Suusun 9 - LAWA A BOO SONBORE

Sii-doɛ̃ a lɛ dia

¹ Sii-doɛ̃ bìbì sɔbaa dɔ, a ná a kion dɔ.

² Á tɔɔn dɛ, á duvɛ̃ zɛnaa, á màn-bii yɔrɔ bɔ.

³ A ná a lɔ dí-nyalin dia woe lɛ diɛ kiwi lɛ a bǎã dadaran nɛ. Maǹ parɛɛ ǹ nə́ pii:

⁴ «Baãnaan lɛn, ka da kànaa!» Min mɛnɛn sii-doɛ̃ lɛ bɛ́ a pã wa, maǹ pii bɛn manɛ:

⁵ «Ka da màn bii, ka duvɛ̃ mi.

⁶ Ka baãnaabaa toa walan, ka á re yiikoonaabaa yii. Ka yiridɛnaabaa ǹ zii saa.»

Yiridɛnaa laanka din koa wole

⁷ Bɛ̀ ń nə n gɔn waa din koa wole ne, n wɔ n ka puusə kɔ nɛ. Bɛ̀ ń doroo kɔ min baraa la, a n sɔ koe n ganaa.

⁸ N nyan doroo kɔ yaa wɔ minin ganaa wole la wa. Bɛ bie wa, a nə n biɛ zɔ́ɔ. Sɛnɛ, bɛ̀ n doroo kɔ sii-dɔ̃li la, ma n kɔɔ̃n koe a ganaa.

⁹ Bɛ̀ n yiri kɔ sii-dɔ̃li la, n nə́ n màn da a yiri li. Ń bɛ́ boo mɛn diɛ min pepere ne, a n màn diɛ a doɛ̃ li.

¹⁰ Nyɛ́ɛbaa Dɛnaa Lawa yii ni n sii doɛ̃ a giala kɔ lɛa. Lawa sonbore kɛ doɛ̃-n yiridɛnaabaa lɛa.

¹¹ Sii-doɛ̃ n màn diɛ yiikoonaabaa lɛawaan li, a n lɛ̀ lɛ mɔnɛɛ.

¹² Bɛ̀ ń yiridɛnaa baa, a là n die yii n din-a. Bɛ̀ ń din koa wole baa, a siin man die kuĩ n din mìi ni.

Baãnaa a lɛ dia

¹³ Baãnaabaa n ka lɔ boo-woɛ̃li bɛ́ lɔn, a ná a sii kɔn giala miɛ wa.

¹⁴ A n giɛ̃ tán a kion kiɛnlɛ-a, kiwi lɛ a bǎã dadaran nɛ.

¹⁵ A nə n toɛ walan, kiɛ̃ wolen kɛn bíi we nyɛɛnɛ sɔnsɔn a n pii:

¹⁶ «Baãnaan lɛn ka da kànaa.» A n pii yiriwɛɛnaan manɛ:

¹⁷ «Ń bɛ́ mi ǹ màn mɛn koɛ̃, bɛ mii á kɔɔ̃ dɛ! Màn-bii bii ka durii ni dɔ á kɔɔ̃n dɛ!»

¹⁸ A da yaa, bɛa minin kɛn lɛn ba doɛ̃ mà ǹsɛn man kunu gɛ̀ li wa, mà bɛa lɔ lɛ a lɛ dia n woe min ni geren piɛ wa.