Timəə dí-pɛn 14 - LAWA A BOO SONBORE

Landa sii gɛ̀-koa wɔ paǹ li

¹ Ka n kaa Lawa, Dɛnaa Lawa lɛ a nɛnyaanan lɛa. Bɛ lɛ nɛ, ta gɛ̀ na á gã ka la, ka nyan nyaǹ kiɛ̃ ka gɔ̀nɔn ganaa wa, ka nyan nə n mìi kɔɔ̃ wa.

² Kaa Lawa, Dɛnaa Lawa din na á ka bɔ á ka koa a din wɔ lɛa. A din na á ka bɔ tɔrɔ kɔsɔn kɛn tumaa bii kanaa, màn mɛn bɛ́ toɛ, ka a dinsɔɔ̃ gɔn màn baa.

Siĩ soɛ̃ boo

³ Màn mɛn tumaa bɛ́ bɔbɔnɛɛ Dɛnaa Lawa yii li, ka nyan toa ka bɛ kɔn wɔ ka lɛ-n wa.

⁴ Ka bɛ́ boe la ka mànan mɛnɛn siĩ sɔ̃, bɛn man ka kɛn nɛ: dii ni, sère ne, ka bòe ne,

⁵ don a zù ni, yuùn ni, luu ni, tiã nɛ, don sère ne, woree ne ka don bòe ne.

⁶ Màn mɛn tumaa gòon bii bɛ́ diɛ nɛ, a gòon tɔ́n nə́ paa, a ná a màn-bii baɛ̃ a gɔ́ɔ̃ nɛ bɛ̀ a timəə la a sɔ̃, ka á boe la ka bɛa siĩ sɔ̃.

⁷ Sɛnɛ, ǹ mɛnɛn bɛ́ ǹ màn-bii baɛ̃ ǹ gɔ́ɔ̃ nɛ bɛ̀ ǹ timəə la ǹ sɔ̃, ǹ mɛnɛn dɔn gòon bii bɛ́ diɛ nɛ, bɛn bii, ka baran kɛn sɔ̃ wa: nyɔɔmaa nɛ, fuiin ni, ka daaman nɛ. A giala, ǹ tá ǹ màn-bii baɛ̃ ǹ gɔ́ɔ̃ nɛ bɛ̀ ǹ timəə la ǹ sɔ̃, sɛnɛ, ǹ gòon tɔ́n bii ba diɛ nɛ wa. Ka ga bɛn ganaa màn gɔgɔrɛn lɛa.

⁸ Ka ga birii dɔ ganaa màn gɔgɔrɛ lɛa. A giala, a gòon bii tá diɛ nɛ, sɛnɛ, a ba a màn-bii baɛ̃ a gɔ́ɔ̃ nɛ, bɛ̀ a timəə la a sɔ̃ wa. Ka nyan bɛa mànan kɛn lɛn siĩ sɔ̃ wa, ka baran n gɔn din da ǹ gere ganaa wa.

⁹ Mu mànan bii, mu baa ǹ mànan laanka fɔrɔ bɛ́ ǹ mɛnɛn ganaa, ka á boe la ka bɛn sɔ̃.

¹⁰ Sɛnɛ, mu baa ǹ mànan laanka fɔrɔ bɛ́ a ba ǹ mɛnɛn ganaa wa, ka nyan toa ka bɛn sɔ̃ wa. Ka ga bɛn ganaa màn gɔgɔrɛn lɛa.

¹¹ Bàan mɛn tumaa bɛ́ *yoreene Lawa yii li, ka á boe la ka bɛ sɔ̃.

¹² Sɛnɛ, ka nyan kɛn sɔ̃ wa: giogialatã-a nɛ, dənsə ne, kɔ̀ mu la ǹ lòn ne,

¹³ sía tɔrɔ tumaa nɛ ka zèwo tɔrɔ tumaa nɛ,

¹⁴ zankoo tɔrɔ tumaa nɛ,

¹⁵ kɔnaason ne, kɔlɔ nɛ, mu li ǹ sɛwɔ nɛ, baafɔɔ tɔrɔ tumaa nɛ,

¹⁶ kɔlɔkuun ni, gere yala bàan nɛ, bɔlɔ pɔɔ̃naa nɛ,

¹⁷ bàan tà-baalin ni,

¹⁸ taban nɛ, gɔgɔrɔ tɔrɔ tumaa nɛ, bàanan koo sàn nɛ, ka kion fòn ne.

