii kakan zɛnaa á pàã nyaa ǹ nɛ, á nyɛ́ɛ da ǹ ganaa. Kaa Lawa, Dɛnaa Lawa na á bɛ lɛ tumaa zɛnaa kaa lɛa, Ezipti gána nɛ, ka dinin yii ni.

³⁵ Bɛ na á n nyaa ka nɛ, màn mɛn bɛ́ toɛ ka dɔ̃, mà Dɛnaa Lawa n Lawa lɛa, bɛ̀ á n bɔ a din ni, lawa kɔsɔ banban.

³⁶ A din lɛ na á n toa lon, á boo da ka nɛ, á ka daraa. A ka toa tán, á ná a tɛ gole kɛ nyaa ka nɛ, ká a boon ma bɛa tɛ lɛ bii.

³⁷ A giala, á goã ka digolon lɛn narɛ. Bɛ lɛ nɛ, á tɔ́n kasɛn bɔ ǹ tɔrɔn lɛa ǹ kio, a din ka waa, á ka bɔ Ezipti gána nɛ, ka a pàã nɛ.

³⁸ A din nə die tɔrɔ kɔsɔn lui a ǹ bɔ ka nyɛɛnɛ, ǹ mɛnɛn bɛ́ mɔnaa nɛ, ǹ pàã dɔ ń gole, á la kaa wɔ nɛ. A n die ka kiɛ bɛn lɛn gána nɛ, a kɔ ka la kíɛ̃ lɛa, ka á ke lɔn pelo.

³⁹ Ka dɔ̃ pelo kəni, ka kũ ka yiri ni, mà Dɛnaa Lawa n Lawa lɛa lon, a din nə Lawa lɛa tán. Bɛ̀ á n bɔ a din ni, lawa kɔsɔ banban.

⁴⁰ Ma bɛ́ a landa boon laanka a gɔn waa ǹ boon mɛnɛn pii ka-n pelo, ka bɛn tamaa. Ka dinin bǐɛ̃-kɔ a lɛa nɛ, ka kaa nɛnyaanan wɔ nɛ, ǹ mɛnɛn bɛ́ re goɛ̃ ka kio. Bɛ á re toɛ dɔn, ka nyin sasa yɛ gána kɛ nɛ, kaa Lawa, Dɛnaa Lawa lɛ n koe ka la yǎa duduu.

Mìi duru ǹ kiwi sɔɔ Zurdɛ̃ a lɛ̀giala gɔn la

⁴¹ Muizu kiwi sɔɔ bɔ á koa a gɔrɔn Zurdɛ̃ tà kio lɛ̀giala-n.

⁴² Bɛ̀ min mɛn gɔn sã á ǹ miã dɛ, bɛ̀ a ba ǹ dɛnaa biɛ zɔ́ɔ lɛlɛ sɛn wa, á boe la a baa si, a wo n mìi duru bɛa kiwi lɛ goon ne. Bɛ̀ á baa si á dɔ bɛa kiwi lɛ mɛn nɛ, a na á la.

⁴³ Bɛtisɛɛrɛ kiwi ke don, diə bǎã kɛ nɛ, bɛ n Urubɛn tɔrɔn wɔ lɛa. Ramɔti kiwi ke Galaati gána nɛ, bɛ n Gaadi tɔrɔn wɔ lɛa. Golan kiwi ke Basan gána nɛ, bɛ n Manaasee tɔrɔn wɔ lɛa.

Muizu a boo laakalaa paabaa ǹ wɔ ( 4—11 )

⁴⁴ Muizu dí-pɛn mɛnɛn kɔ Izirayeli minin lɛn la, bɛn man ka kɛn nɛ.

⁴⁵ Sii zɛnaa ǹ gɔnɔn manɛ, landa boon laanka sii yɔrɔ bɔ ǹ boon ne, Muizu pɛ á nyaa Izirayeli minin lɛn manɛ, bɛ̀ ǹ bɛ́ ǹ nə́ soo Ezipti gána nɛ.

⁴⁶ Bɛa biikoo li, bɛ̀ maǹ Zurdɛ̃ tà kio lɛ̀giala-n, nyankɔrɔ lɛ kɛ nɛ, Bɛti-Pewɔɔrɔ kiwi yɔrɔ-a. Amɔɔrɔn kii Sihɔn mɛn goã giã-n Ɛsibɔn, maǹ nə́ goã bɛa gána nɛ. Muizu laanka Izirayeli minin lɛn man nə́ goã ǹ nə́ bɛ kũ, bɛ̀ ǹ bɛ́ ǹ nə́ soo Ezipti gána nɛ.

⁴⁷ Ǹ nə́ goã ǹ ná a gána si la, ǹ nə́ Basanan kii Ɔgu dɔ a gána si la. Amɔɔrɔ tɔrɔn kiin lɛn man bɛn nɛ min paa, ǹ nə́ goã Zurdɛ̃ tà kio lɛ̀giala-n.

⁴⁸ A saa Aroɛɛrɛ kiwi ganaa Arnɔn tà kɛ lɛ-a, a wo yǎa Sirinyɔn kele kɛ li, ǹ nə́ bíi Ɛrmɔn, Izirayeli minin lɛn nə́ bɛ yii si.

⁴⁹ Diə bǎã kɛ tumaa, Zurdɛ̃ tà kio lɛ̀giala-n, a wo yìsi mu kɔsɛ kɔsɛ kɛ yǎa Pisigaa kele gòã lɛ la, bɛ tumaa tá a nɛ.