Timəə dí-pɛn 3 - LAWA A BOO SONBORE

Ɔgu a bǎã si la boo

¹ Bɛ kio, wɔ́ n bɔyaa wɔ́ Basan gána zii saa. Basanan kii Ɔgu soo kun ka a zaman tumaa nɛ, á daa n da wɔ lɛ Edreyii kiwi, á zia baa wɔ ganaa.

² Dɛnaa Lawa tɔ́n pɛ ma nɛ: «N baran nyɛ́ɛ baa-n wa. A giala, má wɔ n gɔn, a din ni, a zaman tumaa nɛ, ka a gána nɛ. Amɔɔrɔn kii Sihɔn mɛn goã giã-n Ɛsibɔn, n sii mɛn zɛnaa bɛ nɛ, bɛ lɛ miã zɛnaa a dɔ nɛ.»

³ Wɔa Lawa, Dɛnaa Lawa lɛ tɔ́n Basanan kii Ɔgu dɔ wɔ wɔ gɔn, ka a zaman tumaa nɛ. Wɔ́ ǹ dɛ wɔ́ ǹ nya, haalɛ wɔ min goon din toa-n wa.

⁴ Wɔ́ a kiwin lɛn tumaa si bɛa waáraa lɛ nɛ Argɔbu a bǎã kɛ nɛ. Kiwi din goã, mà wɔ n wɔ si ǹ la wa. A kaa kun kiwi pɔsɔrɔ, Basan gána nɛ, Ɔgu goã ǹ mìi la.

⁵ Kungɔn sɔsɔrɔn man nə́ goã bɛa kiwin lɛn tumaa lɛnpɛnɛ, goo nə́ ǹ kiɛnlɛn lɛ bɛ̀ ǹ tã, bɛ̀ ǹ fɔlɔ bàlà da a bii. Kiwi bisin gigiã dɔ́ goã a nɛ, kungɔnɔn nə́ ǹ ba bɛn ganaa wa.

⁶ Wɔ́ ǹ yu lenlen, giĩn ni, lɔn nɛ ka nɛnyaanan nɛ, wɔ́ bɛn dɛ, ka wɔ goã wɔ́ zɛnaa Ɛsibɔnɔn kii Sihɔn nɛ lɔn. Wɔ n wɔ́ goã wɔ́ bɛ dɔ a kiwin tumaa yu.

⁷ Sɛnɛ tɔɔn nɛ, ka wɔ màn mɛn tumaa dɔ yɛ bɛa kiwin lɛn nɛ, wɔ́ bɛn goa wɔa wɔ lɛa.

Galaati gána gii

⁸ Bɛa waáraa lɛ nɛ, gána mɛn lɛ goã Zurdɛ̃ tà a lɛ̀giala gɔn la, wɔ́ bɛ kũ wɔ́ si Amɔɔrɔ tɔrɔn kii min paa kɛ la. A n siɛ Arnɔn tà gòã kɛ ganaa, a wo n doa Ɛrmɔn kele ganaa.

⁹ Sidɔn minin man Ɛrmɔn lɛ bíi Sirinyɔn, Amɔɔrɔ tɔrɔn man bíi Seniiri.

¹⁰ Wɔ́ diə bǎã kɛa kiwin tumaa si, Galaati laanka Basan gána tumaa nɛ, a wo Salkaa laanka Edreyii kiwi yaa. Bɛn man Basan gána a kiwin lɛa, Ɔgu goã gána mɛn lɛ mìi la.

¹¹ Basanan kii Ɔgu dinsɔɔ̃ na á goã Refayimu tɔrɔn lɛn min giala-nyɔmiɛ̃ lɛa. Ǹ na a gere da goo mɛn nɛ, fɔlɔ goo ne. A din lɛ n ke tɔn Amɔn tɔrɔn kɛn kiwi Rabaa. A sasabaa n mɛtərə sii ka talɛɛ, a gɔ́ɔ̃ a golebaa n mɛtərə paa.

¹² Bɛa gána lɛ, wɔ́ si wɔ́ baa wɔa wɔ lɛa bɛa waáraa lɛ nɛ. A n siɛ Aroɛɛrɛ kiwi ganaa Arnɔn tà lɛ-a, a Galaati a kele yii kɛa talɛɛ laanka a kiwin kaa a nɛ. Man má bɛn kɔ Urubɛn tɔrɔn laanka Gaadi tɔrɔn la.

¹³ Galaati gána lɛ a gialakun ke, ka Basan gána tumaa nɛ, Ɔgu goã ǹ mɛn lɛ mìi la, má bɛ kɔ Manaasee tɔrɔn kɛn talɛɛ la. Argɔbu bǎã kɛ tumaa, ka Basan gána tumaa nɛ, maǹ nə́ goã bɛn bíi Refayimu tɔrɔn gána.

¹⁴ Manaasee tɔrɔ Yayiiri ke, bɛ́ Argɔbu bǎã kɛ tumaa si yǎa Gesuuru tɔrɔn laanka Maakaati tɔrɔn gèlè la. Á n din tɔ kɔ Basan gána lɛ a kiwin ganaa. Maǹ bɛa bǎã lɛ bíi pelo mà Yayiiri a gána.

