Timəə dí-pɛn 13 - LAWA A BOO SONBORE

¹ Ma bɛ́ n gɔn wɛɛ ka nɛ ka boon mɛnɛn tumaa nɛ, ka n yiri koa ǹ li, ka ǹ tamaa. Ka nyan màn kɔn da li wa, ka nyan màn kɔn dɔ bɔ lɛ wa.

Min sɔmɔ a da lawa kɔsɔ guguru kɔ ganaa

² Kɔntan min tá re n din biɛ Lawa a boo gii-dali hinlaa narɛɛ-wɔle lɛa ka bii ǹ kɔn pinaa. Á re kaãbaa ǹ sii kaka nyɛɛ ka nɛ hinlaa sii giala pɛ ǹ sii.

³ Bɛa kaãbaa ǹ sii lɛ á boe la a n zɛnaa, ka a bɛ́ á pɛ lɔn. Sɛnɛ, bɛ̀ ǹ dɛnaa pɛ ka nɛ mà ka daa ka kɔ lawa kɔsɔn kio lɛ ka bɛn guguru kɔ, lawan mɛnɛn dinin nə́ ke ka a ǹ doɛ̃ wa,

⁴ ka nyan nə n too kɔ bɛa Lawa a boo gii-dali hinlaa bɛa narɛɛ-wɔle kɛ lɛ lon wa. A giala, kaa Lawa, Dɛnaa Lawa lɛ nə n diɛ ka gɔ́ɔ̃ li á n giɛ a ganaa, bɛ̀ ka tá asɛ narɛ ka ka foo tumaa nɛ, ka ka gɔ́ɔ̃ tumaa nɛ.

⁵ Ka kɔ kaa Lawa, Dɛnaa Lawa dinsɔɔ̃ lɛ, ka nyɛ́ɛ baa a dinsɔɔ̃ nɛ. Ka a gɔn waa ǹ boon lɛn tamaa, ka n too kɔ a din lon. Ka dí nya a din ni, ka n naa a din lɛ ganaa.

⁶ Ka doamaa-n ka bɛa Lawa a boo gii-dali hinlaa bɛa narɛɛ-wɔle kɛ lɛ dɛ a gã. A giala, a na á gòãn dii kaa Lawa, Dɛnaa Lawa ganaa boo da. A din Lawa lɛ na á ka si bɛ̀rɛbaa la, á ka waa á ka bɔ Ezipti gána nɛ. Kaa Lawa, Dɛnaa Lawa zii mɛn a kɔmalɛ boo laa ka ganaa, a n giɛ li a ka nyanaa a ka bɔ bɛ la. Ka ǹ dɛnaa dɛ, ka sii baraa bɔ ka bɔ ka bii bɛa yɔrɔ lɛ la.

⁷ Kɔntan, n dɔɔ̃ngiĩ mɛn bɛ́ n din dan nɛ lɛa, hinlaa n nɛgiĩ hinlaa n nɛlɔ, hinlaa n din gòã li ǹ lɔ hinlaa n giaára taãn-taãn tá boe la a da n li ǹ kɔn pinaa, a n sɔmɔ ka durii ni a pɛ n nɛ kɛnɛn: «ka daa wɔ n tá wɔ lawa kɔsɔn guguru kɔ.» A da yaa, ka dinin ni ka ka digolon ne, ka a bɛa lawan kɛn lɛn doɛ̃ wa.

⁸ Tɔrɔ kɔsɔn mɛnɛn lɛn bɛ́ ka lɛnpɛnɛ, ta ǹ wɔlɔ n kunu hinlaa a n sɔsɔɔ, a saa kanaa paǹ goon ganaa a wo a paǹ kɔsɔ yaa, bɛn lɛn lawan manɛ.

⁹ Min mɛn da n sɔmɔ, n nyan lɛ kɔ la wa, n nyan nə too din kɔ a lon wa. N nyan toa n makara bɔ-a wa, n nyan toa a makara din nə n kũ wa, n nyan nə n kɔ lɛ wa.

¹⁰ Sɛnɛ, yǎa ǹ nə ǹ dɛnaa dii a giɛ̃. A bɛ́ mà a n min mɛn lɛ sɔmɛ diɛ dì guguru kɔ ganaa, bɛ lɛ doamaa nɛ a n gɔn saa a dɛ bibinaa nɛ, zaman lɛ tumaa tɔn nə gòɛ̃ wɔ a-n bɛ kio.

¹¹ Ka kɔlɔ kaã bɔ bɛa dɛnaa lɛ ganaa ka dɛ a gã, a giala, a na á zɔɔ̃ li mà a min na a bɔ kɔn ka kaa Lawa, Dɛnaa Lawa nɛ, bɛ mɛn bɛ́ á ka waa á ka bɔ Ezipti gána nɛ, á ka si bɛ̀rɛbaa la.

¹² Izirayeli minin tumaa á die bɛ miɛ̃, nyɛ́ɛ á die ǹ kuĩ. Ǹ tá re bɛa sii babaraa kɛ miã tɔrɔ a zɛnaa lɛ diɛ ka bii.

¹³ Kaa Lawa, Dɛnaa Lawa kiwin mɛnɛn lɛn kɔ ka la mà ka giã ǹ nɛ, kɔntan ka á re miɛ ǹ kɔn pinaa,

¹⁴ mà min kooron nə́ soo ka bii, ǹ nə́ ǹ kiwi minin nyɛnɛɛ ǹ kiɛ lawa kɔsɔn guguru kɔ ganaa, ka bɛ́ ka a lawan mɛnɛn doɛ̃ wa.

¹⁵ Bɛ̀ á n baa miɛ̃, ka nɔ̀n da, ka sii lɛ basa bɔ, ka gɔsɛ taãn-taãnɛ. Bɛ̀ ká woo yaa sonbore mà bɛa sii bɔbɔnɛɛ kɛ lɛ miã na á n zɛnaa ka bii,

¹⁶ ka bɛa kiwi lɛ a min tumaa dɛ, ka a tɔɔn tumaa nɛ, ka ziziɛ̃ lenlen, kɔnlɛ ka a gɔ́ɔ̃gɔ́ɔ̃ ǹ màn tumaa nɛ.

¹⁷ Bɛ kio, ka kiwi lɛ a màn tumaa sɔkɔn a zaman paã ǹ bǎã nɛ, ka tɛ da a ganaa, ka kiwi lɛ tã lenlen. A n die n biɛ ka *wúlu màn nə́ ke ǹ nə́ tã lenlen lɔn, kaa Lawa, Dɛnaa Lawa wɔ lɛa. Bǎã lɛ n die goɛ̃ tán kɛbɔlɔ lɛa miɛ̃ duduu, a giala, kiwi lɛ a re n doe doo duduu wa.

¹⁸ Lawa ka kurəə mànan mɛnɛn goa ganaa, ka nyan toa ka n gɔn da bɛ kɔn ganaa wa. Bɛ̀ ká zɛnaa miɛ̃, Dɛnaa Lawa foo á re basɛ̃. Á re makara boe ka ganaa, a n dɔ ka lɛ, a toa ka mɔnaa, ka a bɛ́ á n lɛ kɔ ka digolon la lɔn.

¹⁹ Sɛnɛ, yǎa ka kaa Lawa, Dɛnaa Lawa bɔlɔ sii, ma bɛ́ n gɔn wɛɛ ka nɛ ka boon mɛnɛn tumaa-n pelo, ka bɛn tamaɛ, sii mɛn bɛ́ pepere kaa Lawa, Dɛnaa Lawa yii li ka bɛ zɛnɛɛ.