Timəə dí-pɛn 17 - LAWA A BOO SONBORE

¹ Bɛ̀ wɔ̀lɔ̀ tá dii hinlaa sère ganaa, ta wɔ̀lɔ̀ tɔrɔ mɛn nɛ, ka nyan toa ka bɛ kɔ kaa Lawa, Dɛnaa Lawa la *wúlu màn lɛa wa. A giala, bɛ n sii bɔbɔnɛɛ lɛa kaa Lawa, Dɛnaa Lawa yii li.

² Kaa Lawa, Dɛnaa Lawa bɛ́ re kiwin mɛnɛn lɛn koe ka la, kɔntan, min tá re yii ka bii bɛa kiwin lɛn goon ne ǹ kɔn pinaa, giĩ lɛa hinlaa lɔ lɛa, a na a lɛ kɔ kɔn la ǹ boo kɛ la kuru, a sii zɛnaa, sii mɛn nə́ ke baraa Dɛnaa Lawa yii li.

³ Ǹ dɛnaa á die woe lawa kɔsɔn guguru koe a kaa tán bɛn giulun, á re kiɛ tán wasa din giulun, mui ni ka lon gɔ́ɔ̃ nɛ ǹ mànan tumaa nɛ. A da yaa, ma bɛ pɛ ka-n wa.

⁴ Bɛ̀ ǹ nə́ bɛ miã boo pɛ ka nɛ hinlaa ka n ká ma bii-a, ka nɔ̀n da taãn-taãnɛ, ka a woo ǹ bǎã yɛ. Bɛ̀ á daa yaa sonbore bɛa sii bɔbɔnɛɛ kɛ lɛ miã nə́ n zɛnaa Izirayeli gána nɛ,

⁵ min mɛn sii lɛ zɛnaa, giĩ ni hinlaa lɔ nɛ, ka ǹ dɛnaa kũ ka soo ne kiri wɔ ǹ bǎã, ka kɔlɔ kaã bɔ a ganaa, ka dɛ a gã.

⁶ Sɛnɛ, ka toa ka boo ma siére paa hinlaa sɔɔ lɛ-n, ka tɔn nə ǹ dɛnaa dɛ a gã. Ka nyan toa ka dɛ min goon toto lɛ gɔ́ɔ̃ ǹ boo li wa.

⁷ Siéren lɛn dinin nə kɔlɔ kaã bɔ a ganaa bibinaa nɛ, bɛ kio, zaman lɛ tumaa zɛnaa miɛ̃ ǹ dɛ a gã. Bɛ á re toɛ, ka sii baraa bɔ ka bɔ ka bii.

Sii yɔrɔ bɔ

⁸ Bɛ̀ sii mɛn a yɔrɔ bɔ ǹ gɔn tá kaka ka ganaa á la yii ni, gɛ̀-dɛ nɛ hinlaa kɔn-dɛ a mà bɔ kɔn ganaa nɛ, minin mɛ kɔn-a ǹ sii tumaa, bɛ̀ kaa kiwi a sii yɔrɔ-bɔlen ná a yɔrɔ bɔ ǹ nə́ fɔ̃ li, kaa Lawa, Dɛnaa Lawa lɛ bǎã mɛn bɔ á koa, ka yoo ka wo walan.

⁹ Ka wo dɔ Levii tɔrɔ, Lawa a wúlu-bɔlen kɛn li, ka min mɛn dɔ bɛ́ sii yɔrɔ-bɔle lɛa bɛa waáraa lɛ nɛ. Ka nɔ̀n da ǹ la, ǹ tá re sii lɛ a yɔrɔ bɔ ǹ gɔn pii ka nɛ.

¹⁰ Ǹ bɛ́ re boo mɛn pii ka nɛ a yɔrɔ bɔ ǹ gɔn lɛa, Dɛnaa Lawa a bǎã kɛ nɛ á bɔ, ka zɛnaa a kɔnpɛ ka bɛ lɛ nɛ. Ǹ bɛ́ re ka darɛɛ sii mɛn tumaa ganaa, ka n yiri koa li ka kɔ bɛ lɛ.

¹¹ Ǹ bɛ́ re ka darɛɛ dí-pɛ mɛn ganaa, ǹ bɛ́ re sii yɔrɔ bɔ ǹ gɔn mɛn nyɛɛ ka nɛ, ka zɛnaa a kɔnpɛ ka bɛ nɛ. Ǹ bɛ́ re boo mɛn pii ka nɛ, ka kɔ bɛ lɛ, ka nyan kanaa ka wo gusin hinlaa gɔsɛ wa.