¹⁵ Má Galaati gána kɛ kɔ Makiiri tɔrɔn la.

¹⁶ A saa Galaati ganaa, a wo Arnɔn tà kɛ yaa, má bɛ kɔ Urubɛn tɔrɔn laanka Gaadi tɔrɔn la. Arnɔn tà kɛ na a gèlè lɛa, gusin a lɛ̀gɔn la. A n woe yǎa Yabɔki tà lɛ-a, Amɔn tɔrɔn gèlè la.

¹⁷ A lɛ̀nyɛɛn gèlè n boe Zurdɛ̃ tà a nyankɔrɔ lɛ kɛ nɛ, Zenezarɛti tà laanka yìsi mu kɔsɛ kɔsɛ kɛ bii, a wo n doa Pisigaa kele gòã lɛ ganaa lɛ̀giala-n.

¹⁸ Bɛa waáraa lɛ nɛ, má tɔ́n nə n laa ka ganaa, má pɛ ka-n kɛnɛn: «Kaa Lawa, Dɛnaa Lawa na á gána kɛ lɛ kɔ ka la, kaa wɔ lɛa. Kaa zia-baalin tumaa nə ǹ ziabaa ǹ mànan goa, ǹ mɛ ǹ dɔɔ̃n Izirayeli minin gialakunun lɛn nyɛɛnɛ, ǹ Zurdɛ̃ tà kuru.

¹⁹ Kaa lɔn laanka kaa nɛnyaanan nɛ, má pɛ máa bɛn dininsɔɔ̃nɔn nə golee kiwin kɛn nɛ má ǹ kɔ ka la, kun ka kaa tɔɔn nɛ. A giala, ma á doɛ̃, máa kaa tɔɔn tá mɔnaa nɛ.

²⁰ Ka n dɔ ka dɔɔ̃nɔn lɛn lɛ, yǎa Dɛnaa Lawa susui koe ǹ la, ka a bɛ ke á kɔ ka dɔn la lɔn. Kaa Lawa, Dɛnaa Lawa bɛ́ gána mɛn koe ǹ dɔn la, Zurdɛ̃ tà kio lɛ̀nyɛɛnɛ, bɛ̀ ǹ dɔn nə́ ǹ wɔ gii yɛ, ma bǎã mɛn kɔ ka la, didie tɔn nə n bɔyaa kəni, a da giã a wɔ nɛ.»

²¹ Má tɔ́n nə n gɔn waa Zozoe ne bɛa waáraa lɛ nɛ, má pɛ nɛ: «Kaa Lawa, Dɛnaa Lawa sii mɛn zɛnaa kii min paa kɛ nɛ, n din yii bɛ́ á yɛ. Ka bɛ́ re boe bǎã mɛn tumaa nɛ Zurdɛ̃ tà kio, Dɛnaa Lawa n die ǹ dɔn kiin biɛ miɛ̃.

²² Ka baran nyɛ́ɛ baa ǹ nɛ wa. A giala kaa Lawa, Dɛnaa Lawa lɛ, a din nə zia diɛ kaa lɛa.»

Muizu sii mɛn nyankɔ Lawa lon

²³ Má tɔ́n gòã-kũ da Dɛnaa Lawa ganaa bɛa waáraa lɛ nɛ, má pɛ nɛ:

²⁴ «Ma nə n sii kɛ zɛnaa, n tá n golebaa laanka n boo sii la nyɛɛ ma nɛ. A giala, lawa mɛn kɔsɔ bɛ́ boe la a n nya ǹ dín kɛn miã nya, a n tɔ bɔ ǹ siin kɛn zɛnaa, a banban lon wa, a banban tán wa.

²⁵ Bǐɛ̃ kɔ n toa ma Zurdɛ̃ tà kɛ kuru, gána sonbore ke a kio, ma bɛ yɛ, kele yii sonbore kɛ laanka Liban kelen kɛn nɛ.»

²⁶ Sɛnɛ, ka dinin lɛn taman yii, Dɛnaa Lawa foo yoo masɛ li, a n too kɔ ma lon wa. A na á pɛ ma-n kɛnɛn dinin: «Á ma gɔ̀nɔn bɔ. N nyan toa n bɛa boo kɛ lɛ da masɛ-n doo wa.

²⁷ Dii Pisigaa kele kɛ la, n nə n yii saa n ga lɛ̀nyɛɛnɛ, gɔsɛ a lɛ̀gɔn la, gusin a lɛ̀gɔn la ka lɛ̀giala nɛ. Ga gána lɛ-a ka n yii ni, sɛnɛ, n ba re Zurdɛ̃ tà kɛ kuri wa.

²⁸ N gɔn waa Zozoe ne n na a gù we yii, n na a foo taã. A giala, n yii bɛ́ gána mɛn ganaa, Zozoe lɛ din nə die Zurdɛ̃ tà kuri ka zaman kɛ nɛ, a wo bɛa gána lɛ kɔ ǹ la.»

²⁹ Wɔ́ nɔmaa wɔ́ giã nyankɔrɔ lɛ kɛ nɛ, Bɛti-Pewɔɔrɔ yɔrɔ-a.