Timəə dí-pɛn 24 - LAWA A BOO SONBORE

Kurəə lɔ loo wole saa ganaa boo

¹ Ka bɛ̀ kaa min mɛn na á lɔ wɔsɔ á saa. Bɛ kio, a bɛ́ á zɛ̀rɛbaa ǹ paǹ yɛ lɔ lɛ ganaa, á n susu a ba n yɔrɔ bǐɛ̃ diɛ lɔ lɛ la doo wa. Ka bɛ dɔ nɛ, á ná a loo ǹ sɛ́wɔ zɛnaa á kɔ la, á loo á bɔ a kion.

² Lɔ lɛ bɛ́ á soo á woo, á woo wɔ giĩ kɔsɔ li.

³ Bɛ̀ a tìĩ bɔ bɛ dɔ nyin ni, yǎa a na a loo ǹ sɛ́wɔ zɛnaa á kɔ la á loo á bɔ a kion, hinlaa bɛa giĩ kɔsɔ kɛ lɛ á saa ta bɛ na á gã,

⁴ ǹ zuũ bibinaa mɛn lɛ loo, bɛa boe la a saa doo, a baa a lɔ lɛa wa. A giala, lɔ lɛ na á *gɔ̀ da a din ganaa. Dɛnaa Lawa yɔrɔ-a, sii bɔbɔnɛɛ nɛ. Kaa Lawa, Dɛnaa Lawa bɛ́ gána mɛn lɛ koe ka la, mà a kaa wɔ baa, ka nyan toa ka a minin kaa sii baraa zɛnaa ganaa wa.

Lɔ tii ǹ zuũ

⁵ Bɛ̀ tɔntɔraa lɔ saa, bɛ̀ a saa tɔn belebɔ wa, a doamaa bie a wo sɔraasibaa ǹ bǎã-n wa. Ǹ doamaa bie ǹ dí kɔn dɔ da a mìi-n wa. A doamaa nɛ a goã a din gɔn wìi a lɛa lɛ̀ goon gɔ́ɔ̃ nɛ, màn mɛn bɛ́ toɛ, a lɔ mɛn lɛ saa, a boo la a bɛ foo kɔɔ̃n kɔ.

Giɔ̀mɔ lɛ koa ǹ màn

⁶ Min doamaa bie a min a gii dan hinlaa a gii nɛ din si la a giɔ̀mɔ lɛ koa ǹ màn lɛa wa. A giala, bɛ̀ min mɛn bɛ zɛnaa, a n goon ka a na á ǹ dɛnaa nyin si la.

Min koã boo

⁷ Bɛ̀ Izirayeli min mɛn ná a din miã Izirayeli min koã, a na á baa bɛ̀rɛ lɛa hinlaa a na á sã, bɛa wurumu lɛ doamaa-n ka gɛ̀ nɛ. Ka zɛnaa miɛ̃, màn mɛn bɛ́ toɛ, ka sii baraa bɔ ka bɔ ka bii.

Gɔ̀nɔn ki busu babaraa

⁸ Busu mɛn tumaa á ke ká gɔ̀nɔn ki busu babaraa kɛ bɛ́ lɔn, ka yiri bɔ bɛ li, màn mɛn bɛ́ toɛ, Levii tɔrɔ wúlu-bɔlen kɛn nə ka daraa màn mɛn tumaa ganaa bɛ wɔ paǹ li, ka bɛ tamaa sɔnbɔraa nɛ, ka kɔ lɛ. Ka n yiri kɔ li ka zɛnaa a kɔnpɛ ka maa gɔn waa ǹ boon kɛn nɛ má pɛ ka nɛ.

⁹ Kaa Lawa, Dɛnaa Lawa lɛ sii mɛn zɛnaa Miriyamu ni, bɛ̀ ka bɛ́ ká soo Ezipti gána nɛ ká n zii la, ka n yiri koa bɛ li.

Giɔ̀mɔ lɛ koa ǹ màn dòo

¹⁰ Bɛ̀ ká màn mɛn a giɔ̀mɔ da ka dinin miã Izirayeli min ganaa, ka nyan toa ka wɔ a kion mà ka n kaa giɔ̀mɔ lɛ a lɛ koa ǹ màn siɛ wa.