¹² Sɛnɛ, giĩ mɛn bɛ́ re din gole kɔ ǹ sii zɛnɛɛ, a ná a ba n too koe wúlu-bɔle lɛ a boo li wa, ǹ mɛn lɛ bɛ́ golee ne Lawa a bǎã sonbore kɛ nɛ, dí nyɛɛ kaa Lawa, Dɛnaa Lawa nɛ, a ná a ba n too koe sii yɔrɔ-bɔle kɛ dɔ a boo li wa, ka bɛa giĩ lɛ dɛ a gã. Bɛ á re toɛ ka sii baraa bɔ ka bɔ Izirayeli minin bii.

¹³ Izirayeli zaman tumaa á re bɛ miɛ, nyɛ́ɛ á re ǹ kuĩ. Bɛ á re toɛ, min kɔn ba re n din gole koe doo wa.

Kii koa

¹⁴ Bɛ̀ ká wɔ gána lɛ nɛ ǹ mɛn waáraa, kɛ lɛ kaa Lawa, Dɛnaa Lawa n koe ka la, bɛ̀ ká si ká baa kaa wɔ lɛa yǎa ka giã a nɛ, kɔntan ka á re pii ǹ kɔn pinaa mà kasɛn man giɛ li ka kii koa ka dinin mìi la, ka tɔrɔ kɔsɔn kɛn tumaa wɔ bɛ́ lɔn ka lɛnpɛnɛ.

¹⁵ Bɛ̀ á n baa miɛ̃, kaa Lawa, Dɛnaa Lawa din bɛ́ re min mɛn boe, ka bɛ koa ka mìi la kii lɛa. Ka bɛ́ re min mɛn koɛ ka mìi la kii lɛa, ǹ dɛnaa doamaa nɛ a goã ka dinin tɔrɔ Izirayeli min lɛa. Ka doamaa bie ka tɔrɔ kɔsɔ saa ka da ka mìi la bɛ̀ Izirayeli min ná a bie wa.

¹⁶ Sɛnɛ, kii lɛ a sùin doamaa bie ǹ goã gigiã wa. A doamaa dɔ bie a zaman lɛ lɛ goa a dia Ezipti, mà ǹ wo sùin pii ǹ da ǹ nɛ, màn mɛn bɛ́ toɛ, asɛ a sùin nə mɔnaa wa. A giala, Dɛnaa Lawa pɛ ka nɛ mà ka nyan toa ka n bɔyaa ka kɔ zii kɛ lɛ doo wa.

¹⁷ A lɔ dɔ doamaa bie a goã gigiã, ǹ kiɛ̃ ǹ na a taasiɛn bɔyaa ǹ bɔ Lawa la wa. A nyan ga wɔrɔ laanka sana li a la yii-n wa.

¹⁸ Bɛ̀ kii lɛ giã a kiibaa la ǹ mɛn waáraa, Levii tɔrɔ wúlu-bɔlen kɛn bɛ́ re dí-pɛn mɛnɛn koe la, a die a wusoo a kɔ bɛn lɛn lɛ, a ǹ kiɛ̃ sɛ́wɔ kɔsɔ nɛ, a din wɔ lɛa.

¹⁹ Bɛa sɛ́wɔ lɛ n die goɛ̃ a li, bɛ̀ a pɛ baraabaraa, a yiikoonaabaa tumaa gɔ́ɔ̃ nɛ. A doamaa nɛ, a bɛa dí-pɛ lɛ a boon tumaa laanka a landa boon tumaa tamaa, màn mɛn bɛ́ toɛ, a n daraa nyɛ́ɛ baa a Lawa, Dɛnaa Lawa-n ganaa.

²⁰ Bɛ n die toɛ, a ba re n din gole koe a tɔrɔ minin lɛn ganaa wa, a re gɔn waa ǹ boon kɛn dɔn lɛ tii, a kanaa a wo gusin hinlaa gɔsɛ wa. Bɛ̀ á zɛnaa miɛ̃, a din laanka a tɔrɔn tá re boe la ǹ giã Izirayeli minin lɛn mìi la, ǹ belebɔ nɛ.