Timəə dí-pɛn 11 - LAWA A BOO SONBORE

¹ Bɛ lɛ nɛ, ka kaa Lawa, Dɛnaa Lawa lɛ narɛ, a siin mɛnɛn pɛ ka nɛ mà ka ǹ tamaa, ka bɛn lɛn tamaa baraabaraa, a landa boon kɛn nɛ, a sii yɔrɔ bɔ ǹ boon ne, ka a gɔn waa ǹ boon kɛn nɛ.

Lawa bǐɛ̃ mɛn zɛnaa Izirayeli minin manɛ

² Ma bɛ́ re màn mɛn pii sisia, ma bie kaa nɛnyaanan kɛn ganaa wa. A giala, kaa Lawa, Dɛnaa Lawa lɛ minin doroo ǹ siin mɛnɛn zɛnaa, ǹ bɛn yɛ wa, ǹ ba ǹ doɛ̃ wa: Kaa Lawa, Dɛnaa Lawa lɛ a golebaa kɛ nɛ, a boo sii la nɛ,

³ ka a sii kakan mɛnɛn zɛnaa, á n din pàã nyaa nɛ. Á yoo Eziptin kii *Faarahɔn laanka a gána minin tumaa gialaa.

⁴ Ezipti a zia-baalin bɛ́ ka kio lui ǹ mɛn waáraa, a zia nɛn nɛ, ǹ sùin ni ka ǹ ziabaa ǹ wotoron ne, á Sawɛɛ tà kɛa mu baã á kɔ ǹ tumaa lɛ. Dɛnaa Lawa na á ǹ bɔ̀n baa yǎa duduu.

⁵ A din na á n dɔ ka lɛ don, yǎa ká daa ká dɔ bǎã kɛ nɛ.

⁶ A din na á yoo Urubɛn tɔrɔ Eliabu a nɛgiĩn kɛn gialaa: Datan laanka Abiramu ni. Izirayeli minin lɛn dinin yii ni, tán nə́ n lɛ bũ á ǹ mui, kɔnlɛ ka ǹ kion minin ni, ǹ mɔnaa kionən ne, ka min mɛn tumaa bɛ́ á goã koe ǹ gòɛ̃ lɛ.

⁷ Taãn nɛ, bɛa sii dadaran kɛn lɛn Dɛnaa Lawa nə́ ǹ zɛnaa, ka dinin yii na á ǹ yɛ.

⁸ Ma bɛ́ gɔn waa ǹ boon mɛnɛn tumaa pii ka nɛ pelo, ka bɛn tamaa. Bɛ á re toɛ ka pàã yɛ, ka bɛ́ re kiɛ̃ ka kaa gána mɛn lɛ nɛ, ka boo la ka si ka baa kaa wɔ lɛa.

⁹ Dɛnaa Lawa nə n liɛ mà asɛ á re gána mɛn lɛ koe ka digolon laanka ǹ nɛnyaanan la, ka boo la dɔn ka nyin sasa yɛ walan, bɔ̀nyaa laanka zoo nyɔɔ bɛ baa sii gana mɛn nɛ.

Dɛnaa Lawa bɛ́ giɛ gána mɛn walan

¹⁰ Ka bɛ́ re kiɛ gána mɛn lɛ nɛ ka si ka baa kaa wɔ lɛa, bɛ bie ka Ezipti gána kɛ bɛ́ lɔn ká soo a-n wa. Walan, ka n ká goã kaa màn tɔrɔ diɛ, bɛ̀ ka mu kaa a ganaa ka ka gòã nɛ ka dù gɔrɔ bɛ́ lɔn.

¹¹ Sɛnɛ, ka bɛ́ re kiɛ̃ ka kaa gána mɛn nɛ, ka si ka baa kaa wɔ lɛa, kelen laanka nyankɔrɔ basa bǎã nɛ, la mu ń boe.

¹² Bɛa gána lɛ, kaa Lawa, Dɛnaa Lawa lɛ n giɛ a walan. A yii n la miɛ̃, a saa lɛ̀ a giala-kɔ ganaa, a wo a gɔn-nyɔmiɛ̃ yaa.

¹³ Ma bɛ́ gɔn waa ǹ boon mɛnɛn koe ka la pelo, bɛ̀ ka n too kɔ bɛn li doɛ̃ sɛn, ká kaa Lawa, Dɛnaa Lawa narɛ ká dí nya nɛ ka ka foo tumaa nɛ, ka ka gɔ́ɔ̃ tumaa nɛ,

¹⁴ á re kaa gána lɛ a la kiɛ a biikoo li, a la bibinaan laanka a giala-nyɔmiɛ̃ kɔ ka la. Bɛ á re toɛ kaa tán-kɔsiɛ mànan nə bǐɛ̃ kɔ, ka *belee laanka duvɛ̃ yɛ, ka nyɔɔ nɛ.

¹⁵ Á re toɛ buu pã kaa donən ne, kaa tɔɔn wɔ lɛa. Ka á re màn bii ka kã.

¹⁶ Ka n dinin kũ, ka nyan toa kaa taasiɛ nə n bɔyaa, ka wusoo ka wo kaa tán lawa kɔsɔn giulun, ka mà ka n bɛn guguru koe wa.

