Timəə dí-pɛn 29 - LAWA A BOO SONBORE

Lawa sii dadaran mɛnɛn zɛnaa Izirayeli minin manɛ

¹ Muizu Izirayeli minin lɛn tumaa bíi, á pɛ ǹ nɛ: – Ka bɛ́ Ezipti gána nɛ, Dɛnaa Lawa siin mɛnɛn zɛnaa *Faarahɔn nɛ, a dí-nyalin ni ka a gána tumaa nɛ, ka dininmaan yii bɛ́ tumaa yɛ.

² A nɔmaa dadaran mɛnɛn kaa ǹ mìi ni, a kaãbaa ǹ sii dadaran mɛnɛn zɛnaa, ka yii bɛ́ á yɛ.

³ Sɛnɛ, a da kaa pelo lɛ, a laanɛ Dɛnaa Lawa yiri kɔ ka la, ka a tɔn sii giala miɛ wa, a laanɛ á yii nànan kɔ ka la, ǹ ba wɔlɔ yii wa, a laanɛ á toon kɔ ka la, ǹ ba boo miɛ wa.

⁴ Ma din Lawa n má ka nyɛɛnaan bɔ don, lɛ̀ pusi gɔ́ɔ̃ nɛ. Dɔnkɛn mɛnɛn nə goã ka-a, kɔsɔnɔn mɛnɛn nə goã ka gòãn-a, bɛn nə ziziɛ̃ wa.

⁵ Ka màn mɛn sɔ̃, buuru bie wa, ka màn mɛn mi, duvɛ̃ laanka yɔ kakaarɛ bie wa. Man má bɛ zɛnaa, màn mɛn bɛ́ toɛ ka dɔ̃, mà ma din Dɛnaa Lawa lɛ n kaa Lawa lɛa.

⁶ Ka bɛ́ ká daa ká dɔ bǎã kɛ nɛ, Ɛsibɔnɔn kii Sihɔn laanka Basanan kii Ɔgun nə́ soo, ǹ nə́ daa n da ka lɛ, mà maǹ die zia biɛ ka ganaa. Sɛnɛ, wɔ́ boo ǹ la.

⁷ Wɔ́ ǹ gána si, wɔ́ kɔ Urubɛn tɔrɔn laanka Gaadi tɔrɔn la, ka Manaasee tɔrɔn kɛn talɛɛ nɛ ǹ wɔ lɛa.

⁸ Bɛ lɛ nɛ, ka lɛ kɔ kɔn la ǹ boon lɛn tamaa, ka kɔ ǹ lɛ, màn mɛn bɛ́ toɛ, ka bɛ́ re n gɔn diɛ dí woo dí ganaa, a tumaa boo la a bǐɛ̃ kɔ.

Lɛ-kɔ a sii gole baa

⁹ Izirayeli minin lɛn, ka dinin tumaa n ke golee-n kànaa pelo, kaa Lawa, Dɛnaa Lawa yɔrɔ-a: kaa mìilandɛnan nɛ, kaa goledɛnan nɛ, kaa min golen ne, kaa zaman-lɛduə̃lin ni,

¹⁰ kaa lɔn laanka kaa nɛnyaanan nɛ ka gùlin mɛnɛn dɔn dinin nə́ ke giã-n ka bii kaa bǎã lɛ nɛ, ǹ nə́ gɔn kuri koe ka la, ǹ nə́ mu sii koe ka la.

¹¹ Kaa Lawa, Dɛnaa Lawa lɛ n lɛ kɔ kɔn la we ka ka nɛ. Bɛ̀ ka á re koe lɛ, ka n liɛ kànaa pelo.

¹² A n giɛ li, a ka baa a din a minin lɛa pelo, a dinmaa nə n baa kaa Lawa lɛa, ka a bɛ́ á n lɛ kɔ ka la lɔn, ka a bɛ́ á n liɛ ka digolon man lɔn: Abrahamu ni, Izaaki ni ka Zakɔba nɛ.

¹³ Bɛa lɛ kɔ kɔn la ke ma wɔ ka nɛ, má a boo da ka nɛ, má n liɛ má da la, ma bie má wɔ ka kasɛn dininsɔɔ̃nɔn nɛ wa.

¹⁴ Sɛnɛ, min woo min tá kànaa, á n golee-n kun ka wɔ nɛ pelo wɔa Lawa, Dɛnaa Lawa yɔrɔ-a, a n bɛ wɔ lɛa, ka min mɛn dɔ din nə́ ke a tɔn yɛ bɔrɔ wa.

¹⁵ Wɔ bɛ́ wɔ́ goã Ezipti gána-n lɔn, wɔ tɔrɔ kɔsɔn bǎã wɔsɔ kɔn lɔn wɔ́ kiɛ̃, ka dinin tá doɛ̃.

¹⁶ Bɛa gánan kɛn lɛn bɛ́ dì naarɛn mɛnɛn guguru koe, táa ká ǹ yɛ: ǹ tɛn nə gɔn lɛa, ǹ tɛn nə kɔlɔ lɛa, ǹ tɛn nə wɔrɔ lɛa, ǹ tɛn nə sana lɛa.