¹¹ Giɔ̀mɔ-dali lɛ n golee kanaa, a giɔ̀mɔ lɛ da min mɛn ganaa, bɛ na a lɛ koa ǹ màn lɛ saa, a da yaa nɛ kanaa.

¹² Bɛ̀ doobaa nɛ ń ná a mɔnaa si la giɔ̀mɔ lɛ koa ǹ màn lɛa, n nyan toa n gɔn n waa tán nɛ wa.

¹³ Bɛ̀ wasa mɛ, n doamaa nɛ n wo a giɔ̀mɔ lɛ koa ǹ màn lɛ kɔ la. Á die wɛɛ tán ka a mɔnaa nɛ a ganaa, bɛ̀ á n barka diɛ n nɛ. Ka bɛ dɔ nɛ, kaa Lawa, Dɛnaa Lawa yɔrɔ-a, n nə ń sii sonbore zɛnaa.

Doobaa a dí nya ǹ saraa

¹⁴ Ka nyan toa ka bɔ dí-nyali yii ni, a nɔmaa laanka a doobaabaa taman yii wa. Ta ka dinin miã Izirayeli min ni, hinlaa ta gùli ni, giã-n kaa gána lɛ a kiwi kɔn nɛ.

¹⁵ Bɛ̀ á dí nya ǹ mɛn pinaa, ka a saraa kɔ la a din pinaa. Ka nyan toa wasa mɛ a saraa lɛ ganaa ka gɔn wa. A giala, doobaa nɛ, a laadoo n bɛa saraa lɛ ganaa taãn-taãnɛ. Ka nyan toa a Dɛnaa Lawa bii ka li wa. Bɛ̀ á n baa miɛ̃, sii baraa n ka mìi ni.

Didie laanka a mìi gɔ́ɔ̃ ǹ sii

¹⁶ Ka baran díi dɛ a nɛ a sii baraa zɛnaa taman yii wa, ka baran nɛ dɛ ǹ di a sii baraa zɛnaa taman yii wa. Ka doamaa-n ka didie dɛ a din a sii baraa zɛnaa taman yii.

Dɔ doobaan lɛ ǹ sii

¹⁷ Ka nyan sii kɔkɔrɔ zɛnaa ka mɛnaa gùli laanka nɛ toen la wa. Ka baran lɔ giɔɔrɔ a mɔnaan si la giɔ̀mɔ lɛ koa ǹ màn lɛa wa.

¹⁸ Ka n yiri koa a nɛ, mà ka n ká goã bɛ̀rɛn lɛa Ezipti gána nɛ, mà kaa Lawa, Dɛnaa Lawa na á ka bɔ a nɛ. Bɛ lɛ na á toa ma á n gɔn wɛɛ ka nɛ, máa ka kɔ bɛa boo lɛ lɛ.

¹⁹ Bɛ̀ ka tá kaa wuru gɔ́ɔ̃ mànan kuri, bɛ̀ ka yiri bɔ gɔn sara yii mɛn ganaa tán, ka nyan wusoo mà ka n woe bɛ siɛ wa. Ka bɛ toa tán gùlin wɔ lɛa, nɛ toenən laanka lɔ giɔɔrɔn wɔ lɛa, màn mɛn bɛ́ toɛ kaa Lawa, Dɛnaa Lawa barka da ka ganaa, kaa nya ǹ dí tumaa gɔ́ɔ̃ nɛ.

²⁰ Bɛ̀ ká kaa *olivie da zuzuə, ka nyan wusoo doo, mà ka n die a nɛ niɛ wa. Màn mɛn bɛ́ goɛ̃ ǹ dan ganaa, ka bɛ toa gùlin manɛ, nɛ toenən ne ka lɔ giɔɔrɔn nɛ.

²¹ Bɛ̀ ká kaa rezɛ̃ na, ka nyan wusoo doo, mà ka n woe pipiɛ wa. Màn mɛn bɛ́ goɛ̃ la, ka bɛ toa gùlin manɛ, nɛ toenən ne, ka lɔ giɔɔrɔn nɛ.

²² Ka n yiri koa a nɛ, mà ka n ká goã gùlin lɛa Ezipti gána nɛ. Bɛ lɛ na á toa, ma á n gɔn wɛɛ ka nɛ, máa ka kɔ bɛa boo lɛ lɛ.