Timəə dí-pɛn 31 - LAWA A BOO SONBORE

Zozoe bɔ a koa Muizu bǎã nɛ

¹ Bɛ kio, Muizu daa boon kɛn pɛ Izirayeli minin lɛn tumaa nɛ:

² «Masɛ lɛ̀ paabiɛ ka fuə n ke pelo. Ma a boe la ma Izirayeli minin lɛn nyɛɛnaan bɔ doɛ̃ doo wa. Dɛnaa Lawa pɛ ma-n dɔn dinin, mà ma re Zurdɛ̃ tà kɛ kuri wa.

³ Kaa Lawa, Dɛnaa Lawa lɛ din nə die miɛ̃ ka nyɛɛnɛ. Tɔrɔ kɔsɔn mɛnɛn bɛ́ ka nyɛɛnɛ, a din nə die bɛn dii lenlen, ka tɔn nə ǹ bǎã si ka baa kaa wɔ lɛa. Sɛnɛ, Zozoe n die ka nyɛɛnaandɛnaa biɛ, ka Dɛnaa Lawa bɛ́ á pɛ lɔn.

⁴ Dɛnaa Lawa Amɔɔrɔ tɔrɔn kii Sihɔn laanka Ɔgu dɛ, á ǹ gána yu. A sii mɛn zɛnaa bɛn manɛ, a n die bɛ lɛ miã zɛnɛɛ bɛa tɔrɔn lɛn dɔn manɛ.

⁵ Dɛnaa Lawa á re ǹ we ka gɔn. Ma pɛ ka-n lɔn, ka ǹ baa miɛ̃.

⁶ Ka n gù we yii, ka n foo taã, ka baran nyɛ́ɛ baa wa, ka gɔ̀nɔn baran bìn da ǹ nyɛɛn wa. A giala, kaa Lawa, Dɛnaa Lawa din nə die ka diɛ zii, a re n gɔn boe ka ganaa wa, a re ka toɛ walan wa.»

⁷ Bɛ kio, Muizu lɛ dia Zozoe la, á pɛ nɛ Izirayeli minin lɛn tumaa yii ni: «N gù we yii, n nə n foo taã. A giala, Dɛnaa Lawa nə n liɛ zaman kɛ lɛ digolon ne mà asɛ á re gána mɛn lɛ koe ǹ la, n din Zozoe n die woe ka zaman kɛ lɛ-n walan. N din nə die bɛa gána kɛ lɛ gii ǹ bii.

⁸ Dɛnaa Lawa din tá re miɛ̃ n nyɛɛnɛ, á re goɛ̃ kun n ni. A re n gɔn boe n ganaa wa, a re n toɛ walan wa. N baran nyɛ́ɛ baa wa, n baran toa màn kɔn nyɛ́ɛ da n ganaa wa.»

Dí-pɛn sɛ́wɔ pɛ

⁹ Muizu bɛa dí-pɛ lɛ kiɛ̃ á kɔ *Levii tɔrɔn wúlu-bɔlen kɛn la, ǹ mɛnɛn lɛn bɛ́ Dɛnaa Lawa a *lɛ kɔ kɔn la ǹ goo guĩ, á kɔ Izirayeli tɔrɔn min golen tumaa dɔ la.

¹⁰ Muizu tɔn nə n gɔn waa Izirayeli minin lɛn man kɛnɛn: «Lɛ̀ sɔbaa woo lɛ̀ sɔbaa, giɔ̀mɔ toa ǹ lɛ̀ kɛa giala kɔ waáraa, bɛ̀ *giã siã giulun zɔ́n kɛ́ dɔ,

¹¹ Izirayeli minin tumaa bɛ́ re die n lɛ soekɔn ǹ Lawa, Dɛnaa Lawa yɔrɔ-a, bǎã kɛ nɛ a din bɔ á koa, ka die ka bɛa dí-pɛn sɛ́wɔ kɛ lɛ pɛ Izirayeli minin lɛn tumaa yii ni, ǹ ma.

