Timəə dí-pɛn 10 - LAWA A BOO SONBORE

Lawa a min a sii baraa toa

¹ Bɛa waáraa lɛ nɛ, Dɛnaa Lawa pɛ ma nɛ: «Kɔlɔ màn paa sɛlɛ ka bibinaan wɔn kɛn lɛn bɛ́ lɔn, n goo dɔ zɛnaa ka gɔn nɛ, n dii n da ma li kele lɛ la.

² N kɔlɔ-sɛlɛɛn mɛnɛn yɔyɔrɛ bibinaa nɛ, boon mɛnɛn nə goã kiɛ̃-n bɛn la, ma á re bɛa boon lɛn kiɛ̃ kɔlɔ-sɛlɛɛ diin lɛn ganaa, n tɔn nə ǹ kaa goo lɛ nɛ.»

³ Má goo lɛ zɛnaa ka da kaka gɔn nɛ, má kɔlɔ màn paa lɛ sɛlɛ, ka bibinaan wɔn lɛn bɛ́ lɔn, má dii ǹ ni ma gɔn, kele lɛ la.

⁴ Ka bɛ́ soen kɔn kele gòã kɛ la ǹ mɛn pinaa, Dɛnaa Lawa goã á n toa tɛ bii kele lɛ la á boo fù mɛn da kaa wɔ lɛa, á bɛn kiɛ̃ kɔlɔ diin lɛn ganaa, ka bibinaan wɔn lɛn kiɛ̃ ǹ gɔn bɛ́ lɔn. Á bɛa kɔlɔn lɛn kɔ ma la.

⁵ Bɛ kio, má wusoo má gisĩ, má n bɔ kele lɛ la. Ma goo mɛn lɛ zɛnaa, má woo ǹ kaa bɛ nɛ. Ǹ nə́ goã walan, ka Dɛnaa Lawa bɛ́ á pɛ á laa ma ganaa lɔn.

⁶ Izirayeli minin lɛn nə́ kiɛ̃, ǹ nə́ n bɔ Yaakan tɔrɔn tùn kɛn lɛ-a, ǹ nə́ woo Moseraa kiwi. Aarɔn na á gã walan, ǹ ná a gere bĩ. A nɛgiĩ Eleyazaara giã a bǎã nɛ, wúlu-bɔle lɛa.

⁷ Izirayeli minin lɛn nə́ n toa Moseraa, ǹ nə́ woo Gudugoodaa, ǹ nə́ n toa Gudugoodaa, ǹ nə́ woo Yobataa. Yobataa lɛ n mu bǎã lɛa.

⁸ A saa bɛa waáraa lɛ ganaa a da kaa pelo lɛ, Dɛnaa Lawa na á *Levii tɔrɔn kɛn bɔ á ǹ koa ǹ gɔrɔn, mà ǹ na asɛ a *lɛ kɔ kɔn la ǹ goo kɛ gũ, bɛ̀ ǹ golee asɛ yɔrɔ-a, ǹ na asɛ a dí nya, bɛ̀ ǹ barka da minin ganaa ka asɛ tɔ nɛ.

⁹ Bɛ lɛ na á toa, Levii tɔrɔn lɛn nə bǎã yɛ ǹ wɔ lɛa ǹ dɔɔ̃nɔn bii wa. Ǹ wɔ gii na á goã ka Dɛnaa Lawa a dí kɛ nɛ, ka kaa Lawa, Dɛnaa Lawa din bɛ́ á pɛ ǹ nɛ lɔn.

¹⁰ Man má goã má golee kele lɛ la ka lɛlɛ wɔ lɛ bɛ́ lɔn, lɛawaa pusi ka tèlò pusi. Dɛnaa Lawa nə́ n too kɔ ma lon ka bɛ dɔ nɛ, á ka toa walan, a ka dɛ wa.

¹¹ A na á pɛ ma-n kɛnɛn: «Yoo, mɛ zaman lɛ nyɛɛnɛ. Masɛ nə n liɛ ǹ digolon ne ka gána mɛn a sii ni, má maa á re koe ǹ la, ǹ wo kaa bɛa gána lɛ nɛ, ǹ si ǹ baa ǹ wɔ lɛa.»

Lawa narɛɛ laanka Lawa bɔlɔ sii

¹² Sisia kəni Izirayeli minin lɛn, kaa Lawa, Dɛnaa Lawa n giɛ li, mà ka wàa zɛnaa? Bɛ̀ á n bɔ ka nyɛ́ɛ baa nɛ, ka kɔ a foo sii tumaa lɛ, ka narɛ, ka dí nya nɛ ka ka foo tumaa nɛ, ka ka gɔ́ɔ̃ tumaa nɛ.

¹³ Ka Dɛnaa Lawa a gɔn waa ǹ boon laanka a landa boon kɛn tamaa, ma bɛ́ ǹ mɛnɛn lɛn koe ka la pelo, ka dinin bǐɛ̃ a lɛa.

¹⁴ Ka ga le, lon laanka a golebaa tumaa nɛ, tán laanka a gɔ́ɔ̃gɔ́ɔ̃ ǹ mànan tumaa nɛ, kaa Lawa, Dɛnaa Lawa lɛ wɔn manɛ.

¹⁵ Sɛnɛ, a laan bɛ yii ni, Dɛnaa Lawa na á goã kun ka ka digolon lɛn nɛ, á ǹ narɛ. Ǹ tɔrɔn mɛnɛn bɛ́ ǹ kio, bɛ giala, ka dinin lɛn, a na á ka yii gɔgɔɔ̃, á ka bɔ tɔrɔ kɔsɔn bii, ka a bɛ́ ke lɔn pelo.

¹⁶ A bɛ́ miɛ̃ kəni, ka n dinin kɔ lenlen, ka nyan toa ka n too laa wa.

¹⁷ Taãn nɛ, kaa Lawa, Dɛnaa Lawa lɛ n lawan Lawa lɛa, dɛnaan Dɛnaa lɛa, Lawa gole ne, pàã ná a lon, a sii n nyɛ́ɛ diɛ. A bɔn bii-a we wa, a lɛ pii ǹ màn sii min la wa.

¹⁸ A din nə boe nɛ-toenən laanka lɔ giɔɔrɔn lɛ-a, a n gùlin narɛ, a màn-bii laanka wɔ ǹ mɔnaa kɔ ǹ la.

¹⁹ Ka gùlin narɛ, a giala, ka dɔn man ká goã gùlin lɛa Ezipti gána nɛ.

²⁰ Ka nyɛ́ɛ baa kaa Lawa, Dɛnaa Lawa yii ni, ka dí nya nɛ, ka n naa a din lɛ ganaa, ka n liɛ ka a din lɛ tɔ nɛ.

²¹ Ka a din lɛ tɔ saa lon, a dinsɔɔ̃ lɛ n kaa Lawa lɛa. A din na á nyɛ́ɛ da ǹ sii dadaran kɛn zɛnaa kaa lɛa, ka yii nə ǹ mɛnɛn lɛn yɛ.

²² Ka digolon bɛ́ woe Ezipti, bɛ̀ man min pɔsɔbaa dinsɔɔ̃. Sɛnɛ, sisia, kaa Lawa, Dɛnaa Lawa á ke á ka mɔnaa, ka lon a leeren bɛ́ lɔn.