Tesaloniki1 4 - LAWA A BOO SONBORE

Tɔ wɔ ǹ gɔn mɛn bɛ́ kɔɔ̃n Lawa ganaa

¹ Bɛ tumaa woo a n tiləə, dɔɔ̃nɔn lɛn, ka doamaa bɛ́-n ka tɔ wɔ lɔn, ka sii tɔn kɔɔ̃n kɔ Lawa ganaa, wɔ́ ka daraa bɛ ganaa. Sonbore, ka n tɔ we miɛ̃; sɛnɛ sisia, wɔ ǹ ka nyankoe parsiini ka wɔa Dɛnaa Yezu tɔ nɛ, wáa ka n doa ka wusoo ka màn da li.

² Wɔ doroon mɛnɛn kɔ ka la, á bɔ wɔa Dɛnaa Yezu li, ka á bɛn doɛ̃.

³ Lawa bɛ́ giɛ màn mɛn li bɛ ǹ ka kɛ nɛ, ka kɔrɔbaa lɛ da, ka goã *yoreen ne.

⁴ Didie na a din a lɔ yɛ yɔrɔ sonbore la, koa-kun mɛn bɛ́ yoreen ne Lawa laanka mìnbuiinin yɔrɔ-a, a bɛ wɔ kun ni.

⁵ A nyan toa a n saa taasiɛ naarɛ li, ka tɔrɔ kɔsɔ Lawa doɛ̃baã wolen bɛ́ zɛnɛɛ lɔn wa.

⁶ Min kɔ́n baran wɔ ǹ miã lon bɛa sii lɛ gɔ́ɔ̃ nɛ, a pɛ mà a n woe ǹ miã wɔ wɔlɔ li wa. Wɔ́ pɛ ka-n lɛlɛ, wɔ́ n gɔn waa ka-n taãn-taãnɛ, wáa min mɛnɛn bɛ́ bɛa siin lɛn zɛnɛɛ, Dɛnaa á re dɔlɔ boe ǹ ganaa.

⁷ Lawa bie á wɔ bíi gɔgɔrɛbaa taman yii wa, a na á wɔ bíi yoreenbaa taman yii.

⁸ Bɛ lɛ nɛ, bɛ̀ min mɛn nə́ n piã bɛa doroo lɛ nɛ, ǹ dɛnaa bie á n piã ka minbuiin nɛ-n wa, a na á n piã ka Lawa nɛ, asɛ mɛn bɛ́ a Yiri Fu koe ka la.

⁹ Ka laadoo ba a ganaa doo min sɛ́wɔ dia ka la, a dɔɔ̃nɔn kɔn-narɛɛ boo da ka-n wa. A giala, ka dininmaan nə́ n daraa kɔn-narɛɛ ganaa Lawa li.

¹⁰ Bɛ lɛ n ke ka á zɛnɛɛ dinin, dɔɔ̃nɔn tumaa wɔ a paǹ li, Masedoanɛ gána din tumaa nɛ. Sɛnɛ, wɔ n ka nyankoe doo dɔɔ̃nɔn lɛn, wáa ka n doa ka wusoo ka màn da li.

¹¹ Ka n doa ka giã kiĩni, didie na a din a sii yɔrɔ bɔ, a dí nya ka a din gɔn nɛ, ka wɔ bɛ́ wɔ́ pɛ wɔ́ laa ka ganaa lɔn.

¹² Ka zɛnaa miɛ̃ màn mɛn bɛ́ toɛ, min mɛnɛn bɛ́ ǹ ba Lawa-nyankoe wa, kaa tɔ wɔ ǹ gɔn kɔɔ̃n kɔ bɛn ganaa, ka baran goã guĩ lɛa min kɔ́n dɔ mìi-n wa.

Dɛnaa a wusoo a daa boo

¹³ Dɔɔ̃nɔn lɛn, min mɛnɛn bɛ́ ǹ nə́ gã, wɔ ba li wɔ ka yii toa tì bɛn sii gɔ́ɔ̃-n wa. A giala, wɔ ba li ka goã yɔrɔ-kɔsiɛ gɔ́ɔ̃ nɛ, ka min gialakunun mɛnɛn bɛ́, foo-doa ǹ bǎã ná a ba ǹ lon wa.

¹⁴ Bɛ̀ wɔ́ waa la sɛn wáa Yezu gã a yii wusoo á kaa, wɔ waa la dɔn wáa min mɛnɛn nə golee Yezu li yǎa á woo kaa ǹ gɛ̀ lɛ, Lawa á die bɛn dɔn yii kiɛ a ǹ kaa kun ka Yezu ni.

¹⁵ Wɔsɛn mɛnɛn yii bɛ́ re goɛ̃ koo yǎa Dɛnaa a daa pinaa, wɔ a die n gòã boe geren kɛn nyɛɛn wa. Ma á boe la ma pɛ ka nɛ, a kɔnpɛ ka Dɛnaa a boo ne:

¹⁶ Bɛ̀ Lawa din zii kɔ ǹ mɛn pinaa, lon a dia dí-a wolen goledɛnaa lɛn tá re boe, Lawa a bɛn wuu á re boe, Dɛnaa dinmaa á re boe lon a daa. Min mɛnɛn nə gã bɛ̀ ǹ nə́ golee-n *Krita li, bɛn yii á re kiɛ bibinaanɛ.

¹⁷ Bɛ kio, wɔsɛn mɛnɛn bɛ́ re goɛ̃ wɔ yii n koo, wɔ dɔn tá re yui labaran la kunun ǹ ni, wɔ wo n da Dɛnaa lɛ lon. Bɛa yɔrɔ lɛ la, wɔ ǹ die goɛ̃ kun ka Dɛnaa din ni yǎa duduu.

¹⁸ Ka kɔn foo wɔraa ka bɛa boon lɛn nɛ.