Timəə dí-pɛn 23 - LAWA A BOO SONBORE

¹ Giĩ kɔn nyan toa a ga ǹ di a lɔ li wa. Bɛ̀ á bɛ zɛnaa, a na á wɔ ǹ di lɛ lon.

Min mɛnɛn doamaa bɛ́ ǹ bie ǹ giã kun ka Lawa a zaman nɛ wa

² Min mɛn bɛ́ a giĩbaa nya, a lòe gìi a yɔyɔrɛɛ hinlaa a giulun mìi a kurii taman yii, bɛ doamaa bie a giã kun ka Dɛnaa Lawa a zaman nɛ wa.

³ Lɔ laanka giĩ a tá-kun mɛn bɛ́ a n zɛnaa a yɔrɔ li wa, bɛa nɛ doamaa bie a giã kun ka Dɛnaa Lawa a zaman nɛ wa. Haalɛ a nɔ̀ɔ fulupaa a fùbaa ǹ wɔn dinin doamaa bie ǹ giã kun ka Dɛnaa Lawa a zaman nɛ wa.

⁴ Amɔn tɔrɔn laanka Moabu tɔrɔn doamaa bie ǹ giã kun ka Dɛnaa Lawa a zaman nɛ ka duduu wa. Haalɛ ǹ nɔ̀ɔ fulupaa a fùbaa ǹ wɔ doamaa bie a giã kun ka Dɛnaa Lawa a zaman nɛ wa.

⁵ A giala, ka bɛ́ ká soo Ezipti ká n zii la, ǹ da n da ka lɛ ka màn-bii laanka mu-n wa. Moabu tɔrɔn lɛn man nə́ Bewɔɔrɔ a nɛgiĩ Balaamu bii Pewɔɔrɔ kiwi, Mezopotamii gána-n dinin, mà a da lɛn baraa bii ka li.

⁶ Sɛnɛ, kaa Lawa, Dɛnaa Lawa nə n too kɔ Balaamu lon wa, á ná a lɛn baraa bii lɛ din bɔyaa á baa lɛn bǐɛ̃ bii lɛa, a giala a tá ka narɛ.

⁷ A ka toa kanaa kɛ nɛ, ka nyan toa ka ga bɛa tɔrɔ màn paa kɛ lɛ a là nyantoro laanka a yii-nyɛɛ yɛ li duuduu wa.

⁸ Ka nyan toa Edɔmu minin kɛn tìĩ bɔ ka nyin ni wa, a giala, ka dɔɔ̃nɔn manɛ. Ka nyan toa Ezipti minin kɛn tìĩ bɔ ka nyin ni wa, a giala, ka n ká goã gùlin lɛa ǹ gána nɛ.

⁹ Edɔmu minin lɛn nɛ ka Ezipti minin ni, bɛn nɔ̀ɔnɔn tá boe la ǹ giã kun ka Dɛnaa Lawa a zaman nɛ.

Zia-baalin yoreenbaa

¹⁰ Bɛ̀ ká soo ǹ mɛn pinaa, mà ka n woe zia biɛ kaa zɔ́ɔn ganaa, ka ka dinin kũ, ka nyan toa ka *gɔ̀ sii kɔn zɛnaa wa.

¹¹ Bɛ̀ zia-baali lɛ a mɛn tá kun ka nɛ, a ná a *yoreen wa, a giala a giulun na á pisəə tèlò-n, bɛ doamaa nɛ a soo a n bɔ kaa giã ǹ bǎã lɛ nɛ, a giã kanaa yǎa wasa woe miɛ̃.

¹² Bɛ̀ wasa á die miɛ a na a mɔnaan pii, bɛ̀ wasa mɛ ǹ mɛn waáraa, a tɔn da wɔ giã ǹ bǎã lɛ nɛ.

¹³ Ka die ka bǎã kɔn bɔ ka koa a gɔrɔn tìãlɛ-a, kaa giã ǹ bǎã lɛ kio, bɛ̀ ka wo kaa gòɛrɛ kɔ walan.

¹⁴ Yala fɔ̃ ǹ màn doamaa nɛ a goã kun ka zia-baalin lɛn gogoonmaa a mànan nɛ. Bɛ̀ ǹ mɛn woo gòɛrɛ kɔ, a yala fɔ̃ nɛ, bɛ kio a tii nyanaa nɛ, bɛ̀ a kɔ a gòɛrɛ lɛ.