¹² Ka zaman lɛ sɔkɔn, giĩn ni, lɔn nɛ ka nɛnyaanan nɛ, ka gùlin mɛnɛn dɔn bɛ́ giã nɛ ka kiwin ni, màn mɛn bɛ́ toɛ, ǹ nə n too kɔ dí-pɛn sɛ́wɔ lɛ a boon li, ǹ boo la ǹ nyɛ́ɛ baa kaa Lawa, Dɛnaa Lawa yii ni, ǹ nə n yiri dɔ koa li, ǹ dí-pɛn sɛ́wɔ lɛ a boon tumaa tamaa.

¹³ Bɛ á re toɛ, ǹ nɛnyaanan mɛnɛn bɛ́ ǹ goã doɛ̃ wa, bɛn dɔn nə ma, ǹ boo la ǹ nyɛ́ɛ baa kaa Lawa, Dɛnaa Lawa lɛ yii ni, kaa yiikoonaabaa tumaa gɔ́ɔ̃ nɛ, a ka toa bǎã kɛ nɛ ka n die sii ka baa kaa wɔ lɛa, Zurdɛ̃ tà kio.»

Izirayeli minin Lawa bɔlɔ tii

¹⁴ Bɛ kio, Dɛnaa Lawa tɔ́n pɛ Muizu ni: «N gɛ̀ lɛawaa diri. Lɛ dia Zozoe la, ka da kun, kɔn yɛ ka Lawa nɛ ǹ kion kɛ nɛ, man gɔn waa nɛ.» Muizu laanka Zozoe woo kɔn yɛ ǹ kion lɛ nɛ.

¹⁵ Dɛnaa Lawa nə́ n din nya ǹ nɛ tɛmaa bara bii walan. Bɛa tɛmaa bara lɛ na á goã golee-n kɔn yɛ ǹ kion lɛ a kiɛnlɛ-a.

¹⁶ Dɛnaa Lawa pɛ Muizu ni: – Boɛɛnɛ, n tá re kanaa toɛ. N gɛ̀ kio, Izirayeli minin lɛn tá re n dinin koe kɔrɔbaa la: tɔrɔ kɔsɔn mɛnɛn bɛ́ gána lɛ nɛ, ǹ nə́ die woe we ǹ bii, maǹ die bɛn lɛn dìn guguru koe. Ǹ tá re masɛ toɛ walan, ǹ maa lɛ kɔ kɔn la kɛ ziziɛ̃, ma lɛ kɔ kɔn la mɛn lɛ wɔ kɔn-a ǹ nɛ.

¹⁷ Bɛa pinaa kəni, ma foo á re yui ǹ li. Ma á re ǹ toɛ walan, man yɔrɔ bɔyaa ma bɔ ǹ la. Bɛa biikoo li, tɔrɔ kɔsɔn tá re ǹ dii. Bɔ̀n gigiã laanka nɔmaa dadaran tá re doe ǹ ganaa. Ǹ tá re pii bɛa pinaa kɛ lɛ nɛ: «Bɛ̀ ń bɛa bɔ̀n gigiã kɛ yaa wɔ yii, wɔa Lawa lɛ na a ba kun ka wɔ-n doo wa.»

¹⁸ Bɛa pinaa kɛ lɛ-n sɛn, ma á re n yɔrɔ bɔyɛɛ ma bɔ ǹ la duduu, ǹ sii baraan kɛn lɛn tumaa a lɛa, ǹ nə́ die zɛnɛɛ. A giala, maǹ die lawa kɔsɔn guguru koe.

¹⁹ Sisia kəni, man die loe nyɛɛ ka nɛ ka kiɛ̃. Muizu ganaa, Izirayeli minin lɛn daraa bɛa loe lɛ a lɔ ganaa, yǎa ǹ boe la ǹ loe. Bɛa loe lɛ n die siére biɛ ǹ ganaa masɛ wɔ paǹ li.

