Timəə dí-pɛn 30 - LAWA A BOO SONBORE

Izirayeli minin wusoo a da Lawa li

¹ Ma boon mɛnɛn tumaa pɛ má ǹ kaa tán ka giulun, a bǐɛ̃ nɛ ka a baraa nɛ, bɛ̀ ǹ mɛn a sii dɔ ka ganaa ǹ mɛn waáraa, kaa Lawa, Dɛnaa Lawa lɛ bɛ́ re woe ka nɛ bǎã mɛn nɛ, ka n toa walan ka n taasɛ,

² ka wusoo ka da kaa Lawa, Dɛnaa Lawa li, ka dinin laanka kaa nɛnyaanan nɛ, ka a bɔlɔ si ka ka foo tumaa nɛ, ka ka gɔ́ɔ̃ tumaa nɛ, a kɔnpɛ ka gɔn-waa kɛ nɛ, ma á we ka-n pelo.

³ Bɛ̀ á n baa miɛ̃, kaa Lawa, Dɛnaa Lawa lɛ á re makara boe ka ganaa. A ka pɛsɛ̃ tɔrɔn mɛnɛn tumaa bii ka nə́ ǹ bɛ̀rɛn lɛa, á re wusii a ka waa walan doo a ka sɔkɔn.

⁴ Haalɛ ta kaa min mɛnɛn man bɛ̀rɛn lɛa kanaa lɛ dàn ganaa, kaa Lawa, Dɛnaa Lawa lɛ á re woe ǹ kuĩ walan, a da ǹ sɔkɔn.

⁵ Ka digolon nə goã gána mɛn lɛ nɛ lɛlɛ, á re wusii a da ka ka-n walan, á re kaa wɔ biɛ. Á re bǐɛ̃ zɛnɛɛ ka nɛ, a ka mɔnaa a la ka digolon kɛn manɛ.

⁶ Kaa Lawa, Dɛnaa Lawa din tá re ka foo bɔyɛɛ, ka dinin laanka kaa nɛnyaanan nɛ, màn mɛn bɛ́ toɛ, ka kaa Lawa, Dɛnaa Lawa lɛ narɛ ka ka foo tumaa nɛ, ka ka gɔ́ɔ̃ tumaa nɛ, ka yii tɔn goã koo.

⁷ Kaa Lawa, Dɛnaa Lawa n die bɛa dɔlɔn kɛn lɛn tumaa kiɛ kaa zɔ́ɔn mìi ni, min mɛnɛn tumaa ka baa zɔ́ɔ, ǹ nə́ bɔ ka yii ni.

⁸ Sɛnɛ kasɛn, ka wusoo ka Dɛnaa Lawa bɔlɔ si doo. Ma bɛ́ gɔn waa ǹ boon mɛnɛn pii ka nɛ pelo, ka kɔ bɛn lɛ.

⁹ Kaa Lawa, Dɛnaa Lawa lɛ á re kaa nya ǹ dí tumaa bǐɛ̃ koe ka gɔn. Á re toɛ kaa nɛnyaanan laanka kaa tɔɔn nə mɔnaa, á re kaa tán-kɔsiɛ dɔ bǐɛ̃ koe. Bǐɛ̃ zɛnaa ǹ foo mɛn yɛ a lon ka digolon wɔ paǹ li, bɛ lɛ á re yii a lon ka dɔn wɔ paǹ li.

¹⁰ Sɛnɛ, yǎa ka kaa Lawa, Dɛnaa Lawa lɛ bɔlɔ sii. Gɔn waa ǹ boon laanka landa boon mɛnɛn bɛ́ kiɛ̃-n dí-pɛn sɛ́wɔ kɛ nɛ, yǎa ka koe bɛn lɛ, ka wusii ka die kaa Lawa, Dɛnaa Lawa ganaa, ka ka foo tumaa nɛ, ka ka gɔ́ɔ̃ tumaa nɛ.

Lawa a boo á kunu wɔ ganaa

¹¹ Sonbore, ma bɛ́ gɔn waa ǹ boon mɛnɛn pii ka-n pelo, a bie ka maǹ kaka ka ganaa ǹ nə́ la yii-n wa, boo lɛ sasa bie wa.

¹² Ǹ bie lon wa. Bɛ̀ maǹ lon kɛnɛn, bɛ̀ min nə pii: «Die n die dii lon, a wo n too kɔ ǹ ganaa a da ǹ pɛ wɔ nɛ, màn mɛn bɛ́ toɛ, wɔ kɔ ǹ lɛ?»

¹³ Ǹ bie yìsi mu kio wa. Bɛ̀ maǹ walan kɛnɛn, bɛ̀ min nə pii: «Die n die yìsi mu kuri, a wo ǹ too kɔ ǹ ganaa, a da ǹ pɛ wɔ nɛ, màn mɛn bɛ́ toɛ, wɔ kɔ ǹ lɛ?»

¹⁴ Sɛnɛ, boo lɛ n kunu ka li foɛɛ̃. A din lɛ n ka lɛ-n, a din lɛ n ka foo ne, màn mɛn bɛ́ toɛ ka kɔ lɛ.

Yiikoonaabaa ǹ zii

¹⁵ Ka ga Izirayeli minin lɛn, pelo, masɛ n yiikoonaabaa laanka yii-nyɛɛ koɛ ka yɔrɔ-a, ka gɛ̀ laanka bɔ̀n nɛ.

¹⁶ Ma bɛ́ n gɔn wɛɛ ka-n ka sii mɛn nɛ pelo, man máa ka kaa Lawa, Dɛnaa Lawa lɛ narɛ, ka kɔ a zii lɛ, ka a gɔn waa ǹ boon kɛn tamaa, ka a landa boon laanka a sii yɔrɔ bɔ ǹ boon kɛn nɛ. Bɛ á re toɛ ka yii goã koo, ka boo la ka mɔnaa. Ka bɛ́ re we gána mɛn nɛ ka si ka baa kaa wɔ lɛa, kaa Lawa, Dɛnaa Lawa lɛ á re barka dɔ diɛ ka ganaa walan.

¹⁷ Sɛnɛ, bɛ̀ kaa taasiɛ nə́ n bɔyaa, bɛ̀ ka n too kɔ wa, bɛ̀ ká toa minin nə́ ka kaa lawa kɔsɔn guguru kɔ ganaa, yǎa ka dí nya bɛn manɛ,

¹⁸ ka á re papaɛ̃ ka n bɔ kànaa, sàabaa ba la wa. Man bɛ pii ka-n pelo. Ka bɛ́ re Zurdɛ̃ tà kuri ká n woe kiɛ bǎã mɛn lɛ nɛ, ká n die sii ka baa kaa wɔ lɛa, ka n ka a re beleboe walan wa.

¹⁹ Pelo, man lon laanka tán biɛ maa siére lɛa: yiikoonaabaa laanka gɛ̀-n ma á koɛ ka yɔrɔ-a, ka lɛn bǐɛ̃ laanka a baraa nɛ. Ka yiikoonaabaa ǹ zii saa, màn mɛn bɛ́ toɛ, ka yii goã koo, ka dinin laanka kaa nɛnyaanan nɛ.

²⁰ Bɛ n ka kɛ nɛ: ka kaa Lawa, Dɛnaa Lawa lɛ narɛ, ka n too kɔ a lon, ka n naa a din lɛ ganaa. Bɛ lɛ n die toɛ ka yii goã koo. Dɛnaa Lawa nə n liɛ mà asɛ á re bǎã mɛn koe ka digolo Abrahamu la, Izaaki laanka Zakɔba nɛ, ka boo la ka giã walan ka belebɔ.