¹⁹ Màn baaran mɛn tumaa bɛ́ nyàa ka ná a ganaa, ka ga bɛ tumaa ganaa màn gɔgɔrɛ lɛa. Ka nyan sɔ̃ wa.

²⁰ Bàan mɛn tumaa bɛ́ yoreene Lawa yii li, ka á boe la ka bɛa siĩ sɔ̃.

²¹ Ka nyan toa ka màn gere kɔn sɔ̃ wa. Gùlin mɛnɛn bɛ́ kaa kiwin ni, ka kɔ bɛn la, bɛn tá boe la ǹ sɔ̃. Bɛ̀ a miɛ̃ wa, ka sã tii la. A giala, kasɛn man ka gɔrɔn, kaa Lawa, Dɛnaa Lawa a zaman lɛa. Ka baran bòe nɛ siĩ kɔrɛ n dan nyɔ mu li wa.

Lawa wɔ gii bɔ boo

²² Ka bɛ́ re màn mɛn yii kaa wuru-n lɛ̀ woo lɛ̀, ka bɛ tumaa a fùbaa ǹ wɔ bɔ ka kaa a gɔrɔn.

²³ Kaa Lawa, Dɛnaa Lawa din bǎã mɛn bɔ á n tɔ da la, ka kaa mànan fùbaa ǹ wɔ lɛ bii a yɔrɔ-a walan: *belee ne, duvɛ̃ nɛ, nyɔɔ nɛ, ka kaa tɔɔ dadaran laanka a bisinin kɛn nɛ bibinaan nɛ. Bɛ lɛ n die toɛ ka nyɛ́ɛ baa kaa Lawa, Dɛnaa Lawa yii ni lɛawaa tumaa li.

²⁴ Bɛ̀ kaa Lawa, Dɛnaa Lawa toa kaa bɔ don bǐɛ̃ kɔ, ka bɛ́ re màn mɛn boe ka kaa a gɔrɔn, a bǎã mɛn lɛ bɔ á n din tɔ da la, kɔntan ka a re boe la ka gũ ka wo-n walan wa, zii lɛ a sɔsɔɔbaa a la yii-n taman yii.

²⁵ Bɛ̀ á miɛ̃, ka bɛa mànan lɛn sã. Kaa Lawa, Dɛnaa Lawa bǎã mɛn bɔ á n din tɔ da la, ka a wɔrɔ gũ ka gɔn, ka wo-n walan.

²⁶ Màn mɛn tumaa sii bɛ́ ka ganaa, ka á boe la ka pii ka bɛa wɔrɔ lɛ-n walan: ta dii ni, ta sère ne, ta bòe ne, ta duvɛ̃ nɛ ta yɔ kakaarɛn manɛ. Ka bɛ tumaa bii kaa Lawa, Dɛnaa Lawa lɛ yɔrɔ-a walan, ka n nyɛnyɛɛ kun ka kaa kion minin ni.

²⁷ Sɛnɛ, *Levii tɔrɔn mɛnɛn bɛ́ kaa kiwin ni, ka nyan toa ka yiri bɔ ka bɛn nɛ wa. A giala, ǹ bǎã yɛ ǹ wɔ gii lɛa ka bii wa.

²⁸ Lɛ̀ sɔɔ woo lɛ̀ sɔɔ, ka lɛ̀ sɔɔbaa ǹ wɔ lɛ a mànan fùbaa ǹ wɔ si ka sɔkɔn kaa kiwin ni.

²⁹ Levii tɔrɔn kɛn, bǎã ná a banban ǹ wɔ lɛa ka bii wa, bɛn tá re die bɛa màn-bii lɛ kɔn siɛ, kɔnlɛ ka gùlin ni, nɛ-toenən laanka lɔ giɔɔrɔn nɛ, ǹ mɛnɛn bɛ́ giã-n kaa kiwin ni. Ǹ tumaa á die màn bii ǹ kã. Bɛ̀ á n baa miɛ̃, kaa Lawa, Dɛnaa Lawa á die barka diɛ ka ganaa, ka a nya ǹ dí tumaa gɔ́ɔ̃ nɛ.