¹⁵ A giala, kaa Lawa, Dɛnaa Lawa dinmaa nə n bibiĩ kaa giã ǹ bǎã lɛ nɛ, a n ka tamaɛ, a n kaa zɔ́ɔn we ka gɔn. Bɛ lɛ nɛ, kaa giã ǹ bǎã lɛ doamaa nɛ a goã yoreene Lawa wɔ lɛa. Sii mɛn bɛ́ a siĩn wa, ka doamaa bie ka bɛ zɛnaa wa. Bɛ̀ á ka yɛ bɛ zɛnɛɛ, a n die n gɔn boe ka ganaa.

Bɛ̀rɛ baa-sili

¹⁶ Bɛ̀ bɛ̀rɛ mɛn baa si a dɛnaagiĩ li á daa ka li, ka nyan kũ ka kɔ a dɛnaagiĩ lɛ la wa.

¹⁷ Kaa gána lɛ a kiwi mɛn a giãman bɛ́ re kɔɔ̃n koe a ganaa, a dɔ́ n die yii-nyɛɛ yii a nɛ, á boe la a bɛ bɔ, a giã a nɛ. Sɛnɛ, ka nyan toa ka bɔ a yii-n wa.

Wo dìn la ǹ kɔrɔbaa

¹⁸ Izirayeli minin bii, a nyan toa a yɛ nɛlɔ hinlaa nɛginin lɛa, ǹ mɛn bɛ́ n din koe wo dì la ǹ kɔrɔbaa kɛ la wa.

¹⁹ Lɔn laanka giĩn mɛnɛn bɛ́ bɛa siin lɛn zɛnɛɛ, ka nyan toa ka lɛ kɔ, ǹ da ka ǹ kɔrɔbaa ǹ saraa kɛ nɛ kaa Lawa, Dɛnaa Lawa a kion, mà maǹ nə́ daa ǹ lɛ-kɔ Lawa la ǹ màn saraa-n wa. A giala, ǹ zɛnaa ǹ sii lɛ n sii bɔbɔnɛɛ lɛa kaa Lawa, Dɛnaa Lawa yii li.

Giɔ̀mɔ diɛ a ga là li

²⁰ Bɛ̀ kaa min mɛn giɔ̀mɔ da ǹ dɔɔ̃n ganaa, ta wɔrɔ nɛ, ta màn-bii ni, ta màn woo màn nɛ á n là we, a nyan toa a pɛ, mà yǎa a na a là diɛ wa.

²¹ Ka á boe la ka giɔ̀mɔ da tii ganaa ka ga là li. Sɛnɛ, bɛ̀ ka dinin dɔɔ̃n nɛ, ka nyan toa ka bɛ zɛnaa wa, màn mɛn bɛ́ toɛ, ka bɛ́ re we gána mɛn lɛ nɛ, ka si ka baa kaa wɔ lɛa, kaa Lawa, Dɛnaa Lawa boo la, a barka da kaa nya ǹ dí din tumaa ganaa walan.

Lɛ kɔ ǹ màn saraa

²² Bɛ̀ ká n lɛ kɔ kaa Lawa, Dɛnaa Lawa la ka màn mɛn nɛ, ka nyan toa a belebɔ ka bɔlɔ-a wa. Bɛ bie wa, á re liɛ ka la. Bɛ̀ á liɛ dɔ baa, sii baraa n ka mìi ni.

²³ Ta ka n ka n lɛ kɔ Dɛnaa Lawa la ka màn kɔn nɛ wa, a sii baraa lɛa ka mìi-n wa.

²⁴ Sɛnɛ, màn mɛn bɔ ka lɛ-n, màn mɛn a kɔ bɛ́ á ka dinin dùũ baa, ka n yiri koa li ka bɛ zɛnaa, ka ka bɛ́ ká n lɛ kɔ kaa Lawa, Dɛnaa Lawa la lɔn.

Kiɛ̃ zii la wole a màn-bii

²⁵ Bɛ̀ kaa min mɛn tá kiɛ̃ ǹ miã a *rezɛ̃ da wuru-n, á boe la a rezɛ̃ na a bii a kã. Sɛnɛ, a doamaa bie a na a kaa màn nɛ, a wo-n wa.

²⁶ Ta min mɛn dɔ n kiɛ̃ ǹ miã a *belee wuru-n, á boe la a na a san kɔn kuru ka a gɔn nɛ. Sɛnɛ, min doamaa bie a n toa kiɛ̃, a ǹ miã a belee kuru ka sɛ̌n gɔya-n wa.