¹⁷ Min kɔn nyan toa a yɛ ka bii giĩ lɛa hinlaa lɔ lɛa, tanlɛ lɛa hinlaa tɔrɔ lɛa, bɛ ń wusii n boe wɔa Lawa, Dɛnaa Lawa kio pelo, mà asɛ n woe bɛa tɔrɔn kɛn lɛn dìn guguru koe wa. Min kɔn dɔ nyan toa a yɛ ka bii, a n baa ka da gòon bɛ́ lɔn, sèwò kɔɔsɛ koe wa.

¹⁸ Bɛ̀ min mɛn dɔ́ bɛa liɛ ǹ boon lɛn ma, yǎa a taasɛ a din gɔ́ɔ̃ nɛ, mà asɛ wɔ na á bǐɛ̃ kɔ, á n pii: «Ma bɛ́ má n tã, má kɔ ma din a taasiɛ lɛ, maa sii tumaa á ke á bǐɛ̃ kɔ!» Sonbore, tán mɛn bɛ́ basiɛ̃ nɛ, mu boro a bɛ ganaa doo wa.

¹⁹ Dɛnaa Lawa a re lɛ koe a bɛa dɛnaa a sii baraa toa-n wa. Ǹ dɛnaa lɛ bɛ́ na á Dɛnaa Lawa bɔlɔ tii, a foo n die yui li. Dɔlɔ mɛn tumaa boo nə n da sɛ́wɔ kɛ nɛ, bɛ tumaa n die goɛ̃ a mìi ni. Dɛnaa Lawa á re ǹ dɛnaa tɔ tuturi a bɔ kanaa.

²⁰ Dɛnaa Lawa á re niɛ a bɔ Izirayeli minin lɛn tumaa ganaa, a dɔlɔ bɔ a ganaa, a kɔnpɛ ka lɛ kɔ kɔn la lɛ a dɔlɔ tumaa nɛ, ǹ mɛnɛn boo bɛ́ kiɛ̃ nɛ dí-pɛn sɛ́wɔ kɛ nɛ.

Dì guguru kɔ a dɔlɔ

²¹ Kaa nɛnyaanan mɛnɛn bɛ́ re yui ka kio, tiin mɛnɛn dɔn bɛ́ re boe gána sɔsɔɔ nɛ ǹ daa, bɛn tá re bɛa sii kakan lɛn laanka basaãn lɛn yii, Dɛnaa Lawa nə́ ǹ kɔ kaa gána lɛ nɛ.

²² Ǹ tá re pii, mà gána lɛ gɔ́ɔ̃ tumaa n kiribi lɛa, yìsi ni, ka tɛ nɛ, á kukũ lenlen. Màn kɔn ba boe la a n da a-n wa, buu dɔ din banban wa, ta ń màn mɛn da a nɛ a boe wa. A n die goɛ̃ ka Sodɔmu laanka Gomɔɔrɔ kiwin kɛn bɛ́ lɔn, ka Admaa laanka Seboyimu wɔn nɛ, ǹ mɛnɛn lɛn bɛ́ Dɛnaa Lawa nə́ ǹ yu a foo-yoo babaraa lɛ gɔ́ɔ̃ nɛ.

²³ Tɔrɔn tumaa n die pii bɛa biikoo li: «Wàa na á baa, Dɛnaa Lawa gána kɛ baa kɛnɛn? Wàa mɛn sii na á da bɛa foo-yoo gole kɛ ganaa?»

²⁴ Minin tá re ǹ lɛ sii ǹ pɛ: «Dɛnaa, ǹ digolon Lawa lɛ bɛ́ á ǹ waa á ǹ bɔ Ezipti gána nɛ ǹ mɛn waáraa, a goã á lɛ kɔ kɔn la mɛn wɔ kɔn ǹ nɛ, maǹ nə́ bɛ lɛ ziziɛ̃. Bɛ lɛ na á toa sii kɛ lɛ nə́ ǹ yɛ.

²⁵ A giala, maǹ nə́ woo dí nya lawa kɔsɔn manɛ, ǹ nə́ bɛn guguru kɔ, a da yǎa ǹ ba ǹ doɛ̃ lɛlɛ wa, Dɛnaa Lawa dɔ din lɛ kɔ ǹ la, mà ǹ nə ǹ guguru kɔ wa.

²⁶ Bɛ lɛ na á toa, Dɛnaa Lawa foo yoo gána kɛ lɛ li, dɔlɔ mɛn tumaa boo nə n da sɛ́wɔ kɛ nɛ, á tɔ́n bɛn kaa a mìi ni.

²⁷ Dɛnaa Lawa lɛ foo bɛ́ á busu ǹ li, a foo bɛ́ á yoo ǹ li á la yii ni, a na á ǹ goa ka saɛ á kiɛ̃ ǹ nɛ, á woo ǹ kaa gána kɔsɔ nɛ. Maǹ tɔn walan, a da kaa pelo lɛ.»

²⁸ Sii mɛn bɛ́ durii ni, bɛ n wɔa Lawa, Dɛnaa Lawa wɔ lɛa. Sɛnɛ, màn mɛn nə n nyaa wɔ dinin laanka wɔa nɛnyaanan manɛ, bɛa sii n wɔ mìi ni yǎa duduu: bɛ n ka dí-pɛ kɛ nɛ, wɔ doamaa nɛ, wɔ kɔ a boon tumaa lɛ.