²⁰ Sonbore, gána mɛn lɛ á ke bɔ̀nyaa laanka zoo nyɔɔ n baa sii a nɛ, man die woe ka zaman kɛ lɛ-n walan. Ma din ni má n lɛ kɔ ǹ digolon la, ka bɛa bǎã lɛ a sii ni. Ǹ tá re màn bii walan ǹ kã, ǹ kasã, sɛnɛ, maǹ die n bɔyɛɛ ǹ lawa kɔsɔn guguru kɔ. Maǹ die dí nyɛɛ bɛn lɛn manɛ, ǹ masɛ din puusə kɔ, ǹ maa lɛ kɔ kɔn la kɛ ziziɛ̃.

²¹ Bɛ̀ bɔ̀n gigiã laanka nɔmaa dadaran nə́ ǹ yɛ ǹ mɛn waáraa, bɛa loe lɛ á re siére pii ǹ ganaa masɛ wɔ paǹ li. A giala, ǹ nɛnyaanan yiri a re boe ka bɛa loe lɛ a lɔ-n duduu wa. Sonbore ne, masɛ nə n lɛ kɔ ka la ka gána mɛn lɛ a sii ni, a laanɛ masɛ tɔn wo ka kaa walan bɔrɔ wa, sii mɛn a taasiɛ bɛ́ ka gɔ́ɔ̃ nɛ, ma á doɛ̃ pelo dinin gɔrɔ.

²² Bɛa pinaa kɛ lɛ nɛ, Muizu bɛa loe lɛ kiɛ̃, á Izirayeli minin lɛn daraa a ganaa.

²³ Bɛ kio, Dɛnaa Lawa nə́ n gɔn waa Nunu a nɛgiĩ Zozoe dɔ nɛ, á pɛ nɛ: «N gù we yii, n nə n foo taã. A giala, man lɛ kɔ Izirayeli minin lɛn la ka gána mɛn a sii ni, n din lɛ n die woe ǹ ne walan. Ma din Lawa á re goɛ̃ kunun n ni.»

²⁴ Muizu dí-pɛn boon lɛn tumaa kiɛ̃ sɛ́wɔ nɛ. A bɛ́ á nya,

²⁵ *Levii tɔrɔn mɛnɛn bɛ́ Dɛnaa Lawa a lɛ kɔ kɔn la ǹ goo lɛ guĩ, á tɔ́n pɛ bɛn manɛ:

²⁶ «Ka dí-pɛn sɛ́wɔ kɛ si, ka koa kaa Lawa, Dɛnaa Lawa a lɛ kɔ kɔn la ǹ goo lɛ li. A n die goɛ̃ walan, a siére pɛ ka ganaa, masɛ wɔ paǹ li.

²⁷ A giala, masɛ Muizu tá kaa piã laanka ka too kakabaa doɛ̃. Á ke le! Pelo dinin, a ma toa ma yii n koo man tɔn kun ka nɛ bɔrɔ, kaa ke n gòãn dii Dɛnaa Lawa ganaa. Bɛ̀ ma gã, ka tɔn nə n baa lɔn?

²⁸ A bɛ́ miɛ̃, ka kaa tɔrɔn lɛn min golen tumaa laanka ǹ zaman-lɛduə̃lin sɔkɔn ma li. Ma á re lon laanka tán biɛ ma siéren lɛa ǹ ganaa, mà boon kɛn pɛ Izirayeli minin lɛn manɛ ǹ ma.

²⁹ A giala, ma á doɛ̃, máa maa gɛ̀ kio, ka tá re n dinin ziziɛ̃. Ma zii mɛn nyaa ka nɛ, ka tá re kanɛɛ ka n bɔ bɛ la. Bɛa giala-nyɔmiɛ̃ lɛ á re bɔ̀n biɛ ka ganaa. A giala, sii mɛn bɛ́ a ba siĩni Dɛnaa Lawa yii li wa, ka n die bɛ lɛ zɛnɛɛ, ka a foo yoo ne.»

Muizu a loe

³⁰ Bɛ kio, Muizu bɛa loe lɛ lɔ Izirayeli zaman lɛ tumaa yii ni, yǎa á nya. LOE lɛ á ke: