Timəə dí-pɛn 16 - LAWA A BOO SONBORE

Kiɛ̃mala ǹ zɔ́n

¹ *Abibu mui ke, ka n yiri koa bɛ li, ka *kiɛ̃mala ǹ zɔ́n zɛnaa a nɛ, ka kaa Lawa, Dɛnaa Lawa guguru kɔ nɛ. A giala, bɛa mui lɛ nɛ, Dɛnaa Lawa ka waa tèlò-n, á ka bɔ Ezipti gána nɛ.

² Ka bɛ́ re wúlu mànan mɛnɛn koe Dɛnaa Lawa la kiɛ̃mala ǹ zɔ́n lɛ wɔ lɛa, tɔɔ bisinin laanka a dadaran nɛ, kaa Lawa, Dɛnaa Lawa din bɛ́ re bǎã mɛn boe a n tɔ da la, ka die ka bɛn dɛ walan.

³ Yɔ bù bɛ́ buuru mɛn li, ka nyan bɛ sɔ̃ kun ka bɛa zɔ́n lɛ a màn-bii-n wa. Yɔ bù bɛ́ a ba buuru mɛn li wa, ka bɛ sɔ̃ lɛawaa sɔbaa gɔ́ɔ̃ nɛ. Nɔmaa ǹ buuru ni, a giala, ka n ká soo Ezipti gána-n ka fuu ni. Bɛ̀ ka á bɛa buuru lɛ soɛ̃, ka n yiri kɔ kaa soo Ezipti gána-n lɛ li, kaa yiikoonaabaa lɛawaan tumaa gɔ́ɔ̃ nɛ.

⁴ Bɛa lɛawaa sɔbaa lɛ gɔ́ɔ̃ nɛ, yɔ bù doamaa bie a yɛ min kɔn a kion kaa gána lɛ-n wa. Ka bɛ re tɔɔ mɛn dii zɔ́n lɛ a giala kɔ pinaa wasamiɛ̃nɛ, ka nyan toa bɛa siĩ lɛ̀ waa wa.

⁵ Kaa Lawa, Dɛnaa Lawa kiwin mɛnɛn kɔ ka la, ka doamaa bie ka kiɛ̃mala ǹ zɔ́n lɛ zɛnaa bɛ kɔn nɛ wa.

⁶ Sɛnɛ, kaa Lawa, Dɛnaa Lawa din bɛ́ re bǎã mɛn boe a n tɔ da la, ka zɛnaa walan, wasamiɛ̃nɛ, wasa a yii sã biikoo li, a kɔnpɛ ka kaa soo Ezipti gána-n pinaa nɛ.

⁷ Ka siĩ lɛ kɔrɛ, kaa Lawa, Dɛnaa Lawa din bǎã mɛn lɛ bɔ, ka sɔ̃ walan, baayɛlɛ, ka tɔn wusoo ka wo kaa mɔnaa kionən ne.

⁸ Lɛawaa sɔrɔ gɔ́ɔ̃ nɛ, yɔ bù bɛ́ a ba buuru mɛn li wa, ka bɛ sɔ̃. A lɛawaa sɔbaabaa ǹ wɔ pinaa, ka n lɛ sɔkɔn kaa Lawa, Dɛnaa Lawa lɛ tɔ-bɔ a lɛa. Ka nyan toa ka dí kɔn nyan bɛa pinaa wa.

Kaa-piɛ ǹ zɔ́n

⁹ Bɛ̀ ǹ nə́ *belee kurii giala kɔ, a saa bɛa waáraa lɛ ganaa, ka piizii sɔbaa nimi.

¹⁰ Bɛ̀ bɛ lɛ pã, ka *kaa-piɛ ǹ zɔ́n zɛnaa ka kaa Lawa, Dɛnaa Lawa tɔ bɔ nɛ. Kaa Lawa, Dɛnaa Lawa bɛ́ re barka diɛ ka ganaa a mànan mɛnɛn kɔ ka la, ka da ka bɛ lɛ kɔn nɛ a kɔnpɛ ka ka pàã yii ni, ka dinin dùũ *wúlu màn lɛa.

¹¹ Kaa Lawa, Dɛnaa Lawa bɛ́ re bǎã mɛn lɛ boe a n tɔ da la, ka die ka n nyɛnyɛɛ walan a din yɔrɔ-a: ka dinin ni, kaa nɛnyaanan nɛ, ka bɛ̀rɛgiĩn laanka kaa bɛ̀rɛlɔn nɛ ka *Levii tɔrɔn kɛn nɛ kaa kiwin ni, kɔnlɛ ka gùlin ni, nɛ-toenən ne ka lɔ giɔɔrɔn nɛ, ǹ mɛnɛn bɛ́ giã-n ka bii.

¹² Ka dɔn nə n yiri koa a nɛ, mà ka n ká goã bɛ̀rɛn lɛa Ezipti gána nɛ. Ka landa boon kɛn tamaa, ka kɔ ǹ lɛ.

Giã siã giulun zɔ́n

¹³ Bɛ̀ ká kaa belee duwəə, ká kaa rezɛ̃ mu bɔ ká nya ǹ mɛn waáraa, ka *giã siã giulun zɔ́n zɛnaa lɛawaa sɔbaa gɔ́ɔ̃ nɛ.

¹⁴ Ka kaa zɔ́n lɛ zɛnaa ka nyɛnyɛɛ nɛ, ka dinin laanka kaa nɛnyaanan nɛ, kaa bɛ̀rɛgiĩn laanka kaa bɛ̀rɛlɔn nɛ, Levii tɔrɔn kɛn nɛ, gùlin ni, ka nɛ-toenən laanka lɔ giɔɔrɔn nɛ, ǹ mɛnɛn bɛ́ giã-n ka bii.

¹⁵ Kaa Lawa, Dɛnaa Lawa din bɛ́ re bǎã mɛn lɛ boe, ka die ka bɛa zɔ́n lɛ zɛnaa walan, ka Lawa tɔ bɔ nɛ yǎa lɛawaa sɔbaa. Kaa wɔ n die goɛ̃ ka nyɛnyɛɛ dinsɔɔ̃ nɛ, a giala, a din nə die toɛ kaa tán-kɔsiɛ bǐɛ̃ kɔ, a din dɔ n die barka diɛ kaa nya ǹ dí tumaa ganaa.

¹⁶ Kaa Lawa, Dɛnaa Lawa din bɛ́ re bǎã mɛn lɛ boe, lɛ̀ goon gɔ́ɔ̃ nɛ, kaa giĩn tumaa doamaa nɛ ǹ wo n dinin nyaa a yɔrɔ-a walan, gunyin sɔɔ: *yɔ bùbaã buuru zɔ́n li, kaa-piɛ ǹ zɔ́n li ka giã siã giulun zɔ́n nɛ. Sɛnɛ, ǹ nyan toa ǹ wo Lawa yɔrɔ-a ka ǹ gɔn kooro-n wa.

¹⁷ Kaa Lawa, Dɛnaa Lawa bɛ́ re barka diɛ ka ganaa a màn mɛn kɔ ka la, didie die a Lawa gɔ ǹ wɔ bɔ a wɔ nɛ, a kɔnpɛ ka a pàã yii ni.

Sii yɔrɔ bɔ ka peperebaa nɛ

¹⁸ Ka die ka sii yɔrɔ-bɔlen laanka zaman-lɛduə̃lin koa kaa tɔrɔn lɛn wɔ lɛa, kiwin lɛn tumaa nɛ, kaa Lawa, Dɛnaa Lawa bɛ́ re kiwin mɛnɛn koe ka la. Bɛn tá re zaman lɛ a sii yɔrɔ boe ka peperebaa nɛ.

¹⁹ Ka nyan toa ka sii yɔrɔ bɔ ǹ gɔn ziziɛ̃ wa. Ka nyan bɔnbii-a wɔ wa, ka nyan toa min ka lɛ pii ka màn nɛ wa. A giala, lɛ pii ǹ màn nə sii-dɔ̃lin yii tiɛ̃, a min peperen kaa boo kɔkɔrɔ diɛ ganaa.

²⁰ Ka n doa ka kɔ peperebaa lɛ, màn mɛn bɛ́ toɛ, kaa Lawa, Dɛnaa Lawa bɛ́ gána mɛn lɛ koe ka la, ka yii boo la a goã koo, ka bɛa gána lɛ si ka baa kaa wɔ lɛa.

Soɛ̃ siin

²¹ Ka bɛ́ re *wúlu bɔ ǹ bǎã mɛn doe kaa Lawa, Dɛnaa Lawa wɔ lɛa, ka nyan toa ka dì gɔn kɔn zumu bɛ li wa.

²² Ka nyan toa ka tíĩ kɔn doa walan wa. A giala, kaa Lawa, Dɛnaa Lawa a lɛ koe bɛ miã siin lɛn ganaa wa.