¹⁷ Bɛ̀ ká bɛ zɛnaa, Dɛnaa Lawa foo n die yui ka li. A n die lɛ̀ gere koe, la ná a kiɛ doo tán nə́ bǐɛ̃ koe wa. Ka n nɔmiɛ̃ ka papaã ka n bɔ gána kɛ lɛ n fufuu, Dɛnaa Lawa n die koe ka la.

¹⁸ Ka maa boo kɛ gũ ka foo ne, ka n yiri koa a nɛ. Màn mɛn din bɛ́ toɛ ka yiri baran bɔ-n wa, ka yii ka gɔn laanka ka nyanlɛ ganaa.

¹⁹ Ka die ka a boo da kaa nɛnyaanan manɛ, ka ǹ daraa a ganaa, ta ka n giã-n tán kaa kion, ta ka n tɔ we zii la, kaa waa tán waáraa nɛ, kaa yoo lon waáraa nɛ.

²⁰ Ka die ka ǹ kiɛ̃ kaa kiɛnlɛ-a ǹ goon ganaa, ka kaa kiwin wɔ ǹ kiɛnlɛn nɛ.

²¹ Màn mɛn bɛ́ toɛ, Dɛnaa Lawa nə n liɛ mà á die bǎã mɛn koe ka digolon la, ka laanka kaa nɛnyaanan nə boo la ka belebɔ walan, ka lon kɛ bɛ́ lɔn tán lalan.

²² A giala, ma bɛ́ gɔn waa ǹ boo mɛn pii ka nɛ, bɛ̀ ká bɛ si taãn-taãnɛ ká kɔ lɛ, bɛ̀ ká kaa Lawa, Dɛnaa Lawa narɛ ká kɔ a foo sii tumaa lɛ, bɛ̀ ká n naa Dɛnaa Lawa ganaa,

²³ a din tá re tɔrɔn kɛn lɛn tumaa lui a ǹ bɔ ka nyɛɛnɛ. Tɔrɔn mɛnɛn dinin nə́ ke gigiã ǹ nə́ la ka nɛ, ǹ pàã dɔ din la kaa wɔ nɛ, ka á re bɛn bǎã sii ka giã a nɛ.

²⁴ Ka gòã bɛ́ re miɛ bǎã mɛn tumaa nɛ, bɛ á re kaa wɔ biɛ. Ka gèlè n die siɛ diə gole kɛ laanka Liban gána ganaa, a wo Efrati tà kɛ yaa, a kiɛ̃ a wo yǎa Yìsi mu gole kɛ lɛ-a lɛ̀nyɛɛnɛ.

²⁵ Min kɔn din ba re boe la a golee ka nyɛɛnɛ a yɔ bɔ ka-a wa. Ka bɛ́ re boe gána lɛ a bǎã mɛn tumaa nɛ, kaa Lawa, Dɛnaa Lawa á re nyɛ́ɛ laanka foo biɛ na kiɛ minin ganaa ka kaa sii ni, ka a bɛ́ á pɛ ka-n lɔn.

²⁶ Ka ga, pelo, man lɛn bǐɛ̃ laanka a baraa pii ka yii ni, ka n yii dùũ bɔ ǹ bii.

²⁷ Ma bɛ́ kaa Lawa, Dɛnaa Lawa a gɔn waa ǹ boon mɛnɛn pii ka-n pelo, bɛ̀ ká n too kɔ bɛn li, kaa wɔ á re bǐɛ̃ koe.

²⁸ Sɛnɛ, ma bɛ́ zii mɛn nyɛɛ ka-n pelo, bɛ̀ ká kanaa ká n bɔ bɛ la ká woo lawa kɔsɔn kio, ka bɛ́ ka ǹ mɛnɛn dɔ̃ lɛlɛ wa, bɛ̀ ka n too kɔ Dɛnaa Lawa a gɔn waa ǹ boon kɛn li wa, kaa wɔ na á ziziɛ̃.

²⁹ Ka bɛ́ re woe gána mɛn lɛ sii ka baa kaa wɔ lɛa, bɛ̀ kaa Lawa, Dɛnaa Lawa giã ǹ bǎã kɔ ka la a nɛ ǹ mɛn waáraa, ka die ka barka da min ganaa boon kɛn pɛ Garizimu kele la, ka lɛn baraa bii min li boon kɛn pɛ Ebali kele la.

³⁰ Ka á doɛ̃, bɛa kelen lɛn man Zurdɛ̃ tà kio dia-n woe lɛ̀nyɛɛn la, Kanaan minin gána nɛ, ǹ mɛnɛn bɛ́ Zurdɛ̃ a nyankɔrɔ basa kɛ nɛ, Gilgaali yɔrɔ-a, More a dì dan kɛn li.

³¹ Kaa Lawa, Dɛnaa Lawa bɛ́ gána mɛn lɛ koe ka la, ka á re Zurdɛ̃ tà kuri, ka kiɛ̃ ka kaa a nɛ, ka si ka baa kaa wɔ lɛa. Á re kaa wɔ biɛ, ka á re giɛ̃ a nɛ.

³² Sɛnɛ, ma bɛ́ landa boon laanka sii yɔrɔ bɔ ǹ boon mɛnɛn pii ka-n pelo, ka n yiri koa li, ka ǹ tamaa.